RINAP 3/1 Sennacherib 023, ex. 001 (P430082)

object prism
surface a
column 1
1. {disz}{d}en-zu-szesz-mesz-eri-ba _lugal gal lugal#_ [dan-nu]
2. _lugal_ kisz-sza2-ti _lugal kur#_ asz-szur{ki} _lugal_ kib-rat _limmu2_-[tim]
3. _re-e2-um_ it-pe-szu2 mi-gir _dingir-mesz gal-[mesz_]
4. na#-[s,ir kit-ti] ra#-'i#-[im] mi#-sza2#-[ri]
5. [e-pisz u2-sa]-a-ti a-lik tap-pu-ut a-[ki-i]
6. sa#-[hi-ru] dam-qa-a-ti et,-lum git2-ma-lum#
7. zi-ka-ru qar-du a-sza2-red kal ma-al-ki
8. rap-pu la-'i-it, la ma-gi-ri
9. mu-szab-ri-qu za-ma-a-ni {d}asz-szur _kur_-u2 _gal_-u2
10. _lugal_-ut la sza2-na-an u2-szat-li-ma-an-ni-ma
11. _ugu_ gi-mir a-szib pa-rak-ki u2-szar-ba-a _{gesz}tukul-mesz_-ia
12. ul-tu _a-ab-ba_ e-le-ni-ti sza sza2-lam {d}utu-szi
13. a-di tam-tim szap-li-ti sza s,i-it {d}utu-szi
14. gim-ri s,al-mat _sag-du_ u2-szak-nisz sze-pu-u2-a
15. u3 ma-al-ki szep-s,u-ti e-du-ru ta-ha-zi
16. da-ad2-me-szu2-un iz-zi-bu-ma ki-ma su-tin-ni{muszen}
17. ni-gi-is,-s,i e-disz ip-par-szu2 a-szar la 'a-a-ri
  single ruling
18. i-na mah-re-e ger-ri-ia sza {disz}{d}marduk-ibila#-szum2#-na
19. _lugal_ {kur}kar2-{d}dun-ia2-asz3 a-di _erin2 hi-a_ elam-ma{ki} [re]-s,i-szu2
20. i-na ta-mir-ti kisz{ki} asz2-ta-kan _bad5#-bad5_-szu2
21. i-[na] _muru2#_ tam#-ha#-[ri] szu-a-tu e-zib
22. _karasz#_-su e-disz# [ip]-par#-szid#-ma na#-pisz-tusz e-t,i2-ir _{gesz}[gigir-mesz] ansze-kur-ra-mesz_
23. {gesz}s,u-um-bi _{ansze}kunga-mesz_ sza i-na qit-ru-ub
24. ta-ha-zi u2-masz-szi-ru ik-szu-da _szu-min_-a-a
25. a-na _e2-gal_-szu2 sza qe2-reb babila2{ki} ha-disz e-ru-um-ma
26. ap-te-ma _e2_ ni-s,ir-ti-szu2 _ku3-sig17 ku3-babbar_ u2-nu#-ut# _ku3#-sig17 ku3-babbar_
27. _na4_ a-qar-tu mim-ma szum-szu2 _nig2-szu nig2-gur11_ [la] ni-bi
28. ka-bit-tu _gun munus-sza3-e2-gal-mesz_-szu2 _{lu2}tirum-mesz_
29. {lu2}man-za-az pa-ni _{lu2}nar-mesz_ {munus}_nar-mesz_ [si-hir]-ti
30. um-ma-a-ni ma-la ba-szu-u2 mut-tab-bi-lu-[tu2] _e2-gal_-usz
31. u2-sze-s,a-am-ma szal-la-tisz am-nu i-na e-muq {d}asz-[szur] _en_-ia
32. 1(gesz2) 1(u) 5(disz) _iri-mesz_-szu2 dan-nu-ti _e2 bad3-mesz_-ni sza [{kur}]kal-di
33. u3 4(disz) _me_ 2(u) _iri-mesz_-ni _tur-mesz_ sza li-me-ti-szu2-nu
34. al-me ak-szud{ud} asz2-lu-la szal-la-su-un
35. {lu2}ur2-bi {lu2}a-ra-mu {lu2}kal-du sza qe2-reb [unu]{ki}
36. nibru{ki} kisz{ki} {iri}hur-sag-kalam-ma gu2-du8-a{ki} zimbir#{ki}
37. a-di _dumu-mesz iri en_ hi-it,-t,i u2-sze-s,a-am-ma szal-la-[tisz am]-nu
38. i-na ta-a-a-ar-ti-ia {lu2}tu-'u-mu-na {lu2}[ri-hi]-hu
39. {lu2}ia-daq-qu {lu2}u2-bu-du {lu2}gib-[re-e]
40. {lu2}ma-la-hu {lu2}gu-ru-mu {lu2}[u2-bu-lum]
41. {lu2}da-mu-nu {lu2}gam-bu-lum [{lu2}hi]-in-[da-ru]
42. {lu2}ru-'u-u2-a {lu2}pu-qu-du {lu2}ha-am-ra-nu
43. {lu2}ha-ga-ra-nu {lu2}na-ba-tu {lu2}li-i'-ta-u2
44. {lu2}a-ra-mu la kan-szu-ti [mit-ha]-risz ak-szud{ud}
45. 2(disz) _me_ 8(disz) _lim un-mesz tur gal [nita_] u3 _munus ansze-kur-ra-mesz_
46. _{ansze}kunga-mesz ansze-mesz {ansze}gam-mal-mesz gu4-mesz_ u3 s,e-e-ni
47. sza la ni-bi szal-la-tu# ka#-bit-tu2 asz2-lu-la a-na qe2-reb _kur_ asz-szur{ki}
48. i-na me-ti-iq ger-ri-ia sza {disz}{d}muati-en-mu-mesz
49. {lu2}qi2-[pi {iri}]ha-ra-ra-ti _ku3-sig17 ku3-babbar_
50. {gesz}mu-[suk-kan-ni] _gal-mesz ansze-mesz {ansze}gam-mal-mesz gu4-mesz_
51. u3 s,e-e-ni ta-mar-ta-szu2 ka-bit-tu am-hur
52. [ba-hu]-la#-ti {iri}hi-rim-me _{lu2}kur2_ ak-s,i
53. [i-na _{gesz}tukul]-mesz_ u2-szam-[qit-ma] e-du ul e-zib
54. [pag]-ri#-szu-un i-na ga-szi-szi a-lul-ma
55. [si]-hir-ti _iri_ u2-szal-me na-gu-u2 szu-a-tu
56. a-na esz-szu-ti as,-bat [1(disz)]-en _gu4_ 1(u) _udu-nita2-mesz_
57. 1(u) _ansze {gesz}gesztin_ 2(u) _ansze [zu2-lum]-ma_ re-sze-te-szu2#
58. a-na _dingir-mesz_-ni _kur_ asz-szur{ki} _en-mesz_-ia u2-kin da3-ri-szam
  single ruling
59. i-na 2(disz)-e ger-ri-ia {d}asz-[szur be]-li2 u2-tak-kil-an-ni-ma
60. a-na _kur_ {lu2}kasz-szi-i u3 _kur_ {lu2}ia-su-bi-gal-la-a-a
61. sza ul-tu ul-la a-na [_lugal]-mesz_-ni _ad-mesz_-ia
62. la kit-nu-szu2 lu al-lik qe2-[reb hur-sza2-a]-ni zaq-ru-ti
63. _a-sza3_ nam-ra-s,i i-na [_ansze-kur-ra_] ar-kab-ma
64. _{gesz}gigir giri3-min_-ia i-na ti-ik-ka-a#-ti# u2-sza2-asz2-szi
65. asz2-ru szup-szu-qu i-na _giri3-min_-ia ri-ma-nisz at-tag-gisz
66. {iri}e2-{disz}ki-lam-za-ah {iri}ha-ar-[disz]-pi {iri}e2-{disz}ku-bat-ti
67. [_iri]-mesz_-ni-szu2-nu _e2 bad3-mesz_ dan-nu-ti al-me _kur_-ud
68. _ug3-mesz ansze-kur-ra-mesz {ansze}kunga-[mesz] ansze-mesz gu4-mesz_
69. [u3] s,e-e-ni ul-tu qer-bi-[szu2]-un u2-sze-s,a-am-ma
70. [szal]-la#-tisz am-nu u3 _iri-mesz_-ni-[szu2-nu] _tur#-mesz_ sza ni-ba
71. [la] i-szu-u2 ap-pu-ul aq-[qur u2]-sze-me kar-mesz
72. _e2 edin_ kul-ta-ri mu-[sza2-bi]-szu2-nu
73. i-na {d}gesz-bar aq-mu-ma di-[tal-lisz] u2-sze-me
74. u2-ter-ma {iri}e2-{disz}ki-lam-za-[ah] szu-a-tu
75. a-na {iri}bir-tu-ti as,-bat _ugu_ [sza u4]-um pa-ni
76. [_bad3]-mesz_-szu2 u2-dan-nin-ma _ug3-mesz kur-[kur_] ki-szit-ti _szu-min_-ia
77. i-na lib3-bi u2-sze-szib _ug3-mesz kur_ {lu2}kasz-szi-i
column 2
1. u3 _kur_ {lu2}ia-su-bi-gal-la-[a-a]
2. sza la-pa-an _{gesz}tukul-mesz_-ia ip-par-[szid-du]
3. ul-tu qe2-reb _kur_-i u2-sze-ri-[dam-ma]
4. [i-na] {iri#}har-disz-pi {iri}e2-{disz}ku-bat-ti u2-szar-me
5. [i]-na _szu-min_ {lu2}szu-ut _sag_-ia _{lu2}en-nam_ {iri}ar-rap-ha
6. am-nu-szu-nu-u2-ti _{na4}na-ru2-a_ u2-sze-pisz-ma
7. li-i-tum ki-szit-ti _szu-min_ sza _ugu_-szu2-un asz2-tak-ka-nu
8. s,e-ru-usz-szu2 u2-sza2-asz2-t,ir-ma i-na qer-bi _iri_ ul-ziz
9. pa-an ni-ri-ia u2-ter-ma a-na {kur}el-li-pi
10. as,-s,a-bat har-ra-nu el-la-mu-u2-a {disz}is-pa-ba-a-ra
11. [_lugal_]-szu2-un _iri-mesz_-szu2 dan-nu-ti _e2_ ni-s,ir-ti-szu2
12. [u2]-masz-szir-ma a-na ru-qe2-e-ti in-na-bit
13. gim#-ri# _kur_-szu2 _dagal_-tim _gin7 muru9_ as-hu-up
14. {iri}[mar]-u2-bisz-ti {iri}ak-ku-ud-du _iri-mesz_-ni
15. _e2 lugal#_-ti#-szu2 a-di 3(u) 4(disz) _iri-mesz_-ni _tur-mesz_
16. sza li-[me]-ti-szu2-nu al-me _kur_-ud ap-pul aq-qur
17. i-na {d}gesz-[bar] aq-mu _ug3-mesz tur gal nita_ u3 _munus_
18. _ansze-kur-ra-mesz {ansze}kunga-mesz ansze-mesz {ansze}gam-mal-mesz_
19. _gu4-mesz_ u3 [s,e]-e-ni a-na la mi-nam asz2-lu-lam#-ma#
20. a-di la ba-szi-i u2-sza2-lik-szu-ma u2-s,a-ah-hir _kur#_-su
21. {iri}s,i-s,i-ir-tu# {iri#}[ku-um-ma]-ah#-[lum] _iri-mesz_ dan-nu-ti
22. a-di _iri-mesz_-ni _tur#-[mesz_] sza# li-me-ti-szu2-nu
23. {kur}e2-{disz}ba-ar-ru-[u2 na-gu]-u2 a-na [gi-mir]-ti-szu2
24. ul-tu qe2-reb _kur_-szu2 ab-tuq#-ma# _ugu#_ mi#-[s,ir _kur_ asz]-szur#{ki}
25. u2-rad-di {iri}el-en-za-asz2 a-na# _iri# [lugal_-u2]-ti#
26. u3 dan-na-at na-ge-e szu-a-tu [as,-bat-ma]
27. _mu_-szu2 mah-ra-a u2-na-kir-ma {iri}kar-{disz}{d}en-zu-szesz#-mesz#-su
28. at-ta-bi ni-bit-su _ug3-mesz kur-kur_ ki-szit-ti _szu-min_-[ia]
29. i-na lib3-bi u2-sze-szib i-na _szu-min_ {lu2}szu-ut _sag_-ia
30. _{lu2}en-nam_ {iri}har-har [am]-nu-ma u2-rap-pisz ma-a-ti
31. i-na ta-a-a-ar-ti-ia [sza] {kur}ma-da-a-a ru-qu-ti
32. sza i-na _lugal-mesz_-ni _ad-mesz#_-ia# ma-am-man la isz-mu-u2
33. zi-kir _kur_-szu2-un man-da-ta-szu2-nu ka-bit-tu am-hur
34. a-na ni-ri be-lu-ti-ia u2-szak-ni-su-nu-ti
  single ruling
35. i-na [szal-szi] ger#-ri-ia [a]-na# {kur}ha-at-ti lu al-lik
36. {disz}lu-li-i _lugal_ {iri}s,i-[du]-un-ni pul-hi me-lam-me
37. be-lu-ti-ia is-hu-pu-szu2-[ma] a-na# ru#-uq#-qi2# _muru2_ tam-tim#
38. in-na-bit-ma _kur_-szu2 e-mid {iri}s,i-du-un#-[nu _gal_-u2]
39. {iri}s,i-du-un-nu s,e-eh-ru {iri}e2-[zi]-it#-ti
40. {iri}s,a-ri-ip-tu {iri}ma-hal-li-ba {iri}u2-szu-u2
41. {iri}ak-zi-bi {iri}ak-ku-u2 _iri-mesz_-szu2 dan-nu-ti
42. [_e2] bad3#-mesz_ a-szar ri-i-ti u3 [masz-qi2]-ti# _e2_ tuk-la-ti-szu2
43. ra-szub#-bat# _{gesz}tukul_ {d}asz-szur _en_-ia# [is-hu-pu]-szu2#-nu#-ti#-ma
44. ik-nu-szu2# sze#-pu-u2-a {disz}tu-ba#-[a'-lum i-na _{gesz}gu-za lugal_-u2-ti]
45. _ugu_-szu2-[un] u2-sze-szib-ma _gun#_ [man-da-tu be-lu-ti-ia]
46. szat-ti-[szam la] ba-at,-lu u2-[kin s,e-ru-usz-szu2]
47. sza {disz}[mi]-in#-hi#-[im]-mu {iri}sam-si#-[mu-ru-na-a-a]
48. {disz}tu-ba-a'-lu {iri}s,i-du-un#-na#-[a-a]
49. {disz}ab-di#-li-i'-[ti] {iri}a-ru-da-[a-a]
50. {disz}[u2-ru]-mil-[ki] {iri}gu-ub-la-a-a
51. {disz}[mi]-ti#-in-ti {iri}as-du-da-a-a
52. {disz}bu-du-dingir {kur}e2-{disz}am-ma-na-a-a
53. {disz}kam-mu-su-na-[ad]-bi {kur}ma-'a-ba-a-a
54. {disz}{d}a-a-ram-mu [{kur}]u2-du-um-ma-a-a
55. _lugal#-mesz_-ni _kur_ mar-tu{ki} ka-li#-[szu2-un] _igi#-sa2_-e szad-lu-ti
56. [ta-mar]-ta-szu2-nu ka-bit-tu a-di 4(disz)-[szu2 a-na] mah#-ri-ia
57. [isz]-szu-nim-ma isz-szi-qu _giri3-min_-ia [u3 {disz}s,i]-id#-qa-a
58. _lugal_ {iri}is-qa-al-lu-na sza la ik-nu-szu2# [a-na ni-ri-ia]
59. _dingir-mesz e2 ad_-szu2 sza2-a-szu2 _dam_-su _dumu-mesz_-szu2# [_dumu-munus-mesz_-szu2]
60. _szesz-mesz_-szu2 _numun e2 ad_-szu2 as-su-ha-am-ma a-na _kur_ asz-[szur{ki}]
61. u2-ra-asz2-szu2 {disz}lugal-lu-da3-ri _dumu_ {disz}ru-kib-ti
62. _lugal_-szu2-nu mah-ru-u2 _ugu un-mesz_ {iri}is-qa-al-lu-na
63. asz2-kun-ma na-dan _gun_ kad3-re-e be-lu-ti-ia
64. e-mid-su-u2-ma i-sza2-a-at, ab-sza2-a-ni
65. i-na me-ti-iq ger-ri-ia {iri}e2-da-gan-na
66. {iri}ia-ap-pu-u2 {iri}ba-na-a-a-bar-qa {iri}a-zu-ru
67. _iri-mesz_-ni sza {disz}s,i-id-qa-a sza a-na _giri3-min_-ia ar2-hisz
68. la ik-nu-szu2 al-me _kur_-ud asz2-lu-la szal-la-su-un
69. _{lu2}szagina-mesz {lu2}nun-mesz_ u3 _ug3-mesz_ {iri}am-qar-ru-na
70. sza {disz}pa-di-i _lugal_-szu2-nu _en_ a-de-e u3 ma-mit sza _kur_ asz-szur{ki}
71. bi-re-tu _an-bar_ id-du-ma a-na {disz}ha-za-qi-a-u2
72. {kur}ia-u2-da-a-a id-di-nu-szu2 nak-[risz]
73. a-na an-zil-li i-pu-szu2 ip-lah3 lib-ba-szu2#-[un]
74. _lugal-mesz_ {kur}mu-s,u-ri _{lu2}erin2-mesz {gesz}pan {gesz}[gigir-mesz_]
75. _ansze-kur-ra-mesz_ sza _lugal_ {kur}me-luh-ha e-mu-qi2 [la ni-bi]
76. ik-te-ru-nim-ma il-li-ku re-s,u#-su-un
77. i-na ta-mir-ti {iri}al-ta-qu-u2 [el-la]-mu-u2-a
78. si-id-ru szit-ku-nu u2-sza2-'a-[lu _{gesz}]tukul#-mesz_-szu2-un
column 3
1. [i]-na# tukul-ti {d}asz-szur _en#_-[ia it-ti-szu2-un]
2. [am]-da-hi-is,-ma asz2-ta#-[kan _bad5-bad5_-szu2-un]
3. [{lu2}_]en# {gesz}gigir-mesz#_ u3 _dumu-mesz [lugal_ {kur}mu-s,u-ra-a-a]
4. [a]-di {lu2#}[_en {gesz}gigir-mesz_] sza# _lugal_ [{kur}me-luh-hi] bal#-t,u-su-un
5. i-na _muru2_ tam-ha#-ri# ik-szu-da _szu-min_-a-a {iri}al-ta-qu-u2
6. {iri}ta-am-na-a al-me _kur_-ud asz2-lu-la szal-la-su-un
7. a-na {iri}am-qar-ru-na aq-rib-ma _{lu2}szagina-mesz {lu2}nun-mesz_
8. sza hi-it,-t,u u2-szab-szu-u2 a-duk-ma i-na di-ma-a-ti
9. si-hir-ti _iri_ a-lul pag-ri-szu2-un _dumu-mesz iri_ e-pisz an-ni
10. u3 gil2-la-ti a-na szal-la-ti am-nu si-it-tu-te-[szu2-nu]
11. la ba-bil hi-t,i-ti u3 gul-lul-ti sza a-ra-an#-[szu2]-nu#
12. la ib-szu-u2 usz-szur-szu2-un aq-[bi] {disz}pa-di-i _lugal_-[szu2-nu]
13. ul-tu qe2-reb {iri}ur-sa-li-im-mu u2-sze-s,a-[am-ma]
14. i-na _{gesz}gu-za_ be-lu-ti _ugu_-szu2-un u2-sze-[szib-ma]
15. man-da-at-tu be-lu-ti-ia u2-kin s,e-ru#-[usz]-szu2
16. u3 {disz}ha-za-qi-a-u2 {kur}ia-u2-da-a-a sza la# [ik]-nu-szu2
17. a-na ni-ri-ia 4(u) 6(disz) _iri-mesz_-szu2 dan-nu-ti _e2 bad3-mesz_-ni
18. u3 _iri-mesz tur-mesz_ sza li-me-ti-szu2-nu sza ni-[ba] la# i-szu-u2
19. i-na szuk-bu-us a-ram-me u3 qit-ru-[ub] szu-pi-i
20. mit-hu-us, zu-uk _giri3-min_ pil-szi nik-si [u3 kal]-ban#-na-ti
21. al-me _kur_-ud 2(disz) _me lim_ 1(disz) _me_ 5(u) _ug3-mesz tur gal# [nita_] u3 _munus_
22. _ansze-kur-ra-mesz {ansze}kunga-mesz ansze-mesz ansze#-[gam-mal]-mesz# gu4-mesz_
23. u3 s,e-e-ni sza la ni-bi ul-tu# [qer]-bi#-szu2-un
24. u2-sze-s,a-am-ma szal-la-tisz am-nu sza2-a-szu2 [_gim muszen_] qu#-up-pi
25. qe2-reb {iri}ur-sa-li-im-mu _iri lugal#_-ti#-szu2 e-sir2-szu2
26. {iri}hal-s,u-_mesz_ ugu_-szu2 u2-rak-kis-[ma] a-s,e-e _ka2-gal iri_-szu2
27. [u2]-ter#-ra ik-ki-bu-usz _iri-mesz_-szu2 sza asz2-lu-la
28. [ul-tu qe2-reb] _kur#_-szu2 ab-tuq-[ma] a-na {disz}mi-ti-in-ti
29. [_lugal_ {iri}as-du-di {disz}pa]-di#-i _lugal_ {iri}am-qar-ru-na
30. u3 {disz}gissu-[en _lugal_ {iri}ha]-zi#-ti ad-din-ma u2-s,a-ah-hir _kur_-su
31. e-li _gun_ mah#-[ri-ti na]-dan# szat-ti-szu2-un man-da-at-tu
32. kad3-re-e be-lu-[ti-ia u2]-rad-di-ma u2-kin s,e-ru-usz-szu2-un
33. szu-u2 {disz}ha-za-qi-[a-u2 pul]-hi# me-lam-me be-lu-ti-ia
34. is-hu-pu-szu2-ma {lu2#}[ur2-bi] u3 _{lu2}erin2-mesz_-szu2 _saga-mesz_
35. sza a-na dun-nu-[un {iri}ur]-sa-li-im-mu _iri lugal_-ti-szu2
36. u2-sze-ri-bu-ma ir-[szu-u2 til]-la-a-ti it-ti 3(u) _gun ku3-sig17_
37. 8(disz) _me gun ku3-babbar_ ni-[siq-ti gu]-uh#-li tak2-kas3-si _{na4}an-za-gul-me gal-mesz_
38. _{gesz}na2-mesz zu2 {gesz}gu#-[za-mesz_ ne2]-me#-di _zu2 kusz am-si zu2 am-si_
39. _{gesz}esi {gesz}tug2_ mim-ma szum-[szu2 ni]-s,ir#-tu ka-bit-tu2 u3 _dumu-munus-mesz_-szu2
40. {munus}_ug3-mesz e2-gal_-szu2 _{lu2}nar#-[mesz_] {munus}_nar-mesz_ a-na qe2-reb nina{ki}
41. _iri_ be-lu-ti-ia _egir#_-[ia u2-sze]-bi#-lam-ma a-na na-dan
42. man-da-at-ti u3 e-pesz# [_ARAD2_-u2]-ti isz-pu-ra rak-bu-szu2
  single ruling
43. i-na 4(disz)-e ger-ri-ia [{d}asz-szur] be-li2 u2-tak-kil-an-ni-ma
44. um-ma-na-te-ia gap-sza2-a-te# [ad]-ke#-ma a-na {kur}e2-{disz}ia-kin7
45. a-la-ku aq-bi i-na me-[ti-iq] ger-ri-ia sza {disz}szu-zu-bi
46. {lu2}kal-da3-a-a a-[szib qe2-reb {i7}a]-gam#-me i-na {iri}bi-it-tu-tu
47. asz2-ta-kan _bad5#-[bad5_-szu2 szu-u2 hur-ba]-szu2 ta-ha-zi-ia _ugu_-szu2
48. im-qut#-[ma it-ru-ku lib]-bu#-szu2 ki-ma
49. az-za-ri e-disz ip-[par-szid-ma ul] in#-na-mir a-szar-szu2
50. pa-an ni-ri-ia u2-[ter]-ma a-na {kur}e2-{disz}ia-kin7
51. as,-s,a-bat har-ra-nu szu-u2 {disz}{d}marduk-ibila-szum2-na
52. sza i-na a-lak ger-ri-ia mah-re-e _bad5-bad5_-szu2 asz2-ku-nu-ma
53. u2-par-ri-ru el-lat-[su] ri#-gim _{gesz}tukul-mesz_-ia dan-nu-ti
54. u3 ti-ib ta-ha-zi-ia# ez#-zi e-dur-ma _dingir-mesz_ ma-rak _kur_-szu2
55. i-na _ki-tusz#_-szu2-nu id#-[ke-ma qe2-reb] _{gesz}ma2-mesz_ u2-szar-kib-ma
56. [a-na {iri}na-gi-te-raq-qi2 sza qa-bal] tam#-tim is,-s,u-risz
57. [ip-pa-risz _szesz-mesz_-szu2 _numun e2 ad_-szu2 sza u2-masz-szi-ru a]-hi tam-tim
58. [a-di si-it-ti _ug3-mesz kur_-szu2 ul-tu {kur}e2-{disz}ia-kin7]
59. [qe2-reb] {i7}a-[gam-me u ap-pa-ra-a-te u2-sze]-s,a-am-ma
60. [szal]-la-tisz am-nu u2-[ter-ma _iri-mesz_-szu2] ap#-pul aq-qur
61. u2-sze-me kar-mesz _ugu en_ sa-li-me-szu2 _lugal_ {kur}elam-ma{ki}
62. na-mur-ra-tum at-[bu-uk i-na] ta#-a-a-ar-ti-ia
63. {disz}{d}asz-szur-na-din-mu _dumu_ [resz-tu-u2] tar-bit bir-ki-ia
64. i-na _{gesz}gu-za_ be-[lu-ti-szu2] u2-sze-szib-ma
65. _dagal_-tum _kur eme#-[gi7_ u uri]{ki} u2-szad-gil pa-nu-usz-szu2
  single ruling
66. i-na 5(disz) ger-ri-ia# ba#-hu-la-ti {iri}tu-mur-ri
67. {iri}sza2-ru-um {iri}[e-za]-ma {iri}kib-szu2 {iri}hal-bu-da {iri}qu-u2-a
68. {iri}qa-na sza _gim#_ [qin]-ni _ti8_{muszen} a-sza2-red _muszen hi-a_
69. [s,e-er] zuq-ti {kur}[ni]-pur _kur_-i mar-s,i szu-bat-su-un
70. [szit-ku]-na-[at-ma] la kit-nu-szu2 a-na ni-i-ri
71. [i-na _giri3-min_ {kur}ni-pur] ka#-ra-szi u2-sza2-asz2-kin-ma
72. [it-ti {lu2}qur]-bu#-ti _giri3-min_-ia na-as-qu-u2-ti
73. [u3 _{lu2}erin2-mesz_] ta-ha-zi-ia la ga-me-lu-ti
74. [a-na-ku _gin7 am_] ek-di pa-nu-usz-szu2-un as,-bat
75. hur-ri na#-[hal-li] na#-at-bak szad-di-i me-le-e
76. mar-s,u-ti i-na# _{gesz#}gu-za_ asz2-ta-am-di-ih
column 4
1. [a-szar a-na _{gesz}gu-za_ szup-szu-qu i-na _giri3-min_-ia asz2-tah-hi]-it,#
2. [_gim_ ar-me a-na zuq-ti sza2-qu-ti s,e-ru-usz-szu2]-un#
3. [e-li a-szar bir-ka-a-a ma-na-ah-tu i-sza2-a s,e-er _na4 kur_-i u2-szib]-ma#
4. _a-mesz_ {kusz}na-a-di [ka-s,u-te a-na s,u-um-me-ia lu asz2-ti]
5. i-na _szu-si-mesz_ hur-sza2-a-ni ar#-[de]-szu2#-nu-ti-ma asz2-ta#-[kan]
6. tah-ta-szu2#-un# _iri-mesz_-szu2-nu _kur_-[ud]-ma asz2-lu-la szal-la-sun2
7. ap-pul [aq-qur] i-na {d}gesz-bar aq-mu pa-an ni-ri-ia
8. u2-ter-[ma] s,e-er {disz}ma-ni-ia-e _lugal_ {iri}uk-ki
9. szad-da-a-a-e la kan-sze as,-s,a-bat har-ra-nu
10. ur-hi la pe-tu-ti t,u-u2-di pa-asz2-qu-u2-ti
11. sza la-pa-an _kur-mesz_ mar-s,u-ti ul-la-nu-u2-a
12. qe2-reb-szu2-[un] ma#-am-man la il-li-ku _lugal-mesz_ pa-ni mah-ru-ti
13. i-na _giri3-min_ {kur}a-na-ra u3 {kur}up-pa _kur-mesz_-e dan-nu-ti
14. _karasz_ u2-sza2-asz2-kin-ma a-na#-ku i-na _{gesz}gu-za_ ne2#-[me-di]
15. it-ti _{lu2#}erim#-mesz_ ta-ha-[zi]-ia# [git2]-ma#-lu-u2-ti
16. i-na ne-re-bi-szu2-un pi-qu#-ti# szu-nu-hi-isz e-ru-um-ma
17. mar-s,i-isz e-te-el-la-a [_szu]-si-mesz kur_-i pa-asz2-qa-a-ti
18. szu-u2 {disz}ma-[ni]-ia#-e tur-bu-[u'] _giri3-min erin2 hi-a_-ia e-mur-ma
19. {iri}uk-ku [_iri lugal_]-ti#-szu2 e-zib-ma a-na ru-qe2-ti in-na-bit
20. {iri}uk-ku [al-me _kur_]-ud# asz2-lu-la szal-la-su
21. mim-ma szum-szu [_nig2-szu nig2-gur11_ ni]-s,ir#-ti _e2-gal_-szu2
22. ul-tu qer#-[be2-e-szu u2-sze-s,a]-am#-ma szal-la-ti-isz am-nu
23. u3 3(u) 3(disz) _iri-[mesz_-ni sza pa-a]-t,i# na-gi-szu2 ak-szud{ud}-ma
24. _ug3-mesz ansze-mesz# [gu4-mesz_ u3] s,e-e-ni ul-tu qer-bi-szu2-un
25. asz2-lu-la ap-pu#-[ul] aq-qur i-na {d}gesz-bar aq-mu
  single ruling
26. i-na 6(disz) ger-ri#-[ia] si#-it-ti _ug3-mesz_ {kur}e2-{disz}ia-kin7
27. sza la-pa-an _{gesz}tukul#-[mesz_]-ia# dan-nu-ti _gin7_ ser2-re-me ig-ru-ru
28. _dingir-mesz_ ma-rak _kur_-szu2-un i-na szub-ti-szu2-nu id-ku-ma
29. tam-tim _gal_-tum [sza] s,i#-it {d}utu-szi e-bi-ru-ma
30. i-na {iri}na-gi-ti sza {kur}elam-ma{ki} id-du-u2 szu-bat-sun2
31. i-na _{gesz}ma2-mesz_ {kur}hat-[ti] tam-tim lu e-bir {iri}na-gi-tu
32. {iri}na-gi-tu-di-[i'-bi]-na a-di {kur}hi-il-mu {kur}pil-la-tu2
33. u3 {kur}hu-pa-pa-nu na#-ge#-e sza {kur}_elam-ma{ki} kur_-ud
34. _ug3-mesz_ {kur}e2-{disz}ia-kin7 [a-di] _dingir-mesz_-szu2-nu u3 _ug3-mesz_
35. sza _lugal_ {kur}elam-ma{ki} asz2-[lu]-lam#-ma la e-zi-ba mul-tah-t,u
36. qe2-reb _{gesz}ma2-mesz_ u2-szar#-kib#-ma a-na a-ha-an-na-a
37. u2-sze-bi-ram-ma u2-sza2-[as,]-bi-ta har-ra-an _kur_ asz-szur{ki}
38. _iri-mesz_-ni sza qe2-reb na-[ge]-e sza2-tu-nu ap-pul aq-qur
39. i-na {d}gesz-bar aq-mu a-na _du6_ u3 kar-me u2-ter
40. i-na ta#-[a-a]-ar#-ti-ia {disz}szu-zu-bu _dumu_ babila2{ki}
41. sza i-na e-[szi-ti] _kur_ be-[lu]-ut _kur eme-gi7_ u3 uri{ki}
42. ra-ma-nu-usz u2-ter-ru i-[na] ta#-ha-az _edin bad5-bad5_-szu2 asz2-kun
43. bal-t,u-su i-na _szu-min_ as,-bat-[su] szum#-man-nu u3 bi-re-tu2 _an-bar_
44. ad-di-szu-ma a-na _kur_ asz-szur{ki} [u2-ra]-asz2-szu2 _lugal_ {kur}elam-ma{ki}
45. sza _a2-min_-szu2 is-hu-ru-ma il-li#-[ku] re-s,u-su _bad5-bad5_-szu2 asz2-kun
46. _illat-mesz_-szu2 u2-sap-pi-ih-[ma] u2-par-ri-ir pu-hur-szu2
  single ruling
47. i-na 7(disz)-e ger-ri-ia {d}asz-[szur be]-li2 u2-tak-kil-an-ni-ma
48. a-na {kur}e-lam-ti lu al-lik {iri}[e2-{disz}]ha-'i-i-ri {iri}ra-s,a-a
49. _iri-mesz_-ni sza mi-s,ir _kur_ asz-szur{ki} [sza i]-na tar-s,i _ad_-ia
50. e-la-mu-u2 e-ki-mu da-na-nisz# i#-na# me-ti-iq ger-ri-ia
51. ak-szud{ud}-ma asz2-lu-la szal-la-sun2# _{lu2#}erin2-mesz_ szu-lu-ti-ia
52. u2-sze-rib qe2-reb-szu2-un a-na mi-s,ir _kur#_ asz-szur{ki} u2-ter-ram-ma
53. _szu-min {lu2}gal_ {iri}hal-s,u bad3-an{ki} [am]-nu# {iri}bu-be2-e
54. {iri}dun-ni-{d}utu {iri}e2-ri-si-ia# {iri#}_e2_-ah-la-me-e
55. {iri}du-ru {iri}dan-nat-{disz}su-la#-[a-a {iri}]szi-li-ib-tu
56. [{iri}_]e2_-a-s,u-si {iri}kar-_numun-ba_-[sza2 {iri}_]e2_-gi-is,-s,i
57. {iri}e2-{disz}[kat3-pa]-la#-ni# {iri#}_e2#_-im#-bi#-ia {iri#}ha#-ma#-[a-nu]
58. {iri}e2-ar#-ra-bi {iri}bu-ru-tu {iri}di-in-tu-sza-{disz}su-[la-a-a]
59. {iri}[di]-in#-tu-sza2-{disz}{d}dumu-e2-kar-ir {iri}har-ri-asz2-la-ke-[e]
60. {iri}rab-ba-a-a {iri}ra-a-su {iri}ak-ka-ba-ri-na
61. {iri}du6-u2-hu-ri {iri}ha-am-ra-nu {iri}na-di-i-tu#
62. a-di _iri-mesz_-ni sza ne2-re-bi sza {iri}e2-bu-na-[ki]
63. {iri}du6-hu-um-bi {iri}di-in-tu-sza-{disz}du-me#-[_dingir_]
64. {iri}e2-u2-bi-ia {iri}bal-ti-li-szir {iri}ta-qab-li-szir
65. {iri}sza-na-qi-da-a-ti {iri}ma-su-tu2-szap-li#-[ti]
66. {iri}sa-ar-hu-de-e-ri {iri}a-lum-sza-{disz}_gaszan#-[e2_]
67. {iri}e2-{disz}pap-mesz-szum2-na {iri}il-te-u2-[ba]
68. 3(u) 4(disz) _iri-mesz_ dan-nu-ti a-di _iri-mesz tur-mesz_ sza li-[me-ti-szu2]-nu#
69. sza ni-ba la i-szu-u2 al-me _kur_-ud asz2-lu-la [szal]-la-[sun2]
70. ap-pul aq-qur i-na {d}gesz-bar aq-mu qu-tur na-[aq]-mu-ti#-[szu2-nu]
71. _gin7 muru9_ kab-ti pa-an _an_-e rap-szu-ti [u2]-szak#-ti-im#
72. isz-me-ma ki-szit-ti _iri-mesz_-szu2 {disz}ku-dur-[{d}na]-hu#-un-du
73. e-la-mu-u2 im-qut-su hat-tum si-it#-[ti] _iri-mesz_-szu2
74. a-na dan-na-ti u2-sze-rib szu-u2 {iri}[ma]-dak-ti
75. _iri lugal_-ti-szu2 e-zib-ma a-na {iri}ha-[i]-da-la
76. sza qe2-reb szad-di-i _su3-mesz_ is,-s,a-bat# har#-ra-nu
77. a-na {iri}ma-dak-ti _iri lugal_-ti-szu2 a-[la]-ku aq-bi
78. {iti}tam-hi-ri _en-te-na_ dan-nu [e]-ru#-ba-am-ma
column 5
1. sza2-mu-tum ma-at-tum u2-sza2-az-ni-na _szeg3-mesz_-sza2
2. _szeg3-mesz_ u3 szal-gu na#-ah-lu na-at-bak _kur_-[i a]-du#-ra#
3. pa-an ni-ri-ia u2-ter-ma a-na nina{ki} as,#-[s,a-bat har-ra]-nu#
4. i-na u4-me-szu-ma i-na [qi2]-bit {d}asz-szur _en_-ia {disz}nig2-du-{d}na-hu-un-du#
5. _lugal_ {kur}elam-ma{ki} 3(disz) _iti#-mesz#_ ul# u2-ma-al-li-ma
6. i-na u4-um la _nam_-szu2 ur-ru-hi-isz im-tu-ut
7. _egir_-szu2 {disz}um-ma-an-me-na-nu la ra-asz2 t,e3-me u3 mil-ki
8. _szesz_-szu2 dup-pu-us-su-u2 i-na _{gesz}gu-za_-szu2 u2-szib-ma
  single ruling
9. i-na 8(disz)-e ger-ri-ia _egir_ {disz}szu-zu-bi is-se-hu-ma
10. _dumu-mesz babila2{ki} gal5-la2-mesz_ lem-nu-ti _ka2-gal-mesz iri_
11. u2-di-lu ik-pu-ud lib-ba-[szu2]-nu a-na e-pesz _{gesz}la2_
12. {disz}szu-zu-bu {lu2}kal-da3-a-a [et,]-lum dun-na-mu-u2
13. sza la i-szu-u2 bir-ki _ARAD2_ da-[gil2] pa#-an _{lu2}en-nam_ {iri}la-hi-ri
14. {lu2}a-ra-me hal-qu mun-nab-tu [a]-mir# da-me hab-bi-lu
15. s,e-ru-usz-szu2 ip-hu-ru-ma qe2-reb {i7}a-gam-me u2-ri-du-ma
16. u2-szab-szu-u2 si-hu a-na#-[ku] ni#-tum al-me-szu-ma
17. nap-sza2-tusz u2-si-qa la-pa-an hat#-ti# u3 ne2-eb-re-ti
18. a-na {kur}elam-ma{ki} in-na-bit ki-i ri-kil-ti# [u3 gil2-la]-ti#
19. s,e-ru-usz-szu2 ba-szi-i ul-tu {kur}elam-ma{ki} [i-hi-szam-ma]
20. qe2-reb szu-an-na{ki} e-ru-ub _{lu2}babila2{ki}-mesz_
21. a-na la si-ma-ti-szu2 i-na _{gesz}gu-za_ u2-sze-szi-bu-szu
22. be-lu-ut _kur eme-gi7_ u3 uri{ki} u2-szad-gi-lu pa-ni-szu2
23. _e2 nig2-gur11_ sza e2-sag-il2 ip-tu-ma _ku3-sig17 ku3-babbar_
24. sza {d}en {d}zar-pa-ni-tum _nig2-szu e2 dingir-mesz_-szu2-nu u2-sze-s,u-ni
25. a-na {disz}um-ma-an-me-na-nu _lugal_ {kur}elam-ma{ki} sza la i-szu-u2
26. t,e3-e-mu u3 mil-ku u2-sze-bi-lu-usz t,a-a'-tu
27. pu-uh-hi-ir um-man-ka di-ka-a _karasz_-ka a-na babila2{ki}
28. hi-szam-ma i-da-a-ni i-zi-iz-ma tu-kul-ta-ni lu at-ta
29. szu-u2 {lu2}elam-ma{ki}-u2 sza i-na a-lak ger-ri-ia
30. mah-ri-ti sza {kur}_elam-ma{ki} iri-mesz_-szu2 ak-szud-du-ma
31. u2-ter-ru a-na kar-me lib-bu-usz ul ih-su-us
32. t,a-a'-tu2 im-hur-szu2-nu-ti-ma _erin2 hi-a_-szu2 _karasz_-su
33. u2-pa-hir-ma _{gesz}gigir-mesz_ {gesz}s,u-um-bi e-szu-ra
34. _ansze-kur-ra-mesz {ansze}kunga-mesz_ is-ni-qa s,i-in-di-szu2
35. {kur}par-su-asz2 {kur}an-za-an {kur}pa-szi-ru {kur}el-li-pi
36. {lu2}ia-as-il3 {lu2}la-kab-ra {lu2}ha-ar-zu-nu
37. {iri}du-um-mu-qu {iri}su-la-a {iri}sa-am-u2-na
38. _dumu_ {disz}{d}marduk-ibila-szum2-na {kur}e2-{disz}a-di-ni {kur}e2-{disz}a-muk-ka-na
39. {kur}e2-{disz}szil-la-na {kur}e2-{disz}sa-a-la ud-ud-ag{ki} {iri}la-hi-ru
40. {lu2}pu-qu-du {lu2}gam-bu-lum {lu2}ha-la-tu {lu2}ru-'u-u2-a
41. {lu2}u2-bu-lu {lu2}ma-la-hu {lu2}ra-pi-qu {lu2}hi-in-da-ru
42. {lu2}da-mu-nu kit-ru _gal_-u2 ik-te-ra it-ti-szu2
43. gi-ip-szu-us-su-un u2-ru-uh _kur_ uri{ki}
44. is,-ba-tu-nim-ma a-na babila2{ki} te-bu-u2-ni
45. a-di {disz}szu-zu-bi {lu2}kal-da3-a-a _lugal_ babila2{ki}
46. a-na a-ha-mesz iq-ru-bu-ma pu-hur-szu2-nu in-nen-du
47. ki-ma ti-bu-ut a-ri-bi ma-a'-di sza pa-an szat-ti
48. mit-ha-risz a-na e-pesz tuq-ma-ti te-bu-ni s,e-ru-u2-a
49. _sahar-hi-a giri3-min_-szu2-nu _gin7 muru9_ kab-ti sza dun-ni e-ri-ia-ti
50. pa-an _an_-e rap-szu-ti ka-ti-im el-la-mu-u2-a
51. i-na {iri}ha-lu-le-e i-na ki-szad {i7}idigna szit-ku-nu si-dir-ta
52. pa-an masz-qi2-ia s,ab-tu-ma u2-sza2-'a-lu _{gesz}tukul-mesz_-szu2-un
53. a-na-ku a-na {d}asz-szur {d}3(u) {d}utu {d}en {d}muati {d}u-gur
54. {d}inanna sza nina{ki} {d}inanna sza {iri}limmu2-dingir _dingir-mesz_ ti-ik-li-ia
55. a-na ka-sza2-di _{lu2}kur2_ dan-ni am-hur-szu2-nu-ti-ma
56. su-pe#-e#-a ur-ru-hi-isz isz-mu-u2 il-li-ku re-s,u-ti
57. la-ab-bisz an#-na#-dir-ma at-tal-bi-sza2 si-ri-ia-am
58. hu-li-ia-am si-mat s,i-il-ti a-pi-ra ra-szu-u2-a
59. i-na _{gesz}gigir_ ta-ha-zi-ia s,ir#-[ti] sa-pi-na-at za-'i-i-ri
60. i-na ug-gat lib-bi-ia ar-ta#-kab# ha-an-t,isz
61. _{gesz}pan_ dan-na-tum sza {d}asz-szur u2-szat-li-ma i-na _szu-min_-ia as,-bat
62. {gesz}szil-ta-hu pa-ri-i' nap-sza2-ti at-muh rit-tu-u2-a
63. s,e-er gi-mir um-ma-na-ti na-ki-ri lem-nu-ti
64. u4-mi3-isz s,ar-pisz al-sa-a _gin7_ {d}iszkur asz2-gu-um
65. i-na qi2-bit {d}asz-szur _en gal en_-ia a-na szid-di u3 pu-ti
66. ki-ma ti-ib me-he-e szam-ri a-na _{lu2}kur2_ a-zi-iq
67. i#-na# _{gesz}tukul-mesz_ {d}asz#-szur# _en_-ia u3 ti-ib ta-ha-zi-ia ez-zi
68. [i-rat-su-un] a-ne2-e'-ma suh-hur-ta-szu2-nu asz2-kun
69. [_erin2 hi-a_] na#-ki-ri i-na us,-s,i mul-mul-li u2-sza2-qir-ma
70. gi-mir _adda-mesz_-szu2-nu u2-pal-li-sza2 _ud_-zi-zi-isz
71. {disz}{d}hu-um-ba-an-un-da-sza2 {lu2}tur-ta-nu-szu2 et,-lu pit-qu-du
72. mu-ma-'e-er um-ma-ni-szu2 tu-kul-ta-szu2 _gal_-u2
73. a-di _{lu2}gal-mesz_-szu2 sza _gir2_ szib-bi _ku3-sig17_ szit-ku-nu
74. u3 i-na _har-mesz_ as-pi _ku3-sig17_ ru-usz-szi-i
75. ruk-ku-sa rit-ti-szu2-un ki-ma szu-u2-ri ma-ru-ti
76. sza na-du-u2 szum-man-nu ur-ru-hi-isz u2-pal-liq-szu2-nu-ti-ma
77. asz2-ku-na tah-ta-szu2-un ki-sza2-da#-te#-szu2-nu u2-na-kis as-li-isz
78. aq-ra-ti nap-sza2-te-szu2-nu u2-par-ri-i' qu3-u'3-isz
column 6
1. _gin7 illu_ gap-szi [sza] sza2-mu-tum si-ma-ni u3-mun-ni-szu2-nu
2. u2-szar-da-a [s,e-er] er-s,e-ti sza2-di-il-ti
3. la-as-mu-ti [mur-ni-is]-qi s,i-mit-ti ru-ku-bi-ia
4. [i-na da-me-szu2-nu gap-szu]-ti# i-szal-lu-u2 {d}i7-isz
5. sza _{gesz}gigir_ ta-ha-zi-ia [sa-pi]-na#-at rag-gi u3 s,e-ni
6. da-mu u3 par-szu2 ri-it-mu-ku ma-gar-ru-usz
7. pag-ri qu-ra-di-szu2-nu ki-ma [ur-qi2-ti] u2-mal-la-a _edin_
8. sa-ap-sa-pa-ti u2-na-kis-ma# bal#-ta-szu2-un a-bu-ut
9. ki-ma bi-ni qisz-sze-e si-ma-ni u2-na-kis qa-ti-szu2-un
10. _har-mesz_ as-pi _ku3-sig17 ki-sag_ eb#-bi# sza2 rit-ti-szu2-nu am-hur
11. i-na nam-s,a-ri zaq-tu-ti hu-[s,a-an]-ni-szu2-nu u2-par-ri-i'
12. _gir2-mesz_ szib-bi _ku3-sig17 ku3-babbar_ sza2 _muru2#-mesz_-szu2-nu e-kim
13. si-it-ti _{lu2}gal-mesz_-szu2 sza la#-pa#-an ta-ha-zi-ia
14. ip-la-hu id-ku-u2 i-da-szu2#-un bal-t,u-su-nu
15. i-na _muru2_ tam-ha-ri it-mu-ha# _szu#-min_-a-a _{gesz}gigir-mesz_
16. a-di _ansze-kur-ra-mesz_-szi-na sza i-[na] qit#-ru-ub ta-ha-zi dan-ni
17. ra-ki-bu-szi-in de-ku-u2-ma# u3 szi-na musz-szu-ra-ma
18. ra-ma-nu-usz-szin it-ta-na-al-[la]-ka# mit-ha-risz u2-ter-ra
19. a-di 2(disz) _danna ge6_ il-li-[ku da]-ak#-szu2-nu ap-ru-us
20. szu-u2 {disz}um-ma-an-[me-na-nu _lugal_ {kur}elam]-ma#{ki#} a-di _lugal_ babila2{ki}
21. [{lu2}]na#-sik-ka-[ni sza {kur}kal-di a-li-kut] _a2-min_-szu2
22. hur-ba-szu2 ta#-ha#-[zi-ia ki-ma-le-e zu-mur-szu2-un is]-hu#-up
23. {gesz}za-ra-ti-szu2#-un [u2-masz-sze-ru-ma a-na szu-zu-ub _zi-mesz_-szu2]-nu#
24. pag-ri _erin2 hi-a_-szu2-nu u2-da#-['i-i-szu2 e-ti-qu]
25. ki-i sza at-mi _tu_{muszen} kusz-szu-di# [i-tar-ra-ku lib-bu-szu2-un]
26. szi-na-te-szu2-un u2-s,a-ar-ra#-[pu qe2-reb _{gesz}gigir]-mesz#_-szu2-nu
27. u2-masz-sze-ru-ni zu-szu2-un a-[na ra-da]-di#-szu2-nu
28. _{gesz}gigir-mesz ansze-kur-ra-mesz_-ia u2-[ma-'e-er] ar-ki-szu2-un
29. mun-na-rib-szu2-nu sza a-na nap#-[sza2]-a-ti u2-s,u-u2
30. a-szar i-kasz-sza2-du u2-ra-[sa]-bu# i-na _{gesz}tukul_
  single ruling
31. i-na u4-me-szu-ma _e2-gal_ ku-tal-li sza nina{ki}
32. sza a-na szu-te-szur ka-ra-szi pa-qad _ansze-kur-ra-mesz_
33. sa-na-qi2 mim-ma szum-szu2 sza _lugal-mesz_-ni a-li-kut mah-ri
34. _ad-mesz_-ia u2-sze-pi-szu2-ma [tam]-lu-sza2 la ib-szi-ma
35. s,u-uh-hu-rat szu-bat-sa la-ba-risz _u4-mesz_ tem-me-en-sza2
36. e-nisz-ma isz-da-a-sza2 ir-ma-a i-qu-pa re-sza2-a-sza2
37. _e2-gal_ sza2-a-tu a-na si#-hi-ir-ti-sza2 aq-qur
38. ki-ma a-tar-tim-ma qaq-qa-ru ma-[a']-du ul-tu qe2-reb u2-szal-li
39. u3 ta-mir-ti _iri_ as,-ba#-ta i-na muh-hi usz-rad-di
40. qaq-qar _e2-gal_ mah-ri-ti e-zib-ma i-na qaq-qa-ri
41. sza ul-tu qe2-reb u2-szal-[li] as,#-ba-ta tam-la-a usz-mal-li
42. 2(disz) _me_ ti-ib-ki a-na e-la-ni# u2#-szaq-qi2 re-e-su
43. i-na _iti_ sze-me-e u4-mu mit-ga-ri [s,e-er] tam-le-e szu-a-tu
44. _e2-gal_ ra-bi-tum sza s,e-er mah#-[ri]-ti ma-a'-disz szu-tu-rat
45. a-na mu-szab _lugal_-ti-ia u2-[sze-pisz] _gesz-ur3-mesz_ {gesz}ere-ni
46. s,i-ru-ti u2-szat-ri-s,a e-li#-sza2 _{gesz}ig-mesz_ {gesz}li-ia-ri
47. me-ser _uruda_ nam-ri u2-rak-kis-ma u2#-rat-ta-a _ka2-mesz_-sza2
48. {na4}pi-i-lu pe-s,u-u2 sza i#-na# er-s,e-et {iri}ba-la-t,a-a-a
49. in-nam-ru _{d}alad-{d}lamma_ u2#-sze-pisz-ma im-na
50. u3 szu-me-la u2-sza2-as,-bi-ta# si-ga-ar-sza2
51. _e2-gal_ sza2-a-tu ul-tu usz#-[sze]-sza2 a-di na-bur-ri-sza2
52. ar-s,ip u2-szak-lil _mu-sar#_-e szi-t,ir szu-me-ia
53. i-na qer-bi-sza2 asz2-kun a-na ar2#-kat3 _u4-mesz_ i-na _lugal-mesz_-ni
54. _dumu-mesz_-ia sza {d}asz-szur u3 {d#}isz#-tar a-na _re-e2-um kur#_ u3
55. _ug3-mesz_ i-nam-bu-u2 [zi]-kir#-szu2 e-nu-ma _e2-gal_ sza2-a#-[tu]
56. i-lab-bi-ru-ma en-na-hu# [_nun_ ar-ku-u2 an]-hu-sa lu-ud-[disz]
57. _mu-sar_-e szi-t,ir _mu_-ia [li]-mur#-ma _i3-gesz_ lip#-szu#-[usz]
58. _{udu}siskur_ liq-qi2 a-na [asz2]-ri-szu2 lu-[ter]
59. {d}asz-szur u3 {d}isz-[tar] ik-ri-bi-szu2 i-szem-[mu-u]
  single ruling
60. [{iti}x-x _u4 n-kam?_ li-mu {disz}]en#-igi#-an-ni
61. [_{lu2}en-nam_] {iri#}gar-ga-misz