CDLI-Archival View

Publication
Primary publication:	RINAP 3/1 Sennacherib 015 composite
Author:	Grayson, A. Kirk & Novotny, Jamie R.
Publication date:	2012
Secondary publication(s):
Citation:
Author remarks:
Published collation:
CDLI no.:	P462823
UCLA Library ARK	21198/z1b57qfw
CDLI comments:

Source of original electronic files
Catalogue:	20140116 cdliadmin
Transliteration:	Grayson, A. Kirk & Novotny, Jamie R.
Translation:	no translation
Photo:	If not otherwise indicated, digital images were prepared in their current form by CDLI staff, in some cases with the kind assistance of collection staff. For terms of use, click here.
Line Art:	If not otherwise indicated, line art drawings prepared in their digital form by CDLI staff are to be credited to primary publication author(s).

Collection Information
Owner:
Museum no.:
Accession no.:
Acquisition history:

Text Content:
Genre:	Royal/Monumental
Sub-genre:	composite
Sub-genre remarks:
Composite no.:	Q003489
Language:	Akkadian

Physical Information
Object type:	other (see object remarks)
Material:	composite
Object remarks:	composite text
Measurements (mm):	x x
Object preservation:
Surface preservation:
Condition description:
Join information:
Seal no.:
Seal information:

Provenience:
Provenience:	Nineveh (mod. Kuyunjik)
Provenience remarks:
Excavation no.:
Findspot square:
Elevation:
Stratigraphic level:
Findspot remarks:

Chronology:
Period:	Neo-Assyrian (ca. 911-612 BC)
Period remarks:
Date of Origin:	Sennacherib.00.00.00
Dates referenced:	Sennacherib.00.00.00
Date remarks:
Alternative years:
Accounting period:

Unclear abbreviations? Can you improve upon the content of this page? Please contact us!

Composite text

surface a
1. {disz}{d}suen-szesz-mesz-eri-ba _lugal gal_-u2
2. _lugal_ dan-nu _lugal_ kisz-sza2-ti _lugal kur_ asz-szur{ki}
3. _lugal_ kib-rat _limmu2_-ti
4. _re-e2-um_ it-pe-szu2
5. mi-gir _dingir-mesz gal-mesz_
6. na-s,ir kit-ti ra-'i-im mi-sza2-ri
7. e-pisz u2-sa-a-te
8. a-lik tap-pu-ut a-ki-i
9. sa-hi-ru dam-qa-a-ti
10. et,-lum git2-ma-lum zi-ka-ru qar-du
11. a-sza2-red kal mal-ki
12. rap-pu la-'i-it, la ma-gi-ri
13. mu-szab-ri-qu za-ma-a-ni
14. {d}asz-szur _kur_-u2 _gal_-u2 _lugal_-ut la sza2-na-an
15. u2-szat-li-ma-an-ni-ma
16. _ugu_ gim-ri a-szib pa-rak-ki
17. u2-szar-ba-a _{gesz}tukul-mesz_-ia
18. ul-tu _a-ab-ba_ e-le-ni-ti
19. sza szul3-mu _{d}utu_-szi
20. a-di tam-tim szap-li-ti
21. sza s,i-it _{d}utu_-szi
22. gim-ri s,al-mat _sag-du_ u2-szak-nisz sze-pu-u2-a
$ n lines broken
23'. a-na _e2-gal_-szu2 sza qe2-reb _ka2-dingir-ra{ki}_
24'. ha-disz e-ru-um-ma ap-te-e-ma
25'. _e2_ ni-ni-s,ir-ti-szu2 _ku3-babbar_
26'. u2-nu-ut _ku3-sig17 ku3-babbar na4_ a-qar-tu
27'. mim-ma szum-szu2 _nig2-szu nig2-ga_ la ni-bi
28'. ka-bit-tu _gun_ {munus}_un-mesz e2-gal_-szu2
29'. _{lu2}tirum-mesz_ {lu2}man-za-az pa-ni
30'. _{lu2}nar-mesz_ {munus}_nar-mesz_
31'. si-hir-ti um-ma-a-ni ma-la ba-szu-u2
32'. mut-tab-bi-lu-tu _e2-gal_-usz
33'. u2-sze-s,a-am-ma szal-la-tisz am-nu
34'. i-na e-muq {d}asz-szur _en_-ia 1(gesz2) 1(u) 5(disz) _iri-mesz_-szu2
35'. dan-nu-ti _e2 bad3-mesz_-ni sza {kur}kal-di
36'. u3 _4(disz) me 2(u) iri-mesz tur-mesz_ sza li-me-ti-szu2-nu
37'. al-me _kur_-ud asz2-lu-la szal-la-su-un
38'. {lu2}ur2-bi {lu2}a-ra-mu {lu2}kal-du
39'. sza qe2-reb unu{ki} nibru{ki} kisz{ki}
40'. {iri}hur-sag-kalam-ma _gu2-du8-a{ki} zimbir_{ki}
41'. a-di _dumu-mesz iri en_ hi-it,-t,i
42'. u2-sze-s,a-am-ma szal-la-tisz am-nu
43'. i-na ta-a-a-ar-ti-ia {lu2}tu-'u-mu-na
44'. {lu2}ri-hi-hu {lu2}ia-daq-qu
45'. {lu2}u2-bu-du {lu2}gib-re-e
46'. {lu2}ma-li-hu {lu2}gu-ru-mu
47'. {lu2}u2-bu-ru {lu2}da-mu-nu
48'. {lu2}gam-bu-lu {lu2}hi-in-da-ru
49'. {lu2}ru-'u-u2-a {lu2}pu-qu-du
50'. {lu2}ha-am-ra-a-nu {lu2}ha-ga-ra-nu
51'. {lu2}na-ba-tu {lu2}li-i'-ta-u2
52'. {lu2}a-ra-mu la kan-szu-te mit-ha-risz _kur_-ud
53'. _2(disz) me 8(disz) lim ug3-mesz tur gal nita_ u _munus_
54'. _ansze-kur-ra-mesz ansze-kunga-mesz ansze-mesz_
55'. _ansze-gam-mal-mesz gu4-mesz_ u3 _u8-udu hi-a_
56'. sza la ni-bi szal-la-tu ka-bit-tu
57'. asz2-lu-la a-na qe2-reb _kur_ asz-szur{ki}
58'. i-na me-ti-iq ger-ri-ia sza _{disz}{d}ag-en-mu-mesz_
59'. {lu2}qi2-pi {iri}ha-ra-ra-te _ku3-gi ku3-babbar_
60'. {gesz}mu-suk-kan-ni _gal-mesz ansze-mesz ansze-gam-mal-mesz_
61'. _gu4-mesz_ u3 _u8-udu-hi-a_ ta-mar-ta-szu2
62'. ka-bit-tu am-hur ba-hu-la-te {iri}hi-rim-me
63'. _{lu2}kur2_ ak-s,i ina _{gesz}tukul-mesz_ u2-szam-qit-ma e-du ul e-zib
64'. pag-ri-szu2-nu i-na ga-szi-szi a-lul-ma
65'. si-hir-ti _iri_ u2-szal-me
66'. na-gu-u szu-a-tu
67'. a-na esz-szu-ti as,-bat
68'. 1(disz)-en _gu4-gesz 1(u) udu-mesz 1(u) ansze gesztin-mesz_
69'. _2(u) ansze zu2-lum-ma_ re-sze-te-szu2
70'. a-na _dingir-mesz_-ni _kur_ asz-szur{ki}
71'. _en-mesz_-ia u2-kin da3?-ri?-szam?
$ n lines broken
72'. _[...]-mesz_
73'. [...] _u8-udu-hi-a_
74'. ul-tu qer-bi-szu2-un u2-sze-s,a-am-ma szal-la-tisz
75'. am-nu u3 _iri-mesz_-szu2-nu _tur-mesz_ sza ni-ba la i-szu-u2
76'. ap-pul aq-qur u2-sze-me kar-mesz
77'. _e2 edin_ kul-ta-ri mu-sza2-bi-szu2-nu
78'. i-na {d}gesz-bar aq-mu-ma di-tal-lisz u2-sze-me
79'. u2-ter-ma {iri}e2-{disz}ki-lam-za-ah szu-a-tu
80'. a-na {iri}bir-tu-ti as,-bat _ugu_ sza u4-me pa-ni
81'. _bad3-mesz_-szu2 u2-dan-nin-ma
82'. _ug3-mesz kur-kur_ ki-szit-ti _szu-ii_-ia
$ n lines broken
83'. _{na4}na-ru2-a_ u2-sze-pisz-ma li-i-tum
84'. ki-szit-ti _szu-min_ sza _ugu_-szu2-un asz2-tak-ka-nu
85'. s,e-ru-usz-szu2 u2-sza2-asz2-t,ir-ma i-na qer-bi _iri_ ul-ziz pa-an ni-ri-ia
86'. u2-ter-ma a-na {kur}el-li-pi
87'. as,-s,a-bat har-ra-nu el-la-mu-u2-a
88'. {disz}is-pa-ba-a-ra _lugal_-szu2-un _iri-mesz_-szu2 dan-nu-ti
89'. _e2_ ni-s,ir-ti-szu2 u2-masz-szir-ma a-na ru-qe2-e-ti in-na-bit
90'. gim-ri _kur_-szu2 _dagal_-tim _gin7 muru9_ as-hu-up
91'. {iri}mar-u2-bisz-ti {iri}ak-ku-ud-du
92'. _iri-mesz_-ni _e2 lugal_-ti-szu2 a-di 3(u) 4(disz)
93'. _iri-mesz_-ni _tur-mesz_ sza li-me-ti-szu2-nu
94'. al-me _kur_-ud ap-pul aq-qur i-na {d}gesz-bar aq-mu
95'. _ug3-mesz tur gal nita_ u _munus ansze-kur-ra-mesz_
96'. _{ansze}kunga-mesz ansze-mesz ansze-gam-mal-mesz_
97'. _gu4-mesz_ u3 _u8-udu-hi-a_ a-na la mi-nam
98'. asz2-lu-lam-ma a-di la ba-sze20-e
99'. u2-sza2-lik-szu-ma u2-s,a-ah-hi-ir _kur_-su
100'. {iri}s,i-s,i-ir-tu {iri}ku-um-ma-ah-lum
101'. _iri-mesz_-ni dan-nu-ti a-di _iri-mesz tur-mesz_
102'. sza li-me-ti-szu2-nu {kur}e2-{disz}ba-ar-ru-u2
103'. na-gu-u2 a-na gi-mir-ti-szu2
104'. ul-tu qe2-reb _kur_-szu2 ab-tuq-ma
105'. _ugu_ mi-s,ir _kur_ asz-szur{ki}
106'. u2-rad-di {iri}el-en-za-asz2 a-na _iri lugal_-u2-ti
107'. u3 dan-na-at na-ge-e szu-a-tu as,-bat-ma
108'. _mu_-szu2 mah-ra-a u2-na-kir-ma
109'. {iri}kar-{disz}{d}suen-szesz-mesz-eri-ba at-ta-bi ni-bit-su
110'. _ug3-mesz kur-kur_ ki-szit-ti _szu-min_-ia
111'. i-na lib3-bi u2-sze-szib i-na _szu-min_ {lu2}szu-ut _sag_-ia
112'. _{lu2}en-nam_ {iri}har-har am-nu-ma
113'. u2-rap-pisz ma-a-ti
114'. i-na ta-a-a-ar-ti-ia
115'. sza {kur}ma-da-a-a ru-qu-ti
116'. sza i-na _lugal-mesz_-ni _ad-mesz_-ia
117'. ma-am-man la isz-mu-u2 zi-kir _kur_-szu2-un
118'. man-da-ta-szu2-nu ka-bit-tu am-hur
119'. a-na ni-ri be-lu-ti-ia u2-szak-ni-su-nu-ti
120'. i-na szal-szi ger-ri-ia a-na {kur}ha-at-ti lu al-lik
121'. {disz}lu-li-i _lugal_ {iri}s,i-du-un-ni
122'. pul-hi me-lam-me be-lu-ti-ia is-hu-pu-szu-ma
123'. a-na ru-uq-te _murub4_ tam-tim
124'. in-na-bit-ma _kur_-szu2 e-mid
125'. {iri}s,i-du-un-nu _gal_-u2
126'. {iri}s,i-du-un-nu s,e-eh-ru
127'. {iri}e2-zi-it-te {iri}s,a-ri-ip-tu
128'. {iri}ma-hal-li-ba {iri}u2-szu-u2
129'. {iri}ak-zi-bi {iri}ak-ku-u2
130'. _iri-mesz_-szu2 dan-nu-ti _e2 bad3-mesz_-ni
131'. a-szar ri-i-ti u3 masz-qi2-ti _e2_ tuk-la-te-szu2
132'. ra-szub-bat _{gesz}tukul_ {d}asz-szur _en_-ia
133'. is-hu-pu-szu2-nu-ti-ma ik-nu-szu2 sze-pu-u2-a
134'. {disz}tu-ba-a'-lu i-na _{gesz}gu-za lugal_-u2-ti
135'. _ugu_-szu2-un u2-sze-szib-ma
136'. _gun_ man-da-at-tu
137'. be-lu-ti-ia szat-ti-szam la ba-at,-lu
138'. u2-kin s,e-ru-usz-szu2
$ n lines broken
139'. na-dan _gun_ kad3-re-e be-lu-ti-ia
140'. e-mid-su-ma i-sza2-a-t,a ab-sza2-a-ni
141'. i-na me-ti-iq ger-ri-ia {iri}e2-da-gan-na {iri}ia-ap-pu
142'. {iri}ba-na-a-a-bar-qa {iri}a-zu-ru
143'. _iri-mesz_-ni sza {disz}s,i-id-qa-a
144'. sza a-na _giri3-min_-ia ar2-hisz la ik-nu-szu2
145'. al-me _kur_-ud asz2-lu-la szal-la-su-un
146'. _{lu2}szagina-mesz {lu2}nun-mesz_ u3 _ug3-mesz_ {iri}am-qar-ru-na
147'. sza {disz}pa-de-e _lugal_-szu2-nu _en_ a-de-e
148'. u3 ma-mit sza _kur_ asz-szur{ki} bi-re-tu2 _an-bar_
149'. id-du-ma a-na {disz}ha-za-qi-ia-a-u
150'. {kur}ia-u2-da-a-a id-di-nu-szu2 nak-risz
151'. a-na an-zil-li e-pu-szu ip-lah3 _sza3_-szu2-un
152'. _lugal-mesz_-ni {kur}mu-s,u-ri _{lu2}erin2-mesz {gesz}pan_
153'. _{gesz}gigir-mesz ansze-kur-ra-mesz_ sza _lugal_ {kur}me-luh-hi
154'. e-mu-qi2 la ni-bi ik-te-ru-nim-ma
155'. il-li-ku re-s,u-us-su-un
156'. i-na ta-mir-ti {iri}al-ta-qu-u2
157'. el-la-mu-u-a si-id-ru szit-ku-nu
158'. u2-sza2-'a-lu _{gesz}tukul-mesz_-szu2-un
159'. i-na tukul-ti {d}asz-szur _en_-ia it-ti-szu2-un
160'. am-da-hi-is,-ma asz2-ta-kan _bad5-bad5_-szu2-un
161'. _{lu2}en {gesz}gigir-mesz_ u3 _dumu-mesz lugal_ {kur}mu-us,-ra-a-a
162'. a-di _{lu2}en {gesz}gigir-mesz_ sza _lugal_ {kur}me-luh-ha
163'. bal-t,u-su-un i-na _murub4_ tam-ha-ri ik-szu-da _szu-min_-a-a
164'. {iri}al-ta-qu-u2 {iri}ta-am-na-a al-me _kur_-ud
165'. asz2-lu-la szal-la-su-un a-na {iri}am-qar-ru-na
166'. aq-rib-ma _{lu2}nita2-mesz {lu2}nun-mesz_
167'. sza hi-it,-t,u u2-szab-szu-u2 a-duk-ma
168'. ina di-ma-a-ti si-hir-ti _iri_ a-lul pag-ri-szu2-un
169'. _dumu-mesz iri_ e-pisz an-ni u3 gil2-la-ti
170'. a-na szal-la-te am-nu si-it-tu-te-szu2-nu
171'. la ba-bil hi-t,i-ti
172'. u3 gul-lul-ti
173'. sza a-ra-an-szu2-nu la ib-szu-u2
174'. usz-szur-szu2-un aq-bi {disz}pa-di-i _lugal_-szu2-nu
175'. ul-tu qe2-reb {iri}ur-sa-li-im-ma
176'. u2-sze-s,a-am-ma i-na _{gesz}gu-za_ be-lu-ti
177'. _ugu_-szu2-un u2-sze-szib-ma man-da-at-tu
178'. be-lu-ti-ia u2-kin s,e-ru-usz-szu2
179'. u3 {disz}ha-za-qi-a-u {kur}ia-u2-da-a-a
180'. sza la ik-nu-szu a-na ni-ri-ia
181'. _4(u) 6(disz) iri-mesz_-szu2 _e2 bad3-mesz_-ni dan-nu-ti
182'. u3 _iri-mesz tur-mesz_ sza li-me-ti-szu2-nu
183'. sza ni-ba la i-szu-u2 ina szuk-bu-us a-ram-me
184'. u3 qit-ru-ub szu-pe-e mit-hu-us, zu-uk _giri3-min_
185'. pil-szi nik-si u3 kal-ban-na-te al-me _kur_-ud
186'. 2(disz) _me lim_ 1(disz) _me_ 5(u) _un-mesz tur gal nita_ u _munus_
187'. _ansze-kur-ra-mesz {ansze}kunga-mesz ansze-mesz_
188'. _{ansze}gam-mal-mesz gu4-mesz_ u3 _u8-udu hi-a_
189'. sza la ni-bi ul-tu qer-bi-szu2-un
190'. u2-sze-s,a-am-ma szal-la-tisz am-nu
191'. sza2-a-szu2 _gin7 muszen_ qu-up-pi qe2-reb {iri}ur-sa-li-im-ma
192'. _iri lugal_-ti-szu2 e-sir2-szu {iri}hal-s,u-_mesz_
193'. _ugu_-szu2 u2-rak-kis-ma a-s,e-e _ka2-gal iri_-szu2
194'. u2-ter-ra ik-ki-bu-usz
195'. _iri-mesz_-szu2 sza asz2-lu-la ul-tu qe2-reb _kur_-szu2
196'. ab-tuq-ma a-na {disz}mi-ti-in-ti _lugal_ {iri}as-du-di
197'. {disz}pa-di-i _lugal_ {iri}am-qar-ru-na
198'. u3 {disz}gissu-en _lugal_ {iri}ha-zi-ti
$ n lines broken
199'. {lu2}ur2-bi u3 _{lu2}erim-mesz_-szu2 _saga-mesz_
200'. sza a-na dun-nu-un {iri}ur-sa-li-im-mu
201'. _iri lugal_-ti-szu2 u2-sze-ri-bu-ma ir-szu2-u
202'. til-la-a-te it-ti 3(u) _gun ku3-sig17_
203'. _8(disz) me gun ku3-babbar_ ni-siq-ti gu-uh-li
204'. tak2-kas3-si _na4-an-za-gul-me gal-mesz_
205'. _{gesz}na2-mesz zu2 {gesz}gu-za-mesz_ ne2-me-di _zu2_
206'. _kusz am-si zu2 am-si {gesz}esi {gesz}taszkarin_
207'. mim-ma szum-szu2 ni-s,ir-tu ka-bit-tu
208'. u3 _dumu-munus-mesz_-szu2 _{munus}ug3-mesz e2-gal_-szu2 _{lu2}nar-mesz {munus}nar-mesz_
209'. a-na qe2-reb nina{ki} _iri_ be-lu-ti-ia
210'. _egir_-ia u2-sze-bi-lam-ma
211'. a-na na-dan man-da-at-ti
212'. u3 e-pesz _ARAD2_-u2-ti isz-pu-ra rak-bu-szu2
213'. i-na 4(disz)-e ger-ri-ia {d}asz-szur be-li2
214'. u2-tak-kil-an-ni-ma um-ma-na-te-ia
215'. gap-sza2-a-te ad-ke-ma a-na {kur}e2-{disz}ia-kin7
216'. a-la-ku aq-bi ina me-ti-iq ger-ri-ia
217'. sza {disz}szu-zu-bi {lu2}kal-da3-a-a a-szib qe2-reb {i7}a-gam-me
218'. ina {iri}bi-it-tu-u2-ti asz2-ta-kan _bad5-bad5_-szu2
219'. szu-u2 hur-ba-szu ta-ha-zi-ia
220'. _ugu_-szu2 im-qut-ma it-ru-ku _sza3_-szu2
221'. ki-ma a-za-ri e-disz ip-par-szid-ma ul in-na-mir a-szar-szu2
222'. pa-an ni-ri-ia u2-ter-ma
223'. a-na {kur}e2-{disz}ia-kin7 as,-s,a-bat har-ra-nu
224'. szu-u2 {disz}{d}marduk-ibila-szum2-na_
225'. sza ina a-lak ger-ri-ia mah-re-e _bad5-bad5_-szu2 asz2-ku-nu-ma
226'. u2-par-ri-ru el-lat-su
227'. ri-gim _{gesz}tukul-mesz_-ia dan-nu-ti
228'. u3 ti-ib ta-ha-zi-ia ez-zi e-dur-ma
229'. _dingir-mesz_ ma-rak _kur_-szu2 i-na _ki-tusz_-szu2-nu id-ke-ma
230'. qe2-reb _{gesz}ma2-mesz_ u2-szar-kib-ma
231'. a-na na-gi-ti-ra-aq-qi2 sza qa-bal tam-tim
232'. is,-s,u-risz ip-pa-risz
233'. _szesz-mesz_-szu2 _numun e2 ad_-szu2 sza u2-masz-szi-ru a-hi tam-tim
234'. a-di si-it-ti _ug3-mesz kur_-szu2 ul-tu {kur}e2-{disz}ia-kin7
235'. qe2-reb {i7}a-gam-me ap-pa-ra-a-ti u2-sze-s,a-am-ma
236'. szal-la-tisz am-nu u2-ter-ma _iri-mesz_-szu2
237'. ap-pul aq-qur u2-sze-me kar-mesz _ugu en_ sa-li-me-szu2
238'. _lugal_ {kur}elam-ma{ki} na-mur-ra-tum at-bu-uk
239'. i-na ta-a-a-ar-ti-ia {disz}asz-szur-na-din-mu
240'. _dumu_ resz-tu-u2 tar-bit bir-ki-ia
241'. i-na _{gesz}gu-za_ be-lu-ti-szu2 u2-sze-szib-ma
242'. _dagal_-tum _kur eme-gi7_ u3 uri{ki}
243'. u2-szad-gil pa-nu-usz-szu2
244'. i-na szal-lat _kur-mesz_ sza2-ti-na sza asz2-lu-la
245'. 2(u) _lim {gesz}pan-mesz_ 1(u) 5(disz) _lim_ {gesz}a-ri-tu
246'. i-na lib3-bi-szu2-nu ak-s,ur-ma
247'. _ugu_ ki-s,ir _lugal_-ti-ia u2-rad-di
248'. si-it-ti szal-la-ti na-ki-ri ka-bit-tu
249'. a-na gi-mir _karasz_-ia _{lu2}en-nam_-ia
250'. _ug3-mesz_ ma-ha-za-ni-ia _gal-mesz_
251'. ki-ma s,e-e-ni lu u2-za-'i-iz
252'. i-na u4-me-szu-ma nina{ki} ma-ha-zu
253'. s,i-i-ru _iri_ na-ram {d}isz-tar
254'. sza nap-har ki-du-de-e _dingir-mesz_
255'. u3 _{d}isz-tar-mesz_ ba-szu-u qe2-reb-szu2
256'. tem-me-en-nu da-ru-u du-ru-usz s,a-a-te
257'. sza ul-tu ul-la it-ti szi-t,ir bu-ru-u2-me
258'. es,-rat-su es,-ret-ma szu-pu-u2 s,i-in-du-szu2
259'. asz2-ru nak-lu szu-bat pi-risz-te sza2 mim-ma szum-szu2
260'. szi-pir ni-kil-te gi-mir pel-lu-de-e
261'. ni-s,ir-ti lal3-gar szu-ta-bu-lu4 qe2-reb-szu2
262'. sza ul-tu ul-la _lugal-mesz_-ni a-li-kut mah-ri
263'. _ad-mesz_-ia ul-la-nu-u2-a be-lu-tu _kur_ asz-szur{ki}
264'. e-pu-szu-ma u2-ma-'e-ru ba-'u-lat {d}en-lil2
265'. a-a-um-ma ina lib3-bi-szu2-nu a-na szum-dul6 szu-bat _iri_
266'. e-pesz _bad3_ szu-te-szur su-qa-a-ni
267'. u3 ha-re-e _i7_ za-qa-ap s,ip-pa-a-ti
268'. u2-zu-un-szu2 ul ib-szi-ma ul usz-ta-bil
269'. ka-ras-su a-na _e2-gal_ qer-bi-szu2
270'. kum2-mu ri-mit be-lu-ti sza s,u-uh-hu-ru
271'. szu-bat-su e-pisz-tusz la nak-lat-ma
272'. le-es-su ul id-da-a lib-bu-usz
273'. ul ih-su-us ia-a-ti {disz}{d}en-zu-szesz-mesz-su
274'. _lugal_ kisz-sza2-ti _lugal kur_ asz-szur{ki}
275'. e-pesz szip-ri szu-a-tu ki-i t,e3-em _dingir-mesz_
276'. i-na uz-ni-ia ib-szi-ma ka-bat-ti ub-lam-ma
277'. te-ne-szet {kur}kal-di {gesz}a-ra-me {kur}man-na-a-a
278'. {kur}qu-e {kur}hi-lak-ku {kur}pi-lisz-te
279'. u3 {kur}s,ur-ri sza2 a-na ni-ri-ia la ik-nu-szu2 as-su-ha-am-ma
280'. tup-szik-ku u2-sza2-asz2-szi-szu2-nu-ti
281'. il-bi-nu _sig4 e2-gal_ mah-ri-tu
282'. sza 3(disz) _me_ 1(gesz2) ina 1(disz) _kusz3 us2_ 1(gesz2) 2(u) ina 1(disz) _kusz3 dagal_
283'. i-na tar-s,i za-me2-e _e2_ ziq-qur-rat
284'. 1(disz) _me_ 3(u) 4(disz) ina 1(disz) _kusz3 dagal_ ina tar-s,i na-ma-ri _e2_ {d}isz-tar
285'. 1(gesz2) 3(u) 5(disz) ina 1(disz) _kusz3 dagal_ ina tar-s,i na-ma-ri _e2_-kid-mu-ri
286'. sza _lugal-mesz_-ni a-li-kut mah-ri _ad-mesz_-ia
287'. a-na ri-mit be-lu-ti-szu2-un
288'. u2-sze-pi-szu-ma la u2-nak-ki-lu szi-pir-sza2
289'. _udu-mesz_ szad-di {d}lamma sza {na4}pi-i-li pe-s,e-e
290'. i-na {iri}ta-as-ti-a-te sza e-ber-tan {i7}idigna
291'. ib-tu-qu a-na mu-kil _ka2-mesz_-szi-in
292'. a-na szu-pu-usz _{gesz}ma2-mesz_ qe2-reb _{gesz}tir-mesz_
293'. _gesz-mesz gal-mesz_ u2-qe2-ru ina nap-har _kur_-szu2-un
294'. i-na {iti}gu4 u4-mu a-dan-ni e-de-e pa-an szat-te
295'. i-na _{gesz}ma2-mesz_ s,i-ra-a-te
296'. a-na a-ha-an-na-a u2-szeb-bi-ru-ni mar-s,i-isz
297'. i-na ne2-ber ka-a-ri _{gesz}ma2-gu-la-mesz_ u2-t,e-eb-bu-u
298'. ba-hu-la-te-szu2-un u2-sza2-ni-hu u2-lam-me-nu ka-ras-si-in
299'. ina da-na-ni u3 szup-szu-qi2 mar-s,i-isz u2-bi-lu-nim-ma
300'. u2-sza2-as,-bi-tu _ka2-mesz_-szi-in {i7}te-bil-ti a-gu-u szit-mu-ru
301'. sza ul-tu _ud-mesz su3-mesz_ t,e-eh _e2-gal_
302'. i-ba-'u-u2-ma ina _illu_-sza2 gap-szi i-na usz-szi-sza2
303'. ab-bu u2-szab-szu-u2 u2-ri-ib-bu tem-me-en-sza2
304'. _e2-gal-tur-ra_ sza2-a-tu a-na si-hir-ti-sza2 aq-qur-ma
305'. sza {i7}te-bil-ti ma-lak-sza2 usz-te-esz-na-a
306'. ab-bu usz-t,ib-ma u2-sze-szir mu-s,u-sza2
307'. qe2-reb ka-tim-ti a-sur-rak-ki-sza2
308'. szap-la-a-nu _gi-mesz_ e-la-nisz _na4 kur_-i dan-ni
309'. it-ti _esir-ud-a_ ak-si-ma _a-sza3_ ul-tu ma-a-me
310'. u2-sze-lam-ma na-ba-lisz u2-ter _2(disz) me 1(gesz2) 2(u) 8(disz)_ ina _1(disz)-kusz3_
311'. _sag-ki_ qaq-qa-ru _ugu_ me-szi-ih-ti tam-le-e
312'. mah-re-e lu u2-rad-di-ma
313'. nap-har _7(disz) me_ ina _as4-lum gal_-ti _usz_
314'. _1(disz) me 1(gesz2) 1(u) 6(disz)_ ina _as4-lum gal_-ti _sag-ki an-ta {tu15}si-sa2_
315'. _2(disz) me 1(gesz2) 8(disz)_ ina _as4-lum gal_-ti _sag-ki murub4_-tim
316'. me2-eh-ret za-me-e at-man-ni ku-tal {d}isz-tar
317'. _4(disz) me 4(u) 3(disz)_ ina _as4-lum gal_-ti _sag-ki murub4_-tim
318'. sza2-ni-tum mu-uh-hur-ti sza2-a-ri a-mur-ri
319'. ku-tal _e2_ ziq-qur-rat _e2_ {d}isz-tar
320'. _3(disz) me 1(gesz2) 2(u) 6(disz)_ ina _as4-lum gal_-ti _sag-ki ki-ta {tu15}u18-lu_
321'. _us2-sa-du_ {i7}idigna tam-la-a
322'. u2-mal-li-ma am-szu-uh me-szi-ih-ta
323'. asz2-szu2 szip-ri _e2-gal_-ia szu-te-szu-ri
324'. u3 li-pit _szu-min_-ia szul-lu-me
325'. i-na u4-mi-szu-ma {d}asz-szur u {d}isz-tar
326'. sza {na4}pi-i-li pe-s,e-e
327'. ina {iri}ba-la-t,a-a-a u2-szap-tu-u2-ni pa-ni-szu2
328'. _udu-mesz_ szad-di {d}lamma-_mesz_ dan-nu-ti
329'. _{munus}ab2-za-za_-a-te u3 _{na4}kun4-mesz gal-mesz_
330'. ina _ka2-mesz e2-gal_ be-lu-ti-ia ina qer-bi-szu2 ab-tu-uq
331'. la-ba-risz u4-mi i-na _illu_ kisz-sza2-ti
332'. tem-me-en tam-le-e la e-ne2-sze
333'. {na4}pi-i-li rab-bu-ti ki-su-u2-szu
334'. u2-sza2-as-hi-ra u2-dan-nin szu-pu-uk-szu
335'. _mu-sar_-e szi-t,ir szu-me-ia
336'. _1(disz) me 1(gesz2)?_ ti-ib-ki tam-li-i qe2-reb-szu2 al-t,u-ur-ma
337'. szap-la-a-nu ina usz-szi-szu e-zib ah-ra-tasz
338'. ar-ka-a-nu szu-usz-qu-u2 tam-li-i
339'. ka-bat-ti ub-lam-ma 3(u) ti-ib-ki
340'. s,e-er mah-re-e us,-s,ip-ma
341'. _1(disz) me 1(gesz2) 3(u)_ ti-ib-ki u2-szaq-qi2 e-la-nisz
342'. tar-pa-szu-u2 _ugu_ sza u4-me pa-ni u2-szar-bi
343'. s,e-er me-szi-ih-ti _e2-gal_ mah-ri-ti
344'. u2-rad-di-ma u2-sza2-an-di-la szi-kit-tasz
345'. _e2-gal {na4}dur2-mi-na-ban3-da {na4}gesz-nu11-gal_
346'. _zu2 am-si {gesz}esi {gesz}taszkarin_ {gesz}mu-suk-kan-ni
347'. _{gesz}erin {gesz}szur-min3 {szim}li_ u3 {gesz}e-lam-ma-ku
348'. e2-gal-zag-di-nu-tuku-a a-na mu-szab _lugal_-ti-ia
349'. u2-sze-pi-sza2 qe2-reb-szu2 _gesz-ur3-mesz {gesz}erin {gesz}szur-min3_
350'. sza i-ri-su-un t,a-a-bu bi-nu-ut
351'. {kur}ha-ma-nim tar-bit {kur}si-ra-ra
352'. _kur-mesz ku3-mesz_ u2-szat-ri-s,a e-li-szin
353'. _{gesz}ig-mesz {gesz}erin {gesz}szur-min3 {szim}li_
354'. s,i-ra-a-ti me-ser2 _ki-sag_ eb-bi _uruda_ nam-ri
355'. u2-rak-kis-ma u2-rat-ta-a ba-bi-szin
356'. sik-kat3 kar-ri kas-pi u3 _uruda_
357'. qe2-reb-szi-in u2-szal-me i-na a-gur2-ri
358'. _{na4}zu2 {na4}za-gin3_ us-si-ma si-il-lu
359'. ne2-be2-hi u3 gi-mir pa-as-qi2-szi-in
360'. _e2_ ap-pa-a-te tam-szil _e2-gal_ {kur}hat-ti
361'. sza i-na li-sza2-a-ni _kur_ mar-tu{ki}
362'. _e2_ hi-la-a-ni i-sza2-as-su-szu2 a-na mul-ta-'u-ti
363'. be-lu-ti-ia u2-sze-pi-sza2 qe2-reb-szi-in
364'. _1(u) 2(disz) ur-mah-mesz uruda_ nam-ri zi-i-me
365'. da-ah-ru-ti pe-tan bir-ki szu-ta-tu-ti
366'. sza ina szi-pir {d}nin-a2-gal nak-lisz pat-qu-ma
367'. ma-lu-u2 nam-ri-ir-ri u3 2(disz) {gesz}tim-me
368'. szu-ta-hu-ti pi-ti-iq _zabar_ szu-bu-'u
369'. a-di 4(disz) {gesz}tim-me _{gesz}erin gal-mesz_
370'. _ugu_ pirig-gal-le-e u2-kin-ma
371'. dap2-pi ku-lul _ka2-mesz_-szi-in e-mid
372'. _1(u) {munus}ab2-za-za_-a-ti pi-ti-iq u2-ru-de-e nam?-ri?
373'. za-ha-lu-u2 eb-bu u2-szal-bisz-ma
374'. u3 _1(u) ab2-za-za_-a-ti _{na4}gesz-nu11-gal_
375'. _1(u) 2(disz) ab2-za-za_-a-ti pi-ti-iq _gu-an-na_
376'. 2(disz) {gesz}tim-me _{gesz}esi_ s,i-ru-ti sza ih-zu-szu2-nu pa-szal-lum
377'. u3 {gesz}tim-me _{gesz}erin {gesz}szur-min3_ {gesz}dup-ra-ni
378'. ih-ze-et esz-ma2-re-e u3 _zabar_
379'. s,e-ru-usz-szin ul-ziz-ma
380'. sza _e2-gal-mesz_ be-lu-ti-ia e-mid _{gesz}gan-du7-mesz_-szi-in
381'. u3 _1(u) 2(disz) udu-mesz_ szad-di {d}lamma pi-ti-iq u2-ru-de-e nam-ri
382'. sza gat-tu szur-ru-hu szuk-lu-lu mi-na-a-ti
383'. _2(disz) udu-mesz_ szad-di {d}lamma _{na4}gesz-nu11-gal_
384'. _1(disz) usz 1(u) 2(disz) udu-mesz_ szad-di {d}lamma u3 _ab2-za-za_-a-te
385'. {na4}pi-i-li pe-s,e-e _si-gar_ a-s,e-e
386'. u3 ne2-re-bi as-mesz u2-sza2-as,-bit
387'. _{na4}kun4-mesz {na4}dur2-mi-na-ban3-da {na4}gesz-nu11-gal_
388'. u3 _kun4-mesz_ {na4}pi-i-li _gal-mesz_
389'. da-ad2-me na-ki-ri ki-szit-ti _szu-min_-ia
390'. qe2-reb-szi-in es-si-ha a-sur-ru-szi-in
391'. u2-sza2-as-hi-ra a-na tab-ra-a-ti u2-sza2-lik
392'. _{gesz}kiri6-mah_-hu tam-szil {kur}ha-ma-nim
393'. sza gi-mir _szim-hi-a gurun_ s,ip-pa-a-ti
394'. _gesz-mesz_ tuk-lat _kur_-i u3 {kur}kal-di
395'. qe2-reb-szu2 hur-ru-szu2 i-ta-a-sza2 az-qu-up
396'. nina{ki} sza ul-tu u4-mu pa-ni
397'. _9(disz) lim 3(disz) me_ i-na _1(disz)-kusz3_ szu-bat li-me-ti-szu
398'. _bad3_ u3 _bad3-szul-hi_ ul u2-sze-pi-szu
399'. a-li-kut mah-ri ma-al-ki
400'. _1(u) 2(disz)? lim 5(disz) me 1(u) 5(disz)_ a-szar ta-mir-ti li-mit _iri_
401'. s,e-er me-szi-ih-ti mah-ri-ti u2-rad-di-ma
402'. _2(u) 1(disz) lim 8(disz) me 1(u) 5(disz)_ i-na _as4-lum gal_-ti u2-kin min3-da-tusz
403'. sza _bad3_-szu2 _gal_-i bad3-ni2-gal-bi-lu2-kur2-ra-szu2-szu2
404'. du-u2-ru sza nam-ri-ru-szu2 na-ki-ri sah-pu
405'. s,e-er pi-i-li tem-me-en-szu2 ad-di-ma _4(u) sig4_ u2-kab-bir
406'. i-na _1(disz) me 1(gesz2) 2(u)_ ti-ib-ki ul-la-a re-szi-szu2
407'. a-na er-bet-ti sza2-a-ri _1(u) 4(disz) ka2-gal-mesz_
408'. pa-nu u3 ar-ka i-na s,i-li ki-lal-la-an
409'. a-na e-re-bi u3 a-s,e-e
410'. u2-szap-ta-a qe2-reb-szu2
411'. {d}szar2-ur4 mu-szam-qit a-a-bi _lugal_
412'. _ka2-gal_ ha-an-du-u2-ri
413'. lil-bur _ensi2_ {d}asz-szur
$ n lines broken
414'. _ka2-gal_ {d}sza2-masz sza {kur}ga-a-gal
415'. {d}isz-tar za-nin-ki kur-bi
416'. _ka2-gal_ {d}nin-lil2 sza {iri}kar-{d}nin-lil2
417'. mu-sze-s,a-at _uzu azag2 ka2-gal_ musz-la-lum
418'. du-muq asz2-na-an u3 {d}lahar qe2-reb-sza2
419'. ka-a-a-an _ka2-gal_ {iri}szi-ba-ni-bi
420'. ba-bi-lat hi-s,ib hur-sza2-a-ni _ka2-gal_ {kur}ha-lah2-hi
421'. _szunigin 8(disz) ka2-gal-mesz {d}utu-e3_
422'. me2-eh-ret {tu15}szu-u2-ti u3 {tu15}sza2-de-e
423'. az-ku-ra ni-bit-si-in
424'. {d}iszkur sza2-ri-ik _he2-gal2_ a-na _kur_
425'. _ka2-gal_ {d}iszkur sza am-ba-si
426'. {d}er3-ra mu-szam-qit a-a-bi
427'. _ka2-gal_ {d}u-gur sza {iri}tar-bi-s,i
428'. {d}igi-sig7-sig7 mu-szam-me-eh s,ip-pa-a-ti
429'. _ka2-gal {gesz}kiri6-mesz_
430'. _szunigin 3(disz) ka2-gal-mesz_ sza me2-eh-ret {tu15}il-ta-a-ni
431'. at-ta-bi zi-kir-szi-in
432'. {d}e2-a mu-sze-szir kup3-pi-ia _ka2-gal_ ma-as-qe2-e
433'. mu-sze-ri-bat mi-szir3-ti da-ad2-me _ka2-gal_ ka-a-ri
434'. pa-qi2-da-at ka-la-ma _ka2-gal e2-gal_ ma-szar-ti
435'. _szunigin 3(disz) ka2-gal-mesz_ sza me2-eh-ret {tu15}a-mur-ri
436'. at-tas-qa-ra szu-me-szin
437'. sza2 szal-hi-i bad3-nig2-erim2-hu-luh-ha
438'. mu-gal-lit za-ma-a-ni usz-sze-szu2 ap-ti-ma
439'. _4(u) 5(disz) ninda_ u2-szap-pil-ma u2-sza2-ak-szid _a-mesz_ nag-bi
440'. qe2-reb ma-a-me szap-la-a-nu _na4 kur_-i dan-ni ak-si-ma
441'. e-la-nisz a-di pa-as2-qi2-szu i-na {na4}pi-i-li _gal-mesz_
442'. u2-nak-kil szi-pir-szu sza nina{ki} _iri_ be-lu-ti-ia
443'. szu-bat-su usz-rab-bi re-ba-te-szu
444'. u2-sza2-an-dil-ma u2-nam-mir _gin7_ u4-mi
$ n lines broken
445'. a-na me-ti-iq _{gesz}gigir_ be-lu-ti-ia u2-sze-pisz ti-tur-ru
446'. i-te-e _iri 1(disz) {gesz}kiri6-mah_-hi _1(disz) {gesz}kiri6_ am-ba-si
447'. kul-lat _szim-hi-a_ {kur}hat-ti mut-hum-mu ma-ti-tan
448'. _gesz-mesz_ tuk-lat _kur_-i u3 {kur}kal-di
449'. u2-har-ri-sza2 qe2-reb-szu2-un
450'. e-le-en _iri edin_ sza2-ab-bur-ti
451'. _{gesz}gesztin_ gi-mir _gurun_ u3 {gesz}se-er-di
452'. az-qup s,e-ru-usz-sza2 asz2-szu2 szur-pu-szu2 s,ip-pa-a-ti
453'. _a-sza3_ ta-mir-ti e-le-en _iri_
454'. _nigidamin-ta-am3_ a-na _dumu-mesz_ nina{ki} pil-ku
455'. u2-pal-lik-ma u2-szad-gi-la pa-nu-usz-szu2-un
456'. a-na mit,-ra-a-ti szum-mu-hi
457'. ul-tu pa-a-t,i {iri}ki-si-ri a-di
458'. ta-mir-ti nina{ki} _kur_-a u3 bi-ru-tu2
459'. i-na ak-kul-la-te _an-bar_
460'. u2-szat-tir-ma u2-sze-szir {i7}har-ru
461'. _1(disz) 1/2(disz) danna2_ qaq-qa-ru ul-tu qe2-reb {i7}hu-su-ur
462'. ma-a-me da-ru-u2-ti a-szar-sza2 u2-szar-da-a
463'. [...] x
$ n lines broken
464'. [...] x [...]
465'. [...] _szah2-mesz {gesz}gi_
466'. a-lap qi2-szi u2-rap-pi-szu ta-lit-tu
467'. _{gesz}mes-ma2-kan-na {gesz}szur-min3_ tar-bit s,ip-pa-a-ti
468'. _gi ambar-mesz_ sza qe2-reb {i7}a-gam-me
469'. ak-szit,-ma a-na szip-ri hi-szih-ti
470'. _e2-gal-mesz_ be-lu-ti-ia lu e-pu-usz
471'. ul-tu szip-ri _e2-gal_-ia u2-qat-tu-u2
472'. {d}asz-szur _en gal dingir-mesz_ u3 _{d}isz-tar-mesz_
473'. a-szi-bu-ut _kur_ asz-szur{ki} ina qer-bi-sza2
474'. aq-re-ma _{udu}siskur-mesz_ tasz-ri-ih-te
475'. aq-qi2-ma u2-szat-lim kad3-ra-a-a
476'. _i3-gesz_ {gesz}ser2-di u3 hi-bi-isz-ti
477'. sza _{gesz}kiri6-mesz edin_ sza2-ab-bur-ti
478'. u2-raq-qa-a a-na ru-usz-ti
479'. i-na tasz-ri-it _e2-gal_ sza ba-hu-la-ti _kur_-ia
480'. u2-sza2-asz2-qa-a muh-ha-szu2-un
481'. _gesztin_ du-usz-szu-pu s,ur-ra-szu2-un am-kir
482'. a-na ar2-kat3 u4-me ina _lugal-mesz_-ni _dumu-mesz_-ia
483'. sza {d}asz-szur a-na _re-e2-um_-ut _kur_
484'. u3 _ug3-mesz_ i-nam-bu-u zi-kir-szu2
485'. e-nu-ma _bad3_ sza2-a-tu i-lab-bi-ru-ma
486'. en-na-hu an-hu-us-su lu-ud-disz
487'. _mu-sar_-e szi-t,ir szu-me-ia li-mur-ma
488'. _i3-gesz_ lip-szu-usz _{udu}siskur_ liq-qi2
489'. a-na asz2-ri-szu2 lu-ter
490'. {d}asz-szur u3 {d}isz-tar
491'. ik-ri-bi-szu2 i-szem-mu-u2

Archival view of P462823