CDLI-Archival View

Publication
Primary publication:	RINAP 3/1 Sennacherib 017 composite
Author:	Grayson, A. Kirk & Novotny, Jamie R.
Publication date:	2012
Secondary publication(s):
Citation:
Author remarks:
Published collation:
CDLI no.:	P462825
UCLA Library ARK	21198/z12n66zc
CDLI comments:

Source of original electronic files
Catalogue:	20140116 cdliadmin
Transliteration:	Grayson, A. Kirk & Novotny, Jamie R.
Translation:	no translation
Photo:	If not otherwise indicated, digital images were prepared in their current form by CDLI staff, in some cases with the kind assistance of collection staff. For terms of use, click here.
Line Art:	If not otherwise indicated, line art drawings prepared in their digital form by CDLI staff are to be credited to primary publication author(s).

Collection Information
Owner:
Museum no.:
Accession no.:
Acquisition history:

Text Content:
Genre:	Royal/Monumental
Sub-genre:	composite
Sub-genre remarks:
Composite no.:	Q003491
Language:	Akkadian

Physical Information
Object type:	other (see object remarks)
Material:	composite
Object remarks:	composite text
Measurements (mm):	x x
Object preservation:
Surface preservation:
Condition description:
Join information:
Seal no.:
Seal information:

Provenience:
Provenience:	Nineveh (mod. Kuyunjik)
Provenience remarks:
Excavation no.:
Findspot square:
Elevation:
Stratigraphic level:
Findspot remarks:

Chronology:
Period:	Neo-Assyrian (ca. 911-612 BC)
Period remarks:
Date of Origin:	Sennacherib.00.00.00
Dates referenced:	Sennacherib.00.00.00
Date remarks:
Alternative years:
Accounting period:

Unclear abbreviations? Can you improve upon the content of this page? Please contact us!

Composite text

surface a
1. {disz}{d}en-zu-szesz-mesz-eri-ba _lugal gal_
2. _lugal_ dan-nu _lugal_ kisz-sza2-ti
3. _lugal kur_ asz-szur{ki} _lugal_ kib-rat _limmu2_-ti
4. _re-e2-um_ it-pe-szu mi-gir _dingir-mesz gal-mesz_
5. na-s,ir kit-ti ra-'i-im mi-sza2-ri
6. e-pisz u2-sa-a-ti a-lik tap-pu-ut
7. a-ki-i sa-hi-ru dam-qa-a-ti
8. et,-lum git2-ma-lum zi-ka-ru qar-du
9. a-sza2-red kal ma-al-ki rap-pu la-'i-it,
10. la ma-gi-ri mu-szab-ri-qu za-ma-a-ni
11. {d}asz-szur _kur_-u2 _gal_-u2 _lugal_-ut la sza2-na-an
12. u2-szat-li-ma-an-ni-ma _ugu_ gi-mir
13. a-szib pa-rak-ki u2-szar-ba-a _{gesz}tukul-mesz_-ia
14. ul-tu _a-ab-ba_ e-le-ni-ti
15. sza szul-mu {d}utu-szi a-di tam-tim szap-li-ti
16. sza s,i-it {d}utu-szi
17. gim-ri s,al-mat _sag-du_ u2-szak-nisz sze-pu-u2-a
18. u3 mal-ki szep-s,u-ti e-du-ru ta-ha-zi
19. da-ad2-me-szu2-un iz-zi-bu-ma
20. ki-ma su-tin-ni ni-gi-is,-s,i
21. e-disz ip-par-szu a-szar la 'a-a-ri
22. i-na mah-re-e ger-ri-ia
23. sza {disz}{d}marduk-ibila-szum2-na _lugal_ {kur}kar2-{d}dun-ia2-asz3
24. a-di _erin2 hi-a_ elam-ma{ki} re-s,i-szu2
25. i-na ta-mir-ti kisz{ki} asz2-ta-kan _bad5-bad5_-szu2
26. i-na _muru2_ tam-ha-ri szu-a-tu
27. e-zib _karasz_-su e-disz ip-par-szid-ma
28. na-pisz-tusz e-t,i2-ir _{gesz}gigir-mesz ansze-kur-ra-mesz_
29. {gesz}s,u-um-bi _{ansze}kunga-mesz_
30. sza i-na qit-ru-ub ta-ha-zi
31. u2-masz-szi-ru ik-szu-da _szu-min_-a-a
32. a-na _e2-gal_-szu2 sza qe2-reb babila2{ki}
33. ha-disz e-ru-um-ma ap-te-e-ma _e2_ ni-s,ir-ti-szu2
34. _ku3-sig17 ku3-babbar_ u2-nu-ut _ku3-sig17 ku3-babbar na4_ a-qar-tu
35. mim-ma szum-szu2 _nig2-szu nig2-gur11_ la ni-bi ka-bit-tu _gun_
36. {munus}_ug3-mesz e2-gal_-szu2 _{lu2}tirum-mesz_ {lu2}man-za-az pa-ni
37. _{lu2}nar-mesz_ {munus}_nar-mesz_
38. si-hir-ti um-ma-a-ni ma-la ba-szu-u2
39. mut-tab-bi-lu-tu2 _e2-gal_-usz
40. u2-sze-s,a-am-ma szal-la-tisz am-nu
41. i-na e-muq {d}asz-szur _en_-ia 1(gesz2) 1(u) 5(disz) _iri-mesz_-szu2 dan-nu-ti
42. _e2 bad3-mesz_-ni sza {kur}kal-di
43. u3 4(disz) _me_ 2(u) _iri-mesz_-ni _tur-mesz_ sza li-me-ti-szu2-nu
44. al-me _kur_-ud asz2-lu-la szal-la-su-un
45. {lu2}ur2-bi {lu2}a-ra-mu {lu2}kal-du
46. sza qe2-reb unu{ki} nibru{ki} kisz{ki}
47. {iri}hur-sag-kalam-ma gu2-du8-a{ki} zimbir{ki}
48. a-di _dumu-mesz iri en_ hi-it,-t,i u2-sze-s,a-am-ma
49. szal-la-tisz am-nu
50. i-na ta-a-a-ar-ti-ia
51. {lu2}tu-'u-mu-na {lu2}ri-hi-hu
52. {lu2}ia-daq-qu {lu2}u2-bu-du
53. {lu2}gib-re-e {lu2}ma-la-hu
54. {lu2}gu-ru-mu {lu2}u2-bu-lu
55. {lu2}da-mu-nu {lu2}gam-bu-lum
56. {lu2}hi-in-da-ru {lu2}ru-'u-u-a
57. {lu2}pu-qu-du {lu2}ha-am-ra-a-nu
58. {lu2}ha-ga-ra-nu {lu2}na-ba-tu
59. {lu2}li-i'-ta-a-u2 {lu2}a-ra-mu
60. la kan-szu-ti mit-ha-risz ak-szud{ud}
61. 2(disz) _me_ 8(disz) _lim un-mesz tur gal nita_ u _munus ansze-kur-ra-mesz_
62. _{ansze}kunga-mesz ansze-mesz {ansze}gam-mal-mesz gu4-mesz_
63. u3 _u8-udu hi-a_ sza la ni-bi szal-la-tu
64. ka-bit-tu asz2-lu-la a-na qe2-reb _kur_ asz-szur{ki}
65. i-na me-ti-iq ger-ri-ia sza {disz}{d}muati-en-mu-mesz
66. {lu2}qi2-pi {iri}ha-ra-ra-te
67. _ku3-sig17 ku3-babbar_ {gesz}mu-suk-kan-ni _gal-mesz ansze-mesz_
68. _{ansze}gam-mal-mesz gu4-mesz_ u3 _u8-udu hi-a_
69. ta-mar-ta-szu2 ka-bit-tu am-hur
70. ba-hu-la-te {iri}hi-rim-me _{lu2}kur2_ ak-s,i
71. i-na _{gesz}tukul-mesz_ u2-szam-qit-ma e-du ul e-zib
72. pag-ri-szu2-un i-na ga-szi-szi a-lul-ma
73. si-hir-ti _iri_ u2-szal-me
74. na-gu-u2 szu-a-tu a-na esz-szu-ti as,-bat
75. 1(disz)-en _gu4_ 1(u) _udu-mesz_ 1(u) _ansze gesztin_ 2(u) _ansze zu2-lum-ma_
76. re-sze-te-szu2 a-na _dingir-mesz_-ni _kur_ asz-szur{ki}
77. _en-mesz_-ia u2-kin da3-ri-szam
78. i-na 2(disz)-e ger-ri-ia {d}asz-szur be-li2 u2-tak-kil-an-ni-ma
79. a-na _kur_ {lu2}kasz-szi-i u3 _kur_ {lu2}ia-su-bi-gal-la-a-a
80. sza ul-tu ul-la a-na _lugal-mesz_-ni _ad-mesz_-ia
81. la kit-nu-szu lu al-lik
82. qe2-reb hur-sza2-a-ni zaq-ru-ti _a-sza3_ nam-ra-s,i
83. i-na _ansze-kur-ra_ ar-kab-ma _{gesz}gigir giri3-min_-ia
84. i-na ti-ik-ka-a-te u2-sza2-asz2-szi
85. asz2-ru szup-szu-qu i-na _giri3-min_-ia ri-ma-nisz at-tag-gisz
86. {iri}e2-{disz}ki-lam-za-ah {iri}ha-ar-disz-pi
87. {iri}e2-{disz}ku-bat-ti _iri-mesz_-szu2-nu
88. _e2 bad3-mesz_-ni dan-nu-ti al-me _kur_-ud
89. _ug3-mesz ansze-kur-ra-mesz {ansze}kunga-mesz_
90. _ansze-mesz gu4-mesz_ u3 _u8-udu hi-a_
91. ul-tu qer-bi-szu2-un u2-sze-s,a-am-ma u2-sze-s,a-am-ma
92. u3 _iri-mesz_-szu2-nu _tur-mesz_ sza ni-ba la i-szu-u2
93. ap-pul aq-qur u2-sze-me kar-mesz
94. _e2 edin_ kul-ta-ri mu-sza2-bi-szu2-nu
95. ina {d}gesz-bar aq-mu-ma di-tal-lisz u2-sze-mi
96. u2-ter-ma {iri}e2-{disz}ki-lam-za-ah szu-a-tu
97. a-na bir-tu-ti as,-bat _ugu_ sza u4-me pa-ni
98. _bad3-mesz_-szu2 u2-dan-nin-ma
99. _ug3-mesz kur-kur_ ki-szit-ti _szu-min_-ia
100. i-na lib3-bi u2-sze-szib
101. _ug3-mesz kur_ {lu2}kasz-szi-i
102. u3 _kur_ {lu2}ia-su-bi-gal-la-a-a
103. sza la-pa-an _{gesz}tukul-mesz_-ia ip-par-szid-du
104. ul-tu qe2-reb _kur_-i u2-sze-ri-dam-ma
105. i-na {iri}har-disz-pi {iri}e2-{disz}ku-bat-ti u2-szar-me
106. i-na _szu-min_ {lu2}szu-ut _sag_-ia
107. _{lu2}en-nam_ {iri}ar-rap-ha am-nu-szu2-nu-ti
108. _{na4}na-ru2-a_ u2-sze-pisz-ma
109. li-i-tum ki-szit-ti _szu-min_ sza _ugu_-szu2-un asz2-tak-ka-nu
110. s,e-ru-usz-szu2 u2-sza2-asz2-t,ir-ma i-na qer-bi _iri_ ul-ziz
111. pa-an ni-ri-ia u2-ter-ma
112. a-na {kur}el-li-pi as,-s,a-bat har-ra-nu
113. el-la-mu-u2-a {disz}is-pa-ba-a-ra _lugal_-szu2-un
114. _iri-mesz_-szu2 dan-nu-ti _e2_ ni-s,ir-ti-szu2
115. u2-masz-szir-ma a-na ru-qe2-e-te in-na-bit
116. gim-ri _kur_-szu2 _dagal_-tim _gin7 muru9_ as-hu-up
117. {iri}mar-u2-bisz-ti {iri}ak-ku-ud-du
118. _iri-mesz_-ni _e2 lugal_-ti-szu2 a-di 3(u) 4(disz) _iri-mesz tur-mesz_
119. sza li-me-ti-szu2-nu al-me _kur_-ud
120. ap-pul aq-qur ina {d}gesz-bar aq-mu
121. _ug3-mesz tur gal nita_ u _munus ansze-kur-ra-mesz_
122. _{ansze}kunga-mesz ansze-mesz {ansze}gam-mal-mesz gu4-mesz_
123. u3 _u8-udu hi-a_ a-na la mi-nam asz2-lu-lam-ma
124. a-di la ba-szi-i u2-sza2-lik-szu-ma
125. u2-s,a-ah-hi-ir _kur_-su
126. {iri}s,i-s,i-ir-tu {iri}ku-um-ma-ah-lum
127. _iri-mesz_ dan-nu-ti a-di _iri-mesz tur-mesz_
128. sza li-me-ti-szu2-nu {kur}e2-{disz}ba-ar-ru-u
129. na-gu-u2 a-na gi-mir-ti-szu2
130. ul-tu qe2-reb _kur_-szu2 ab-tuq-ma
131. _ugu_ mi-s,ir _kur_ asz-szur{ki} u2-rad-di
132. {iri}el-en-za-asz2 a-na _iri lugal_-u2-ti
133. u3 dan-na-at na-ge-e szu-a-tu as,-bat-ma
134. _mu_-szu2 mah-ra-a u2-nak-kir-ma
135. {iri}kar-{disz}{d}en-zu-szesz-mesz-eri-ba
136. at-ta-bi ni-bit-su
137. _ug3-mesz kur-mesz_ ki-szit-ti _szu-min_-ia i-na lib3-bi u2-sze-szib
138. i-na _szu-min_ {lu2}szu-ut _sag_-ia
139. _{lu2}en-nam_ {iri}har-har am-nu-ma
140. u2-rap-pisz ma-a-ti
141. i-na ta-a-a-ar-ti-ia
142. sza {kur}ma-da-a-a ru-qu-u2-te
143. sza i-na _lugal-mesz_-ni _ad-mesz_-ia
144. ma-am-man la isz-mu-u2 zi-kir _kur_-szu2-un
145. man-da-ta-szu2-nu ka-bit-tu am-hur
146. a-na ni-ri be-lu-ti-ia
147. u2-szak-ni-su-nu-ti
148. i-na szal-szi ger-ri-ia a-na {kur}hat-ti lu al-lik
149. {disz}lu-li-i _lugal_ {iri}s,i-du-un-ni
150. pul-hi me-lam-me be-lu-ti-ia is-hu-pu-szu2-ma
151. a-na ru-uq-qi2 _muru2_ tam-tim in-na-bit-ma _kur_-szu2 e-mid
152. {iri}s,i-du-un-nu _gal_-u2 {iri}s,i-du-un-nu s,e-eh-ru
153. {iri}e2-zi-it-te {iri}s,a-ri-ip-tu
154. {iri}ma-hal-li-ba {iri}u2-szu-u2
155. {iri}ak-zi-bi {iri}ak-ku-u2
156. _iri-mesz_-szu2 dan-nu-ti _e2 bad3-mesz_ a-szar ri-i-ti
157. u3 masz-qi2-ti _e2_ tuk-la-ti-szu2
158. ra-szub-bat _{gesz}tukul_ {d}asz-szur _en_-ia
159. is-hu-pu-szu2-nu-ti-ma ik-nu-szu sze-pu-u2-a
160. {disz}tu-ba-a'-lu ina _{gesz}gu-za lugal_-u2-ti
161. _ugu_-szu2-un u2-sze-szib-ma
162. _gun_ man-da-at-tu be-lu-ti-ia
163. szat-ti-szam la ba-at,-lu
164. u2-kin s,e-ru-usz-szu2
165. sza {disz}mi-in-hi-im-mu {iri}sam-si-mu-ru-na-a-a
166. {disz}tu-ba-a'-lu {iri}s,i-du-un-na-a-a
167. {disz}ab-di-li-i'-ti {iri}a-ru-da-a-a
168. {disz}u2-ru-mil-ki {iri}gu-ub-la-a-a
169. {disz}mi-ti-in-ti {iri}as-du-da-a-a
170. {disz}bu-du-dingir {iri}{kur}e2-{disz}am-ma-na-a-a
171. {disz}kam-mu-su-na-ad-bi {kur}ma-'a-ba-a-a
172. {disz}{d}a-a-ram-mu {kur}u2-du-um-ma-a-a
173. _lugal-mesz_-ni _kur_ mar-tu{ki} ka-li-szu2-un
174. _igi-sa2_-e szad-lu-ti ta-mar-ta-szu2-nu ka-bit-tu
175. a-di 4(disz)-szu2 a-na mah-ri-ia isz-szu-nim-ma
176. isz-szi-qu _giri3-min_-ia
177. u3 {disz}s,i-id-qa-a _lugal_ {iri}is-qa-al-lu-na
178. sza la ik-nu-szu a-na ni-ri-ia
179. _dingir-mesz e2 ad_-szu sza2-a-szu _dam_-su _dumu-mesz_-szu2
180. _dumu-munus-mesz_-szu2 _szesz-mesz_-szu2 _numun e2 ad_-szu2
181. as-su-ha-am-ma a-na _kur_ asz-szur{ki} u2-rasz-szu
182. {disz}lugal-lu-da3-a-ri _dumu_ {disz}ru-kib-ti _lugal_-szu2-nu mah-ru-u
183. _ugu un-mesz_ {iri}is-qa-al-lu-na asz2-kun-ma
184. na-dan _gun_ kad3-re-e be-lu-ti-ia
185. e-mid-su-ma i-sza2-a-t,a ab-sza2-a-ni
186. i-na me-ti-iq ger-ri-ia {iri}e2-da-gan-na
187. {iri}ia-ap-pu-u2 {iri}ba-na-a-a-bar-qa
188. {iri}a-zu-ru _iri-mesz_ sza {disz}s,i-id-qa-a
189. sza a-na _giri3-min_-ia ar2-hisz la ik-nu-szu
190. al-me _kur_-ud asz2-lu-la szal-la-su-un
191. _{lu2}szagina-mesz {lu2}nun-mesz_ u3 _ug3-mesz_
192. {iri}am-qar-ru-na sza {disz}pa-di-i _lugal_-szu2-nu
193. _en_ a-de-e u3 ma-mit sza _kur_ asz-szur{ki}
194. bi-re-tu2 _an-bar_ id-du-ma a-na {disz}ha-za-qi-a-u2
195. {kur}ia-u2-da-a-a id-di-nu-szu2 nak-risz
196. a-na an-zil-li i-pu-szu2 ip-lah3 _sza3_-szu2-un
197. _lugal-mesz_-ni {kur}mu-us,-ri _{lu2}erin2-mesz {gesz}pan {gesz}gigir-mesz_
198. _ansze-kur-ra-mesz_ sza _lugal_ {kur}me-luh-ha e-mu-qi2 la ni-bi
199. ik-te-ru-nim-ma il-li-ku re-s,u-us-su-un
200. i-na ta-mir-ti {iri}al-ta-qu-u2 el-la-mu-u-a
201. si-id-ru szit-ku-nu u2-sza2-'a-lu _{gesz}tukul-mesz_-szu2-un
202. i-na tukul-ti {d}asz-szur _en_-ia
203. it-ti-szu2-un am-da-hi-is,-ma asz2-ta-kan _bad5-bad5_-szu2-un
204. _{lu2}en {gesz}gigir-mesz_ u3 _dumu-mesz lugal_ {kur}mu-s,u-ra-a-a
205. a-di _{lu2}en {gesz}gigir-mesz_ sza _lugal_ {kur}me-luh-ha
206. bal-t,u-su-un i-na _muru2_ tam-ha-ri
207. ik-szu-da _szu-min_-a-a {iri}al-ta-qu-u {iri}ta-am-na-a
208. al-me _kur_-ud asz2-lu-la szal-la-su-un
209. a-na {iri}am-qar-ru-na aq-rib-ma
210. _{lu2}szagina-mesz {lu2}nun-mesz_ sza hi-it,-t,u u2-szab-szu-u
211. a-duk-ma i-na di-ma-a-ti
212. si-hir-ti _iri_ a-lul pag-ri-szu2-un
213. _dumu-mesz iri_ e-pisz an-ni u3 gil2-la-ti
214. a-na szal-la-ti am-nu
215. si-it-tu-te-szu2-nu la ba-bil hi-t,i-ti
216. u3 gul-lul-ti
217. sza a-ra-an-szu2-nu la ib-szu-u2
218. usz-szur-szu2-un aq-bi
219. {disz}pa-di-i _lugal_-szu2-nu
220. ul-tu qe2-reb {iri}ur-sa-li-im-ma
221. u2-sze-s,a-am-ma ina _{gesz}gu-za_ be-lu-ti
222. _ugu_-szu2-un u2-sze-szib-ma man-da-at-tu
223. be-lu-ti-ia u2-kin s,e-ru-usz-szu2
224. u3 {disz}ha-za-qi-a-u2 {kur}ia-u2-da-a-a
225. sza la ik-nu-szu a-na ni-ri-ia
226. 4(u) 6(disz) _iri-mesz_-szu2 _e2 bad3-mesz_-ni dan-nu-ti
227. u3 _iri-mesz tur-mesz_ sza li-me-ti-szu2-nu
228. sza ni-ba la i-szu-u2
229. i-na szuk-bu-us a-ram-me
230. u3 qit-ru-ub szu-pe-e
231. mit-hu-us, zu-uk _giri3-min_ pil-szi nik-si
232. u3 kal-ban-na-te al-me _kur_-ud
233. 2(disz) _me lim_ 1(disz) _me_ 5(u) _ug3-mesz tur gal_
234. _nita_ u _munus ansze-kur-ra-mesz {ansze}kunga-mesz_
235. _ansze-mesz {ansze}gam-mal-mesz gu4-mesz_
236. u3 _u8-udu hi-a_ sza la ni-bi ul-tu qer-bi-szu2-un
237. u2-sze-s,a-am-ma szal-la-tisz am-nu
238. sza2-a-szu2 _gin7 muszen_ qu-up-pi qe2-reb
239. {iri}ur-sa-li-im-ma _iri lugal_-ti-szu2 e-sir2-szu
240. {iri}hal-s,u-_mesz_ ugu_-szu2 u2-rak-kis-ma
241. a-s,e-e _ka2-gal iri_-szu2
242. u2-ter-ra ik-ki-bu-usz
243. _iri-mesz_-szu2 sza asz2-lu-la
244. ul-tu qe2-reb _kur_-szu2 ab-tuq-ma
245. a-na {disz}mi-ti-in-ti _lugal_ {iri}as-du-di
246. {disz}pa-di-i _lugal_ {iri}am-qar-ru-na
247. u3 {disz}gissu-en _lugal_ {iri}ha-zi-ti
248. ad-din-ma u2-s,a-ah-hi-ir _kur_-su
249. e-li _gun_ mah-ri-ti na-da-an szat-ti-szu2-un
250. man-da-at-tu kad3-re-e be-lu-ti-ia
251. u2-rad-di-ma u2-kin s,e-ru-usz-szu2-un
252. szu-u2 {disz}ha-za-qi-a-u2 pul-hi me-lam-me
253. be-lu-ti-ia is-hu-pu-szu2-ma
254. {lu2}ur2-bi u3 _{lu2}erin2-mesz_-szu2 _saga-mesz_
255. sza a-na dun-nu-un {iri}ur-sa-li-im-mu
256. _iri lugal_-ti-szu2 u2-sze-ri-bu-ma ir-szu2-u2 til-la-a-te
257. it-ti 3(u) _gun ku3-sig17_ 8(disz) _me gun ku3-babbar_
258. ni-siq-ti gu-uh-li tak2-kas3-si _{na4}an-za-gul-me gal-mesz_
259. _{gesz}na2-mesz zu2 {gesz}gu-za-mesz_ ne2-me-di _zu2_
260. _kusz am-si zu2 am-si {gesz}esi {gesz}tug2_
261. mim-ma szum-szu2 ni-s,ir-tu ka-bit-tu
262. u3 _dumu-munus-mesz_-szu2 {munus}_ug3-mesz e2-gal_-szu2
263. _{lu2}nar-mesz_ {munus}_nar-mesz_
264. a-na qe2-reb nina{ki} _iri_ be-lu-ti-ia
265. _egir_-ia u2-sze-bi-lam-ma
266. a-na na-dan man-da-at-ti
267. u3 e-pesz _ARAD2_-u2-ti isz-pu-ra rak-bu-szu2
268. i-na 4(disz)-e ger-ri-ia {d}asz-szur be-li2 u2-tak-kil-an-ni-ma
269. um-ma-na-te-ia gap-sza2-a-te ad-ke-ma
270. a-na {kur}e2-{disz}ia-kin7 a-la-ku aq-bi
271. i-na me-ti-iq ger-ri-ia
272. sza {disz}szu-zu-bi {lu2}kal-da3-a-a
273. a-szib qe2-reb {i7}a-gam-me
274. ina {iri}bi-it-tu-u2-tu asz2-ta-kan _bad5-bad5_-szu2
275. szu-u2 hur-ba-szu ta-ha-zi-ia _ugu_-szu2 im-qut-ma
276. it-ru-ku _sza3_-szu2 ki-ma az-za-ri e-disz ip-par-szid-ma
277. ul in-na-mir a-szar-szu
278. pa-an ni-ri-ia u2-ter-ma
279. a-na {kur}e2-{disz}ia-kin7 as,-s,a-bat har-ra-nu
280. szu-u2 {disz}{d}marduk-ibila-szum2-na
281. sza ina a-lak _kaskal_-ia mah-re-e
282. _bad5-bad5_-szu2 asz2-ku-nu u2-par-ri-ru el-lat-su
283. ri-gim _{gesz}tukul-mesz_-ia dan-nu-ti
284. u3 ti-ib ta-ha-zi-ia ez-zi e-dur-ma
285. a-na {kur}na-gi-a-te-ra-aq-qi2
286. sza qa-bal tam-ti is,-s,u-risz ip-pa-risz
287. _szesz-mesz_-szu2 _numun e2 ad_-szu2 sza u2-masz-szi-ru a-hi tam-tim
288. a-di si-it-ti _ug3-mesz kur_-szu2
289. ul-tu {kur}e2-{disz}ia-kin7 qe2-reb {i7}a-gam-me
290. ap-pa-ra-a-te u2-sze-s,a-am-ma szal-la-tisz am-nu
291. u2-ter-ma _iri-mesz_-szu2 ap-pul aq-qur u2-sze-me kar-mesz
292. _ugu en_ sa-li-me-szu2 _lugal {kur}elam-ma{ki}_
293. na-mur-ra-tu at-bu-uk
294. i-na ta-a-a-ar-ti-ia {disz}asz-szur-na-din-_mu_
295. _dumu_ resz-tu-u2 tar-bit bir-ki-ia
296. i-na _{gesz}gu-za_ be-lu-ti-szu2 u2-sze-szib-ma
297. _dagal_-tum _kur eme-gi7_ u3 uri{ki}
298. u2-szad-gil pa-nu-usz-szu2
299. i-na 5(disz) ger-ri-ia ba-hu-la-te {iri}tu-mur-ri
300. {iri}sza2-a-ru-um {iri}e-za-a-ma {iri}kib-szu2
301. {iri}hal-bu-da {iri}qu-u2-a {iri}qa-na
302. sza _gin7_ qin-ni _ti8_{muszen} a-sza2-red _muszen hi-a_
303. s,e-er zuq-ti {kur}ni-pur _kur_-i mar-s,i
304. szu-bat-su-un szit-ku-na-at-ma la kit-nu-szu
305. a-na ni-i-ri i-na _giri3-min_ {kur}ni-pur ka-ra-szi u2-sza2-asz2-kin-ma
306. it-ti {lu2}qur-bu-ti _giri3-min_-ia na-as2-qu-ti
307. u3 _{lu2}erin2-mesz_ ta-ha-zi-ia la ga-me-lu-ti
308. a-na-ku _gin7 am_ ek-di pa-nu-usz-szu2-un as,-bat
309. hur-ri na-hal-li na-at-ba-ki _kur_-i me-le-e
310. mar-s,u-ti i-na _{gesz}gu-za_ asz2-ta-am-di-ih
311. a-szar a-na _{gesz}gu-za_ szup-szu-qu
312. i-na _giri3-min_-ia asz2-tah-hi-t,am _gin7_ ar-me
313. a-na zuq-ti sza2-qu-u2-ti s,e-ru-usz-szu2-un e-li
314. a-szar bir-ka-a-a ma-na-ah-tu i-sza2-a
315. s,e-er _na4 kur_-i u2-szib-ma _a-mesz_ {kusz}}na-a-d
316. ka-s,u-ti a-na s,u-me-ia lu asz2-ti
317. i-na _szu-si-mesz_ hur-sza2-a-ni ar-de-szu-nu-ti-ma
318. asz2-ta-kan tah-ta-szu2-un _iri-mesz_-szu2-nu _kur_-ud-ma
319. asz2-lu-la szal-la-su-un ap-pu-ul aq-qur ina {d}gesz-bar aq-mu
320. pa-an ni-ri-ia u2-ter-ma s,e-er {disz}ma-ni-ia-e
321. _lugal_ {iri}uk-ki szad-da-a-a-e la kan-sze as,-s,a-bat har-ra-nu
322. ur-hi la pe-tu-ti t,u-di pa-asz2-qu-ti
323. sza la-pa-an _kur-mesz_ mar-s,u-ti
324. ul-la-nu-u2-a qe2-reb-szu2-un ma-am-man
325. la il-li-ku _lugal-mesz_ pa-ni mah-ru-ti
326. i-na _giri3-min_ {kur}a-na-ra u3 {kur}up-pa _kur-mesz_
327. dan-nu-ti ka-ra-szi u2-sza2-asz2-kin-ma
328. a-na-ku i-na _{gesz}gu-za_ ne2-me-di it-ti _erin2-mesz_
329. ta-ha-zi-ia git2-ma-lu-ti
330. i-na ne-re-bi-szu2-un pi-qu-ti
331. szu-nu-hi-isz e-ru-um-ma mar-s,i-isz e-te-el-la-a
332. _szu-si-mesz kur-mesz_ pa-asz2-qa-a-ti
333. szu-u2 {disz}ma-ni-ia-e tur-bu-u'
334. _giri3-min erim-hi-<a>_-ia e-mur-ma {iri}uk-ku _iri lugal_-ti-szu2
335. e-zib-ma a-na ru-qe2-e-ti in-na-bit
336. {iri}uk-ku al-me _kur_-ud asz2-lu-la szal-la-su
337. mim-ma szum-szu2 _nig2-szu nig2-gur11_ ni-s,ir-ti _e2-gal_-szu2
338. ul-tu qer-bi-szu u2-sze-s,a-am-ma szal-la-tisz am-nu
339. u3 3(u) 5(disz) _iri-mesz_ sza pa-a-t,i li-me-ti-szu2
340. ak-szud{ud}-ma _ug3-mesz gu4-mesz_ u3 s,e-e-ni
341. _ansze-mesz_ asz2-lu-la ap-pu-ul aq-qur ina {d}gesz-bar aq-mu
342. i-na li-mu {disz}szul3-mu-_en {lu2}gar-kur_ {iri}tal-mu-si
343. {disz}ki-ru-a _{lu2}en-iri_ sza {iri}il-lu-ub-ri
344. _{lu2}ARAD2_ da-gil2 pa-ni-ia sza iz-zi-bu-szu _dingir-mesz_-szu2
345. ba-hu-la-te {iri}hi-lak-ki
346. usz-bal-kit-ma ik-s,u-ra ta-ha-zu
347. _ug3-mesz_ a-szi-bu-ut {iri}in-gi-ra-a u {iri}tar-zi
348. i-da-a-szu2 is-hu-ru-ma ger-ri {kur}qu-e
349. is,-ba-tu ip-ru-su a-lak-tu
350. _{lu2}erin2-mesz {gesz}pan_ na-szi tuk-szi u3 az-ma-re-e
351. _{gesz}gigir-mesz ansze-kur-ra-mesz_ ki-s,ir _lugal_-ti-ia
352. u2-ma-'e-er s,e-ru-usz-szu2-un
353. sza ba-hu-la-te {iri}hi-lak-ki
354. sza i-da-a-szu2 is-hu-ru
355. i-na qe2-reb _kur_-i mar-s,i isz-ku-nu tah-ta-szu2-un
356. {iri}in-gi-ra-a {iri}ta-ar-zu ik-szu-du-ma
357. isz-lu-lu szal-la-su-un
358. sza2-a-szu2 qe2-reb {iri}il-lu-ub-ri _iri_ dan-nu-ti-szu2
359. ni-tum il-mu-szu-ma is,-ba-tu mu-s,u-szu
360. i-na qur-ru-ub szu-pe-e nim-gal-li _bad3_
361. u3 kal-ban-na-te mit-hu-s,u zu-uk _giri3-min_
362. dab2-da-a-szu2 isz-ku-nu-ma is,-ba-tu _iri_
363. {disz}ki-ru-a _{lu2}en-iri_ a-di szal-lat _iri-mesz_-szu2
364. u3 _ug3-mesz_ {iri}hi-lak-ki sza i-da-a-szu2
365. is-hu-ru a-di _ansze-mesz gu4-mesz_ u3 s,e-e-ni
366. a-na {iri}ni-na-a a-di mah-ri-ia ub-lu-ni
367. sza {disz}ki-ru-a ma-szak-szu2 a-ku-us,
368. u2-ter-ma {iri}il-lu-ub-ru a-na esz-szu-te as,-bat
369. _ug3-mesz kur-kur_ ki-szit-ti _szu-min_-ia i-na lib3-bi u2-sze-szib
370. _{gesz}tukul_ {d}asz-szur _en_-ia qe2-reb-szu2 u2-szar-me
371. _{na4}na-ru2-a_-a sza _{na4}gesz-nu11-gal_ u2-sze-pisz-ma
372. ma-har-szu ul-zi-iz
373. i-na li-mu {disz}asz-szur_-en-pap {lu2}gar-kur_ {kur}kat-mu-hi
374. a-na _{iri}du6_-ga-ri-im-me
375. a-lum sza pa-a-t,i {kur}ta-ba-li
376. sza {disz}gur2-di-i _lugal_ {iri}ur-du-ti
377. ir-ku-su _{gesz}tukul-mesz_-szu2
378. as-su-uk-ma _{lu2}erim-mesz {gesz}pan_ na-szi tuk-szi
379. u3 az-ma-re-e _{gesz}gigir-mesz ansze-kur-ra-mesz_
380. ki-s,ir _lugal_-ti-ia u2-ma-'e-er s,e-ru-usz-szu2
381. _iri_ szu-a-tum ni-i-tum il-mu-ma
382. i-na szi-pik e-pe-ri u3 qur-ru-ub szu-pi-i
383. mit-hu-us, zu-uk _giri3-min_ is,-ba-tu _iri_
384. _ug3-mesz_ a-di _dingir-mesz_ a-szib lib3-bi-szu2 im-nu-u2 szal-la-ti-isz
385. _iri_ szu-a-tu ip-pu-lu iq-qu-ru
386. a-na _du6_ u3 kar-me u2-ter-ru
387. i-na szal-lat _kur-mesz_ sza-ti-na sza asz2-lu-la
388. _3(u) lim {gesz}pan 2(u) lim_ {gesz}a-ri-tu
389. i-na lib3-bi-szu2-nu ak-s,ur-ma
390. _ugu_ ki-s,ir _lugal_-ti-ia u2-rad-di
391. si-it-ti szal-lat na-ki-ri ka-bit-tu
392. a-na gi-mir _karasz_-ia u3 _{lu2}en-nam-mesz_-ia
393. _ug3-mesz_ ma-ha-za-ni-ia _gal-mesz_
394. ki-ma s,e-e-ni lu u2-za-'i-iz
395. i-na u4-me-szu-ma nina{ki} ma-ha-zu s,i-i-ru
396. _iri_ na-ram {d}isz-tar
397. sza nap-har ki-du-de-e _dingir-mesz_
398. u3 _{d}isz-tar-mesz_ ba-szu-u2 qe2-reb-szu2
399. tem-me-en-nu da-ru-u2 du-ru-usz s,a-a-ti
400. sza ul-tu ul-la it-ti szi-t,ir bu-ru-um-me
401. es,-rat-su es,-ret-ma szu-pu-u2 s,i-in-du-szu2
402. asz2-ru nak-lu szu-bat pi-risz-ti
403. sza mim-ma szum-szu2 szi-pir ni-kil-ti
404. gi-mir pel-lu-de-e ni-s,ir-ti lal3-gar
405. szu-ta-bu-lu qe2-reb-szu2
406. sza ul-tu ul-la _lugal-mesz_-ni
407. a-li-kut mah-ri _ad-mesz_-ia
408. ul-la-nu-u2-a be-lu-ut _kur_ asz-szur{ki} e-pu-szu2-ma
409. u2-ma-'e-ru ba-'u-lat {d}en-lil2
410. a-a-um-ma i-na lib3-bi-szu2-nu a-na szum-dul6 szu-bat _iri_
411. e-pesz _bad3_ szu-te-szur su-qa-a-ni
412. u3 ha-re-e _i7_ za-qa-ap s,ip-pa-a-ti
413. u2-zu-un-szu ul ib-szi-ma
414. ul usz-ta-bil ka-ras-su
415. a-na _e2-gal_ qer-bi-szu2 kum2-mu ri-mit be-lu-te
416. sza s,u-uh-hu-rat szu-bat-sa
417. e-pisz-tasz la nak-lat-ma
418. le-e-su ul id-da-a
419. lib-bu-usz ul ih-su-us
420. ia-a-ti {disz}{d}en-zu-szesz-mesz-eri-ba
421. _lugal_ kisz-sza2-ti _lugal kur_ asz-szur{ki}
422. e-pesz szip-ri szu-a-tu ki-i t,e3-em _dingir-mesz_
423. i-na uz-ni-ia ib-szi-ma ka-bat-ti ub-lam-ma
424. te-ne-szet {kur}kal-di {lu2}a-ra-me {kur}man-na-a-a
425. {kur}qu-e u3 {kur}hi-lak-ku {kur}pi-lisz-ti u3 {kur}s,ur-ri
426. sza a-na ni-ri-ia la ik-nu-szu
427. as-su-ha-am-ma tup-szik-ku u2-sza2-asz2-szi-szu2-nu-ti-ma
428. il-bi-nu _sig4 e2-gal_ mah-ri-tu
429. sza 3(disz) _me_ 1(gesz2) ina _1(disz) kusz3 us2_
430. 1(gesz2) 3(u) 5(disz) ina _1(disz) kusz3 sag-ki_
431. ma-ra-ku szit-ku-na-at-ma
432. s,u-uh-hu-rat szu-bat-sa
433. sza _lugal-mesz_-ni a-li-kut mah-ri _ad-mesz_-ia
434. a-na ri-mit be-lu-ti-szu2-un u2-sze-pi-szu-ma
435. la u2-nak-ki-lu szi-pir-sza2
436. _{d}alad-{d}lamma-mesz_ sza {na4}pi-i-li pe-s,e-e
437. i-na {iri}ta-as-ti-a-te sza e-ber-tan {i7}idigna
438. ib-tu-qu a-na mu-kil _ka2-mesz_-szi-in
439. a-na szu-pu-usz _{gesz}ma2-mesz_
440. qe2-reb _{gesz}tir-mesz gesz-mesz gal-mesz_
441. u2-qe2-ru i-na nap-har _kur_-szu2-un
442. i-na {iti}gu4 u4-mu a-dan-ni e-de-e pa-an szat-ti
443. i-na _{gesz}ma2-mesz_ s,i-ra-a-te
444. a-na a-ha-an-na-a u2-szeb-bi-ru-ni mar-s,i-isz
445. i-na ne2-ber ka-a-ri _{gesz}ma2-gu-la-mesz_
446. u2-t,e-eb-bu-u2 ba-hu-la-te-szu2-un
447. u2-sza2-ni-hu u2-lam-me-nu ka-ras-si-in
448. i-na da-na-ni u3 szup-szu-qi
449. mar-s,i-isz u2-bi-lu-nim-ma
450. u2-sza2-as,-bi-tu _ka2-mesz_-szi-in
451. {i7}te-bil-ti a-gu-u2 szit-mu-ru
452. sza ul-tu _ud-mesz su3-mesz_
453. t,e-eh _e2-gal_ i-ba-'u-u2-ma
454. i-na _illu_-sza2 gap-szi i-na usz-szi-sza2
455. ab-bu u2-szab-szu-u2 u2-ri-ib-bu tem-me-en-sza2
456. _e2-gal-tur-ra_ sza2-a-tu a-na si-hir-ti-sza2 aq-qur
457. sza {i7}te-bil-ti ma-lak-sza2
458. ul-tu qa-bal-ti _iri_ ap-ru-us-ma
459. i-na ta-mir-ti ku-tal _iri_ u2-sze-szir mu-s,u-sza2
460. i-na _1/2(iku) GAN2_ ma-lak _a-mesz_ 4(disz) {na4}pi-i-li _gal-mesz_
461. it-ti _esir2 had2-a_ ak-si-ma _gi-mesz_ a-pe
462. u3 ku-pe-e u2-szat-ri-s,a _ugu_-szu2-un
463. _3(disz) me 4(u)_ ina _1(disz) kusz3 us2_
464. _2(disz) me 1(gesz2) 2(u) 9(disz)_ ina _1(disz) kusz3 sag-ki_
465. qaq-qa-ru ul-tu qe2-reb {i7}hu-su-ur
466. u3 ta-mir-ti _iri_
467. ki-ma a-tar-tim-ma lu as,-ba-ta s,e-er me-szi-ih-ti
468. tam-li-i mah-re-e lu u2-rad-di-ma
469. a-na si-hir-ti-szu2 ina _1(disz) me 1(gesz2) 3(u)_ ti-ib-ki ul-la-a re-szi-szu2
470. la-ba-risz _u4-mesz_ i-na _illu_ kisz-sza2-ti
471. tem-me-en tam-li-i la e-ne2-szi
472. {na4}pi-i-li _gal-mesz_ ki-su-u2-szu
473. u2-sza2-as-hi-ra u2-dan-nin szu-pu-uk-szu
474. a-na _7(disz) me_ i-na _as4-lum gal_-ti _usz_
475. u3 _4(disz) me 4(u)_ ina _as4-lum gal_-ti _sag-ki_
476. szi-kit-ti _e2-gal_ u2-ter-ma
477. szu-bat-sa usz-rab-bi _e2-gal-mesz ku3-sig17 ku3-babbar_
478. _zabar {na4}an-za-gul-me {na4}dur2-mi-na-banda3{da}_
479. _{na4}gesz-nu11-gal zu2 am-si {gesz}esi {gesz}tug2_
480. _{gesz}mes-ma2-kan-na {gesz}eren {gesz}szur-min3_
481. {szim}_li_ {gesz}e-lam-ma-ku {gesz}si-in-da-a
482. a-na mu-szab be-lu-ti-ia
483. ab-ni-ma _e2_ mu-ter-re-te
484. tam-szil _e2-gal_ {kur}ha-at-ti
485. me2-eh-ret ba-ba-a-ti u2-sze-pisz
486. _gesz-ur3-mesz_ {gesz}ere-ni _{gesz}szur-min3_
487. sza e-ri-su-un t,a-a-bu bi-nu-ut {kur}ha-ma-nim
488. u3 {kur}si-ra-ra _kur-mesz ku3-mesz_
489. u2-szat-ri-s,a e-li-szin
490. _{gesz}ig-mesz_ {gesz}ere-ni _{gesz}szur-min3 szim-li_
491. {gesz}si-in-da-a me-ser _ki-sag uruda_
492. u2-rak-kis-ma u2-rat-ta-a ba-bi-szin
493. i-na ba-rak-ki sza qe2-reb {e2}_pa-pah-mesz_
494. ap-ti bi-ir-ri u2-pat-ta-a
495. _{munus}{d}lamma-mesz {na4}gesz-nu11-gal zu2 am-si_
496. sza il-lu-ru na-sza2-a kit-mu-sa rit-ta-szin
497. bal-tu ku-uz-bu hi-it-lu-pa lu-le-e
498. ma-la-a i-na _ka2-mesz_-szin ul-ziz-ma
499. a-na tab-ra-a-te u2-sza2-lik
500. s,u-lul ta-ra-a-ni sza qe2-reb ba-rak-ka-a-ni
501. e-t,u-su-un u2-szah-la-a
502. u4-mi3-isz usz-nam-mir
503. sik-kat3 kar-ri kas-pi u3 _uruda_
504. qe2-reb-szin u2-szal-me
505. i-na _sig4-al-ur3-ra {na4}zu2 {na4}za-gin3_
506. us-si-ma se-el-lum ne2-be2-hi
507. u3 gi-mir pa-asz2-qi2-szi-in
508. asz2-szu2 szip-ri _e2-gal_-ia szu-te-szu-ri
509. u3 li-pit _szu-min_-ia szul-lu-me
510. i-na u4-me-szu-ma {d}asz-szur u3 {d}isz-tar
511. ra-'i-i-mu _{lu2}sanga_-ti-ia
512. na-bu-u2 _mu_-ia gesz-mah-hi {gesz}ere-ni
513. sza ul-tu _ud-mesz su3-mesz_ i-szi-hu-ma
514. ik-bi-ru ma-gal i-na qe2-reb {kur}si-ra-ra
515. _kur-mesz_ ina pu-uz-ri na-an-zu-zu
516. u2-szak-li-mu-in-ni s,i-i-su-un
517. sza _{na4}gesz-nu11-gal_ sza i-na tar-s,i _lugal-mesz_-ni
518. _ad-mesz_-ia a-na kar-ri nam-s,a-ri szu-qu-ru
519. i-na sa-pan {kur}am-ma-na-na u2-szap-tu-ni pa-ni-szu2
520. u3 _{na4}dur2-mi-na-banda3{da}_ ma-la {dug}bur-zi-gal-li
521. sza la in-nam-ru ma-ti-ma
522. ina {iri}kap-ri-da-ar-gi-la-a
523. sza pa-a-t,i {iri}du6-bar-si-ip
524. u2-kal-lim ra-ma-nu-usz
525. i-te-e nina{ki} ina er-s,e-ti {iri}ba-la-t,a-a-a
526. ki-i t,e3-em _dingir_-ma {na4}pi-i-lu pe-s,u-u
527. a-na mu-'u-de-e in-na-mir-ma
528. _{d}alad-{d}lamma-mesz_ u3 s,a-lam mesz-re-ti _{na4}gesz-nu11-gal_
529. sza i-na 1(disz)-en _na4_ ib-ba-nu-u2 mi-na-a-te szuk-lu-lu
530. i-na ki-gal-li ram-ni-szu2-nu
531. sza2-qisz na-an-zu-zu
532. _{munus}ab2-za-za_-a-te _{na4}gesz-nu11-gal_
533. sza zi-me nu-us-su-qa
534. _gin7_ u4-me na-par-di-i nu-um-mu-ru zu-mur-szin
535. _kun4-mesz {na4}dur2-mi-na-banda3{da} mah-mesz_
536. ab-ni ki-lal-la-an i-na szad-di-szu2-un ab-tuq-ma
537. a-na szip-ri _e2-gal_-ia
538. u2-szal-di-da qe2-reb {iri}ni-na-a
539. _{d}alad-{d}lamma-mesz_ u3 _{munus}ab2-za-za_-a-te
540. {na4}pi-i-li pe-s,e-e i-na lip-ta-at {d}nin-kur-ra
541. i-na er-s,e-et {iri}ba-la-t,a-a-a
542. u2-sza2-a'-lid-ma u2-szak-li-la gat-ta-szu2-un
543. sza ul-tu ul-la _lugal-mesz_-ni _ad-mesz_-ia
544. s,a-lam _uruda_ tam-szil gat-ti-szu2-un
545. a-na szu-zu-zi qe2-reb _e2-kur-mesz_
546. ib-nu-ma i-na e-pisz-ti-szu2-nu
547. u2-sza2-ni-hu gi-mir _dumu_ um-ma-a-ni
548. i-na la bi-szit uz-ni la ha-sa-as a-ma-te
549. a-na szip-ri hi-szih-ti-szu2-nu
550. _i3-gesz_ isz-ku-ru na-al-ba-asz2 s,e-e-ni
551. u2-qe2-ru qe2-reb _kur-mesz_-szu2-un
552. ia-a-ti {disz}{d}en-zu-szesz-mesz-eri-ba
553. a-sza2-red kal mal-ki mu-de-e szip-ri
554. ka-la-ma tim-me _uruda gal-mesz_
555. ur-mah-hi pe-tan bir-ki sza ma-nam-ma
556. la ip-ti-qu _lugal_ pa-ni mah-ri-ia
557. i-na uz-ni ni-kil-ti
558. sza u2-szat-li-ma ru-bu-u2 {d}nin-szi-ku3
559. i-na szi-tul-ti ram-ni-ia
560. a-na e-pesz szip-ri szu-a-tu
561. ra-bisz am-tal-lik-ma ina mi3-lik t,e3-me-ia
562. u3 me-resz ka-bat-ti-ia
563. pi-ti-iq _uruda_ u2-ba-asz2-szim-ma
564. u2-nak-ki-la nik-la2-su
565. sza gesz-mah-hi u3 a-la-mit-ta
566. _gesz_ mesz-re-e _1(u) 2(disz) ur-mah-mesz_ ne2-'i-ru-ti
567. a-di _1(u) 2(disz) {d}alad-{d}lamma-mesz_
568. _mah-mesz_ sza szuk-lu-lu nab-ni-tu
569. _2(u) 2(disz) {munus}ab2-za-za_-a-te sza ku-uz-ba
570. ul-s,u hi-it-lu-pa bal-tu la-la-a
571. kum2-mu-ru s,e-ru-usz-szin
572. ki-i t,e3-em _dingir_-ma zi-i'-pi t,i-it,-t,i
573. ab-ni-ma e-ra-a qe2-reb-szu2 asz2-tap-pa-ka
574. ki-i pi-ti-iq _1/2(disz) gin2-ta-am3_
575. u2-szak-li-la nab-ni-su-un
576. _{d}alad-{d}lamma-mesz_ nab-nit _uruda_
577. sza 2(disz) ina lib3-bi za-ha-lu-u lit-bu-szu2
578. _{d}alad-{d}lamma-mesz {na4}gesz-nu11-gal_
579. a-di _{d}alad-{d}lamma-mesz_ u3 _{munus}ab2-za-za_-a-te
580. {na4}pi-i-li pe-s,e-e sza _e2-gal-mesz_-ia
581. u2-sza2-as,-bi-ta _si-gar_-szi-in
582. tim-me _uruda mah-mesz_ a-di tim-me {gesz}ere-ni
583. _gal-mesz_ bi-ib-lat {kur}ha-ma-nim
584. me-ser _uruda_ u3 _an-na_ u2-rak-kis-ma
585. s,e-er pirig-gal-le-e ul-ziz-ma
586. dap2-pi ku-lul _ka2-mesz_-szin e-mid
587. _{munus}ab2-za-za_-a-te _{na4}gesz-nu11-gal_
588. a-di _{munus}ab2-za-za_-a-te pi-ti-iq u2-ru-de-e
589. sza2 za-ha-lu-u lit-bu-sza2 u3 _{munus}ab2-za-za_-a-te
590. pi-ti-iq _gu-an-na_
591. sza nu-um-mu-ru gat-ta-szi-in
592. {gesz}tim-me _{gesz}esi {gesz}szur-min3_ {gesz}ere-ni {gesz}dup-ra-ni
593. _szim-li_ u3 {gesz}si-in-da-a ih-ze-et pa-szal-li
594. u3 kas-pi s,e-ru-usz-szin ul-ziz-ma
595. sza kum2-me mu-szab be-lu-ti-ia
596. e-mid _{gesz}gan-du7-mesz_-szu2-un
597. _kun4-mesz {na4}dur2-mi-na-banda3{da} {na4}gesz-nu11-gal_
598. u3 _kun4-mesz_ {na4}pi-i-li _gal-mesz_
599. a-sur-ru-szin u2-sza2-as-hi-ra
600. a-na tab-ra-a-te u2-sza2-lik
601. asz2-szu2 u4-me-szam-ma _a-mesz_ di-lu-ti
602. da-lum eb-li gu-has,-s,a-a-te _zabar_
603. u har-ha-ri _zabar_ u2-sze-pisz-ma
604. ki-mu-u2 ma-ka-a-te gesz-mah-hi u3 a-la-mit-ta _uruda_
605. s,e-er _pu2-mesz_ usz-ziz _e2-gal-mesz_ sza2-ti-na u2-sza2-lik as-mi3-isz
606. si-hir-ti _e2-gal_ a-na tab-rat kisz-szat _ug3-mesz_
607. ul-la-a re-szi-sza2 _e2-gal_ sza2-ni-na la i-szu-u
608. ni-bit-sa az-kur
609. _{gesz}kiri6-mah_-hu tam-szil {kur}ha-ma-nim
610. sza gi-mir _szim hi-a gurun_ s,ip-pa-a-te
611. _gesz-mesz_ tuk-lat _kur_-i u3 {kur}kal-di
612. a-di _gesz-mesz_ na-asz2 _siki hi-a_
613. qe2-reb-szu2 hur-ru-szu i-ta-a-sza2 az-qu-up
614. nina{ki} sza ul-tu u4-me pa-ni
615. 9(disz) _lim_ 3(disz) _me_ ina _1(disz) kusz3_ szu-bat li-me-ti-szu2
616. _bad3_ u3 _bad3-szul-hi_ ul u2-sze-pi-szu2
617. a-li-kut mah-ri ma-al-ki
618. _1(u) 2(disz) lim 5(disz) me 1(u) 5(disz)_ a-szar ta-mir-ti li-mit _iri_
619. s,e-er me-szi-ih-te mah-ri-ti u2-rad-di-ma
620. _2(u) 1(disz) lim 8(disz) me 1(u) 5(disz)_ ina _as4-lum gal_-ti u2-kin min3-da-tusz
621. sza _bad3_-szu2 _gal_-i bad3-ni2-gal-bi-lu2-kur2-ra-szu2-szu2
622. du-u2-ru sza nam-ri-ru-szu na-ki-ri sah-pu
623. s,e-er {na4}pi-i-li tem-me-en-szu2 ad-di-ma
624. _4(u) sig4_ u2-kab-bir
625. i-na _1(disz) me 1(gesz2) 2(u)_ ti-ib-ki ul-la-a re-szi-szu
626. a-na er-bet-ti sza2-a-ri _1(u) 5(disz) ka2-gal-mesz_
627. pa-nu u3 ar-ka i-na s,i-li ki-lal-la-an
628. a-na e-re-bi u3 a-s,e-e
629. u2-szap-ta-a qe2-reb-szu2
630. li-bur _ensi2_ {d}asz-szur _ka2-gal_ {d}asz-szur sza {iri}sza3-iri_
631. sa-pi-in gi-mir na-ki-ri
632. _ka2-gal_ {disz}{d}en-zu-szesz-mesz-eri-ba sza {kur}hal-zi
633. {d}en-lil2 mu-kin _bala_-ia _ka2-gal_ {d}utu sza {kur}ga-gal
634. sza {disz}{d}en-zu-szesz-mesz-eri-ba it-ti man-zal-ti e-req-qi
635. kin-ni _bala_-szu2 _ka2-gal_ {d}nin-lil2 sza {iri}kar-{d}nin-lil2
636. mu-sze-s,a-at _uzu azag2 ka2-gal_ musz-la-lum
637. du-muq asz2-na-an u3 {d}lahar qe2-reb-sza2 ka-a-a-an
638. _ka2-gal_ {iri}szi-ba-ni-ba
639. ba-bi-lat hi-s,ib hur-sza2-a-ni _ka2-gal_ {kur}ha-lah-hi
640. _szu-nigin_ 7(disz) _ka2-gal-mesz_ {d}utu-e3
641. me2-eh-ret {im}szu-u2-ti u3 {im}sza2-di-i
642. az-ku-ra ni-bit-si-in
643. {d}iszkur sza2-ri-ik _he2-gal2_ a-na _kur_
644. _ka2-gal_ {d}iszkur sza am-ba-si
645. {d}er3-ra sza2-a-gisz za-ma-ni-ia
646. _ka2-gal_ {d}u-gur sza {iri}tar-bi-s,i
647. {d}nanna-ru na-s,ir _aga_ be-lu-ti-ia _ka2-gal_ {d}en-zu
648. _szu-nigin_ 3(disz) _ka2-gal-mesz_ sza me2-eh-ret {im}il-ta-ni
649. at-ta-bi si-qir-szi-in
650. {d}e2-a mu-sze-szir kup3-pi-ia _ka2-gal_ mas-qe2-e
651. mu-sze-ri-bat mi-szir3-ti da-ad2-me _ka2-gal_ ka-a-ri
652. kad3-re-e {lu2}su-mu-'e-el3 u3 {lu2}te-e-me
653. qe2-reb-sza2 ir-ru-ub _ka2-gal_ mad-ba-ri
654. pa-qi2-da-at ka-la-ma _ka2-gal e2-gal_ ma-szar-ti
655. {d}szar2-ur4 mu-szam-qit a-a-ab _lugal ka2-gal_ ha-an-du-u2-ri
656. _szu-nigin_ 5(disz) _ka2-gal-mesz_ sza me2-eh-ret {im}a-mur-ri
657. at-tas-qa-ra szu-me-szin
658. sza szal-hi-i bad3-nig2-erim2-hu-luh-ha
659. mu-gal-lit za-ma-a-ni usz-sze-szu2 ap-te-e-ma
660. 4(u) 5(disz) _ninda_ u2-szap-pil-ma
661. u2-sza2-ak-szid _a-mesz_ na-ag-bi
662. qe2-reb ma-a-me szap-la-a-nu _na4 kur_-i dan-ni ak-si-ma
663. e-la-nisz a-di pa-asz2-qi2-szu2 i-na {na4}pi-i-li _gal-mesz_
664. u2-nak-kil szi-pir-szu
665. sza nina{ki} _iri_ be-lu-ti-ia szu-bat-su usz-rab-bi
666. re-ba-ti-szu2 u2-sza2-an-dil-ma u2-nam-mir _gin7_ u4-me
667. _bad3_ szal-hu-u2 u2-sze-pisz-ma u2-zaq-qir hur-sza2-nisz
668. e-le-en _iri_ u3 _ki-ta iri_ u2-sze-pisz _{gesz}kiri6-mesz_
669. mut-hum-me _kur_-i u3 ma-ti-tan
670. kul-lat _szim hi-a_ {kur}hat-ti u2-har-ri-sza2 qe2-reb-szu2-un
671. s,e-er sza2-ab-bur-ti sza a-ha am-ba-si _gesztin kur_-i
672. _du3_-szu2-un gi-mir _gurun_ ad-na-a-te
673. _szim hi-a_ u3 {gesz}se-er-di a-na ba-a'-li az-qu-up
674. {i7}hu-su-ur sza ul-tu ul-la-a _a-mesz_-sza2
675. szu-up-lu s,ab-tu-ma i-na _lugal-mesz_-ni _ad-mesz_-ia
676. mam2-ma la is-sir2-szu-nu-ti-ma i-tab-ba-ku _{i7}hal-hal_-isz3
677. a-na mit,-ra-a-te szum-mu-hi
678. ul-tu pa-a-t,i {iri}ki-si-ri
679. mu-la-a musz-pa-lum i-na ak-kul-la-a-te
680. ah-ra-a u2-sze-szir {i7}pat-tu
681. _a-mesz_ szu-nu-te s,e-er ta-mir-ti nina{ki} u2-ki-nam-ma
682. qe2-reb s,ip-pa-a-te sza-ti-na u2-szah-bi-ba a-tap-pisz
683. a-na bit-re-e ma-a-me ina _giri3-min_ mu-us,-ri _kur_-e ger-ri as,-bat-ma
684. asz2-qu-ma a-di {iri}el-mu-na-qin-ne2-e szup-szu-qisz at-tal-lak
685. i-na re-esz {iri}bad3-{d}1(u)-5(disz) {iri}szi-ba-ni-ba
686. u3 {iri}su-li nam-ba-'i a-mur-ma
687. _igi-min_-szu2-nu pi-qa-a-te u2-rab-bi-ma u2-ter a-na kup-pi
688. asz2-szu2 ma-lak _a-mesz_ szu2-nu-ti _kur-mesz_ mar-s,u-ti
689. asz2-ri pa-asz2-qu-ti ina ak-kul-la-ti u2-szat-tir-ma
690. mu-s,u-szu2-un u2-sze-szi-ra a-na ta-mir-ti nina{ki}
691. {i7}har-ra-ti-szu2-un u2-dan-nin ki-i szu-pu-uk _kur_-i
692. _a-mesz_ sza-tu-nu qe2-reb-szu2-un u2-kin-na
693. ki-ma a-tar-tim-ma s,e-er _a-mesz_ {i7}hu-su-ur
694. u2-rad-da-a da-ri-szam
695. i-na um-ma-a-te u2-sza2-asz2-qa-a gi-mir s,ip-pa-a-ti
696. i-na _en-te-na 1(disz) lim {sze}numun-mesz_ ta-me-ra-a-ti
697. e-li _iri_ u3 _ki-ta iri_ u2-sza2-an-kar szat-ti-szam
698. a-na szup-szu-hi a-lak-ti _a-mesz_ szu-nu-ti
699. {i7}a-gam-mu u2-szab-szi-ma s,u-s,u-u2 qe2-reb-sza2
700. as-ti-il _igira2{muszen}-mesz szah-mesz {gesz}gi_
701. a-lap qi2-szi i-na lib3-bi u2-masz-szir
702. i-na t,e3-em _dingir_-ma qe2-reb _{gesz}kiri6-mesz edin_ sza2-ab-bur-ti
703. _gesztin_ gi-mir _gurun_ {gesz}se-er-du
704. _szim hi-a_ ma-gal isz-mu-hu
705. _{gesz}szur-min3 {gesz}mes-ma2-kan-na_
706. nap-har _gesz-mesz_ i-szi-hu-ma
707. u2-s,ar-ri-szu2 pa-pa-al-lum
708. ap-pa-ra-a-ti ma-gal i-szi-ra
709. _muszen-mesz an_-e _igira2_{muszen} sza a-szar-szu2 ru-u2-qu
710. qin-na iq-nun-ma _szah2-mesz {gesz}gi_ a-lap qi2-szi
711. u2-rap-pi-szu2 ta-lit-tu
712. _{gesz}mes-ma2-kan-na {gesz}szur-min3_ tar-bit s,ip-pa-a-ti
713. _gi ambar-mesz_ sza qe2-reb {i7}a-gam-me ak-szit,-ma
714. a-na szip-ri hi-szih-ti _e2-gal-mesz_
715. be-lu-te-ia lu e-pu-usz
716. is,-s,u na-asz2 szi-pa-a-ti ib-qu-mu im-ha-s,u s,u-ba-ti-isz
717. ul-tu szip-ri _e2-gal_-ia u2-qat-tu-u2
718. {d}asz-szur _en gal_-u2 _dingir-mesz_ u3 _{d}isz-tar-mesz_
719. a-szi-bu-ut _kur_ asz-szur{ki}
720. i-na qer-bi-sza2 aq-re-ma
721. _{udu}siskur-mesz_ tasz-ri-ih-te aq-qi2-ma
722. u2-szat-lim kad3-ra-a-a
723. _i3-gesz_ {gesz}ser2-di u3 hi-bi-isz-ti
724. sza _{gesz}kiri6-mesz edin_ sza2-ab-bur-ti
725. u2-raq-qa-a a-na ru-usz-ti
726. i-na tasz-ri-it _e2-gal_ sza ba-hu-la-te _kur_-ia
727. u2-sza2-asz2-qa-a muh-ha-szi-in
728. _gesztin_ du-usz-szu-pu s,ur-ra-szi-in am-kir
729. a-na ar2-kat3 u4-me i-na _lugal-mesz dumu-mesz_-ia
730. sza {d}asz-szur a-na _re-e2-um_-ut _kur_ u3 _ug3-mesz_
731. i-nam-bu-u2 zi-kir-szu2
732. e-nu-ma _bad3_ sza2-a-tu
733. i-lab-bi-ru-ma en-na-hu
734. an-hu-us-su lu-ud-disz
735. _mu-sar_-e szi-t,ir szu-me-ia
736. li-mur-ma _i3-gesz_ lip-szu-usz
737. _{udu}siskur_ liq-qi2 a-na asz2-ri-szu2 li-ter
738. {d}asz-szur u3 {d}isz-tar
739. ik-ri-bi-szu2 i-szem-mu-u2

Archival view of P462825