RINAP 5/1 Ashurbanipal 003 composite (P514712)

object composite text
surface a
1. a-na-ku {disz}an-szar2-du3-a _lugal gal lugal_ dan-nu
2. _lugal szu2 lugal kur_ an-szar2{ki} _lugal_ kib-rat _limmu2_-tim
3. s,i-it lib3-bi {disz}an-szar2-pap-asz _lugal kur_ asz-szur{ki}
4. _szagina_ babila2{ki} _lugal kur eme-gi7_ u uri{ki}
5. _sza3-bala-bala_ {disz}{d}sin-pap-mesz-su _lugal szu2 lugal kur_ asz-szur{ki}
6. _dingir-mesz gal-mesz_ ina _ukken_-szu2-nu szi-mat _saga_-tim i-szim-mu szim-ti
7. uz-nu ra-pa-asz2-tum isz-ru-ku-u-ni
8. kul-lat t,up-szar-ru-ti u2-sza2-hi-zu ka-ra-szi
9. ina _ukken_ lu-li-me zi-kir _mu_-ia u2-szar-ri-hu
10. u2-szar-bu-u2 _lugal_-u2-ti
11. du-un-nu zik-ru-u-tu e-mu-qa-an s,i-ra-a-ti
12. u2-szat-lim-u-ni ma-ta-a-ti la ma-gi-re-ia
13. ina _szu-min_-ia im-nu-u u2-szam-s,u-in-ni ma-la lib3-bi-ia
14. {lu2}sza2-an-gu-ti ih-szu-hu
15. na-dan zi-bi-ia i-t,ib _ugu dingir_-ti-szu2-un
16. esz-ret _dingir-mesz gal-mesz en-mesz_-ia u2-szak-lil
17. u2-szal-bi-sza2 _ku3-sig17 ku3-babbar_
18. {d}lah3-me anzu{muszen}-mesz tim-me _mah-mesz_
19. ina _ka2_-szu2-un ul-ziz e2-szar2-ra
20. e2-masz-masz e2-gaszan-kalam-ma e2-hul2-hul2
21. ki-ma szi-t,ir sza2-ma-me u2-ban-ni
22. mim-ma si-mat e2-kur sza2 _ku3-sig17 ku3-babbar_ e-pu-usz
23. e-li sza _lugal-mesz ad-mesz_-ia u2-rad-di
24. sat-tuk-ku gi-nu-u2 _ugu_ sza2 u4-me ul-lu-u-ti
25. u2-sza2-tir-ma u2-kin asz2-rat _dingir-mesz_ asz2-te-'a-a
26. at-tal-la-ka al-ka-ka-te-szu2-un
27. {d}iszkur _szeg3-mesz_-szu2 u2-masz-sze-ra
28. {d}e2-a u2-pat,-t,i-ra _idim-mesz_-szu2
29. 5(disz) _kusz3 sze-am_ isz-qu ina _ab-sin2_-ni-szu2
30. e-ri-ik szu-bul-tu2 5/6(disz) _kusz3_
31. _si-sa2 buru14_ na-pa-asz2 {d}nisaba ka-a-a-an u2-szah-na-bu
32. gi-pa-ru s,ip-pa-a-ti szu-um-mu-ha in-bu _masz2-ansze_ szu-te-szur
33. ina ta-lit-ti ina _bala_-ia _he2-nun_ t,uh-du
34. ina _mu-an-na-mesz_-ia ku-um-mu-ru _he2-gal2_-lum
35. 1(u) _ansze sze-pad-mesz_ 1(disz) _ansze gesztin-mesz 2(ban2) i3-mesz_ 1(disz) _gun sig2-mesz_
36. ina nap-har _kur_-ia _ki-lam_ nap-szu2 i-szam-mu ina 1(disz) _gin2_ kas-pi
37. szat-ti-szam-ma ina t,uh-di u mi-sza2-ri
38. ar-te-'a-a ba-'u-u2-lat {d}en-lil2
39. ul-tu tam-tim e-liti a-di tam-tim szap-liti a?-bel-ma?
40. _lugal-mesz_ s,i-it _{d}utu_-szi u e-reb _{d}utu_-szi
41. isz-szu2-u-ni _gun_-su-nu ka-bit-tu2
42. _ug3-mesz muru2_ tam-tim a-szib szad-de-e sza2-qu-te
43. u2-szak-ni-sza2 a-na _{gesz}szudun_-ia
44. ina qi2-bit an-szar2 u {d}1(u)-5(disz) _lugal-mesz_ a-szib pa-rak-ki
45. u2-na-asz2-sza2-qu _giri3-min_-ia
46. mal-ki _gal-mesz_ sza2 s,i-tasz u szi-la-an
47. a-na kit-ri-szu2-nu u2-pa-qu-u-ni
48. i-na mah-re-e ger-ri-ia
49. a-na {kur}ma2-kan u {kur}me-luh-ha lu-u al-lik
50. {disz}tar-qu-u _lugal_ {kur}mu-s,ur u {kur}ku-u-si
51. sza2 {disz}an-szar2-pap-asz _man kur_ an-szar2{ki} _ad_ ba-nu-u-a _bad5-bad5_-szu2 isz-ku-nu
52. i-be-lu _kur_-su da-na-an an-szar2 {d}1(u)-5(disz) u _dingir-mesz gal-mesz en-mesz_-ia
53. im-szi-ma it-ta-kil a-na t,e3?-em ra-ma-ni-szu2
54. _ugu lugal-mesz_ {lu2}qe-pa-a-ni sza2 qe2-reb {kur}mu-s,ur
55. u2-pa-qi2-du _ad_ ba-nu-u-a
56. a-na da-a-ki ha-ba-a-ti u e-kem {kur}mu-s,ur
57. il-li-ka _edin_-usz-szu2-un
58. e-ru-um-ma u2-szib qe2-reb {iri}me-em-pi
59. _iri_ sza _ad_ ba-nu-u-a ik-szu-du
60. a-na mi-s,ir _kur_-szu2 u2-ter-ru al-la-ku ha-an-t,u
61. ina qe2-reb nina{ki} il-lik-am-ma
62. u2-sza2-an-na-a ia-a-ti
63. _ugu_ ep-sze-e-ti an-na-a-ti
64. lib3-bi i-gug-ma is,-s,a-ru-uh ka-bat-ti
65. ad-ke-e-ma {lu2}e-mu-qi-ia _mah-mesz_ sza an-szar2 u {d}1(u)-5(disz)
66. u2-mal-lu-u qa-a-tu-u-a a-na na-ra-ru-ti ha-mat
67. sza _lugal-mesz_ {lu2}qe-pa-ni sza qe2-reb {kur}mu-s,ur
68. _ARAD-mesz_ da-gil2 pa-ni-ia
69. ur-ru-hi-isz ar-de-e-ma
70. al-lik a-di {iri}kar-{d}ba-ni-ti
71. {disz}tar-qu-u _man_ {kur}mu-s,ur {kur}ku-u-si
72. qe2-reb {iri}me-em-pi a-lak ger-ri-ia isz-me-e-ma
73. a-na e-pesz _muru2 {gesz}tukul-mesz me3_ a-na mah-ri-ia
74. id-ka-a _erin2-mesz me3_-szu2 ina tu-kul-ti an-szar2 {d}en {d}ag _dingir-mesz_
75. _gal-mesz en-mesz_-ia a-li-kut i-di-ia ina _me3 edin_ rap-szi
76. asz2-ku-na _bad5-bad5 erin2-hi-a_-szu2 {disz}tar-qu-u2 ina qe2-reb {iri}me-em-pi
77. isz-ma-a tah-te-e _erin2-hi-a_-szu2 nam-ri-ri an-szar2 u {d}1(u)-5(disz)
78. is-hu-pu-szu-ma il-li-ka mah-hu-tisz2 me2-lam-me _man_-ti-ia2
79. ik-tu-mu-szu-ma sza2 u2-za-'i-i-nu-u-ni _dingir-mesz_ szu-ut _an ki_
80. {iri}me-em-pi u2-masz-szir-ma a-na szu-zu-ub _zi_-ti3-szu2
81. in-na-bit a-na qe2-reb {iri}ni-i' _iri_ szu-a-tu2 as,-bat
82. _erin2-hi-a-mesz_-ia u2-sze-rib u2-sze-szib ina lib3-bi _lugal-mesz_
83. _{lu2}nam-mesz_ sza2 qe2-reb {kur}mu-s,ur u2-pa-qi-du _ad_ ba-nu-u-a
84. sza la-pa-an ti-bu-ti {disz}tar-qu-u pi-qit-ta-szu2-un
85. u2-masz-sze-ru im-lu-u2 _edin_
86. u2-ter-ma a-szar pi-qit-ti-szu2-un
87. ina masz-kan2-i-szu-nu ul-zi-is-su-nu-ti
88. {kur}mu-s,ur {kur}ku-u-si sza2 _ad_ ba-nu-u-a ik-szu-du
89. a-na esz-szu-ti as,-bat _en-nun-mesz_-szu2 _ugu_ u4-me pa-ni u-da-nin
90. u2-rak-ki-sa rik-se-szu2
91. {iri}sa-a-a {iri}bi-in-t,i-t,i {iri}s,a-a'-nu sza ib-bal-ki-tu2
92. it-ti {disz}tar-qu-u isz-ku-nu pi-i-szu2-un
93. _iri-mesz_ sza2-a-tu-nu ak-szu-ud
94. _ug3-mesz_ a-szib lib3-bi-szu2-nu a-ni-ir
95. ina _{gesz}tukul-mesz adda-mesz_-szu2-nu ina {gesz}ga-szi-szi a-lul _kusz-mesz_-szu2-nu asz2-hu-ut, _bad3 iri_
96. u2-hal-lip2 {disz}lugal-lu-da3-ri sza2 _ad_-u-a ina {kur}mu-s,ur isz-ku-nu-usz
97. a-na _lugal_-ti sza2 _hul_-tu ik-pu-du ana _dumu-mesz kur_ asz-szur{ki}
98. ina qa-ti as,-bat u2-ra-a ana _kur_ asz-szur{ki}
99. {disz}tar-qu-u a-szar in-nab-tu ra-szub-bat _{gesz}tukul_ an-szar2 _en_-ia
100. is-hu-pu-szu-ma il-lik nam-mu-szi-szu2 _egir_-nu {disz}ur-da-ma-ne2-e
101. _dumu nin9_-szu2 u2-szib ina _{gesz}gu-za lugal_-ti-szu2 {iri}ni-i' {iri}u2-nu
102. a-na dan-nu-ti-szu2 isz-kun u2-pah-hi-ir el-lat-su
103. a-na mit-hu-s,i _erin2-hi-a dumu-mesz kur_ asz-szur{ki} sza2 qe2-reb {iri}me-em-pi
104. id-ka-a qa-bal-szu2 _ug3-mesz_ sza2-a-tu-nu e-si-ir-ma
105. is,-ba-ta mu-us,-s,a-szu2-un _{lu2}a_ szip-ri ha-an-t,u
106. a-na _nina_ il-li-kam-ma iq-ba-a ia-a-ti
107. asz2-ni-ma a-na {kur}mu-s,ur u {kur}ku-u-si usz-te-sze-ra har-ra-nu
108. {disz}ur-da-ma-ne2-e a-lak ger-ri-ia isz-me-ma
109. sza ak-bu-su mi-s,ir {kur}mu-s,ur
110. {iri}me-em-pi u2-masz-szir-ma a-na szu-zu-ub _zi_-ti3-szu2
111. in-na-bit a-na qe2-reb {iri}ni-i'
112. _lugal-mesz {lu2}nam-mesz_ {lu2}qe-pa-a-ni
113. sza qe2-reb {kur}mu-s,ur asz2-ku-nu
114. ina ir-ti-ia il-lik-u-nim-ma u2-na-asz2-szi-qu _giri3-min_-ia
115. _egir {disz}ur_-da-ma-ne2-e har-ra-nu as,-bat
116. al-lik a-di {iri}ni-i' _iri_ dan-nu-ti-szu2
117. ti-ib _me3_-ia e-mur-ma {iri}ni-i' u2-masz-szir
118. in-na-bit a-na {iri}ki-ip-ki-pi
119. _iri_ szu2-a-tu ana si-hir-ti-szu2
120. ina tu-kul-ti an-szar2 u {d}1(u)-5(disz) ik-szu-da _szu-min_-a-a
121. _ku3-babbar ku3-sig17_ ni-siq-ti _na4-mesz_
122. _nig2-szu e2-gal_-szu2 ma-la ba-szu-u
123. lu-bul-tu bir-me _gada-mesz ansze-kur-ra-mesz gal-mesz_
124. _ug3-mesz_ zik-ra u3 sin-nisz
125. 2(disz) tim-me _mah-mesz_ pi-tiq za-ha-le-e eb-bi
126. sza 2(disz) _lim_ 5(disz) _me gun ki?-la2_-szu2-nu man-za-az _ka2_ e2-kur
127. ul-tu man-zal-ti-szu2-nu as-suh-ma al-qa-a ana _kur_ asz-szur{ki}
128. szal-la-tu ka-bit-tu2 a-na la mi3-ni asz2-lu-la
129. ul-tu qe2-reb {iri}ni-i' _ugu_ {kur}mu-s,ur u {kur}ku-u-si
130. _{gesz}tukul-mesz_-ia u2-szam-ri-ir-ma
131. asz2-ta-kan li-i-tu2 it-ti _szu-min_ ma-li-te
132. szal-mesz a-tu-ra a-na nina{ki} _iri en_-ti-ia
133. ina szal-szi ger-ri-ia _ugu_ {disz}ba-'a-li _man_ {kur}s,ur-ri
134. a-szib _muru2_ tam-tim lu-u al-lik asz2-szu2 a-mat _lugal_-ti-ia
135. la is,-s,u-ru la isz-mu-u zi-kir _nundum_-ia
136. {iri}hal-s,u-_mesz ugu_-szu u2-rak-kis
137. a-na la a-s,e-e _ug3-mesz_-szu2 u2-dan-nin ma-s,ar-tu
138. ina tam-tim u na-ba-li ger-re-ti-szu2 u2-s,ab-bit
139. a-lak-ta-szu2 ap-ru-us
140. _a-mesz_ te-'u-u2-ta ba-lat, _zi_-ti3-szu2-nu
141. a-na pi-i-szu-nu u2-sza2-qi2-ir
142. ina me-se-ri dan-ni sza la na-par-szu-di e-si-ir-szu2-nu-tu2
143. nap-szat-su-nu u2-si-iq u2-kar-ri
144. a-na _{gesz}szudun_-ia u2-szak-ni-is-su-nu-ti
145. _dumu-munus_-su s,i-it lib3-bi-szu2 u3 _dumu-munus szesz-mesz_-szu2
146. a-na e-pesz _{munus}agrig_-u2-ti u2-bi-la a-di _igi_-ia2
147. _dumu_-szu2 sza2 ma-ti-ma _a-ab-ba_ la e-bi-ra
148. isz-sza2-a a-na e-pesz _ARAD_-ti-ia
149. _dumu-munus_-su u3 _dumu-munus-mesz szesz-mesz_-szu2
150. it-ti ter-ha-ti ma-a'-as-si am-hur-szu2
151. re-e-mu ar-szi-szu2-ma _dumu_ s,i-it lib3-bi-szu2
152. u2-ter-ma a-ri-im-szu2 {iri}hal-s,u-_mesz_
153. sza2 _ugu_ {disz}ba-'a-li _lugal_ {kur}s,ur-ri
154. u2-rak-ki-su ap-t,ur ina tam-tim u na-ba-li
155. ger-re-ti-szu2 ma-la u2-s,ab-bi-tu ap-ti
156. ma-da-at-ta-szu2 ka-bit-tu2 am-hur-szu2
157. szal-mesz a-tu-ra a-na nina{ki} _iri en_-ti-ia
158. ma-al-ki _muru2_ tam-tim u3 _lugal-mesz_
159. a-szi-bu-ti sza2-de-e sza2-qu-u-ti
160. da-na-an ep-sze-ti-ia an-na-a-ti
161. e-mu-ru-ma ip-la-hu _en_-u-ti {disz}ia-ki-in-lu-u
162. _man_ {kur}a-ru-ad-da {disz}mu-gal-lu _lugal_ {kur}tab_-iri_-a-a
163. {disz}sa-an-di-szar-me {kur}hi-lak-ka-a-a sza a-na _lugal-mesz_
164. _ad-mesz_-ia la kan-szu2 ik-nu-szu2 a-na _{gesz}szudun_-ia
165. _dumu-munus-mesz_ s,i-it lib3-bi-szu2-nu it-ti nu-dun-ne2-e ma-a'-di
166. u3 ter-ha-ti ma-a'-as-si a-na e-pesz _{munus}agrig_-u-ti
167. a-na nina{ki} u2-bi-lu-nim-ma u2-na-asz2-szi-qu _giri3-min_-ia
168. _ugu_ {disz}mu-gal-li _ansze-kur-ra-mesz gal-mesz_
169. ma-da-at-tu2 szat-ti-szam u2-kin _edin_-usz-szu2
170. ul-tu {disz}ia-ki-in-lu-u _lugal_ {kur}a-ru-ad-da
171. il-li-ku ana szim-ti
172. {disz}a-zi-ba-al {disz}a-bi-ba-al {disz}a-du-ni-ba-al
173. _dumu-mesz_ {disz}ia-ki-in-lu-u a-szib _muru2_ tam-tim
174. ul-tu _muru2_ tam-tim e-lu-nim-ma
175. it-ti ta-mar-ti-szu2-nu ka-bit-ti il-lik-u-nim-ma
176. u2-na-asz2-szi-qu _giri3-min_-ia
177. {disz}a-zi-ba-a'-al ha-disz ap-pa-lis-ma
178. a-na _lugal_-ti {kur}a-ru-ad-da asz2-kun
179. {disz}a-bi-ba-a'-al {disz}a-du-ni-ba-a'-al lu-bul-ti bir-me
180. u2-lab-bisz _har-mesz ku3-sig17_ asz2-kun ina mah-ri-ia
181. ul-zis-su-nu-ti {disz}gu-ug-gu _man_ {kur}lu-ud-di
182. na-gu-u2 sza2 ne2-ber-ti _a-ab-ba_ asz2-ru ru-u-qu
183. sza2 _lugal-mesz ad-mesz_-ia la isz-mu-u zi-kir _mu_-szu2
184. ni-bit _lugal_-ti-ia ina _masz2-ge6_ u2-szab-ri-szu2-ma
185. an-szar2 ba-nu-u-a u4-mu _masz2-ge6_ an-ni-tu e-mu-ru
186. {lu2}rak-bu-szu2 isz-pu-ra a-na sza2-'a-al szul-mi3-ia
187. {lu2}gi-mir-a-a _{lu2}kur2_ ek-s,u sza2 la ip-tal-la-hu
188. _ad-mesz_-ia u3 ia-a-szi la is,-ba-tu2 _giri3-min lugal_-ti-ia
189. ina tukul-ti an-szar2 u {d}marduk _en-mesz_-ia
190. ina {gesz}s,i-is,-s,i {gesz}szat qa-ti {gesz}szi-ga-ri u2-tam-me-eh-ma
191. it-ti ta-mar-ti-szu2 ka-bit-ti u2-sze-bi-la
192. a-di mah-ri-ia a-tam-ma-ru da-na-an an-szar2 u {d}szu2
193. ina 4(disz)-e ger-ri-ia a-na {iri}qir-bit2
194. sza2 qe2-reb {iri}ha-re-e-ha-as-ta lu-u al-lik
195. sza {disz}ta-an-da _{lu2}en-iri_-szu2-nu ana _lugal-mesz ad-mesz_-ia
196. la ik-nu-szu2 a-na _{gesz}szudun_ u _ug3-mesz_ a-szi-bu-ti {iri}qir-bit2
197. ka-a-a-an ih-ta-nab-ba-tu hu-bu-ut {kur}ia-mut-ba-li
198. _iri_ szu-a-tu ina tu-kul-ti an-szar2 {d}en u {d}ag
199. _dingir-mesz en-mesz_-ia2 ak-szu-ud asz2-lu-la szal-lat-su
200. {disz}ta-an-da _{lu2}en-iri_-szu2-nu
201. it-ti szal-lat _iri_-szu2 al-qa-a a-na _kur_ asz-szur{ki}
202. _ug3-mesz_ {iri}qir-bit2 ma-la asz2-lu-lu
203. u2-bil-ma qe2-reb {kur}mu-s,ur u2-sza2-as,-bit
204. ina 5(disz)-szi ger-ri-ia _ugu_ {disz}ah-sze-e-ri
205. _lugal_ {kur}man-na-a-a lu-u al-lik
206. sza a-na _lugal-mesz ad-mesz_-ia la kit-nu-szu2
207. i-tap-pa-lu da-s,a-a-ti
208. ad-ke _erin2-mesz me3_-ia a-na ka-sza2-ad {kur}man-na-a-a
209. usz-te-sze-ra har-ra-nu al-lik-ma qe2-reb {iri}bad3-asz-szur
210. usz-man-nu ad-di-ma asz2-ku-na ka-ra-szi
211. {disz}ah-sze-e-ri a-lak ger-ri-ia isz-me-ma
212. u2-ma-'e-e-ra um-man-szu2
213. ina szat mu-szi ina szi-pir ni-kil-ti a-na e-pesz _me3_ it-bu-u-ni
214. a-na mit-hu-s,i _erin2-hi-a_-ia
215. _erin2-mesz me3_-ia it-ti-szu2-un im-da-ha-s,u
216. isz-ku-nu _bad5-bad5_-szu2-un
217. ma-lak 3(disz) _danna a-sza3_ szal-ma-ti-szu2-nu
218. u2-ma-al-lu-u2 _edin_ rap-szu2
219. ina qi2-bit an-szar2 {d}sin {d}utu _dingir-mesz gal-mesz en-mesz_-ia
220. sza2 u2-tak-ki-lu-in-ni qe2-reb {kur}man-na-a-a e-ru-ub-ma
221. at-tal-lak szal-t,isz ina me-ti-iq ger-ri-ia {iri}a-a-u2-si-asz2
222. {iri}hal-s,u {iri}asz2-sza2-asz2 dan-na-su {iri}bu-su-ud {iri}asz2-di-asz2
223. {iri}ur-ki-ia-mu-un {iri}up-pi-isz {iri}si-hu-u-a
224. {iri}na-zi-ni-ri 8(disz) _iri-mesz_ dan-nu-ti
225. u3 a-di s,e-eh-ru-ti sza2 ni-ba la i-szu-u
226. a-di qe2-reb {iri}i-zir-ti ak-szu-ud
227. ap-pul aq-qur ina {d}gesz-bar aq-mu
228. _ug3-mesz ansze-kur-ra-mesz ansze-mesz gu4-mesz_ s,e-e-ni
229. ul-tu qe2-reb _iri-mesz_ sza2-a-tu-nu
230. u2-sze-s,a-am-ma szal-la-tisz am-nu
231. {disz}ah-sze-e-ri a-lak ger-ri-ia isz-me-ma
232. u2-masz-szir {iri}i-zir-tu2 _iri lugal_-ti-szu2
233. a-na {iri}at-ra-a-na _iri_ tukul-ti-szu2 in-na-bit
234. e-hu-uz mar-qi2-tu2 {iri}i-zir-tu2 {iri}ur-me-e-te
235. {iri}uz-bi-a _iri-mesz_ dan-nu-ti-szu2 al-me
236. _ug3-mesz_ a-szi-bu-ti _iri-mesz_ sza2-a-tu-nu
237. e-si-ir-ma nap-szat-su-nu u2-si-iq u2-kar-ri
238. na-gu-u szu-a-tu ak-szu-ud ap-pul aq-qur ina {d}gesz-bar aq-mu
239. ma-lak 1(u) u4-me 5(disz) u4-me u2-szah-rib-ma sza2-qu-um-ma-tu2
240. at-bu-uk ina me-ti-iq ger-ri-ia _iri-mesz_ sza2 li-me-et {iri}pad-di-ri
241. sza2 ina ter-s,i _lugal-mesz ad-mesz_-ia {kur}man-na-a-a e-ki-mu
242. a-na i-di ra-ma-ni-szu2-nu u2-ter-ru
243. ak-szu-ud ina {d}gesz-bar aq-mu asz2-lu-la szal-lat-sun2
244. _iri-mesz_ sza2-a-tu-nu a-na mi-s,ir _kur_ an-szar2{ki} u2-ter
245. na-gu-u sza2 {iri}ar-si-ia-ni-isz
246. sza bi-rit {iri}a-za-qa-na-ni
247. sza {kur}ha-ar-si sza2-di-i
248. sza _sag_ {kur}ku-mu-ur-da-a-a sza2 qe2-reb {kur}man-na-a-a
249. as-pu-un ina {d}gesz-bar aq-mu
250. {disz}ra-a-a-di-sza2-di-i _{lu2}gal {iri}hal-s,u_-szu2-nu a-duk
251. asz2-lu-la szal-lat-su
252. na-gu-u sza2 {iri}e-ri-is-te-ia-na ak-szu-ud
253. _iri-mesz_-szu2 as-pu-un ina {d}gesz-bar aq-mu asz2-lu-la szal-lat-sun2
254. ina ti-ib _me3_-ia na-gu-szu2 u2-szah-rib
255. u2-s,a-ah-hir nap-har _kur_-szu2
256. it-ti hu-ub-ti ma-a'-di szal-la-ti ka-bit-te
257. szal-mesz a-tu-ra ak-bu-sa mi-s,ir _kur_ asz-szur{ki} {iri}bi-ir-ru-a
258. {iri}lugal-iq-bi {iri}gu-si-ne2-e _iri-mesz_ mah-ru-u-te sza2 mi-s,ir _kur_ asz-szur{ki}
259. sza ina ter-s,i _lugal-mesz ad-mesz_-ia e-ki-mu {kur}man-na-a-a da-ad2-me
260. sza2-a-tu-nu ak-szu-ud {kur}man-na-a-a _ta_ lib3-bi as-suh
261. _ansze-kur-ra-mesz_ til-li u2-nu-ut _me3_-szu2-nu asz2-lu-la ana _kur_ asz-szur{ki}
262. _iri-mesz_ sza2-a-tu-nu a-na esz-szu-ti as,-bat
263. u2-ter-ra a-na mi-s,ir _kur_ asz-szur{ki}
264. {disz}ah-sze-e-ri la pa-lih _en_-ti-ia
265. an-szar2 u {d}1(u)-5(disz) im-nu-szu2 ina _szu-min ARAD-mesz_-szu2
266. _ug3-mesz kur_-szu2 si-hu _ugu_-szu2 u2-szab-szu2-u
267. ina _sila iri_-szu id-du-u pa-gar-szu2
268. _egir_-nu {disz}u2-al-li-i _dumu_-szu2 u2-szib ina _{gesz}gu-za_-szu2
269. da-na-an an-szar2 {d}en {d}ag {d}1(u)-5(disz) sza2 {iri}nina{ki}
270. {d}1(u)-5(disz) sza2 {iri}limmu2-dingir _dingir-mesz gal-mesz en-mesz_-ia
271. e-mur-ma ik-nu-sza2 a-na _{gesz}szudun_-ia
272. asz2-szu2 ba-lat, _zi_-ti3-szu2 up-na-a-szu2 ip-ta-a
273. u2-s,al-la-a be-lu-u-ti {disz}e-ri-si-in-ni
274. _dumu usz_-ti-szu2 a-na nina{ki} isz-pur-am-ma u2-na-sziq _giri3-min_-ia
275. _arhusz_ ar-szi-szu2 _{lu2}a kin_-ia sza2 szul-me u2-ma-'e-er _edin_-usz-szu2
276. _dumu-munus_ s,i-it lib3-bi-szu2 u2-sze-bi-la ana e-pesz _{munus}agrig_-u-ti
277. ma-da-at-ta-szu2 mah-ri-tu2 sza2 ina tar-s,i _lugal-mesz ad-mesz_-ia
278. u2-szab-t,i-lu isz-szu-u-ni a-di mah-ri-ia
279. 3(u) _ansze-kur-ra-mesz ugu_ ma-da-at-ti-szu2 mah-ri-te u2-rad-di-ma
280. e-mid-su ina u4-me-szu2-ma {disz}bi-ri-is-ha-at-ri _{lu2}en-iri_ sza mad-a-a
281. {disz}sar-a-ti {disz}pa-ri-hi 2(disz) _dumu-mesz_ {disz}ga-gi
282. _{lu2}en-iri_ {kur}sa-hi sza is,-lu-u _{gesz}szudun en_-ti-ia
283. 1(gesz2) 1(u) 5(disz) _iri-mesz_-szu2-nu dan-nu-ti ak-szu-ud asz2-lu-la szal-la-sun2
284. sza2-a-szu-nu bal-t,u-su-nu ina _szu-min_ as,-bat
285. u2-bi-la ana {iri}nina{ki} _iri en_-u-ti-ia
286. {disz}an-da-ri-a _{lu2}en-nam_ {kur}ur-ar2-t,i
287. sza2 a-na ka-sza2-ad {kur}up-pu-um-me u {kur}kul-li-im-me-ri
288. ir-da-a il-li-ka qe2-reb mu-szi-ti
289. _ug3-mesz_ a-szi-bu-ti {iri}kul-li-im-me-ri
290. _ARAD-mesz_ da-gil2 pa-ni-ia
291. ina szat mu-szi di-ik-ta-szu2 ma-as-su i-du-ku
292. la iz-zi-bu a-a-um-ma
293. _sag-du_ {disz}an-da-re-e ik-ki-su-nim-ma
294. a-na {iri}nina{ki} ina mah-ri-ia u2-bil-u-ni
295. ina 6(disz)-szi ger-ri-ia _ugu_ {disz}ur-ta-ki _man_ {kur}elam-ma{ki}
296. lu-u al-lik sza _mun ad du3_-ia la ha-as-su
297. la is,-s,u-ru ib-ru-ti ul-tu2 ina {kur}elam-ma{ki}
298. su-un-qu isz-ku-nu ib-ba-szu2-u ne2-eb-re-tu
299. {d}nisaba ba-lat, _zi_-tim _ug3-mesz_ u2-sze-bil-szu2-ma
300. as,-bat _szu-min_-su _ug3-mesz_-szu2 sza2 la-pa-an su-un-qi2
301. in-nab-tu-u-nim-ma u2-szi-bu qe2-reb _kur_ asz-szur{ki}
302. a-di zu-un-nu ina _kur_-szu2 iz-nu-nu ib-ba-szu-u _buru14_
303. _ug3-mesz_ sza2-a-tu-nu sza2 ina _kur_-ia ib-lu-t,u u2-sze-bil-szu2-ma
304. _{lu2}elam-ma_-a-a sza2 ti-bu-us-su it-ti lib3-bi-ia la da-ba-ku
305. la ha-as-sa-ku s,e-let-su {disz}en-ba-sza2 {kur}gam-bu-la-a-a
306. {disz}{d}muati-mu-kam-esz _{lu2}gu2-en-na ARAD-mesz_ da-gil2 pa-ni-ia
307. {disz}{d}marduk-mu-du3 {lu2}szu-ut _sag-mesz_ sza2 {disz}ur-ta-ki sza2 it-ti-szu2-nu
308. isz-ku-nu pi-i-szu ana mit-hu-s,i _kur eme-gi7_ u uri{ki}
309. ina pi-ir-s,a-a-ti id-ku-u-ni {disz}ur-ta-ki _man_ {kur}elam-ma{ki}
310. {disz}ur-ta-ki sza2 la ag-ru-szu2 qa-bal-szu2 id-ka-a
311. a-na {kur}kar2-{d}dun-ia2-asz3 ur-ri-ha ta-ha-zu
312. asz2-szu2 _zi?_-ut {lu2}e-la-me-e _{lu2}a kin_
313. a-na nina{ki} il-li-kam-ma iq-ba-a ia-a-te
314. a-ma-ti sza2-a-ti-na sza ti-bu-ti {disz}ur-ta-ki
315. ul asz2-du-ud ina lib3-bi-ia
316. szu-ut _{lu2}mah-mesz_-szu2 sza2 su-lum-me-e
317. isz-ta-nap-pa-ra ina mah-ri-ia
318. a-na a-mar _man {kur}elam-ma{ki} {lu2}a kin_-ia u2-ma-'e-er
319. ha-an-t,isz il-lik i-tu-ram-ma
320. a-ma-a-te ka-a-a-ma-na-ti u2-sza2-an-na-a ia-a-te
321. um-ma {lu2}e-la-mu-u _gin7 zi_-ut _buru5-hi-a_
322. ka-tim _kur_ uri{ki} ka-li-sza2 s,e-er babila2{ki}
323. usz-man-nu sza2-kin-ma na-di ma-dak-tu2 ana na-ra-ru-ti
324. {d}en u {d}ag _dingir-mesz_-ia sza2 ap-tal-la-hu _dingir_-us-su-un
325. _erin2-mesz me3_-ia ad-ke-e-ma as,-ba-ta har-ra-nu
326. a-lak ger-ri-ia isz-me-ma hat-tu is-hup2-szu2-ma
327. i-tur ana _kur_-szu2 _egir_-szu2 as,-bat a-bi-ik-ta-szu2 asz2-kun
328. at,-ru-us-su a-di mi-s,ir _kur_-szu2
329. {disz}ur-ta-ki _lugal_ {kur}elam-ma{ki} sza2 la is,-s,u-ru ib-ru-ti
330. ina u4-me la szim-ti-szu2 mu-u2-tu u2-ga-ru-u
331. ina ta-ne2-hi iq-tu-u i-zu-bu
332. ina qaq-qa-ri ba-la-t,i _giri3-min_-szu2 ul isz-kun
333. ina _mu-an-na_-szu2 na-pisz-ta-szu2 iq-ti
334. il-lik nam-mu-szi-szu2 {disz}en-ba-sza2 {lu2}gam-bu-la-a-a
335. sza is,-lu-u2 _{gesz}szudun en_-u-ti-ia ina ni-szik _pesz2_ isz-ta-kan na-pisz-tu2
336. {disz}{d}muati-mu-kam-esz _{lu2}gu2-en-na_ la na-s,ir a-de-e
337. isz-szi a-ga-nu-til-la-a _a-mesz sa5-mesz_
338. {disz}{d}marduk-mu-du3 {lu2}szu-ut _sag_-szu2 mu-szad-bi-ib-szu2
339. sza _munus-hul_ u2-szak-pi-du a-na {disz}ur-ta-ki
340. e-mid-su {d}marduk _man dingir-mesz_ sze-er-ta-szu2 _gal_-tu2
341. ina 1(disz)-et _mu-an-na_ me2-eh-ret a-ha-mesz
342. isz-ku-nu na-pisz-tu2 lib3-bi an-szar2 ag-gu
343. ul i-nu-uh-szu-nu-ti
344. ul ip-szah-szu-nu-ti ka-bit-ti {d}isz-tar
345. sza u2-tak-kil-an-ni
346. _bala_-e _lugal_-ti-szu2 isz-ki-pu
347. be-lut {kur}e-lam-ti u2-szal-qu-u sza2-nam-ma
348. ar-ka {disz}te-um-man tam-szil _gal5-la2_ u2-szib ina _{gesz}gu-za_
349. {disz}ur-ta-ki a-na da-a-ki _dumu-mesz_ {disz}ur-ta-ki
350. a-na _dumu-mesz_ {disz}um-man-al-da-sze _szesz_ {disz}ur-ta-ki
351. isz-te-ne2-'a-a _munus-hul_
352. {disz}um-man-i-gasz {disz}um-man-ap-pa {disz}tam-ma-ri-tu
353. _dumu-mesz_ {disz}ur-ta-ki _lugal_ {kur}elam-ma{ki}
354. {disz}ku-dur2-ru {disz}pa-ru-u2 _dumu-mesz_ {disz}um-man-al-da-sze
355. _lugal_ a-lik pa-ni {disz}ur-ta-ki
356. u3 1(gesz2) _numun lugal_ ina la mi3-ni _erin2-mesz {gesz}pan_
357. _dumu_ ba-ne2-e sza {kur}elam-ma{ki}
358. la-pa-an da-a-ki {disz}te-um-man
359. in-nab-tu-nim-ma is,-ba-tu2 _giri3-min lugal_-ti-ia
360. ina 7(disz)-e ger-ri-ia _ugu_ {disz}te-um-man _man_ {kur}elam-ma{ki}
361. lu-u al-lik sza2 _ugu_ {disz}um-man-i-gasz {disz}um-man-ap-pa
362. {disz}tam-ma-ri-tu _dumu-mesz_ {disz}ur-ta-ki _lugal_ {kur}elam-ma{ki}
363. {disz}ku-dur2-ru {disz}pa-ru-u2 _dumu-mesz_ {disz}um-man-al-da-sze
364. _szesz_ {disz}ur-ta-ki _lugal_ {kur}elam-ma{ki}
365. _{lu2}mah-mesz_-szu2 isz-ta-nap-pa-ra ana sze-bu-li
366. _ug3-mesz_ sza2-a-tu-nu sza2 in-nab-tu-nim-ma
367. is,-ba-tu2 _giri3-min_-ia sze-bul-szu2-nu ul aq-bi-szu2
368. ina _ugu_ me-re-he-e-ti ina _szu-min_ {disz}um-ba-da-ra-a
369. u3 {disz}{d}muati-saga-iq isz-ta-nap-pa-ra _iti_-szam
370. qe2-reb {kur}elam-ma{ki} usz-tar-ra-ah ina _ukken erin2-hi-a_-szu2
371. at-kil a-na {d}1(u)-5(disz) sza2 u2-tak-kil-an-ni
372. qi2-bit pi-i-szu er-hu ul am-gur2 ul a-din-szu2
373. mun-nab-ti sza2-a-tu-nu {disz}te-um-man le-mut-tu2
374. isz-te-ne2-'a-a {d}sin isz-te-ne2-'a-szu2
375. _geszkim-mesz munus-hul_ ina _{iti}szu an-mi_ szat ur-ri _en zalag2_
376. usz-ta-ni-ih-ma {d}utu _igi_-szu2-ma ki-ma szu-a-tu-ma
377. kal u4-me usz-ta-ni-ih a-na qi2-it _bala-mesz_
378. _man {kur}elam-ma{ki} zah2 kur_-szu2
379. u2-kal-lim-an-ni _gurun esz-bar_-szu2 sza la in-ne2-nu-u
380. ina u4-me-szu2-ma mi-ih-ru im-hur-szu-ma
381. _nundum_-su uk-tam-bil-ma _igi-min_-szu2 is-hur-ma
382. ga-ba-s,u isz-sza2-kin ina lib3-bi-szu
383. it-ti ep-sze-e-ti an-na-a-ti sza2 an-szar2 u {d}1(u)-5(disz)
384. e-pu-szu2-usz ul i-ba-asz2 id-ka-a _erin2-hi-a_-szu2
385. ina _{iti}ne iti_ na-an-mur-ti _mul-pan_
386. i-sin-ni szar-ra-ti ka-bit-ti _dumu-munus_ {d}en-lil2
387. a-na pa-lah _dingir_-ti-sza2 _gal_-ti asz2-ba-ak
388. ina {iri}limmu2-dingir _iri_ na-ram lib3-bi-sza2
389. asz2-szu2 ti-bu-ut {lu2}e-la-me-e sza2 ba-lu-u _dingir_ it-ba-a
390. u2-sza2-an-nu-u-ni t,e3-e-mu um-ma {disz}te-um-man
391. ki-a-am iq-bi sza2 {d}1(u)-5(disz) u2-sza2-an-nu-u mi3-lik t,e3-me-szu2
392. um-ma ul u2-masz-szar a-di al-la-ku it-ti-szu2
393. ep-pu-szu2 mit-hu-s,u-tu2 szu-ut me-re-eh-te an-ni-te
394. sza2 {disz}te-um-man iq-bu-u am-hur sza2-qu-tu2 {d}isz-tar
395. a-zi-iz ana tar-s,i-sza2 ak-mi3-is sza2-pal-sza2
396. _dingir_-us-sa u2-sap-pa-a il-la-ka di-ma-a-a
397. um-ma {d}be-let {iri}limmu2-dingir{ki} a-na-ku {disz}asz-szur-du3-a _man kur_ asz-szur{ki}
398. bi-nu-ut _szu-min_-ki sza2 ih-szu-hu-szu2 an-szar2 _ad_ ba-nu-ki
399. a-na ud-du-usz esz-re-e-ti szul-lum par-s,e-szu2-un
400. na-s,ir pi-risz-te-szu2-un szu-t,u-ub lib3-bi-szu2-un
401. im-bu-u zi-kir-szu2 a-na-ku asz2-re-e-ki asz2-te-ne2-'i-i
402. al-li-ka a-na pa-lah _dingir_-ti-ki szul-lum par-s,e-e-ki
403. u3 szu-u2 {disz}te-um-man _man_ {kur}elam-ma{ki} la mu-sza2-qir _dingir-mesz_
404. ku-s,ur ka-li a-na mit-hu-s,i _erin2-hi-a_-ia
405. um-ma at-ti {d}be-let be-le-e-ti i-lat qab-li be-let _me3_
406. ma-li-kat3 _dingir-mesz ad-mesz_-sza2 sza2 ina ma-har an-szar2 _ad du3_-ki
407. _saga_-ti3 taq-bi-i i-na ni-isz _igi-min_-szu2 _ku3-mesz_ ih-szu-ha-an-ni
408. a-na _lugal_-u-ti asz2-szu2 {disz}te-um-man _man_ {kur}elam-ma{ki}
409. sza2 ana an-szar2 _man dingir-mesz ad du3_-ki ih-tu-u bil-tu
410. id-ka-a _erin2-hi-a_-szu2 ik-s,u-ra ta-ha-zu
411. u2-sza2-'i-i-la _{gesz}tukul-mesz_-szu2 a-na a-lak _kur_ asz-szur{ki}
412. um-ma at-ti qa-rit-ti _dingir-mesz_ ki-ma _gun_
413. ina qa-bal tam-ha-ri pu-ut,-t,i-ri-szu2-ma di-kisz-szu2 me-hu-u
414. _im_ lem-nu in-he-ia szu-nu-hu-ti {d}1(u)-5(disz) isz-me-ma
415. la ta-pal-lah iq-ba-a u2-szar-hi-s,a-an-ni lib3-bu
416. a-na ni-isz _szu-min_-ka sza2 tasz-sza2-a _igi-min_-ka im-la-a di-im-tu2
417. ar-ta-szi re-e-mu ina szat mu-szi szu-a-tu sza2 am-hur-szi
418. 1(disz)-en {lu2}szab-ru-u u2-tu-ul-ma i-na-at,-t,al _masz2-ge6_
419. i-gi-il-ti-ma tab-rit mu-szi sza {d}1(u)-5(disz) u2-szab-ru-szu2
420. u2-sza2-an-na-a ia-a-ti um-ma {d}1(u)-5(disz) a-szi-bat {iri}limmu2-dingir
421. e-ru-ba-am-ma 1(u)-5(disz) u 2(disz)-3(u) tu-ul-la-ta isz-pa-a-ti
422. tam-ha-at _{gesz}pan_ ina i-di-sza2 szal-pat nam-s,a-ru zaq-tu2 sza2 e-pesz ta-ha-zi
423. ma-har-sza2 ta-zi-iz szi-i ki-ma _ama_
424. a-lit-ti i-tam-ma-a it-ti-ka
425. il-si-ka {d}1(u)-5(disz) sza2-qut _dingir-mesz_ i-szak-kan-ka t,e3-e-mu
426. um-ma ta-na-at,-t,a-la a-na e-pesz sza2-asz2-me
427. a-szar pa-nu-u-a szak-nu te-ba-ku a-na-ku
428. at-ta ta-qab-bi-sza2 um-ma a-szar tal-la-ki
429. it-ti-ki lul-lik {d}be-let _gaszan-mesz_
430. szi-i tu-sza2-an-nak-ka um-ma at-ta a-kan-na lu asz2-ba-ta
431. a-szar masz-kan2-i-ka a-kul a-ka-lu szi-ti ku-ru-un-nu
432. nin-gu-tu2 szu-kun nu-'i-id _dingir_-ti
433. a-di al-la-ku szip-ru szu-a-tu ep-pu-szu2 u2-szak-sza2-du
434. s,u-um-me-rat lib3-bi-ka
435. pa-nu-u-ka ul ur-raq ul i-nar3-ru-t,a _giri3-min_-ka
436. ul ta-szam-mat, zu-ut-ka ina _muru2_ tam-ha-ri
437. ina ki-rim-mi3-sza2 _du10-ga_ tah-s,i-in-ka-ma tah-te-na gi-mir la-ni-ka
438. pa-nu-usz-sza2 {d}gesz-bar in-na-pi-ih
439. szam-risz ta-at-ta-s,i a-na a-ha-a-ti
440. e-li {disz}te-um-man _man_ {kur}elam-ma{ki}
441. sza ug-gu-ga-ta pa-nu-usz-sza2 tasz-kun
442. ina _{iti}kin_ szi-pir _{d}inanna-mesz_ i-sin-ni an-szar2 s,i-i-ru
443. _iti_ {d}sin na-an-nar3 _an_-e u _ki_-tim at-kil ana _esz-bar_
444. {d}nanna-ri nam-ri u3 szi-pir {d}1(u)-5(disz) _gaszan_-ia sza2 la in-nen-nu-u
445. ad-ke _erin2-mesz me3-mesz_-ia mun-dah-s,e sza2 ina qi2-bit an-szar2 {d}sin u {d}1(u)-5(disz)
446. it-ta-na-asz2-ra-bi-t,u ina _muru2_ tam-ha-ri
447. e-li {disz}te-um-man _man_ {kur}elam-ma{ki} ur-hu as,-bat-ma
448. usz-te-sze-ra har-ra-nu el-la-mu-u-a {disz}te-um-man _man_ {kur}elam-ma{ki}
449. ina {iri}e2-{disz}im-bi-i na-di ma-dak-tu2 e-reb _lugal_-ti-ia
450. sza2 qe2-reb |BAD3.AN|{ki} isz-me-e-ma is,-bat-su hat-tu {disz}te-um-man ip-lah3-ma
451. ana _egir_-szu2 i-tur e-ru-ub qe2-reb {iri}szu-sza2-an
452. _ku3-babbar ku3-sig17_ a-na szu-zu-ub _zi_-ti3-szu2 u2-za-'i-iz a-na _ug3-mesz kur_-szu2
453. re-s,e-e-szu a-lik _a2-min_-szu pa-nu-usz-szu2 u2-ter-ram-ma
454. ug-dap2-pi-sza2 a-na mah-ri-ia
455. {i7}u2-la-a-a ana dan-nu-ti-szu2 isz-kun-ma is,-bat pa-an masz-qe2-e
456. ina qi2-bit an-szar2 {d}marduk _dingir-mesz gal-mesz en-mesz_-ia2 sza2 u2-tak-kil-u2-in-ni
457. ina _geszkim-mesz munus saga masz2-ge6 inim-gar_ szi-pir mah-he-e
458. qe2-reb _du6-{iri}tu_-ba _bad5-bad5_-szu2-nu asz2-kun
459. ina _adda-mesz_-szu2-nu {i7}u2-la-a-a
460. as-ki-ir szal-ma-ti-szu2-nu ki-ma _{gesz}dih3_ u _{gesz}kiszi16_
461. u2-mal-la-a ta-mir-ti {iri}szu-sza2-an
462. _sag-du_ {disz}te-um-man _lugal_ {kur}elam-ma{ki} ina qi2-bit
463. an-szar2 u {d}marduk _dingir-mesz gal-mesz en-mesz_-ia
464. ak-kis ina _ukken erin2-hi-a_-szu2 me-lam-me an-szar2 u {d}1(u)-5(disz)
465. {kur}elam-ma{ki} is-hu-up-ma ik-nu-szu2 a-na ni-ri-ia2
466. {disz}um-man-i-gasz sza2 in-nab-tu is,-ba-tu _giri3-min_-ia2
467. ina _{gesz}gu-za_-szu2 u2-sze-szib {disz}tam-ma-ri-tu _szesz_-szu2 szal-sza2-a-a
468. ina {iri}hi-da-lu a-na _lugal_-u2-ti asz2-kun
469. _{gesz}gigir-mesz_ {gesz}s,u-um-bi _ansze-kur-ra-mesz ansze-kunga-mesz_
470. s,i-mit-ti ni-i-ri {gesz}til-li si-mat _me3_
471. sza2 ina tukul-ti an-szar2 {d}1(u)-5(disz) _dingir-mesz gal-mesz en-mesz_-ia
472. bi-rit {iri}szu-sza2-an u {i7}u2-la-a-a ik-szu-da _szu-min_-a-a
473. ina qi2-bit an-szar2 u _dingir-mesz gal-mesz en-mesz_-ia
474. ul-tu qe2-reb {kur}elam-ma{ki} ha-disz u2-s,a-am-ma
475. a-na gi-mir _erin2-hi-a_-ia sza2-lim-tu szak-na-at
476. ina 8(disz)-e ger-ri-ia _ugu_ {disz}du-na-nu _dumu {disz}en-ba_-sza2
477. a-na {kur}gam-bu-li lu-u al-lik
478. sza2 a-na _lugal_ {kur}elam-ma{ki} it-tak-lu
479. la ik-nu-szu2 a-na ni-ri-ia
480. ta-ha-zi dan-nu {kur}gam-bu-lu a-na si-hir-ti-szu2
481. ki-ma _muru9_ ak-tum3
482. {iri}sza2-pi-i-{d}en _iri_ dan-nu-ti-szu2
483. sza qe2-reb _id2-mesz_ na-da-at szu-bat-su ak-szu-ud
484. {disz}du-na-nu _szesz-mesz_-szu2 ul-tu qe2-reb _iri_ szu-a-tu
485. bal-t,u-su-un u2-sze-s,a-a
486. _dam_-su _dumu-mesz_-szu2 _dumu-munus-mesz_-szu2 {munus}sek-re-ti-szu2
487. _{lu2}nar-mesz {munus}nar-mesz_ u2-sze-s,a-am-ma szal-la-tisz am-nu
488. _ku3-babbar ku3-sig17 nig2-szu_ na-kam2-ti _e2-gal_-szu2 u2-sze-s,a-am-ma szal-la-tisz am-nu
489. {lu2}szu-ut _sag-mesz_ man-za-az pa-ni-szu2 {lu2}kit-ki-tu-u mu-sza2-ki-le-szu2 u2-sze-s,a-am-ma
490. szal-la-tisz am-nu gi-mir um-ma-a-ni ma-la ba-szu-u
491. mar-kas _iri_ u _edin_ u2-sze-s,a-am-ma szal-la-tisz am-nu
492. _gu4-mesz_ s,e-e-ni _ansze-kur-ra-mesz ansze-kunga-mesz_
493. sza ni-ba la i-szu2-u u2-sze-s,a-am-ma szal-la-tisz am-nu
494. _ug3-mesz kur_-szu2 zi-kir u sin-nisz _tur_ u _gal_
495. e-du ul e-zib u2-sze-s,a-am-ma szal-la-tisz am-nu
496. {disz}mas-si-ra-a _{lu2}gal {gesz}pan_ sza2 {disz}te-um-man _man_ {kur}elam-ma{ki}
497. sza2 a-na kit-ri {kur}gam-bu-li ma-s,ar-tu {disz}du-na-nu
498. asz2-bu qe2-reb {iri}sza2-pi-i-{d}en
499. bal-t,u-us-su ina qa-ti as,-bat
500. _sag-du_-su ak-kis2
501. it-ti pa-ni {disz}du-na-nu kit-ri la mu-sze-zib-i-szu2 ar-pi-is
502. _iri_ szu-a-tu2 ap-pul aq-qur ina _a-mesz_ usz-har-mit,
503. a-di la ba-sze-e u2-sza2-lik
504. na-gu-u2 szu-a-tu u2-szah-rib
505. ri-gim a-me-lu-ti ap-ru-sa _edin_-usz-szu2
506. ina tu-kul-ti an-szar2 {d}en {d}ag _dingir-mesz gal-mesz en-mesz_-ia
507. _{lu2}kur2-mesz_-ia a-ni-ir szal-mesz a-tu-ra a-na nina{ki}
508. _sag-du_ {disz}te-um-man _man_ {kur}elam-ma{ki} ina _gu2_ {disz}du-na-nu a-lul
509. it-ti ki-szit-ti {kur}elam-ma{ki}
510. szal-la-at {kur}gam-bu-li
511. sza ina qi2-bit an-szar2 ik-szu-da _szu-min_-a-a
512. it-ti _{lu2}nar-mesz_ e-pisz nin-gu-ti
513. a-na nina{ki} e-ru-ub ina _hul2-mesz_
514. {disz}um-ba-da-ra-a {disz}{d}muati-saga-iq
515. _{lu2}mah-mesz_ sza2 {disz}te-um-man _lugal_ {kur}elam-ma{ki}
516. sza {disz}te-um-man ina _szu-min_-szu2-nu isz-pu-ra
517. szi-pir me-re-eh-ti sza ina mah-ri-ia ak-lu-u
518. u2-qa-'u-u2 pa-an szi-kin t,e3-me-ia
519. ni-kis _sag-du_ {disz}te-um-man _en_-szu2-nu qe2-reb nina{ki}
520. e-mu-ru-ma sza2-ne2-e t,e3-e-me is,-bat-su-nu-ti
521. {disz}um-ba-da-ra-a ib-qu-nu ziq-na-a-szu
522. {disz}{d}ag-saga-iq ina _gir2 an-bar_ szib-bi-szu2 is-hu-la kar-as-su
523. ni-kis _sag-du_ {disz}te-um-man ina _gaba abul muru2 iri_
524. sza nina{ki} u2-mah-hi-ra mah-hu-risz
525. asz2-szu2 da-na-an an-szar2 u {d}1(u)-5(disz) _en-mesz_-ia _ug3-mesz_ kul-lu-me
526. ni-kis _sag-du_ {disz}te-um-man _lugal_ {kur}elam-ma{ki}
527. {disz}ibila-a-a _dumu_ {disz}{d}muati-sa-lim _dumu dumu {disz}{d}szu2-a-asz_
528. sza la-pa-an _ad ad_ ba-ni-ia _ad_-szu2 in-nab-tu
529. a-na {kur}elam-ma{ki} ul-tu {disz}um-man-i-gasz qe2-reb {kur}elam-ma{ki}
530. asz2-ku-nu ana _lugal_-u2-ti {disz}ibila-ia _dumu_ {disz}{d}ag-sa-lim
531. is,-bat u2-sze-bi-la a-di mah-ri-ia
532. {disz}du-na-nu {disz}sa-am-gu-na _dumu-mesz {disz}{d}en-ba_-sza2
533. {kur}gam-bu-la-a-a sza2 _ad-mesz_-szu2-un a-na _lugal-mesz ad-mesz_-ia2
534. u2-dal-li-pu-ma u3 szu-nu u2-nar3-ri-t,u e-pesz
535. _lugal_-ti-ia qe2-reb bal-til{ki} u3 {iri}limmu2-dingir
536. a-na da-lal2 ah-ra-a-te u2-bil-szu-nu-ti
537. sza2 {disz}man-nu-ki-pap-mesz {lu2}2(disz)-u sza2 {disz}du-na-ni
538. u3 {disz}{d}muati-u2-s,al-li {lu2}sza2 _ugu iri_ {kur}gam-bu-li
539. sza _ugu dingir-mesz_-ia iq-bu-u szil-la-tu2 _gal_-ti
540. qe2-reb {iri}limmu2-dingir _eme_-szu2-un asz2-lu-up asz2-hu-t,a _kusz_-szu2-un
541. {disz}du-na-nu qe2-reb nina{ki} _ugu_ {gesz}ma-ka-s,i id-du-szu2-ma
542. it,-bu-hu-szu2 as-lisz si-it-ti _szesz-mesz_-szu2 sza2 {disz}du-na-ni
543. u3 {disz}ibila-a-a a-ni-ir _uzu-mesz_-szu2-nu u2-na-kis
544. u2-sze-bil a-na ta-mar-ti ma-ti-tan
545. {disz}{d}muati-i {disz}{d}en-kar-ir _dumu-mesz {disz}{d}muati-mu-kam_-esz _{lu2}gu2-en-na_
546. sza2 _ad_ ba-nu-szu2-un {disz}ur-ta-ku id-ka-a a-na
547. mit-hu-s,i _kur uri{ki} giri3-pad-da-mesz {disz}{d}muati-mu-kam_-esz
548. sza2 ul-tu qe2-reb {kur}gam-bu-li il-qu-u-ni a-na _kur_ asz-szur{ki}
549. _giri3-pad-da-mesz_ sza2-a-ti-na me2-eh-ret _abul muru2 iri_
550. sza2 {iri}ni-na-a
551. u2-szah-szi-la _dumu-mesz_-szu2
552. {disz}um-man-i-gasz sza2 t,a-ab-tu2 ma-a'-as-su e-pu-szu2-usz
553. asz2-ku-nu-usz a-na _lugal_-u-ti {kur}elam-ma{ki}
554. sza _saga_-ti3 la ha-as-su
555. la is,-s,u-ru a-de-e ma-mit _dingir-mesz gal-mesz_
556. ul-tu _szu-min {lu2}a kin-mesz {disz}{d}gesz-nu11-mu-gi-na_
557. _szesz_ la ke-nu _{lu2}kur2_-ia im-hu-ru t,a-a'-tu2
558. e-mu-qi-szu2 it-ti-szu2-un isz-pu-ra
559. a-na mit-hu-s,i _erin2-hi-a_-ia
560. _erin2-mesz me3_-ia sza2 ina {kur}kar2-{d}dun-ia2-asz3
561. it-ta-na-al-la-ku u2-kab-ba-su {kur}kal-du
562. ina la i-de s,e-er {disz}un-da-si
563. _dumu_ {disz}te-um-man _lugal_ {kur}elam-ma{ki}
564. u3 {disz}za-za-az _{lu2}en-iri_ {kur}pil-la-te
565. {disz}pa-ru-u2 _{lu2}en-iri_ {kur}hi-il-mu
566. {disz}at-ta-me-tu _{lu2}gal {gesz}pan_
567. {disz}ne2-e-szu2 a-lik pa-ni _erin2-hi-a_ sza2 {kur}elam-ma{ki}
568. a-na mit-hu-us,-s,i it-ti _erin2-hi-a kur_ asz-szur{ki}
569. u2-ma-'e-er-szu2-nu-ti isz-kun-szu2-nu-te t,e3-e-mu
570. {disz}um-man-i-gasz a-na {disz}un-da-si ki-a-am iq-bi
571. um-ma a-lik _ta kur_ asz-szur{ki} ter-ra
572. tuk-te9-e _ad_ ba-ni-ka
573. {disz}un-da-a-su? {disz}za-za-az {disz}pa-ru-u {disz}at-ta-me-tu {disz}ne2-e-szu2
574. it-ti _{lu2}a kin-mesz {disz}{d}gesz-nu11-mu-gi-na szesz_ nak-ri
575. ur-hu is,-ba-tu-nim-ma usz-te-sze-ru-ni har-ra-nu
576. _erin2-mesz me3_-ia ina {iri}man-gi-si sza2 qe2-reb {iri}su-man-dir
577. _edin_-usz-szu2-un e-lu-nim-ma isz-ku-nu tah-ta-szu2-un
578. sza {disz}un-da-si _dumu_ {disz}te-um-man _lugal_ {kur}elam-ma{ki}
579. sza {disz}za-za-az {disz}par-ru-u2 {disz}at-ta-me-tu
580. _sag-du-mesz_-szu2-nu ik-ki-su-nim-ma u2-bil-u-ni a-di mah-ri-ia
581. szu-ut a-ma-a-ti an-na-a-ti _{lu2}a kin_-ia
582. u2-ma-'e-er s,e-er {disz}um-man-i-gasz
583. {lu2}szu-ut _sag_-ia sza2 asz2-pu-ru ik-la-ma
584. la u2-ter-ra tur-tu2 a-mat-ia
585. an-szar2 {d}sin {d}utu {d}en {d}muati {d}u-gur _dingir-mesz_ ti-ik-le-ia
586. di-in kit-ti it-ti {disz}um-man-i-gasz i-di-nu-in-ni
587. {disz}tam-ma-ri-tu _edin_-usz-szu2 ib-bal-kit-ma sza2-a-szu2 ga-du kim-ti-szu2 u2-ra-sib
588. ina _{gesz}tukul-mesz_ {disz}tam-ma-ri-tu2 sza2 e-la sza2-a-szu2 ek-s,u u2-szib ina _{gesz}gu-za_
589. {kur}elam-ma{ki} ki-ma sza2-a-szu2-ma t,a-'a-a-tu2 im-hur
590. ul isz-al szu-lum _lugal_-ti-ia
591. a-na kit-ri {disz}{d}gesz-nu11-mu-gi-na _szesz_ la ke-e-nu il-lik-am-ma
592. a-na mit-hu-s,i _erin2-hi-a_-ia ur-ri-ha _{gesz}tukul-mesz_-szu2
593. ina su-up-pe-e sza2 an-szar2 u {d}1(u)-5(disz) u2-sap-pu-u
594. ta-ne2-hi-ia im-hu-ru isz-mu-u zi-kir _nundum_-ia
595. _ARAD-mesz_-szu2 _edin_-usz-szu2 ib-bal-ki-tu-ma
596. a-ha-mesz u2-ra-si-bu _en hul_-ti3-ia
597. {disz}in-da-bi-bi _ARAD_-su sza2 si-hu
598. _ugu_-szu2 u2-szab-szu-u u2-szib ina _{gesz}gu-za_-szu2
599. {disz}tam-ma-ri-tu _lugal_ {kur}elam-ma{ki}
600. sza me-re-eh-tu2 iq-bu-u
601. e-li ni-kis _sag-du_ {disz}te-um-man
602. sza2 ik-ki-su a-hu-ru-u _erin2-hi-a_-ia
603. u3 _szesz-mesz_-szu2 qin-nu-szu2 _numun e2 ad_-szu2
604. it-ti 1(gesz2) 2(u) 5(disz) _nun-mesz_ sza2 {kur}elam-ma{ki} a-li-kut _a2-min-mesz_-szu2
605. sza la-pa-an _{gesz}tukul-mesz_ an-szar2 u {d}1(u)-5(disz) ip-par-szu-nim-ma
606. a-na da-lal2 _dingir_-ti-szu2-nu _gal_-ti
607. it-ti {disz}{d}marduk-man-pap {lu2}szu-ut _sag_-ia
608. sza ib-szi-mu-szu2 ina da-na-ni
609. mi-ra-nu-usz-szu2-un ina _ugu_ lib3-bi-szu-nu
610. ip-szi-lu-nim-ma is,-ba-tu _giri3-min lugal_-ti-ia
611. {disz}tam-ma-ri-tu a-na e-pesz _ARAD_-ti-ia ra-man-szu2 im-nu-ma
612. a-na kat3-a-ri-szu2 u2-s,al-la-a _en_-u-ti
613. szu-ut 1(disz)-en szu-ut _sag_-ia an-szar2 {d}sin {d}utu {d}en {d}ag
614. _dingir-mesz_ tik-le-ia 1(disz) _lim-a-a_ ri-bi-ia i-ri-bu-u-ni
615. {disz}tam-ma-ri-tu _ug3-mesz_ ma-la it-ti-szu
616. qe2-reb _e2-gal_-ia ul-zi-is-su-nu-ti
617. {disz}in-da-bi-bi sza2 _egir_ {disz}tam-ma-ri-ti
618. u2-szi-bu ina _{gesz}gu-za_ {kur}elam-ma{ki}
619. da-na-an _{gesz}tukul-mesz_-ia i-de-e-ma
620. sza u2-szam-ri-ru _ugu_ {kur}elam-ma{ki}
621. _dumu-mesz kur_ asz-szur{ki} sza2 asz2-pu-ru
622. a-na kit-ri {disz}{d}muati-en-mu-mesz _dumu_ {disz}{d}marduk-a-asz
623. sza _gin7_ ib-ri u tap-pe-e na-s,ar _kur_-szu2
624. it-ta-na-al-la-ku it-ti-szu2
625. sza2 {disz}{d}muati-en-mu-mesz ina pi-ir-s,a-a-ti ina szat mu-szi
626. us,-s,ab-bi-tu ik-lu-u2 ina ki-li
627. {disz}in-da-bi-bi _lugal_ {kur}elam-ma{ki}
628. ul-tu _e2_ s,i-bit-ti u2-sze-s,a-asz2-szu2-nu-ti
629. ki-i s,a-bat ab-bu-ut-ti qa-be2-e _munus saga_-szu2
630. la ha-t,e-e mi-s,ir _kur_-szu2
631. ina _szu-min {lu2}a kin_-szu2 sza2 t,u-u2-bi u3 su-lum-me-e
632. u2-sze-bi-la a-di _igi_-ia
633. {disz}ia-u-ta-a' _dumu_ {disz}ha-za-a-dingir _lugal_ {kur}qa-da-ri
634. e-pisz _ARAD_-ti-ia asz2-szu2 _dingir-mesz_-szu2 im-hur-an-ni-ma
635. u2-s,al-la-a _lugal_-u2-ti
636. _mu dingir-mesz gal-mesz_ u2-sza2-az-kir2-szu2-ma
637. {d}a-tar-sa-ma-in u2-ter-ma a-din-szu2
638. _egir_-nu ina a-de-ia ih-t,i-ma
639. _mun_ la is,-s,ur-ma is,-la-a _{gesz}szudun_ be-lu-ti-ia
640. a-na sza2-'a-al szul-mi3-ia _giri3-min_-szu2 ip-ru-us-ma
641. ik-la-a ta-mar-ti
642. _ug3-mesz_ {kur}a-ri-bi it-ti-szu2 u2-sza2-bal-kit-ma
643. ih-ta-nab-ba-tu hu-bu-ut _kur_ mar-tu{ki}
644. _erin2-hi-a_-ia sza2 ina mi-s,ir _kur_-szu2 asz2-bu
645. u2-ma-'e-e-ra s,e-ru-usz-szu
646. _bad5-bad5_-szu2-nu isz-ku-nu _ug3-mesz_ {kur}a-ri-bi
647. ma-la it-bu-u-ni u2-ra-si-bu ina _{gesz}tukul-mesz_
648. _e2 edin_ kul-ta-ri mu-sza2-bi-szu2-nu
649. _izi_ u2-sza2-hi-zu ip-qi2-du a-na {d}gesz-bar
650. _gu4-mesz_ s,e-e-ni _ansze-mesz ansze-gam-mal-mesz_
651. a-me-lu-tu isz-lu-lu-u-ni ina la mi3-ni
652. se-he-ep _kur_ ka-la-mu a-na si-hir-ti-szu2
653. um-da-na-al-lu-u a-na pat, gim-ri-sza2
654. _ansze-gam-mal-mesz_ ki-ma s,e-e-ni u2-par-ri-is
655. u2-za-'i-iz a-na _ug3-mesz kur_ asz-szur{ki}
656. qa-bal-ti _kur_-ia _ansze-gam-mal_ ina 1(disz) _gin2_ ina 1/2(disz) _gin2_ kas-pi
657. i-szam-mu ina _ka2_ ma-hi-ri
658. {munus}asz2-tam-mu ina ni-id-ni _{lu2}lunga2_ ina {dug}ha-be2-e
659. _{lu2}nu-{gesz}kiri6_ ina ki-i-szi im-da-na-ha-ru
660. _ansze-gam-mal-mesz_ u3 a-me-lu-tu
661. si-it-ti {lu2}a-ri-bi sza2 la-pa-an _{gesz}tukul-mesz_-ia
662. ip-par-szi-du u2-szam-qit {d}er3-ra qar-du
663. su-un-qu ina bi-ri-szu2-un isz-sza2-kin-ma
664. a-na bu-ri-szu2-nu e-ku-lu _uzu-mesz dumu-mesz_-szu2-un
665. ar-ra-a-ti ma-la ina a-de-szu2-un szat,-ru
666. ina pi-it-ti i-szi-mu-szu2-nu-ti an-szar2 {d}sin {d}utu
667. {d}en u {d}ag {d}1(u)-5(disz) sza2 nina{ki} {d}1(u)-5(disz) sza2 {iri}limmu2-dingir{ki}
668. _dingir-mesz gal-mesz en-mesz_-ia
669. {disz}ia-u-ta-a' ma-ru-usz-tu2 im-hur-szu2-ma
670. e-disz-szi-szu2 in-na-bit {disz}a-bi-ia-te-e' _dumu_ {disz}te-e'-ri
671. a-na nina{ki} il-li-kam-ma u2-na-sziq _giri3-min_-ia
672. a-de-e a-na e-pesz _ARAD_-ti-ia it-ti-szu2 asz2-kun
673. ku-um {disz}ia-u-ta-a' asz2-kun-szu2 ana _lugal_-u-ti
674. _ku3-sig17 {na4}igi-min-mesz {na4}babbar-dili_ gu-uh-lu _ansze-gam-mal-mesz_
675. _ansze-mesz_ bit-ru-tu2 man-da-at-tu2 szat-ti-szam-ma
676. u2-kin _edin_-usz-szu
677. {disz}am-mu-la-di-in _lugal_ {kur}qa-ad-ri sza2 ki-ma sza2-a-szu2
678. ik-ki-ru ih-ta-nab-ba-tu hu-bu-ut _kur_ mar-tu{ki}
679. ina zi-kir _mu_-ia sza2 an-szar2 {d}sin {d}utu {d}en {d}ag
680. {d}1(u)-5(disz) sza2 nina{ki} {d}1(u)-5(disz) sza2 limmu2-dingir{ki} u2-szar-bu-u2
681. {disz}ka-ma-as-hal-ta-a _lugal_ {kur}ma-'a-a-ba
682. _ARAD_ da-gil2 pa-ni-ia
683. ina _me3_ isz-ku-nu _bad5-bad5_-szu2
684. {disz}am-mu-la-di? si-it-ti _ug3-mesz_-szu2
685. sza la-pa-an da-a-ki i-szi-tu-u-ni u2-s,ab-bit ina _szu-min_
686. _szu-min_ u _giri3-min_ bi-re-tu2 _an-bar_ id-di-ma
687. a-na {iri}nina{ki} a-di mah-ri-ia u2-sze-bi-la
688. {disz}na-at-nu _lugal_ {kur}na-ba-a-a-ti
689. sza a-szar-szu ru-u-qu
690. isz-ma-a da-na-an an-szar2 u {d}marduk sza2 u2-tak-kil-u2-in-ni
691. sza ma-ti-ma a-na _lugal-mesz ad-mesz_-ia
692. _{lu2}a kin_-szu2 la isz-pu-ra
693. la isz-a-lu4 szu-lum _lugal_-ti-szu2-un
694. e-nen-na ia-a-ti _{lu2}a kin_-szu2 sza2 szul-me
695. isz-pu-ra u2-na-sziq _giri3-min_-ia
696. a-na sza2-kan a-de-e su-lum-me-e e-pesz _ARAD_-ti-ia
697. u2-s,a-na-al-la-a be-lu-u-ti
698. a-na-ku ha-disz ap-pa-lis-szu-ma
699. pa-ni-ia _saga-mesz ugu_-szu2 asz2-kun
700. _gun_ man-da-at-tu szat-ti-szam-ma u2-kin _edin_-usz-szu2
701. ina u4-me-szu2-ma _e2-gal_ ma-szar-ti sza qe2-reb nina{ki}
702. sza {disz}{d}sin-pap-mesz-su _man kur_ asz-szur{ki} _ad ad du3_-ia e-pu-szu2
703. la-ba-risz il-lik-am-ma tem-me-en-szu2 ir-bu-ub-ma
704. i-qu-pa _e2-gar8-mesz_-szu2
705. _e2-gal_ ma-szar-ti szu-a-tu sza la-ba-risz il-la-ku
706. e-na-hu _usz8_-szu2 mi-qit-ta-szu ad-ke
707. ak-szu-da a-sur-ru-szu ul-tu _usz8_-szu2
708. a-di gaba-dib-be2-e-szu2 ar-s,ip u2-szak-lil
709. _ugu_ sza2 u4-me pa-ni u2-dan-ni-na tem-me-en-szu2
710. _mu-sar_-u2 szi-t,ir _mu_-ia u ta-nit-ti qar-ra-du-ti-ia
711. sza2 ina tukul-ti an-szar2 {d}sin {d}utu {d}en {d}ag
712. {d}1(u)-5(disz) sza2 nina{ki} {d}1(u)-5(disz) sza2 {iri}limmu2-dingir {d}masz {d}nusku {d}u-gur
713. ina _kur-kur_ at-tal-la-ku asz2-ku-nu da-na-an u li-i-tu2
714. asz2-t,ur-ma ana? ah-rat u4-me e-zib
715. a-na _egir_ u4-me ina _dumu-mesz dumu dumu-mesz dumu-mesz_
716. u3 _dumu-mesz_ ina _lugal-mesz dumu-mesz_-ia
717. sza an-szar2 u {d}1(u)-5(disz) a-na be-lut _kur_ u _ug3-mesz_
718. i-nam-bu-u zi-kir-szu2 e-nu-ma _e2-gal_ ma-szar-te
719. szu-a-tu2 i-lab-bi-ru-ma en-na-hu
720. an-hu-us-su lu-ud-disz
721. _mu-sar_-u2 szi-t,ir _mu_-ia li-mur-ma
722. _i3-mesz_ lip-szu-usz _{udu}siskur bala_-qi2
723. a-na asz2-ri-szu lu-ter ki-i sza a-na-ku
724. _mu-sar_-u2 szi-t,ir szu-me {disz}{d}sin-pap-mesz-su _ad ad du3_-ia
725. a-mu-ru _i3-mesz_ ap-szu-szu2 _{udu}siskur_ aq-qu-u
726. it-ti _mu-sar_-e szi-t,ir _mu_-ia asz2-ku-nu
727. at-ta ki-ma ia-a-ti-ma _mu-sar_-a-a a-mur-ma
728. _i3-mesz_ pu-szu-usz _{udu}siskur bala_-qi2
729. it-ti _mu-sar_-e szi-t,ir _mu_-ka szu-kun
730. _dingir-mesz gal-mesz_ ma-la ina _mu-sar_-e an-ne2-e szat,-ru
731. _lugal_-ut-ka lik-tar-ra-bu li-is,-s,u-ru _bala-mesz_-ka
732. sza _mu-sar_-u2 szi-t,ir _mu_-ia
733. u3 szi-t,ir szu-me _ad ad_-ia? ib-ba-tu2
734. ina mim-ma szi-pir ni-kil-ti u2-hal-la-qu
735. it-ti _mu-sar_-e szi-t,ir _mu_-szu2 la i-szak-ka-nu
736. _dingir-mesz gal-mesz_ sza2 _an_-e u _ki_-tim _lugal_-su lis-ki-pu
737. _mu_-szu2 _numun_-szu2 ina _kur_ lu?-hal-li-qu