&P258910 = OB Legal 095 & 096 #atf: lang akk @tablet @obverse # for the most part covered by envelope @reverse $ beginning broken 1'. [...] x x [...] 2'. [a-na _2(esze3) GAN2 a-sza3]_ {iri}hu-ba{ki} _a-gar3#_ [puzur4-la-ba] 3'. [_1/3(disz) sar e2_ ga-gi]-im sza be-le-su2-nu _dumu-munus_ i-din-{d}utu 4'. [a-na la-ma]-si2# um-mi-sza id-di-nu-ma 5'. [{disz}la-ma-si2] a-na ARAD2-{d}suen ma-ri-sza ap-lu-sa3 id#-di#-nu 6'. [_1(esze3) 3(iku) GAN2 a-sza3] a-gar3_ me-er-ri-ga-at{ki} i-na pa-ni# _[{gesz}]tir#_ 7'. [_1(esze3) 3(iku) GAN2 a-sza3]_ {iri}hu-ba{ki} _sza3 a-sza3_ di-a-ta-[nu-um] 8'. [_3(disz) sar e2 du3-a_ i]-na# _e2_ la-bi-ri-im 9'. [sza wa-ar-ka-at _e2]_ {d}suen 10'. [_1(disz) sag-ARAD2]_ at#-[ta-dingir]-ma 11'. _1(disz) [sag-geme2]_ ma-ad-du#-[mu-uq]-sza 12'. _1(disz) [sag]-geme2_ be-el-ti#-[illat-ti] 13'. _1(disz) sag#-geme2_ ma-an-nu-um-ba-lu-usz#-sza 14'. sza in-bu-sza a-na ARAD2-sin _dumu_ sin-ma-gir a-hi-sza 15'. ap-lu-us-sa3 id-di-nu u3 wa-tar-ti _e2 a-ba_ 16'. a-na ARAD2-sin _dumu_ sin-ma-gir u2-ul i-ra-ga-mu# 17'. _mu_ {d}utu {d}marduk u3 sa-am-su-i-lu-na it#-[mu-u2] 18'. _igi_ nu-ra-tum _dumu_ sig-an-nu-ni#-[tum] 19'. _igi_ ARAD2-sin _dumu_ sin-i-din-nam x x x [...] 20'. _igi_ sig-an-nu-ni-tum _dumu#_ dingir#-szu#-ba-ni# 21'. _igi_ {d}suen-be-el-ibila _[dumu ...]-x-[x] 22'. _igi_ i-bi-{d}nin-szubur _dumu_ nu-ur2-a-li-[szu] 23'. _igi_ an-pi2-sza _dumu_ s,il2-li2-{d}utu @left 1. _igi_ ri-isz-{d}utu _dumu_ lu-usz#-ta#-mar#-[sin] @envelope @obverse 1. a-na _2(esze3)# GAN2 a-sza3_ sza {iri}hu-ba _a-gar3_ puzur4-la-ba 2. sza [{d}]suen#-ma-gir _dumu_ a-bu-um-wa-qar isz-ta-mu 3. _1/3(disz)# sar <e2>_ ga-gi-im _da e2_ {d}a-a-tum 4. [u3] _da e2_ a-ma-at-{d}ma-mu 5. sza# be-le-su2-nu _dumu-munus_ i-din-{d}utu a-na la-ma-si2 um-mi-sza 6. ap-lu-us-sa3 id-di-nu-ma 7. {disz}la-ma-si2 a-na ARAD2-{d}suen ma-ri-sza ap-lu-us-<sa3> id-di-nu 8. _1(esze3)# 3(iku) GAN2 a-sza3 a-gar3_ me-er-ri-ga-at{ki} 9. li#-ib-bu te-ep-ti-tim sza pa-ni _{gesz}tir_ 10. i-ta _e_ {d}szul-gi u3 i-ta _a-sza3_ la-ma-sa3-ni _lukur_ {d}utu 11. _1(esze3) 3(iku) GAN2 a-sza3 a-gar3_ {iri}hu-ba li-ib-bu _a-sza3_ di-a-ta-nu-um 12. i-ta _a-sza3_ {d}en-lil2-is-su2 a-hi-sza u3 i-ta _a-sza3_ i-bi-{d}en-lil2 a-hi-sza 13. _3(disz) sar e2 du3-a_ li-ib-bu _e2_ la-bi-ri-im sza wa-ar-ka-at _e2_ {d}suen 14. _1(disz) sag-ARAD2_ at-ta-dingir-ma _1(disz) sag-geme2_ ma-ad-du-mu-uq-sza 15. _1(disz) sag-geme2_ be-el-ti-illat-ti _1(disz) sag-geme2_ ma-an-nu-um-ba-lu-usz-sza 16. [sza] in-bu-sza _nu-bar dumu-munus_ a-bu-um-wa-qar 17. [a]-na# ARAD2-{d}suen _dumu_ {d}suen-ma-gir a-hi-sza ap-lu-us-sa3 id-di-nu 18. [{disz}]i-bi-{d}en-lil2 {disz}dingir-szu-i#-bi u3 be-le-su2-nu _dumu-mesz_ {d}en-lil2-na-s,i-ir 19. [a-na] ARAD2#-{d}suen _dumu_ {d}suen-ma#-gir# ir-gu-mu um-ma szu-nu-ma 20. [ki-isz]-da#-at {d}en-lil2-na-s,i#-ir a-bi-ni 21. [u3] wa#-tar-ti _e2 a-ba#_ sza# le-qe2-e-ni i-na qa2-ti-ka i-ba-asz-szi 22. [szar]-ra-am im-hu-ru tup-pi2 sza-ri-im 23. [a]-na# _di-ku5-mesz_ zimbir{ki} il-li-kam 24. _di-ku5-mesz_ a-wa#-ti#-szu-nu i-mu-ru 25. tup-pi2 ap-lu#-tim sza be-le-su2-nu a-na la-ma-si2 id#-di-nu-ma 26. {disz}la-ma-si2 a-na ARAD2-{d}suen ma-ri-sza ap-lu-us-sa3 id-di-nu 27. u3# tup-pi2 _ha-la_ sza in-bu-sza _nu-bar dumu-munus_ a-bu-um-wa-qar 28. sza ma-la li-ib-bi-sza ma-s,i-a-at-ma 29. ap-lu-us-sa3 a-na ARAD2-{d}suen _dumu_ {d}suen-ma-gir a-hi-sza id-di-nu 30. _di-ku5-mesz_ isz-mu-u2 31. u3 ki-ma wa-tar-ti _e2 a-ba_ 32. i-na qa2-ti ARAD2-{d}suen la i-ba-asz-szu-u2 33. i-mu-ru di-nam u2-sza-hi-zu-szu-nu-ti-ma @reverse 1. [asz-szum] la ha#-ab-lu-ma i-na la i-di-im szar-ra-am im-hu-ru 2. _di#-ku5-mesz_ ar-nam i-mi-du-szu-nu-ti 3. u2-ul i-tu-ur2-ru-ma _u4-kur2-sze3_ 4. {disz}i-bi-{d}en-lil2 {disz}dingir-szu-i-bi u3 be-le-su2-nu _lukur_ {d}utu _dumu-mesz_ {d}en-lil2-na-s,i-ir 5. a-na _2(esze3) GAN2 a-sza3_ {iri}hu-ba! _a-gar3_ puzur4-la-ba 6. _1/3(disz)# sar# e2_ <ga>-gi-im sza be-le-su2-nu _dumu-munus_ i-din-{d}utu 7. a-na la-ma-si2 um-mi-sza ap#-lu#-us-sa3 id-di-nu-ma 8. {disz}la-ma-si2 ap#-[lu-us-sa3 a]-na# ma-ri-sza id-di-nu 9. _1(esze3) 3(iku) GAN2 a-sza3 a-gar3_ [me-er-ri-ga]-at#{ki} 10. _1(esze3) 3(iku) GAN2 a-sza3_ {iri}hu-[ba li-ib-bu _a]-sza3_ di-a-ta-nu-um 11. _3(disz) sar e2 du3-a_ li-ib-[bu _e2_ la-bi-ri-im sza] wa#-ar-ka-at _e2_ {d}suen 12. _1(disz) sag-ARAD2_ at-ta-dingir-ma _[1(disz) sag-geme2_ ma-ad-du-mu]-uq#-sza 13. _1(disz) sag-geme2_ be-el-ti-illat-ti _[1(disz) sag-geme2_ ma-an-nu]-um#-ba-lu-usz-sza 14. sza in-bu-sza a-na ARAD2-{d}suen _dumu_ {d}suen#-[ma-gir] id#-di-nu 15. u3 wa-tar-ti _e2 [a-ba]_ 16. [a]-na ARAD2#-{d}suen _dumu_ {d}suen-ma-gir# [u2-ul i-ra-ga-mu] 17. _mu_ {d}utu {d}[marduk] u3# sa-am#-[su-i-lu-na it-mu]-u2 $ single ruling 18. _igi_ nu-ra-tum# _[dumu_ sig-an-nu-ni-tum] 19. _igi_ sig-i3-li2-szu _dumu#_ [qi2-isz-nu-nu] 20. _igi_ ARAD2-{d}suen# _[dumu_ {d}suen-i-din-nam] 21. _igi_ ri-isz-[{d}utu _dumu_ lu-usz-ta-mar-{d}suen] 22. _igi_ szar-rum-[{d}iszkur _dumu_ {d}iszkur-ma-an-szum2] 23. _igi_ sig-an-nu-ni-[tum _dumu_ dingir-szu-ba-ni] 24. _igi_ {d}suen-be-[el-ibila _dumu_ ...]-x-x 25. _igi_ i-bi#-[{d}nin-szubur _dumu]_ nu#-ur2-a-li-szu 26. _igi_ [an-pi2-sza] _dumu#_ s,il2-li2-{d}utu 27. _igi#_ [...] _dub-sar_ $ single ruling 28. _iti [...] u4 3(u)-kam_ 29. _mu_ sa-am-su-i-lu-na _lugal-e u6-nir ki-tusz mah {d}za-ba4-ba4 {d}inanna-bi-da-ke4 szu gibil bi2-in-ak_ @seal 1 # Drawing in Fs Sjöberg (1989) p. 537. Cuneiform signs inserted among the figures: 1. {d}suen-i-din-nam 2. dumu nu-ra-tum 3. ARAD ha-am-mu-ra-pi2 @seal 2 # Cuneiform signs inserted among the figures: 1. sig-i3-li2-szu 2. dumu qi2-[isz-nu-nu] @seal 3 1. szar-ru-um-{d}[iszkur] 2. dumu {d}iszkur-ma-[an-szum2] 3. [ARAD ...] @seal 4 1. dingir-szu-ba-ni dam-gar3 2. dumu i-bi-{d}nin-szubur 3. ARAD nig2 {d}nin-szubur @seal 5 1. [{d}]suen#-[be-el-ibila] 2. [dumu] {d}suen-ma-[gir] 3. ARAD# {d}suen# @seal 6 1. [i]-bi-{d}nin-szubur# 2. [dumu] nu-ur2-a-li-[szu] 3. [ARAD] {d}nin-[szubur]
Total 1 record(s)