&P274785 = CT 05, pl. 04, BM 022446
#atf: lang akk
@tablet
@obverse
1. [_disz] i3-gesz_ a-na me-e ad-di-i-ma _i3-gesz_ it,-bu i-li-ma u3 <<u3>> me-e-szu ha-pi2{pi}-ir [a-na ha-ra-nim ti-bi] le-mu-ut-tim a-na mar-s,i-im qa2-ti i-lu-tim qa2-tum da-[an-na-at]
2. _disz i3_ a#-[na szi]-na# ra-ma-an-szu i-zu#-uz a-na ha-ra-nim szu-ub-ta-an i-ne2-[szi-ra] a-na ma-ar-s,i-im e-pe-esz-ma i-ma-a-at
3. _disz_ i-na qa2-ab-li-a-at _i3-gesz_ tu-ut-ru a-na s,i-it {d}szam-szi u2-s,i-ma i-zi-iz a-na ha-ra-nim e-ep-pu-usz zi-it-tam a-ka-al a-na mar-s,i-im i-ba-al-lu-ut,
4. _disz_ i-na qa2-ab-li-a-at _i3-gesz_ tu-tu-ru szi-na u2-s,u2-nim-ma isz-te-en ra-bi isz-te-en s,e-he-er asz-ti a-wi-lim zi-ka-ra-am ul-la-ad a-na mar-s,i-im i-ba-al-lu-ut,
5. _disz i3_ sa3-pi-ih-ma ka-sa3-am im-la mar-s,u2-um i-ma-at a-na ha-ra-ni-im um-ma-na-am i-du-ku-ni-im
6. _disz i3_ a-na s,i-it {d}utu-szi-im ip-t,u3-ur-ma _2(disz) tu-tu-ru u2-s,u2-ni {d}utu sza-am-sza-am a-wi-lam a-na na-pi-isz-ti-szu i-ri-isz
7. _disz i3_ a-na s,i-it {d}utu-szi-im _4(disz)_ tu-tu-ru u2-s,u2-ni _ku3-babbar {d}utu_ la-bi-ru e-li a-wi-lim i-ba-asz-szi
8. _disz i3_ a-na s,i-it {d}utu-szi-im ip-t,u3-ur-ma _5(disz)_ tu-tu-ru u2-s,u2-ni _ku3-babbar {d}suen_ la-bi-ru e-li a-wi-lim i-ba-asz-szi
9. _disz i3_ a-na s,i-it {d}utu-szi-im ip-t,u3-ur-ma _6(disz)_ tu-tu-ru u2-s,u2-ni ma-an-za-az ma-al-ki sza dingir-mah a-na ma-ka-li
10. _disz i3_ it,-bu-u2-ma a-na ha-al-li-ia i-te-li-a-am s,i-bi-it dingir-mah
11. _disz i3_ u2-ru-uq s,i-bi-it {d}isz-ha-ra
12. _disz i3_ a-na ha-al-li-ia szu-ul-ma-am id-di-a-am ma-<an>-za-az i-li a-wi-lim
13. _disz i3_ i-mi-tam u3 szu-me-lam i-ta-s,i ma-an-za-az {d}suen u3 {d}utu
14. _disz i3_ a-na s,i-it {d}utu-szi-im ip-t,u3-ur-ma _7(disz) tu-tu-ru u2-s,u2-ni ma-an-za-az ku-bi a-na ma-AL-KI-im
15. _disz i3_ a-na s,i-it {d}utu-szi-im ip-t,u3-ur-ma _2(disz) tu-tu-ru a-na i-mi-it-tim _2(disz) tu-tu-ru a-na szu-me-lim u2-s,u2-nim ma-an-za-az {d}masz-tab-ba
16. _disz i3_ i-mi-it-tam u3 _a2-gub3_ qa2-ar-na-szu ha-as-ra asz-sza-at a-wi-lim us,-s,i
17. _disz i3_ a-na s,i-it {d}utu-szi szu-lu-um-szu it-ta-at-ra-ak mar-s,um i-ma-a-at
18. _disz i3_ a-na _2(disz)_-szu ra-ma-an-szu i-zu-uz mar-s,um i-ma-at a-na ha-ra-ni-im um-ma-nu-um u2-ul i-tu-ra-am
19. _disz i3_ a-na s,i-it {d}utu-szi isz-ta-la-at, mar-s,um i-ma-a-at
20. _disz i3_ i-mi-it-ti ka-si2-im is,-ba-at mar-s,um i-ba-lu-ut,
21. _disz i3_ szu-me-el ka-si2-im is,-ba-at mar-s,um i-ba-lu-ut,
# error for i-ma-a-at ?
22. _disz i3_ sa-am sza-mu-um i-za-nu-nu-un
23. _disz i3_ a-na s,i-it {d}utu-szi ne2-ke-em-tam id-di-a-am mar-s,um i-ba-lu-ut, a-na _kaskal_ um-ma-ni _lu2-kur2_ i-da-a-ak
24. _disz i3_ a-na szu-me-lim ne2-ke-em-tam id-di-a-am mar-s,um i-ma-a-at a-na _{gesz}tukul dingir kur2_ um-ma-nam i-du-ka-am
25. _disz i3_ hu-ur-hu-ma-tam id-di-a-am mar-s,um i-ma-a-at
26. _disz i3_ a-na _4(disz)_-szu ra-ma-an-szu i-zu-uz du-ri um-ma-ni-ia na-ak-ri i-da-a-ak
27. _disz-i3_ a-na s,i-it {d}utu-szi <tu-tu-ru> u2-s,i-ma ki-bi-ir _i3-gesz_ is,-ba-at a-na mar-s,i-im i-ba-lu-ut, a-<na> _kaskal lu2-kur2_ a-da-ak
28. _disz-i3_ a-na i-pi i-tu-ur2 mar-s,u2 i-ma-at i-na sza-ni na-di-ia ik-ta-s,a-ar lu mar-s,um i-ba-lu-ut,
29. _disz i3_ me-e-szu isz-ta-da-ad ma-mi-it er-s,e-tim a-wi-lam s,a-ab-ta-at
30. _disz i3_ <i-na> sza-ni-im na-de-ia me-e-szu u2-ta-asz-szi-ir ma-mi-it er-s,e-tim a-wi-lam <u2-ul> s,a-ab-ta-at
31. _disz i3_ ir-pi-isz-ma a-na qa2-ab-li-a-at me-e-szu ka-ka-ba-am id-di-a-am s,i-bi-it {d}utu
32. _disz i3_ me-e i-na na-de-ka it,-bu-u2-ma i-li-a-am a-wi-lum i-na da-an-na-tim us,-s,i2
33. _disz i3_ me-e i-na na-de-e-ka is-sa3-pi-ih bi-it a-wi-lim is-sa3-ap-pa-ah
34. _disz i3_ me-e i-na na-de-e-ka ip-ru-usz-ma i-tu-ur a-wi-lum li-im-ra-as, li-isz-ta-ne2-eh i-ba-lu-ut,
35. _disz-i3_ me-e i-na na-de-e-ka it,-bu-u2-ma ka-sa3-am is,-ba-at mar-s,um i-ma-a-at
36. _disz i3_ me-e i-na na-de-e-ka it,-bu i-li-a-am-ma ki-bi-ir ka-si2-im is,-ba-at mar-s,um i-ba-lu-ut,-ma ba-al-t,u3 la i-ma-at#
37. _disz i3_ me-e i-na na-de-e-ka i-mi-tam ta-ri-ik mar-s,um i-ba-lu-ut, a-na _erin2-hi-a kaskal_ re-esz _a-sza3_-szu u2-ul i#-ka#-sza#-ad#
@reverse
1. _disz i3_ me-e i-na na-de-ka a-ga-szu ta-ri-ik nam-ta-al-le {d}suen a-wi-lum i-ma-a-at
2. _disz i3_ li-ib-ba-szu e-li-ma me-e la i-ma-ha-ar a-wi-lum ha-ra-an i-la-ku ga?-ri-a-at
# from gerȗ 'to be hostile'? or read be2-ri-a-at with CAD barȗ B 'to starve' ?
3. _disz i3_ me-e i-na na-de-ka i-mi-it-tam u3 szu-me-lam ip-t,u3-ur pi-it-ru-usz-tum
4. _disz i3_ szu-ul-mi szi-na id-di-ma mi-it-ha-ru a-na mar-s,i-im i-ba-lu-ut, a-na _kaskal_ um-ma-ni re-qu2-us-sa3 i-tu-u2-ra
5. _disz i3_ i-na pa-t,a-ri-szu ki-ma ka-ka-bi-im s,u2-ur-ru-usz ma-an-za-az mu-szi-im u3 {d}nin-si4-an-na
6. _disz i3_ szu-ul-ma-am id-di-ma a-na i-mi-it-tim _i3-gesz_ is-hu-ra-am-ma i-mi-it-ti _i3-gesz_ is,-ba-at na-s,i-ir-ti na-ak-ri-ka us,-s,i-kum
7. _disz i3_ szu-ul-ma-am id-di-ma a-na szu-me-el _i3-gesz_ is-hu-ra-am-ma szu-me-el _i3-gesz_ is,-ba-at wa-szi-ib ma-ah-ri-i-ka a-wa-ti-ka usz-te-ne2-es,-s,i
8. _disz i3_ i-mi-tam u3 szu-me-lam a-na s,i-it {d}utu-szi-im u3 e-re-eb {d}utu-szi-im ip-t,u3-ur i-mi-it-ti a-wi-lim pi-a-am la ki-na-am i-da-ab-bu-ub
9. _disz i3_ i-mi-tam ip-t,u3-ur mar-s,a-am mu-ru-us-su2 i-sza#-an-ni-szu a-na _kaskal_ pi-si2-il-tum
10. _disz i3_ szu-me-lam ip-t,u3-ur mar-s,u2 i-ba-lu-ut, [a-na _kaskal_ um]-ma#-ni re-isz _a-sza3_-sza i-ka-asz-sza-ad
11. _disz i3_ szu-ul-ma-am id-di-ma ki-ma er-ri# [qi2-sze]-em# isz#-du#-ud# ti-bu a-na mar-s,i ka-ti-im
12. _disz i3_ szu-ul-ma-am id-di-ma e-li mi-[ni]-a-ti-szu ir-ta-bi ti-bu mu-ki-il re-esz li-mu-ut-tim a-na be-el _i3-gesz_ lu-mu-un li-ib-bi
13. _disz i3_ szu-ul-mi szi-na id-di-ma isz-te-en ra-bi isz-te-en s,e2-he-er a-na mar-s,i ri-ig-mu-um a-na _kaskal_ um-ma-ni zi-it-tam i-ka-al
14. _disz 3(disz)_ szu-ul-mu ni-ip-hu
15. _disz 4(disz)_ szu-ul-mu ri-ig-mu-um
16. _disz 5(disz)_ szu-ul-mu ma-an-za-az e-t,e-em-mi
17. _disz 6(disz)_ szu-ul-mu ma-an-za-az ku-bi
18. _disz 7(disz)_ szu-ul-mu ma-al-ki-im
19. _disz_ isz-tu qa2-ab-li-a-at um-ma-tim _7(disz) u3 7(disz)_ szu-ul-mu isz-hi-t,u3-ni-im ma-an-za-az s,e-ni e-ri-isz-ti {d}szakkan2
20. _disz_ isz-tu qa2-ab-li-a-at um-ma-tim szu-ul-mu-um ip-t,u3-ra-am-ma ib-te-li ma-an-za-az {d}szakkan2 e-ri-isz-ti _ku3-babbar_
21. _disz i3_ me-e i-na na-de-ka qa2-an-ni-in ir-ta-szi ma-an-za-az {d}suen
22. _disz_ a-na qa2-ab-li-a-at _i3-gesz_ me-e i-na na-de-ka re-bi-a-at _i3-gesz_ ip-ru-us ma-an-za-az {d}utu e-ri-isz-ti sza-am-szi-im
23. _disz_ a-na qa2-ab-li-a-at _i3-gesz_ me-e i-na na-de-ka ki-ma ka-ka-bi-im isz-hi-it, ma-an-za-az {d}utu
24. _disz i3_ szu-ul-ma-am id-di-ma ki-bi-ir ka-si2-im is,-ba-at ma-an-za-az e2-a e-ri-isz-ti na-ri-im
25. _disz i3_ szu-ul-ma-am id-di-ma a-sza-ar isz-hi-t,u3 ir-ta-qi-iq a-wi-lum ik-ri-bi-szu sza i-lam <<x>> u2-ka-li-mu i-ku-ul
26. _disz i3_ szu-ul-mu-um id-di-ma e-li um-ma-ti-szu bi-ir-s,a-am i-szu mar-s,um ma-ru-us-su2 i-na-pu-szu-ma i-sza-an-ni-szu-ma i-ma-at a-na _kaskal_ ni-ip-hu-u2
27. _disz i3_ a-na ha-al-li-ka ir-ta-qi2-iq uz-za-tum s,i-bi-it ku-bi
28. _disz i3_ a-na ha-al-li-ka pa-t,e-er ma-an-za-az {d}suen
29. _disz i3_ a-na u2-di-tim i-tu-ur2 i-lu-um ik-ri-bi-szu i!-le-eq-qi2
30. _disz i3_ a-na szi-szi-tim i-tu-ur2 ma-an-za-az dingir-mah
31. _disz i3_ me-e-szu ik-su2-us ma-mi-it i-lim a-wi-lam s,a-ab-ta-at
32. _disz i3_ a-na s,i-it sza-am-szi-im ip-t,u3-ur i-lu-um re-esz a-wi-lim i-na-asz-szi
33. _disz i3_ a-na e-re-eb {d}utu-szi-im ip-t,u3-ur lu-mu-um li-bi-im
34. _disz i3_ qa2-ab-li-szu id-ku!(LU)-usz-ma u3 i-ta-tu-szu di-im-tam sa3-ah-ra nam-ta-al-le {d}utu
35. _disz i3_ me-e i-na na-de-ka it,-bu mar-s,um i-ma-at
$double ruling
36. _1(gesz2) 1(u) 2(disz) mu-bi-im_
Total 1 record(s)