&P431776 = RIME 4.02.13a.02, ex. 01
#atf: lang akk
@object cone
@surface a
1. ku-du-ur-ma-bu-uk
2. a-bu e-mu-ut-ba-la
3. _dumu_ si-im-ti-szi-il-ha-ak
4. a-na larsa{ki} u3 e-mu-ut-ba-la
5. mi-im-ma u2-la u2-ga-le-el
6. sza e-li {d}utu la t,a-ba
7. u2-la e-pu-usz
8. i-na u2-zu-un _igi-gal2_-im
9. sza i-lum i-di-nu-szum
10. em-qi3-isz isz-ti-i-ma
11. i-na asz-ri-im
12. a-szar sze20-pu-um pa-ar-su2-u2
13. bi-it a-gu-ur-ri-im
14. su-ub-tam el-le-tam
15. ma-an-za-az na-re-e-em
16. sza u4-mi-sza-am
17. i-na li-ib-bi-szu
18. ni-qu2 ka-a-nu-u2
19. a-na da-ri-isz u4-mi
20. i-pu-usz-ma
21. szum-szu kab-tam isz-ku-un
22. a-na s,i-a-at ni-szi
23. na-PI-tam usz-zi-iz
24. a-na ma-ti-i-ma
25. a-na wa-ar-ki-a-at u4-mi
26. sza bi-it a-gu-ur-ri-im szu-a-ti
27. i-nu-ma il-ta-bi-ru
28. la u2-da-an-na-nu-szu
29. a-su2-ur-ra-szu
30. la i-ka-asz-sza-ru
31. _{gesz}ig_-su2 i-na-sa2-hu-u2
32. si2-ip-pi-szu i-na-s,u2-u2
33. pi-sa3-an-na-szu i-na ma-qa2-tim
34. a-na asz-ri-i-szu
35. la u2-te-er-ru
36. i-na i-da-at
37. le-mu-ut-tim
38. i-na-aq-qa2-ru-u2-ma
39. usz-szi-i-szu sza-am-sza-am
40. u2-ka-al-la-mu
41. a-na ni-pi er-s,e-e-tim
42. u2-ta-ar-ru-szu
43. a-wi-lam szu-a-ti lu _lugal_ lu _en_
44. {d}nergal
45. i-lum ba-ni qa2-aq-qa2-di-ia
46. a-gi-isz i-na u2-zi-szu
47. li-ib-ba-szu li-is-su-uh
48. {d}utu be-el sza-me-e
49. u3 er-s,e-e-tim
50. er-re-tam ma-ru-usz-tam
51. li-ru-ur-szu
Total 1 record(s)