&P462948 = RINAP 4 Esarhaddon 098 composite
#atf: lang akk
@object composite text
@surface a
1. an-szar2 _ad dingir-mesz_ ra-a'-im _sanga_-ti-ia
2. {d}a-nu gesz-ru resz-tu-u na-bu-u szu-mi3-ia
3. {d}bad _en_ sza2-qu-u mu-ki-in _bala-mesz_-ia
4. {d}disz er-szu2 mu-du-u mu-szim _nam-mesz_-ia
5. {d}sin {d}nanna nam-ru mu-dam-mi3-iq _geszkim-mesz_-ia
6. {d}utu _di-ku5 an_-e u _ki_-tim pa-ri-su _esz-bar_-ia
7. {d}iszkur _en_ ra-asz2-bu mu-na-hi-isz _erin2-hi-a-mesz_-ia
8. {d}mes e-tel {d}i2-gi3-gi3 u {d}gesz2-u-ki mu-szar-bu-u _lugal_-ti-ia
9. {d}inanna be-let _muru2_ u _me3_ a-li-kat3 i-di-ia
10. {d}7(disz)-bi _dingir-mesz_ qar-du-u-ti sa-pi-nu na-ki-ri-ia
11. _dingir-mesz gal-mesz du3_-szu2-nu mu-szim-mu szim-ti
12. sza ana _lugal_ mi-gir-szu2-un i-szar-ra-ku da-na-an li-i-tu2
13. {disz}asz-szur-pap-asz _lugal gal man_ dan-nu _man szu2 man kur_ asz-szur{ki}
14. _szagina_ babila2{ki} _lugal kur_ szu-me-ri
15. u3 _uri{ki} man_ {kur}kar2-{d}dun-ia2-asz3 _du3_-szu2-un
16. _lugal-lugal-mesz_ {kur}mu-s,ur {kur}pa-tu-ri-su u {kur}ku-u-si
17. pa-lih _dingir-mesz gal_-ti
18. u2-szum-gal-lu s,i-i-rum na-ram an-szar2 {d}utu
19. {d}ag u {d}marduk _lugal-lugal-mesz_
20. la pa-du-u mu-la-'i-it,
21. ek-s,u-ti la-bisz na-mur-ra-ti
22. la a-di-ru sza2-asz2-me qar-ra-du git2-ma-lu
23. la pa-du-u tu-qu-un-tu ru-bu-u dan-dan-nu
24. mu-kil s,er-ret ma-li-ki lab-bu na-ad-ru
25. mu-ter gi-mil a-bi a-li-di-szu2
26. _lugal_ sza2 ina tukul-ti an-szar2 {d}utu {d}ag u {d}marduk
27. _dingir-mesz_ ti-ik-le-e-szu2
28. i-sza2-risz
29. it-tal-lak-u-ma
30. ik-szu-da
31. ni-iz-mat-su
32. kul-lat la ma-gi-re-e-szu2 mal-ki la kan-szu2-ti-szu2 _gin7 gi_ a-pi
33. u2-ha-s,i-is,-ma u2-szak-bi-sa sze-pu-usz-szu2
34. za-nin _nidba_ a-na _dingir-mesz gal-mesz_
35. sza2 pa-lah _dingir-mesz_ u3 {d}isz-ta-ri i-du-u2
36. x? x-x-i gab-bi ba-nu-u2
37. _e2_ an-szar2 mu-szak-lil si-ma-te-e-szu2
38. e-pisz e2-sag-gil2 u3 babila2{ki} mu-szal-li-mu
39. par-s,e-e sza2 _dingir-mesz kur-kur_ szal-lu-u-ti _ta_ qe2-reb {iri}asz-szur
40. a-na asz2-ri-szu2-nu u2-ter-ru _lugal_ sza na-dan zi-be2-e-szu2
41. _dingir-mesz gal-mesz_ i-ram-mu-ma _sanga_-su ina _e2-kur-mesz_ da-risz
42. u2-kin-nu _{gesz}tukul-mesz_-szu2-nu la pa-du-u-ti a-na szi-rik-ti
43. _en_-ti-szu2 isz-ru-ku _lugal_ sza _en en-mesz_ {d}marduk
44. _ugu lugal-mesz_-ni sza kib-rat _limmu2_-ti u2-sza2-te-ru u2-szar-bu-u
45. _en_-u-su _kur-kur du3_-szi-na a-na _giri3-mesz_-szu2 u2-szak-ni-szu2
46. bil-tu u3 man-da-at-tu _ugu_-szi-na u2-kin-nu ka-szid a-a-be2-e-szu2
47. mu-hal-li-qu ga-re-e-szu2 _lugal_ sza2 tal-lak-ta-szu2 a-bu-bu-um-ma ep-sze-ta-szu2
48. lab-bu na-ad-ru pa-nu-usz-szu2 _iri_-um-ma ar-ke-e-szu2 ti-lu qit-ru-ub
49. ta-ha-zi-szu2 dan-nu nab-lu musz-tah-mi3-t,u {d}gesz-bar la a-ni-hu
50. _dumu_ {disz}{d}sin-pap-mesz-su _man szu2 man kur_ asz-szur{ki} _dumu_ {disz}lugal-gi-na _man szu2 man kur_ asz
51. _szagina_ babila2{ki} _lugal kur eme-gi7_ u3 uri{ki} _numun lugal_-u-ti da-ru-u
52. sza {disz}{d}en-ba-ni _dumu_ {disz}a-da-si mu-kin _lugal_-u-ti _kur_ asz-szur{ki} sza2 du-ru-ug-szu2
53. bal-til{ki} ina pi-i an-szar2 {d}utu {d}ag u {d}marduk _dingir-mesz gal-mesz en_-u-ti
54. im-qut-am-ma dan-na-ku dan-dan-na-ku e-tel-la-ku szit-ra-ha-ku gesz-ra-ku
55. kab-ta-ku szur-ru-ha-ku ina gi-mir _lugal-mesz_-ni sza2-ni-na ul i-sza2-ku
56. ni-szit an-szar2 {d}ag u {d}marduk ni-bit {d}sin mi-gir {d}a-nim na-ra-am szar-ra-ti
57. {d}isz-tar i-lat kal gim-ri _{gesz}tukul_ la pa-du-u mu-rib _kur_ nu-kur2-ti a-na-ku-ma
58. _lugal_ le-'e-e2-um _muru2_ u3 _me3_ sza-gesz da-ad2-me na-ki-re-e-szu2
59. ne2-er a-a-be2-e-szu2 musz-har-mi3-t,u ga-re-e-szu2 mu-szak-nisz la kan-szu2-te-e-szu2
60. sza nap-har kisz-szat _ug3-mesz_ i-pe-lu an-szar2 {d}utu {d}ag u3 {d}marduk
61. _en-mesz_-ia _mah-mesz_ sza la in-nen-nu-u qi2-bit-su-un _lugal_-u-ut la sza2-na-an
62. a-na szim-ti-ia i-szi-mu {d}isz-tar be-el-tum ra-a'-i-mat _sanga_-ti-ia2
63. _{gesz}pan_ dan-na-tu {gesz}szil-ta-hu gesz-ru mu-szam-qit la ma-gi-ri tu-szat-me-ha
64. rit-tu-u-a bi-ib-lat lib3-bi-ia tu-szak-szi-da-an-ni-ma nap-har mal-ki
65. la kan-szu2-ti tu-szak-ni-sza2 sze-pu-u-a e-nu an-szar2 _en gal_-u asz2-szu2 tasz-ri-ih-ti
66. da-na-an ep-sze-te-ia _ug3-mesz_ kul-lu-mi-am-ma _ugu lugal-mesz_ sza2 kib-rat _limmu2_-ti
67. _lugal_-u-ti u2-szar-ri-ih-ma u2-szar-ba-a zik-ri _mu_-ia szi-bir-ru ez-zu
68. a-na ra-sa-ab na-ki-ri u2-sza2-asz2-sza2-a i-da-a-a ma-a-tu2 a-na an-szar2
69. ih-t,u-u u2-gal-li-lu i-szi-t,u a-na ha-ba-ti sza2-la-li mi-s,ir _kur_ asz-szur{ki}
70. ru-up-pu-szi u2-mal-lu qa-tu2-u-a _ta_ an-szar2 u _dingir-me gal-mesz en-mesz_-ia2
71. iq-bu-u-ni a-la-ku _kaskal-min-mesz su3-mesz_ szad-de-e _gig-mesz_ szi-pik ba-s,i _kal-mesz_
72. a-szar s,u-ma-a-me ina mi-gir lib3-bi-ia szal-mesz lu at-tal-lak sza {disz}tar-qu-u2
73. _man_ {kur}mu-s,ur u3 {kur}ku-u-si ni-zir-ti _dingir_-ti-szu2-nu _gal_-ti _ta_ {iri}isz-hup-ri
74. a-di {iri}me-em-pi _iri man_-ti ma-lak 1(u) 5(disz) u4-me qaq-qa-ri u4-me-szam la na-par-ka-a
75. di-ik-tu2-szu2 ma-a'-disz a-duk u3 sza2-a-szu2 5(disz)-szu2 ina us,-s,i {gesz}szil-ta-hi
76. mi-hi-is, la nab-la-t,i am-ha-su-ma {iri}me-em-pi _iri man_-ti-szu2 ina mi3-szil u4-me
77. ina pil-szi nik-si na-bal-kat3-ti al-me _kur_-ud ap-pul aq-qur ina {d}gesz-bar
78. aq-mu _munus-e2-gal_-szu2 _{munus}erin2-e2-gal-mesz_-szu2 {disz}u2-sza2-na-hu-ru _dumu usz_-ti-szu2
79. u3 re-eh-ti _dumu-mesz_-szu2 _dumu-munus-mesz_-szu2 _nig2-szu_-szu2 _nig2-gur11_-szu2 _ansze-kur-ra-mesz_-szu2 _gu4-mesz_-szu2
80. s,e-e-ni-szu2 ina la ma-a-ni asz2-lu-la a-na _kur_ asz-szur{ki} szur-usz {kur}ku-u-si
81. _ta_ {kur}mu-s,ur as-suh-ma e-du ina lib3-bi ana da-li-li ul e-zib
82. ina _ugu_ {kur}mu-s,ur _du3_-szu2 _lugal-mesz {lu2}nam-mesz {lu2}gar-nu-mesz {lu2}gal-kar-mesz_ {lu2}qi-pa-a-ni
83. {lu2}sza2-pi-ri ana esz-szu2-ti ap-qid sat-tuk-ki gi-nu-u a-na an-szar2 u _dingir-me gal-me en-mesz_-ia2
84. u2-kin da3-re-e _gun_ u3 man-da-at-tu _en_-ti-ia2 szat-ti-szam la na-par-ka-a
85. e-mid-su-nu-ti _{na4}na-ru2-a_ szi-t,ir _mu_-ia u2-sze-pisz-ma ta-nit-ti qar-ra-du-ti
86. an-szar2 _en_-ia2 da-na-an ep-sze-te-ia sza2 ina tukul-ti an-szar2 _en_-ia2 at-tal-lak-u-ma
87. u3 li-i-tu2 ki-szit-ti _szu-min_-ia _edin_-usz-szu2 u2-sza2-asz2-t,ir-ma ana tab-rat kisz-szat na-ki-ri
88. ana s,a-at u4-me ul-ziz sza2 _{na4}na-ru2-a_ szu2-a-tu2 _ta ki_-szu2 u2-nak-kar-u-ma szu-mi3 szat,-ru
89. i-pa-szi-t,u-ma _mu_-szu2 i-szat,-t,a-ru lu-u ina e-pe-ri i-kat3-ta-mu lu-u ina _a-mesz_
90. i-nam-du-u lu-u ina _izi gibil2_-u lu-u ina asz2-ri la a-ma-ri i-szak-ka-nu {d}inanna be-let _muru2_ u _me3_
91. zik-ru-su sin-nisz-a-nisz lu-sza2-lik-ma ina _ki-ta {lu2}kur2_-szu2 lu-sze-szib-szu2 ka-mesz _nun_-u _egir_-u _{na4}na-ru2-a_
92. szi-t,ir _mu_-ia2 li-mur-ma ma-har-szu2 lil-ta-su-ma _i3-gesz_ lip-szu2-usz _{udu}siskur_ liq-qi2 zik-ri an-szar2 _en_-ia2 lu-ta-'i-id
Total 1 record(s)