&P462984 = RINAP 4 Esarhaddon 135 composite
#atf: lang akk
@object composite text
@surface a
1. a-na {d}na-na-a pu-su-um-ti i-la-a-ti sza2 _hi-li_ u ul-s,i za-a'-na-tu lu-le-e ma-la-tu
2. bu-kur2-ti {d}a-nim szit-ra-ah-ti sza2 ina nap-har be-le-e-ti szur-ba-a-tu e-nu-us-sa
3. hi-rat {d}mu-zib-sa4-a ti-iz-qar-ti sek-ra-ti na-a'-it-ti na-ram-ti _nun_-u2-ti-szu2
4. il3-tum re-me-ni-tum a-li-kat2 ri-s,i _lugal_ pa-li-hi-sza2 mu-szal-bi-rat pa-le-e-szu2
5. a-szi-bat e2-hi-li-an-na sza2 qe2-reb e2-an-na szar-rat unu{ki} _gaszan gal_-tum _gaszan_-szu2
6. {disz}an-szar2-szesz-szum2-na _lugal szu2 lugal kur_ asz-szur{ki} _szagina_ babila2{ki} _lugal kur_ szu-me-ru u3 uri{ki}
7. _lugal_ szah-t,u musz-te-e'-u2 asz2-ra-a-ti _dingir-mesz gal-mesz_ pa-a-lih _en en-en_
8. ba-a-nu-u2 _e2_ an-szar2 e-pisz e2-sag-il2 u babila2{ki} za-a-nin e2-zi-da
9. mu-ud-disz e2-an-na mu-szak-lil esz-re-e-ti ma-ha-zi sza2 ina qer-bi-szi-na isz-tak-kan si-ma-a-ti
10. _dumu_ {disz}{d}sin-szesz-mesz-su _lugal szu2 lugal kur_ asz-szur{ki} _dumu_ {disz}lugal-gin _lugal kur_ asz-szur{ki} _szagina_ babila2{ki} _lugal kur_ szu-me-ru u3 ak-ka-di-i
11. e2-hi-li-an-na _e2_ pa-pa-hi {d}na-na-a _gaszan_-ia sza2 qe2-reb e2-an-na
12. sza2 _lugal_ mah-ri i-pu-szu la-ba-risz il-lik-ma mi-qit-ti ir-szi
13. es,-re-ti-szu2 asz2-te-e'-i ina _sig4-al-ur3-ra udun ku3_-tim ma-qit-ta-szu2 ak-szi-ir
14. _szu-min_ {d}na-na-a _gaszan gal_-tum as,-bat-ma a-na qer-bi-szu2 u2-sze-rib-ma szu-bat da-ra-a-ti u2-szar-me
15. _{udu}siskur-mesz_ tasz-ri-ih-ti aq-qi2 usz-par-zi-ih szi-gar-sza2
16. {d}na-na-a _gaszan_ s,ir-tum ina qe2-reb _e2_ pa-pa-hi szu-a-ti ha-di-isz ina a-sza2-a-bi-ki
17. ia-a-ti {disz}an-szar2-szesz-szum2-na _nun_ pa-a-lih-ki ina ma-har {d}ag ha-a-a-i-ri-ki ti-is-qa-ri ba-ni-ti
18. _ti ud-mesz su3-mesz_ sze-be2-e lit-tu-tu t,u-u2-bi _uzu_ u hu-ud lib3-bi szi-i-mi szi-ma-ti
19. _suhusz {gesz}gu-za lugal_-u2-ti-ia u2-hum-mesz szur-szi-di it-ti _an_-e u _ki_-tim kin-ni _bala_-u2-a
20. ma-ti-ma ina ah-rat _u4-mesz nun egir_-u2 sza2 ina _bala_-szu2 _e2_ pa-pa-hi szu-a-ti in-na-hu an-hu-us-su lu-ud-disz
21. szu-mi it-ti szu-mi-szu2 lisz-t,ur _mu-sar_-ru-u2 szi-t,ir _mu_-ia _i3-gesz_ lip-szu-usz _{udu}siskur bala_-qi2 it-ti _mu-sar_-e-szu2 lisz-kun
22. ik-ri-bi-szu2 _dingir-mesz_ i-szem-mu-u2 u sza2 szu-mi szat,-ru ina szi-pir ni-kil-ti i-pa-asz2-szi-t,u
23. _mu-sar_-ru-u2-a ib-ba-tu lu-u a-szar-szu2 u2-nak-ka-ru
24. {d}na-na-a _gaszan_ szur-bu-ti ag-gesz lik-kil-me-szu2-ma szi-mat le-mut-tim li-szim-szu2
25. _mu_-szu2 _numun_-szu2 ina _kur_ li-hal-liq-ma a-a ir-szi-isz re-e-mu
Total 1 record(s)