&P468902 = RIMB 2.06.32.06, ex. 001 #atf: lang akk @object barrel @surface a 1. {disz}an-szar2-du3-a _lugal gal lugal_ dan-nu _lugal szar2_ 2. _lugal kur_ asz-szur _lugal_ kib-rat _limmu2_-ti _lugal-lugal-mesz_ 3. _nun_ la sza2-na-an _dumu {disz}an-szar2-szesz-szum2-na_ 4. _lugal gal lugal_ dan-nu _lugal szar2 lugal kur_ asz-szur 5. _szagina_ babilax(|DIN.TIR|){ki} _lugal kur-eme-gi7_ u uri{ki} 6. _dumu dumu_ {disz}{d}sin-szesz-mesz-su _lugal gal lugal_ dan-nu 7. _lugal szar2 lugal kur_ asz-szur a-na-ku-ma _en gal_ {d}marduk 8. sza2 ina _bala_-e _lugal_ mah-ri ina ma-har _ad_ ba-ni-i-szu2 9. u2-szi-bu ina qe2-reb bal-til{ki} ina u4-me _bala_-ia 10. ina ri-sza2-a-ti a-na babilax(|DIN.TIR|){ki} i-ru-um-ma 11. sat-tuk-ki e2-sag-il2 u _dingir-mesz_ babilax(|DIN.TIR|){ki} u2-kin 12. ki-din-nu-u2-tu babilax(|DIN.TIR|){ki} ak-s,ur# 13. asz2#-szu2 dan-nu a-na _sig_ la ha-ba-li 14. {disz}{d}gesz-nu11-mu-gi-na _szesz_ ta-li-me 15. a-na _lugal_-u2-tu babilax(|DIN.TIR|){ki} ap-qi2-di 16. u3 szi-pir e2-sag-il2# sza2# za-ru-u2-a 17. la u2#-qa-at-tu-u2 a-na-ku u2-szak#-lil 18. ina u4-me-szu2-ma# di-'-a-ni u _bara2#-mesz#_ sza2# si-hir#-ti 19. e2-sag-il2# ki-i si#-ma-a-ti-szu2-nu la-bi-ra-a-ti 20. ina asz2-ri-szu2-nu lu-u ad-di a-na szat-ti# {d}marduk _en gal_ 21. ep-sze-ti-ia dam-qa-a-ti# ha-di-isz _igi-bar_-ma 22. _ti_ u4-me _su3-mesz_ sze-be2-e lit-tu-tu t,u-ub _uzu_ 23. u3 hu-ud lib3-bi li-szim szi-ma-ti 24. u3 sza2 {disz}{d}gesz-nu11-mu-gi-na _lugal_ babilax(|DIN.TIR|){ki} 25. _szesz_ ta-lim-ia u4-me-szu2 li-ri-ku lisz-bi bu-'-a-ri 26. ma-ti-ma ina ah-rat u4-me _nun_ ar-ku-u sza2 ina u4-me _bala_-szu2 27. szi-pir szu-a-ti in-na-hu an-hu-us-su lu-ud-disz 28. szu-mi3 it-ti _mu_-szu2 lisz-t,ur _mu-sar_-u-a li-mur-ma 29. _i3-gesz_ lip-szu-usz _{udu}siskur2 bala_-qi2 ina asz2-ri-szu2 lisz-kun 30. ik-ri-bi-i-szu2 {d}marduk i-szem-me [sza2] szu-mi3 szat,-ru 31. i-pa-asz2-szi-t,u _mu-sar_-u2-a i-ab-ba-tu 32. lu-u a-szar-szu2 u2-nak-ka-ru _en gal_ {d}marduk ag-gi-isz 33. lik-kil-me-szu2-ma _mu_-szu2 _numun_-szu2 i-na _kur-kur_ li#-hal-liq
Total 1 record(s)