&P514719 = RINAP 5/1 Ashurbanipal 010 composite #atf: lang akk @object composite text @surface a 1. a-na-ku {disz}an-szar2-du3-a _lugal gal_-u 2. _lugal_ dan-nu _lugal szu2 lugal kur_ an-szar2{ki} 3. _lugal_ kib-rat _limmu2_-tim 4. _e3_ lib3-bi {disz}an-szar2-pap-asz _man kur_ an-szar2{ki} 5. _szagina_ babila2{ki} 6. _lugal kur eme-gi7_ u3 uri{ki} 7. _sza3-bala-bala_ {disz}{d}sin-pap-mesz-su 8. _lugal szu2 lugal kur_ an-szar2{ki} 9. _dingir-mesz gal-mesz_ ina _ukken_-szu2-nu 10. szi-mat _saga_-tim i-szi-mu szim-ti 11. e-li _lugal-mesz_ a-szib pa-rak-ki 12. zi-kir _mu_-ia u2-szar-ri-hu 13. u2-szar-bu-u2 be-lu-u2-ti 14. e2-hur-sag-gal-kur-kur-ra 15. _e2_ an-szar2 _en_-ia u2-szak-lil 16. _e2-gar8-mesz_-szu2 u2-szal-bi-sza2 _ku3-sig17 ku3-babbar_ 17. {gesz}tim-me _mah-mesz_ me-ser _ku3-babbar_ u2-rak-kis 18. ina _ka2_ hi-s,ib _kur-kur_ az-qu-up 19. an-szar2 ina e2-hur-sag-gu-la u2-sze-rib-ma 20. u2-szar-ma-a _bara2_ da-ra-a-ti 21. e2-sag-il2 _e2-gal dingir-mesz du3_-usz 22. u2-szak-li-la _gesz-hur-mesz_-szu2 23. {d}en {d}gaszan-mu {d}be-let-babila2{ki} 24. {d}e2-a {d}di-ku5 ul-tu qe2-reb e2-szar2-ra 25. u2-bil u2-sze-rib 26. qe2-reb szu-an-na{ki} 27. _bara2-mah_-hu szu-bat _dingir_-ti-szu2 s,ir-ti 28. 5(u) _gun_ za-ha-lu-u2 eb-bu 29. a-na a-gur2-ri ap-ti-iq-ma 30. u2-rab-ba-a _edin_-usz-szu2 31. u2-sze-pisz-ma {gesz}er-me a-nu _{gesz}mes-ma2-kan-na_ 32. is,-s,i da-re-e sza2 szit-nu-nu sza2-ma-me-esz 33. 3(u) 4(disz) _gun_ 2(u) _ma-na ku3-sig17 husz-a_ 34. kip-pat-su u2-szal-bisz 35. u2-dan-ni-na rik-se-e-szu2 36. e-li {d}marduk _en gal_-e 37. s,u-lul-szu2 at-ru-us,-ma 38. u2-kin ta-ra-an-szu2 39. _{gesz}gigir_ s,ir-tu ru-kub {d}marduk 40. e-tel-li _dingir-mesz en en-en_ 41. ina _ku3-sig17 ku3-babbar na4-mesz_ ni-siq-ti 42. ag-mu-ra nab-nit-sa 43. a-na {d}marduk _lugal_ kisz-szat _an_-e u _ki_-tim 44. sa-pi-in _{lu2}kur2-mesz_-ia 45. a-na szi-rik-ti asz2-ruk 46. _{gesz}na2 {gesz}mes-ma2-kan-na_ is,-s,i da-re-e 47. sza pa-szal-lu lit-bu-szat 48. _na4-mesz_ ni-siq-ti za-a'-na-at 49. a-na ma-a-a-al tak-ne2-e {d}en {d}gaszan-mu 50. sza2-kan ha-sza2-di e-pesz ru-'a-a-me 51. nak-lisz e-pu-usz 52. ina ka2-hi-li-su3 masz-tak {d}zar-pa-ni-tum 53. sza ku-uz-bu sa-al-hu 54. ad-di 55. 4(disz) _am-mesz ku3-babbar_ ek-du-u-ti 56. na-s,i-ru ki-bi-is _lugal_-u-ti-ia 57. ina _ka2_ s,i-it _{d}utu_-szi 58. ina _ka2 {d}lamma-ra-bi_ 59. ina _ka2_ e2-zi-da sza2 qe2-reb 60. bar2-sipa{ki} ul-ziz 61. e2-masz-masz e2-gaszan-kalam-ma _ku3-babbar ku3-sig17_ 62. u2-za-'i-in lu-le-e u2-mal-li 63. {d}szar-rat-kid-mu-ri sza2 ina ug-gat lib3-bi-sza2 64. at-man-sza2 e-zi-bu 65. u2-szi-bu a-szar la si-ma-a-ti-sza2 66. ina _bala_-ia dam-qi2 sza2 an-szar2 isz-ru-ka 67. tar-sza2-a sa-li-mu 68. a-na szuk-lul _dingir_-ti-sza2 s,ir-ti 69. szur-ru-hu mi-se-e-sza2 szu-qu-ru-ti 70. ina _masz2-ge6_ szi-pir mah-he-e 71. isz-ta-nap-pa-ra ka-a-a-na 72. {d}utu u3 {d}iszkur asz2-al-ma 73. e-pu-lu-in-ni an-nu ke-e-nu 74. si-mat _dingir_-ti-sza2 _gal_-ti u2-szar-ri-ih 75. u2-sze-szib-szi ina _bara2-mah_-hi 76. szu-bat da-ra-a-ti 77. par-s,e-e-sza2 szu-qu-ru-ti u2-kin-ma 78. u2-szal-li-ma mi-se-e-sza2 79. anzu{muszen}-mesz {gesz}szu-ri-in-ni 80. a-na _ti-la zi-mesz_-ia 81. ina _ka2_ e2-galam-mes 82. _e2_ {d}u-gur sza2 {iri}tar-bi-s,i az-qu-up 83. a-di a-di-ni a-bi la im-ma-al-la-du 84. um-mi3 a-lit-ti la ba-na-at ina lib3-bi _ama_-sza2 85. a-na e-pesz e2-hul2-hul2 iz-kur ni-bit _mu_-ia 86. {d}sin sza2 ib-na-an-ni a-na _lugal_-u-ti 87. um-ma {disz}an-szar2-du3-a e2-kur szu2-a-tu 88. ip-pu-usz-ma qe2-reb-szu2 89. u2-szar-man-ni pa-rak da-ra-a-ti 90. a-mat {d}sin sza2 ul-tu _u4-mesz su3-mesz_ 91. iq-bu-u e-nen-na u2-kal-lim 92. _ug3-mesz egir-mesz_ 93. _e2_ {d}sin sza2 {disz}{d}sal2-ma-nu-masz 94. _a_ {disz}asz-szur-pap-ibila _lugal_ pa-ni 95. mah-ri-ia e-pu-szu 96. la-ba-risz u2-sza2-lik-ma 97. u2-szad-gi-la pa-nu-u-a 98. ina a-mat {d}sin {d}nusku an-hu-us-su 99. ad-ke e-li sza u4-me pa-ni 100. szu-bat-su u2-rap-pisz 101. ul-tu _usz8_-szu2 a-di gaba-dib-be2-e-szu2 102. ar-s,ip u2-szak-lil 103. e2-me-lam2-an-na _e2_ {d}nusku _sukkal mah_ 104. sza _lugal_ pa-ni mah-ri-ia la e-pu-szu2 105. ab-na-a qe2-reb-szu2 106. _gesz-ur3-mesz {gesz}eren-mah-mesz_ 107. u2-szat-ri-s,a e-li-szu2-un 108. _{gesz}ig-mesz_ {gesz}li-ia-a-ri 109. me-ser _ku3-babbar_ u2-rak-kis 110. u2-rat-ta-a _ka2-mesz_-szu2-un 111. 2(disz) _am-mesz ku3-babbar_ mu-nak-ki-pu 112. ga-re-ia ina at-man {d}sin 113. _en_-ia ul-ziz 2(disz) {d}lah3-me 114. esz-ma-re-e sza2 ti-is,-bu-tu2 115. {gesz}szu-ri-in-ni 116. mu-szal-li-mu kib-si _lugal_-ti-ia 117. mu-sze-ri-bu hi-s,ib _kur_-i u tam-tim 118. ina _ka2_ e2-hul2-hul2 ul-ziz 119. _szu-min_ {d}sin {d}nusku as,-bat 120. u2-sze-rib u2-sze-szib ina _bara2_ da-ra-a-ti 121. e2-dim-gal-kalam-ma _e2 an-gal_ 122. sza2 qe2-reb |BAD3.AN|{ki} 123. a-na si-hi-ir-ti-szu2 ar-s,ip u2-szak-lil 124. _e2_ {d}sin {d}nin-gal {d}utu {d}a-a 125. sza qe2-reb nina{ki} sza {disz}an-szar2-pap-asz 126. _man kur_ an-szar2{ki} _ad du3_-ia e-pu-szu2 127. il-li-ku la-ba-risz e2-kur szu2-a-tu2 128. e-na-ah-ma i-qu-pa _e2-gar8-mesz_-szu2 129. e2-kur szu-a-tu2 a-na si-hir-ti-szu2 130. ar-s,ip u2-szak-lil ul-la-a re-szi-szu2 131. _gesz-ur3-mesz {gesz}szur-min3 mah-mesz_ 132. u2-szat-ri-s,a ta-ra-an-szu2 133. _{gesz}ig-mesz_ {gesz}li-ia-a-ri 134. sza e-re-si-na _du10-ga_ 135. u2-rat-ta-a _ka2-mesz_-szu2 136. ul-tu e2-kur szu2-a-tu2 u2-szak-li-lu 137. u2-qat-tu-u ag-mu-ra szi-pir-szu2 138. {d}sin {d}nin-gal {d}nusku {d}utu u {d}a-a 139. _dingir-mesz_ tik-le-ia ina qer-bi-szu2 140. u2-sze-rib-ma u2-szar-me 141. _bara2_ da-ra-a-ti esz-re-e-ti 142. _kur_ an-szar2{ki} _kur_ uri{ki} ana si-hir-te-szi-na 143. ar-s,ip u2-szak-lil 144. mim-ma si-mat e2-kur ma-la _gal2_-u 145. sza _ku3-babbar ku3-sig17_ e-pu-usz 146. e-li sza _lugal-mesz ad-mesz_-ia 147. u2-rad-di _dingir-mesz gal-mesz_ 148. tik-le-ia ina at-ma-na-a-te-szu2-nu 149. s,i-ra-a-te u2-sze-szib-szu2-nu-ti 150. _{udu}siskur-mesz_ tasz-ri-ih-ti 151. ma-har-szu-un aq-qi2 152. u2-szam-hi-ra kad3-ra-a-a 153. sat-tuk-ku gi-nu-u2 e-li sza u4-me 154. ul-lu-ti u2-sza2-tir-ma 155. ar-ku-us _alam lugal_-ti-ia 156. sza _ku3-babbar ku3-sig17 uruda_ nam-ri157. ina szi-pir {d}nin-a2-gal {d}ku3-si22-banda3{+da}157. ina szi-pir {d}nin-a2-gal {d}ku3-sig17-banda3{+da} 158. {d}nin-kur-ra nak-lisz u2-sze-pisz-ma 159. a-na mu-ter-ri-szi _ti-la_-ia 160. ma-har _dingir-mesz_ ti-ik-le-ia 161. u2-kin na-an-za-sun2 162. ul-tu s,e-he-ri-ia a-di ra-be2-ia 163. asz2-te-'a-a asz2-rat _dingir-mesz gal-mesz_ 164. {lu2}sza2-an-gu-ti ih-szu-hu 165. i-ram-mu na-dan zi-bi-ia 166. {d}iszkur _szeg3-mesz_-szu2 u2-masz-szi-ra 167. {d}e2-a u2-pat,-t,i-ra _idim-mesz_-szu2 168. szat-ti-szam-ma ina t,uh-di mi-sza2-ri 169. ar-te-'a-a ba-'u-lat {d}en-lil2 170. _dingir-mesz gal-mesz_ sza2 ap-tal-la-hu _dingir_-us-su-un 171. dun-nu zik-ru-u2-tu 172. e-mu-qi2 s,i-ra-a-ti 173. u2-szat-li-mu-in-ni 174. _kur-kur_ la ma-gi-re-ia 175. ina _szu-min_-ia im-nu-u2 176. u2-szam-s,u-in-ni ma-la lib3-bi-ia 177. ul-tu tam-tim e-liti 178. a-di tam-tim szap-liti 179. sza _lugal-mesz ad-mesz_-ia 180. ir-te-ed-du-u2 a-na-ku lu-u ar-de 181. ma-lak _iti u4 2(u)-kam2_ 182. ina _muru2_ tam-tim u na-ba-li 183. mi-is,-ru e-li sza _lugal-mesz ad-mesz_-ia 184. u2-rad-di-ma a-bel 185. _ug3-mesz_ a-szi-bu-ti _kur-kur_ sza2-a-ti-na 186. u2-szak-ni-sza2 a-na _{gesz}szudun_-ia 187. _gun_ man-da-at-tu2 szat-ti-szam-ma 188. u2-kin _edin_-usz-szu2-un 189. ina qi2-bit an-szar2 {d}nin-lil2 190. _lugal-mesz_ a-szib pa-rak-ki 191. u2-na-asz2-sza2-qu _giri3-min_-ia 192. ma-al-ki _gal-mesz_ sza2 s,i-tasz u szi-la-an 193. a-na kit-ri-szu2-nu u2-pa-qu-u-ni 194. ina tukul-ti _dingir-mesz gal-mesz en-mesz_-ia 195. qe2-reb {kur}elam-ma{ki} e-ru-ub 196. _bad5-bad5_-szu2-nu ina la mi3-ni 197. asz2-kun at-tal-lak szal-t,isz 198. {disz}um-man-al-da-si ti-ib 199. _me3_-ia dan-ni e-dur-ma 200. me-ra-nu-usz-szu2 in-na-bit-ma 201. is,-ba-ta sza2-da-a 202. 1(u) 4(disz) _iri-mesz_ dan-nu-ti mu-szab _lugal_-ti-szu2 203. u3 _iri-mesz tur-mesz_ sza2 ni-i-ba la i-szu-u2 204. a-di _2(u)-am3 iri-mesz_ 205. ina na-ge-e sza2 {iri}hu-un-nir 206. ina _ugu_ mi3-is,-ri sza2 {iri}hi-da-lu 207. ak-szu-ud {iri}ba-szi-mu 208. u3 _iri-mesz_ sza2 li-me-ti-szu2 209. ap-pul aq-qur sza2 _ug3-mesz_ a-szib 210. lib3-bi-szu2-un ka-mar-szu2-nu asz2-kun 211. u2-szab-bir _dingir-mesz_-szu2-un 212. u2-szap-szi-ih ka-bat-ti _en en-en_ 213. _dingir-mesz_-szu2 _{d}1(u)-5(disz)-mesz_-szu2 _nig2-szu_-szu2 _nig2-gur11_-szu2 214. _ug3-mesz tur_ u _gal_ asz2-lu-la ana _kur_ an-szar2{ki} 215. 1(gesz2) _danna_ qaq-qa-ru 216. qe2-reb {kur}elam-ma{ki} u2-szah-rib 217. _mun {u2}zag-hi-li{sar}_ 218. u2-sap-pi-ha _edin_-usz-szu2-un 219. {d}na-na-a sza 1(disz) _lim_ 6(disz) _me 3(u)-am3_ 5(disz) 220. _mu-an-na-mesz_ ta-as-bu-su-ma 221. tal-li-ku tu-szi-bu 222. qe2-reb {kur}elam-ma{ki} a-szar 223. la si-ma-a-te9-e-sza2 224. u3 ina u4-me-szu2-ma szi-i 225. u3 _dingir-mesz ad-mesz_-sza2 226. ib-bu-u szu-mi3 ana be-lut _kur-kur_ 227. ta-a-a-rat _en_-u-ti-sza2 228. tu-szad-gi-la pa-nu-u-a 229. um-ma {disz}an-szar2-du3-a 230. ul-tu2 qe2-reb {kur}elam-ma{ki} 231. u2-sze-s,a-an-ni-ma 232. u2-sze-rab-an-ni 233. qe2-reb e2-an-na 234. a-mat qi2-bit _dingir_-ti-szu2-un 235. sza ul-tu2 _u4-mesz su3-mesz_ iq-bu-u 236. e-nen-na u2-kal-li-mu _ug3-mesz egir-mesz_ 237. _szu-min dingir_-ti-sza2 _gal_-ti at-mu-uh 238. har-ra-nu i-szir-tu sza2 ul-lu-us, 239. lib3-bi ta-as,-ba-ta a-na e2-an-na 240. ina qe2-reb unu{ki} u2-sze-rib-szi-ma 241. ina e2-hi-li-an-na sza2 ta-ram-mu 242. u2-szar-me-szi pa-rak da-ra-a-ti 243. ina u4-me-szu2 _e2_ a2-ki-it {d}1(u)-5(disz) _gaszan_-ia 244. sza qe2-reb nina{ki} 245. sza ki-ma _ama_ a-lit-ti tu-rab-ba-an-ni 246. _{lu2}kur2-mesz_-ia i-na-ru 247. gi-mir ma-al-ki u2-szak-ni-sza2 248. a-na _giri3-min_-ia sza {disz}lugal-gi-na 249. _ad ad ad du3_-ia 250. _sza3-bala-bala {disz}en_-ba-ni _dumu_ {disz}a-da-si 251. sza du-ru-ug-szu2 bal-til{ki} 252. e-pu-szu2 la-ba-risz il-lik 253. mi-qit-ta-sza2 ad-ke 254. ina _iti_ szal-me u4-me sze-me-e 255. at-ta-ad-di tem-me-en-sza2 256. ina a-gur2-ri _{na4}zu2 {na4}za-gin3_ 257. _e2_ a2-ki-it szu2-a-tu 258. a-na si-hir-ti-sza2 ar-s,ip 259. u2-szak-lil lu-le-e u2-mal-li 260. an-szar2 u {d}nin-lil2 _dingir-mesz_ tik-le-ia 261. mu-szam-s,u-u2 ma-la lib3-bi-ia 262. qe2-reb-sza2 u2-sze-rib-ma 263. u2-sze-pi-sza2 i-sin-ni _e2_ a2-ki-it 264. _{udu}siskur-mesz_ tasz-ri-ih-ti 265. ma-har-szu-un aq-qi2 266. u2-szam-hi-ra kad3-ra-a-a 267. an-szar2 u3 {d}nin-lil2 268. sza ul-tu s,e-he-ri-ia 269. u2-rab-bu-in-ni 270. is,-s,u-ru _lugal_-u-ti 271. qe2-reb _e2_ a2-ki-it szu2-a-tu2 ir-ru-bu-ma 272. ip-pu-szu2 i-sin-ni _hul2-mesz_ 273. ina bu-un-ni-szu2-nu nam-ru-ti 274. ina ni-isz _igi-min-mesz_-szu2-nu _saga-mesz_ 275. sza2 i-bar-ra-a kib-ra-a-ti 276. {disz}an-szar2-du3-a _lugal_ mi-gir lib3-bi-szu2-nu 277. e-pisz _e2_ a2-ki-it szu-a-tu 278. ha-disz lit-tap-la-su 279. _u4-mesz_-ia li-sza2-ri-ku 280. lu-usz-bi bu-'a-a-ru 281. _suhusz {gesz}gu-za lugal_-ti-ia lu-kin-nu 282. lu-szal-bi-ru _bala-mesz_-ia 283. _{lu2}kur2-mesz_-ia li-ne2-e-ru 284. li-szam-qi2-tu ga-re-ia 285. ina tukul-ti-szu2-nu ra-bi-ti 286. e-ma a-qab-bu-u la-be-el 287. a-szar u2-s,ar-ra-mu 288. lik-szu-da _szu-min_-a-a 289. a-na _egir_ u4-me _dumu-mesz dumu dumu-mesz_ 290. _dumu-mesz_ u3 _dumu-mesz_ 291. ina _lugal-mesz dumu-mesz_-ia 292. sza2 an-szar2 u {d}nin-lil2 ut-tu-szu-ma 293. a-na be-lut _kur_ u _ug3-mesz_ 294. i-nam-bu-u2 zi-kir-szu2 295. e-nu-ma _e2_ a2-ki-it szu-a-tu2 296. i-lab-bi-ru-ma in-na-hu 297. an-hu-us-su lu-ud-disz 298. _mu-sar_-u2 szi-t,ir _mu_-ia 299. li-mur-ma _i3-gesz_ lip-szu-usz 300. _{udu}siskur bala_-qi2 301. a-na asz2-ri-szu2 lu-ter 302. _dingir-mesz gal-mesz_ ma-la ina _mu-sar_-e an-ne2-e sza2-at,-ru 303. _lugal_-ut-ka lik-tar-ra-bu 304. li-is,-s,u-ru _bala-mesz_-ka 305. sza _mu?-sar?_-u szi-t,ir _mu_-ia ib-ba-tu2 306. ina mim-ma szi-pir ni-kil-ti u2-hal-la-qu 307. it-ti _mu-sar_-e 308. szi-t,ir _mu_-szu2 la i-szak-ka-nu 309. _dingir-mesz gal-mesz_ 310. sza _an_-e u3 _ki_-tim 311. _lugal_-us-su lis-ki-pu 312. _mu_-szu2 _numun_-szu2 ina _kur_ lu-hal-li-qu
&P514719 = RINAP 5/1 Ashurbanipal 010 composite #atf: lang akk @object composite text @surface a 1. a-na-ku {disz}an-szar2-du3-a _lugal gal_-u 2. _lugal_ dan-nu _lugal szu2 lugal kur_ an-szar2{ki} 3. _lugal_ kib-rat _limmu2_-tim 4. _e3_ lib3-bi {disz}an-szar2-pap-asz _man kur_ an-szar2{ki} 5. _szagina_ babila2{ki} 6. _lugal kur eme-gi7_ u3 uri{ki} 7. _sza3-bala-bala_ {disz}{d}sin-pap-mesz-su 8. _lugal szu2 lugal kur_ an-szar2{ki} 9. _dingir-mesz gal-mesz_ ina _ukken_-szu2-nu 10. szi-mat _saga_-tim i-szi-mu szim-ti 11. e-li _lugal-mesz_ a-szib pa-rak-ki 12. zi-kir _mu_-ia u2-szar-ri-hu 13. u2-szar-bu-u2 be-lu-u2-ti 14. e2-hur-sag-gal-kur-kur-ra 15. _e2_ an-szar2 _en_-ia u2-szak-lil 16. _e2-gar8-mesz_-szu2 u2-szal-bi-sza2 _ku3-sig17 ku3-babbar_ 17. {gesz}tim-me _mah-mesz_ me-ser _ku3-babbar_ u2-rak-kis 18. ina _ka2_ hi-s,ib _kur-kur_ az-qu-up 19. an-szar2 ina e2-hur-sag-gu-la u2-sze-rib-ma 20. u2-szar-ma-a _bara2_ da-ra-a-ti 21. e2-sag-il2 _e2-gal dingir-mesz du3_-usz 22. u2-szak-li-la _gesz-hur-mesz_-szu2 23. {d}en {d}gaszan-mu {d}be-let-babila2{ki} 24. {d}e2-a {d}di-ku5 ul-tu qe2-reb e2-szar2-ra 25. u2-bil u2-sze-rib 26. qe2-reb szu-an-na{ki} 27. _bara2-mah_-hu szu-bat _dingir_-ti-szu2 s,ir-ti 28. 5(u) _gun_ za-ha-lu-u2 eb-bu 29. a-na a-gur2-ri ap-ti-iq-ma 30. u2-rab-ba-a _edin_-usz-szu2 31. u2-sze-pisz-ma {gesz}er-me a-nu _{gesz}mes-ma2-kan-na_ 32. is,-s,i da-re-e sza2 szit-nu-nu sza2-ma-me-esz 33. 3(u) 4(disz) _gun_ 2(u) _ma-na ku3-sig17 husz-a_ 34. kip-pat-su u2-szal-bisz 35. u2-dan-ni-na rik-se-e-szu2 36. e-li {d}marduk _en gal_-e 37. s,u-lul-szu2 at-ru-us,-ma 38. u2-kin ta-ra-an-szu2 39. _{gesz}gigir_ s,ir-tu ru-kub {d}marduk 40. e-tel-li _dingir-mesz en en-en_ 41. ina _ku3-sig17 ku3-babbar na4-mesz_ ni-siq-ti 42. ag-mu-ra nab-nit-sa 43. a-na {d}marduk _lugal_ kisz-szat _an_-e u _ki_-tim 44. sa-pi-in _{lu2}kur2-mesz_-ia 45. a-na szi-rik-ti asz2-ruk 46. _{gesz}na2 {gesz}mes-ma2-kan-na_ is,-s,i da-re-e 47. sza pa-szal-lu lit-bu-szat 48. _na4-mesz_ ni-siq-ti za-a'-na-at 49. a-na ma-a-a-al tak-ne2-e {d}en {d}gaszan-mu 50. sza2-kan ha-sza2-di e-pesz ru-'a-a-me 51. nak-lisz e-pu-usz 52. ina ka2-hi-li-su3 masz-tak {d}zar-pa-ni-tum 53. sza ku-uz-bu sa-al-hu 54. ad-di 55. 4(disz) _am-mesz ku3-babbar_ ek-du-u-ti 56. na-s,i-ru ki-bi-is _lugal_-u-ti-ia 57. ina _ka2_ s,i-it _{d}utu_-szi 58. ina _ka2 {d}lamma-ra-bi_ 59. ina _ka2_ e2-zi-da sza2 qe2-reb 60. bar2-sipa{ki} ul-ziz 61. e2-masz-masz e2-gaszan-kalam-ma _ku3-babbar ku3-sig17_ 62. u2-za-'i-in lu-le-e u2-mal-li 63. {d}szar-rat-kid-mu-ri sza2 ina ug-gat lib3-bi-sza2 64. at-man-sza2 e-zi-bu 65. u2-szi-bu a-szar la si-ma-a-ti-sza2 66. ina _bala_-ia dam-qi2 sza2 an-szar2 isz-ru-ka 67. tar-sza2-a sa-li-mu 68. a-na szuk-lul _dingir_-ti-sza2 s,ir-ti 69. szur-ru-hu mi-se-e-sza2 szu-qu-ru-ti 70. ina _masz2-ge6_ szi-pir mah-he-e 71. isz-ta-nap-pa-ra ka-a-a-na 72. {d}utu u3 {d}iszkur asz2-al-ma 73. e-pu-lu-in-ni an-nu ke-e-nu 74. si-mat _dingir_-ti-sza2 _gal_-ti u2-szar-ri-ih 75. u2-sze-szib-szi ina _bara2-mah_-hi 76. szu-bat da-ra-a-ti 77. par-s,e-e-sza2 szu-qu-ru-ti u2-kin-ma 78. u2-szal-li-ma mi-se-e-sza2 79. anzu{muszen}-mesz {gesz}szu-ri-in-ni 80. a-na _ti-la zi-mesz_-ia 81. ina _ka2_ e2-galam-mes 82. _e2_ {d}u-gur sza2 {iri}tar-bi-s,i az-qu-up 83. a-di a-di-ni a-bi la im-ma-al-la-du 84. um-mi3 a-lit-ti la ba-na-at ina lib3-bi _ama_-sza2 85. a-na e-pesz e2-hul2-hul2 iz-kur ni-bit _mu_-ia 86. {d}sin sza2 ib-na-an-ni a-na _lugal_-u-ti 87. um-ma {disz}an-szar2-du3-a e2-kur szu2-a-tu 88. ip-pu-usz-ma qe2-reb-szu2 89. u2-szar-man-ni pa-rak da-ra-a-ti 90. a-mat {d}sin sza2 ul-tu _u4-mesz su3-mesz_ 91. iq-bu-u e-nen-na u2-kal-lim 92. _ug3-mesz egir-mesz_ 93. _e2_ {d}sin sza2 {disz}{d}sal2-ma-nu-masz 94. _a_ {disz}asz-szur-pap-ibila _lugal_ pa-ni 95. mah-ri-ia e-pu-szu 96. la-ba-risz u2-sza2-lik-ma 97. u2-szad-gi-la pa-nu-u-a 98. ina a-mat {d}sin {d}nusku an-hu-us-su 99. ad-ke e-li sza u4-me pa-ni 100. szu-bat-su u2-rap-pisz 101. ul-tu _usz8_-szu2 a-di gaba-dib-be2-e-szu2 102. ar-s,ip u2-szak-lil 103. e2-me-lam2-an-na _e2_ {d}nusku _sukkal mah_ 104. sza _lugal_ pa-ni mah-ri-ia la e-pu-szu2 105. ab-na-a qe2-reb-szu2 106. _gesz-ur3-mesz {gesz}eren-mah-mesz_ 107. u2-szat-ri-s,a e-li-szu2-un 108. _{gesz}ig-mesz_ {gesz}li-ia-a-ri 109. me-ser _ku3-babbar_ u2-rak-kis 110. u2-rat-ta-a _ka2-mesz_-szu2-un 111. 2(disz) _am-mesz ku3-babbar_ mu-nak-ki-pu 112. ga-re-ia ina at-man {d}sin 113. _en_-ia ul-ziz 2(disz) {d}lah3-me 114. esz-ma-re-e sza2 ti-is,-bu-tu2 115. {gesz}szu-ri-in-ni 116. mu-szal-li-mu kib-si _lugal_-ti-ia 117. mu-sze-ri-bu hi-s,ib _kur_-i u tam-tim 118. ina _ka2_ e2-hul2-hul2 ul-ziz 119. _szu-min_ {d}sin {d}nusku as,-bat 120. u2-sze-rib u2-sze-szib ina _bara2_ da-ra-a-ti 121. e2-dim-gal-kalam-ma _e2 an-gal_ 122. sza2 qe2-reb |BAD3.AN|{ki} 123. a-na si-hi-ir-ti-szu2 ar-s,ip u2-szak-lil 124. _e2_ {d}sin {d}nin-gal {d}utu {d}a-a 125. sza qe2-reb nina{ki} sza {disz}an-szar2-pap-asz 126. _man kur_ an-szar2{ki} _ad du3_-ia e-pu-szu2 127. il-li-ku la-ba-risz e2-kur szu2-a-tu2 128. e-na-ah-ma i-qu-pa _e2-gar8-mesz_-szu2 129. e2-kur szu-a-tu2 a-na si-hir-ti-szu2 130. ar-s,ip u2-szak-lil ul-la-a re-szi-szu2 131. _gesz-ur3-mesz {gesz}szur-min3 mah-mesz_ 132. u2-szat-ri-s,a ta-ra-an-szu2 133. _{gesz}ig-mesz_ {gesz}li-ia-a-ri 134. sza e-re-si-na _du10-ga_ 135. u2-rat-ta-a _ka2-mesz_-szu2 136. ul-tu e2-kur szu2-a-tu2 u2-szak-li-lu 137. u2-qat-tu-u ag-mu-ra szi-pir-szu2 138. {d}sin {d}nin-gal {d}nusku {d}utu u {d}a-a 139. _dingir-mesz_ tik-le-ia ina qer-bi-szu2 140. u2-sze-rib-ma u2-szar-me 141. _bara2_ da-ra-a-ti esz-re-e-ti 142. _kur_ an-szar2{ki} _kur_ uri{ki} ana si-hir-te-szi-na 143. ar-s,ip u2-szak-lil 144. mim-ma si-mat e2-kur ma-la _gal2_-u 145. sza _ku3-babbar ku3-sig17_ e-pu-usz 146. e-li sza _lugal-mesz ad-mesz_-ia 147. u2-rad-di _dingir-mesz gal-mesz_ 148. tik-le-ia ina at-ma-na-a-te-szu2-nu 149. s,i-ra-a-te u2-sze-szib-szu2-nu-ti 150. _{udu}siskur-mesz_ tasz-ri-ih-ti 151. ma-har-szu-un aq-qi2 152. u2-szam-hi-ra kad3-ra-a-a 153. sat-tuk-ku gi-nu-u2 e-li sza u4-me 154. ul-lu-ti u2-sza2-tir-ma 155. ar-ku-us _alam lugal_-ti-ia 156. sza _ku3-babbar ku3-sig17 uruda_ nam-ri 157. ina szi-pir {d}nin-a2-gal {d}ku3-si22-banda3{+da} 158. {d}nin-kur-ra nak-lisz u2-sze-pisz-ma 159. a-na mu-ter-ri-szi _ti-la_-ia 160. ma-har _dingir-mesz_ ti-ik-le-ia 161. u2-kin na-an-za-sun2 162. ul-tu s,e-he-ri-ia a-di ra-be2-ia 163. asz2-te-'a-a asz2-rat _dingir-mesz gal-mesz_ 164. {lu2}sza2-an-gu-ti ih-szu-hu 165. i-ram-mu na-dan zi-bi-ia 166. {d}iszkur _szeg3-mesz_-szu2 u2-masz-szi-ra 167. {d}e2-a u2-pat,-t,i-ra _idim-mesz_-szu2 168. szat-ti-szam-ma ina t,uh-di mi-sza2-ri 169. ar-te-'a-a ba-'u-lat {d}en-lil2 170. _dingir-mesz gal-mesz_ sza2 ap-tal-la-hu _dingir_-us-su-un 171. dun-nu zik-ru-u2-tu 172. e-mu-qi2 s,i-ra-a-ti 173. u2-szat-li-mu-in-ni 174. _kur-kur_ la ma-gi-re-ia 175. ina _szu-min_-ia im-nu-u2 176. u2-szam-s,u-in-ni ma-la lib3-bi-ia 177. ul-tu tam-tim e-liti 178. a-di tam-tim szap-liti 179. sza _lugal-mesz ad-mesz_-ia 180. ir-te-ed-du-u2 a-na-ku lu-u ar-de 181. ma-lak _iti u4 2(u)-kam2_ 182. ina _muru2_ tam-tim u na-ba-li 183. mi-is,-ru e-li sza _lugal-mesz ad-mesz_-ia 184. u2-rad-di-ma a-bel 185. _ug3-mesz_ a-szi-bu-ti _kur-kur_ sza2-a-ti-na 186. u2-szak-ni-sza2 a-na _{gesz}szudun_-ia 187. _gun_ man-da-at-tu2 szat-ti-szam-ma 188. u2-kin _edin_-usz-szu2-un 189. ina qi2-bit an-szar2 {d}nin-lil2 190. _lugal-mesz_ a-szib pa-rak-ki 191. u2-na-asz2-sza2-qu _giri3-min_-ia 192. ma-al-ki _gal-mesz_ sza2 s,i-tasz u szi-la-an 193. a-na kit-ri-szu2-nu u2-pa-qu-u-ni 194. ina tukul-ti _dingir-mesz gal-mesz en-mesz_-ia 195. qe2-reb {kur}elam-ma{ki} e-ru-ub 196. _bad5-bad5_-szu2-nu ina la mi3-ni 197. asz2-kun at-tal-lak szal-t,isz 198. {disz}um-man-al-da-si ti-ib 199. _me3_-ia dan-ni e-dur-ma 200. me-ra-nu-usz-szu2 in-na-bit-ma 201. is,-ba-ta sza2-da-a 202. 1(u) 4(disz) _iri-mesz_ dan-nu-ti mu-szab _lugal_-ti-szu2 203. u3 _iri-mesz tur-mesz_ sza2 ni-i-ba la i-szu-u2 204. a-di _2(u)-am3 iri-mesz_ 205. ina na-ge-e sza2 {iri}hu-un-nir 206. ina _ugu_ mi3-is,-ri sza2 {iri}hi-da-lu 207. ak-szu-ud {iri}ba-szi-mu 208. u3 _iri-mesz_ sza2 li-me-ti-szu2 209. ap-pul aq-qur sza2 _ug3-mesz_ a-szib 210. lib3-bi-szu2-un ka-mar-szu2-nu asz2-kun 211. u2-szab-bir _dingir-mesz_-szu2-un 212. u2-szap-szi-ih ka-bat-ti _en en-en_ 213. _dingir-mesz_-szu2 _{d}1(u)-5(disz)-mesz_-szu2 _nig2-szu_-szu2 _nig2-gur11_-szu2 214. _ug3-mesz tur_ u _gal_ asz2-lu-la ana _kur_ an-szar2{ki} 215. 1(gesz2) _danna_ qaq-qa-ru 216. qe2-reb {kur}elam-ma{ki} u2-szah-rib 217. _mun {u2}zag-hi-li{sar}_ 218. u2-sap-pi-ha _edin_-usz-szu2-un 219. {d}na-na-a sza 1(disz) _lim_ 6(disz) _me 3(u)-am3_ 5(disz) 220. _mu-an-na-mesz_ ta-as-bu-su-ma 221. tal-li-ku tu-szi-bu 222. qe2-reb {kur}elam-ma{ki} a-szar 223. la si-ma-a-te9-e-sza2 224. u3 ina u4-me-szu2-ma szi-i 225. u3 _dingir-mesz ad-mesz_-sza2 226. ib-bu-u szu-mi3 ana be-lut _kur-kur_ 227. ta-a-a-rat _en_-u-ti-sza2 228. tu-szad-gi-la pa-nu-u-a 229. um-ma {disz}an-szar2-du3-a 230. ul-tu2 qe2-reb {kur}elam-ma{ki} 231. u2-sze-s,a-an-ni-ma 232. u2-sze-rab-an-ni 233. qe2-reb e2-an-na 234. a-mat qi2-bit _dingir_-ti-szu2-un 235. sza ul-tu2 _u4-mesz su3-mesz_ iq-bu-u 236. e-nen-na u2-kal-li-mu _ug3-mesz egir-mesz_ 237. _szu-min dingir_-ti-sza2 _gal_-ti at-mu-uh 238. har-ra-nu i-szir-tu sza2 ul-lu-us, 239. lib3-bi ta-as,-ba-ta a-na e2-an-na 240. ina qe2-reb unu{ki} u2-sze-rib-szi-ma 241. ina e2-hi-li-an-na sza2 ta-ram-mu 242. u2-szar-me-szi pa-rak da-ra-a-ti 243. ina u4-me-szu2 _e2_ a2-ki-it {d}1(u)-5(disz) _gaszan_-ia 244. sza qe2-reb nina{ki} 245. sza ki-ma _ama_ a-lit-ti tu-rab-ba-an-ni 246. _{lu2}kur2-mesz_-ia i-na-ru 247. gi-mir ma-al-ki u2-szak-ni-sza2 248. a-na _giri3-min_-ia sza {disz}lugal-gi-na 249. _ad ad ad du3_-ia 250. _sza3-bala-bala {disz}en_-ba-ni _dumu_ {disz}a-da-si 251. sza du-ru-ug-szu2 bal-til{ki} 252. e-pu-szu2 la-ba-risz il-lik 253. mi-qit-ta-sza2 ad-ke 254. ina _iti_ szal-me u4-me sze-me-e 255. at-ta-ad-di tem-me-en-sza2 256. ina a-gur2-ri _{na4}zu2 {na4}za-gin3_ 257. _e2_ a2-ki-it szu2-a-tu 258. a-na si-hir-ti-sza2 ar-s,ip 259. u2-szak-lil lu-le-e u2-mal-li 260. an-szar2 u {d}nin-lil2 _dingir-mesz_ tik-le-ia 261. mu-szam-s,u-u2 ma-la lib3-bi-ia 262. qe2-reb-sza2 u2-sze-rib-ma 263. u2-sze-pi-sza2 i-sin-ni _e2_ a2-ki-it 264. _{udu}siskur-mesz_ tasz-ri-ih-ti 265. ma-har-szu-un aq-qi2 266. u2-szam-hi-ra kad3-ra-a-a 267. an-szar2 u3 {d}nin-lil2 268. sza ul-tu s,e-he-ri-ia 269. u2-rab-bu-in-ni 270. is,-s,u-ru _lugal_-u-ti 271. qe2-reb _e2_ a2-ki-it szu2-a-tu2 ir-ru-bu-ma 272. ip-pu-szu2 i-sin-ni _hul2-mesz_ 273. ina bu-un-ni-szu2-nu nam-ru-ti 274. ina ni-isz _igi-min-mesz_-szu2-nu _saga-mesz_ 275. sza2 i-bar-ra-a kib-ra-a-ti 276. {disz}an-szar2-du3-a _lugal_ mi-gir lib3-bi-szu2-nu 277. e-pisz _e2_ a2-ki-it szu-a-tu 278. ha-disz lit-tap-la-su 279. _u4-mesz_-ia li-sza2-ri-ku 280. lu-usz-bi bu-'a-a-ru 281. _suhusz {gesz}gu-za lugal_-ti-ia lu-kin-nu 282. lu-szal-bi-ru _bala-mesz_-ia 283. _{lu2}kur2-mesz_-ia li-ne2-e-ru 284. li-szam-qi2-tu ga-re-ia 285. ina tukul-ti-szu2-nu ra-bi-ti 286. e-ma a-qab-bu-u la-be-el 287. a-szar u2-s,ar-ra-mu 288. lik-szu-da _szu-min_-a-a 289. a-na _egir_ u4-me _dumu-mesz dumu dumu-mesz_ 290. _dumu-mesz_ u3 _dumu-mesz_ 291. ina _lugal-mesz dumu-mesz_-ia 292. sza2 an-szar2 u {d}nin-lil2 ut-tu-szu-ma 293. a-na be-lut _kur_ u _ug3-mesz_ 294. i-nam-bu-u2 zi-kir-szu2 295. e-nu-ma _e2_ a2-ki-it szu-a-tu2 296. i-lab-bi-ru-ma in-na-hu 297. an-hu-us-su lu-ud-disz 298. _mu-sar_-u2 szi-t,ir _mu_-ia 299. li-mur-ma _i3-gesz_ lip-szu-usz 300. _{udu}siskur bala_-qi2 301. a-na asz2-ri-szu2 lu-ter 302. _dingir-mesz gal-mesz_ ma-la ina _mu-sar_-e an-ne2-e sza2-at,-ru 303. _lugal_-ut-ka lik-tar-ra-bu 304. li-is,-s,u-ru _bala-mesz_-ka 305. sza _mu?-sar?_-u szi-t,ir _mu_-ia ib-ba-tu2 306. ina mim-ma szi-pir ni-kil-ti u2-hal-la-qu 307. it-ti _mu-sar_-e 308. szi-t,ir _mu_-szu2 la i-szak-ka-nu 309. _dingir-mesz gal-mesz_ 310. sza _an_-e u3 _ki_-tim 311. _lugal_-us-su lis-ki-pu 312. _mu_-szu2 _numun_-szu2 ina _kur_ lu-hal-li-qu
Total 2 record(s)