&P516956 = RINAP 5/2 Ashurbanipal 073 composite #atf: lang akk @object composite text @surface a 1. a-na-ku {disz}an-szar2-du3-a _lugal gal lugal_ dan-nu _lugal szu2 lugal kur_ asz-szur _lugal_ kib-rat _limmu2_-tim $ n lines broken 2'. _szagina_ babila2{ki} _lugal kur eme-gi7_ u uri{ki} 3'. _dumu dumu_ {disz}{d}sin-pap-mesz-su _lugal gal lugal_ dan-nu _lugal szu2 lugal kur_ asz-szur 4'. li-ib-li-bi {disz}lugal-gi-na _lugal gal lugal_ dan-nu _lugal szu2 lugal kur_ asz-szur 5'. _szagina_ babila2{ki} _lugal kur eme-gi7_ u uri{ki} 6'. an-szar2 _ad dingir-mesz_ ina lib3-bi _ama_-ia szi-mat _lugal_-u-ti i-szim? szim-ti? 7'. {d}nin-lil2 _ama gal_-tu a-na be-lut _kalam_ u _ug3-mesz_ taz-ku-ra szu-mi3? 8'. {d}e2-a _dingir-mah alam-dim2_-me-e _en_-u-ti u2-s,ab-bu-u nak-lisz 9'. {d}sin _dingir_ el-lu asz2-szu2 e-pesz _lugal_-ti-ia usz-tak-li-ma _munus saga_ it-tum 10'. {d}utu {d}iszkur ba-ru-tu2 szi-pir la in-nen-nu-u2 u2-mal-lu-u _szu-min_-u-a 11'. {d}marduk _abgal dingir-mesz_ uz-nu ra-pa-asz2-tu ha-si-su pal-ku-u isz-ru-ka szi-rik-te 12'. {d}ag _dub-sar_ gim-ri ih-ze ne2-me-qi-szu2 i-qi2-sza2-an-ni a-na qisz-ti 13'. {d}nin-urta {d}u-gur dun-ni zik-ru-te e-mu-qi2 la sza2-na-an u2-szar-szu-u gat-ti 14'. szi-pir ap-kal-li a-da-pa3 a-hu-uz ni-s,ir-tu2 ka-tim-tu2 kul-lat t,up-szar-ru-tu2 15'. _geszkim-mesz an_-e u _ki_-tim am-ra-ku szu-ta-du-na-ku ina _ukken_ um-ma-a-ni 16'. szu-ta-bu-la-ku 1(disz) _ba3_-ut ma-at,-lat _an_-e it-ti _abgal i3-mesz_ le-'u-u-ti 17'. u2-pa-t,ar _i-gi-a-ra2_-e et-gu-ru-ti sza2 la i-szu-u pi-it pa-ni 18'. asz2-ta-si kam-mu nak-lu sza2 _eme-gi7_ s,u-ul-lu-lu ak-ka-du-u ana szu-te-szu-ri asz2-t,u 19'. hi-t,a-a-ku _gu3-sum_ ab-ni sza2 la-am a-bu-bi sza2 kak-ku sa-ak-ku bal-lu 20'. it-ti il-li na-as-qi2 an-na-a sza2 ep-pu-sza2 gi-mir u4-me-ia 21'. szi-tah-hu-t,a-ku mur-ni-is-qi2 rak-pa-ak hi-isz-sza2-me-e szit-ma-ru-ti 22'. tam-ha-ak til-pa-na u2-s,u u2-szap-ra-asz2 si-mat qar-ra-du-ti 23'. a-szal-lu ki-ma szil-ta-hi az-ma-ra-ne2-e nu-ur-ru-t,u-u-ti 24'. s,ab-ta-ku {kusz}a-sa-a-ti ki-ma as-sa-ri u2-sza2-as-har se-he-er {gesz}ma-gar-ri 25'. usz-ta-na-as,-bar ki-ma kisz-kat3-te-e {gesz}a-ra-a-te {gesz}ka-ba-ba-te 26'. le-'a-a-ku sza gi-mir um-ma-ni ka-li-szu2-nu i-nu-szu2-nu ra-bu-u 27'. isz-te-nisz a-lam-mad si-mat _en_-u-ti al-ka-ka-te at-ta-na-lak sza2 _lugal_-te 28'. u2-szu-za-ku ma-har _lugal_ ba-ni-ia t,e3-e-me asz-ta-nak-kan a-na _gal-mesz_ 29'. ba-lu-u-a _{lu2}nam_ ul ip-pa-qid _{lu2}gar_-nu ul isz-sza2-kan ul-la-nu-u-a 30'. it-ta-nap-la-as _ad_ ba-nu-u-a qar-ra-du-tu2 sza2 i-szi-mu-in-ni _dingir-mesz gal-mesz_ 31'. ina qi2-bit _dingir-mesz gal-mesz ukken szesz-mesz_-ia ma-a'-disz i-ra-man-ni 32'. asz2-szu2 e-pesz _lugal_-ti-ia im-hur an-szar2 _lugal dingir-mesz en_ gim-ri 33'. u2-s,al-li {d}nin-lil2 {d}sze-ru-u-a ru-bat i-la-a-ti be-let _gaszan-mesz_ 34'. u2-sa-ap-pi {d}utu {d}iszkur ba-re-e sza2-ma-me qaq-qar _di-ku5_ kib-ra-a-te 35'. usz-te-mi3-iq {d}ag {d}marduk na-di-nu-te _{gesz}gidri {gesz}gu-za_ mu-kin-nu _lugal_-u-ti 36'. um-ma ina ukken-ni-ku-nu ib-ba-a ina _dumu-mesz_-ia te-nu-u2-a 37'. [...] x [...] 38'. [...] $ n lines broken 39'. ina _igi dingir-mesz gal-mesz_ sza2 _an_-e u _ki_-tim 40'. u2-dan-nin isz-t,ur isz-kun a-de-e a-na u4-me s,a-a-ti 41'. ina _{iti}gu4 iti_ {d}e2-a _en_ te-ne2-sze-e-ti pa-ti-qu nab-nit _lugal_-ti-ia 42'. e-ru-um-ma ina _e2_ ri-du-u-ti a-szar t,e3-e-me u mil-ki 43'. ina qi2-bit an-szar2 _ad dingir-mesz_ {d}marduk _en en-en lugal dingir-mesz_ 44'. u2-sza2-qa-an-ni _ugu dumu-mesz lugal_ szu-mi3 iz-kur ana _lugal_-u-ti 45'. _e2-gal_ ina e-re-bi-ia i-ra-asz2 gi-mir _karasz_ ma-li ni-gu-tu 46'. ha-du-u2 _nun-mesz_ {lu2}szu-ut _sag_ u2-pa-qu zi-kir szap-ti-ia 47'. ma-har _lugal ad_ ba-ni-ia s,ab-tak ab-bu-su-nu pu-su-sak hi-t,i-szu2-nu? 48'. _dingir-mesz gal-mesz_ ep-sze-te-ia _saga-mesz_ ha-disz ip-pal-su-ma 49'. ina qi2-bi-ti-szu2-nu s,ir-ti u2-szib t,a-a-bisz ina _{gesz}gu-za ad du3_-ia 50'. ru-be2-e {lu2}szu-ut _sag en_-u-ti ih-szu-hu i-ra-mu e-pesz _lugal_-ti-ia 51'. ina zi-kir _mu_-ia kab-ti ha-du-u2 i-ri-szu2 kib-rat _limmu2_-tim 52'. _lugal-mesz_ sza2 ti-amti e-liti szap-liti _ARAD-mesz_ da-gil2 pa-ni _ad_ ba-ni-ia 53'. asz2-szu2 e-pesz _lugal_-ti-ia pu-su-rat ha-de-e isz-tap-pa-ru ana a-a-szi 54'. _{gesz}tukul-mesz_ na-ki-ri ti-bu-te ir-tab-s,u rak-su ip-t,u-ru ta-ha-za-szu2-un 55'. i-nu-hu ul-me-szu2-un sze-lu-u-ti u2-szap-szi-hu _{gesz}pan_-szu2-un ma-la-ti 56'. ir-bu-bu ak-s,u-ti a-na la ma-gi-re-szu2-un tu-qu-un-tu2 hasz-hu 57'. bi-rit _iri_ u _e2_ a-me-lu mim-mu-u tap-pe-e-szu2 ul e-kim ina da-na-ni 58'. se-he-ep _kur_ ka-la-ma et,-lu e-du hi-bil-tu ul e-pu-usz 59'. a-lik ur-hi e-disz-szi-szu2 ina szul-me ib-'a har-ra-nu ru-qe2-e-ti 60'. ul ib-szi szar-ra-qu ta-bik da-me ul ip-pa-rik pi-rik-tu2 61'. asz2-ba _kur-kur_ szub-tu ne2-eh-tu2 ki-ma u2-lu szam-ni taq-na kib-rat _limmu2_-tim 62'. {lu2}e-la-mu-u szip-ra-a-ti a-na sza2-'a-al szul-mi3-ia isz-pu-ru-nim-ma na-szu2-u? 63'. ina qi2-bit {d}marduk _en gal?_-e? ul ar-szi sza2-ni-na ul ib-szi ge-ra-a-a 64'. ina mah-re-e _bala_-ia sza2 {d}marduk _lugal_ gim-ri _en_-ut x x? x u2-mal-lu-u2 _szu-min_-u-a 65'. _{tug2}sig2 dingir_-ti-szu2 _gal_-ti as,-bat asz2-te-'a-a asz2-ra-te-e-szu2 66'. sza a-lak _dingir_-ti-szu2 kak-da3-a u2-sa-al-la u2-sa-ap-pa _gal_-tu2 _dingir_-u-su 67'. hu-su-us babila{ki} sza ina ug-gat lib3-bi-ka ta-bu-tu-szu2 at-ta 68'. a-na e2-sag-gil _e2-gal en_-ti-ka ki-szad-ka ter-ra su-uh-hi-ra pa-an-ka 69'. ma-s,i _iri_-ka te-e-zib a-szar la si-ma-te-ka ra-ma-ta szub-tu2 70'. at-ta-ma {d}en-lil2-la2 _dingir-mesz_ {d}marduk qi2-bi a-lak szu-an-na{ki} 71'. ina pi-i-ka el-li sza2 la szu-un-ne2-e lisz-sza2-kin e-reb e2-sag-gil 72'. man-nu [...] $ n lines broken 73'. 5(disz)? ia-a-ti [...] 74'. 9(disz) _{lu2}ka-pirig_ x x [...] 75'. 1(u) _{lu2}gala-mesz_ ina man-zi-i hal-hal-la-ti [...] 76'. 1(u) 1(disz) _{lu2}nar-mesz_ ina _{gesz}za3?-mi2_ ta?-nit?-ti _en_-ti-szu2 i-za-am-mu-ru? 77'. 7(disz) {disz}{d}gesz-nu11-mu-gi-na _szesz_ ta-li-me-ia sza2 asz2-ru-ku a-na {d}marduk 78'. 8(disz) _szu-min dingir_-ti-szu2 _gal_-ti s,a-bit-ma i-szad-di-ha ma-har-szu2 79'. 1(u) 3(disz) ul-tu _kar_ bal-til{ki} a-di _kar_ babila{ki} a-szar i-szak-ka-nu nu-bat-tu2 80'. as-li t,u-ub-bu-hu le-e pu-ul-lu-ku ar-man-ni sur-ru-qu e-x x? _x-ga-mesz_ 81'. mim-ma szum-szu2 nap-tan sze-e-ri li-la-a-ti u2-t,ah-hu-u-ma ma-har-szu2 82'. ab-ri nu-up-pu-hu di-pa-ri qe2-e-du a-na 1(disz) _danna-am3_ na-mir-tu2 szak-nat 83'. gi-mir _erin2_-ni-ia ki-ma {d}tir-an-na szu-tas-hu-ru u4-mu u _ge6_ szit-ku-nu nin-gu-tu2 84'. {d}gaszan sza2 a-ga-de3{ki} {d}na-na-a {d}u2-s,ur-a-mat-sa {d}ha-ni-bi-ia {d}a-da-pa3? 85'. ina kib-ri _i7_ szub-tu szit-ku-na-ma u2-qa-'u-u2 _lugal dingir-mesz en en-en_ 86'. {d}u-gur dan-dan-ni _dingir-mesz_ it-ta-s,a-a ul-tu e2-mes-lam szu-bat ru-bu-ti-szu2 87'. ina ul-s,i ri-sza2-a-ti ina _kar_ babila{ki} iq-rib-ma i-t,e-ha-a ina szul-me 88'. {d}ag _ibila_ szit-lu-t,u ul-tu qe2-reb bar2-sipa{ki} usz-te-esz-sze-ra _kaskal_ 89'. {d}utu ul-tu si-par{ki} i-hi-szam-ma a-na babila{ki} um-dasz2-szi-ra sza2-ru-ri 90'. _dingir-mesz kur eme-gi7_ u uri{ki} ki-ma mu-re-e an-hu-te pa-nu-usz-szu2 it-ta-nak-ka-ru 91'. ina s,ip-pat mu-sza2-re-e ku-uz-bi sza2 kar-za-gin3-na asz2-ri el-li 92'. ma-har _mul-mesz_ sza2-ma-mi {d}e2-a {d}utu {d}asal-lu2-hi _dingir-mah_ {d}ku3-su3 {d}nin-a-ha-kud-du 93'. ina szi-pir _abgal ka-luh-u3-da ka-du8-u3-da_ rim-ki te-lil-te 94'. e-ru-um-ma qe2-reb-szu2 ir-ma-a pa-rak da-ra-a-ti 95'. _gu4-mah_-hi bit-ru-te szu-'e-e ma-ru-ti aq-qa-a ma-har-szu2 96'. _ku6_ u _muszen he2-gal2 zu-ab_ u2-t,ah-ha-a pa-nu-usz-szu2 97'. [...] _lal3 i3-mesz_ u2-sza2-az-ni-na ki-ma ra-a-di 98'. [...] _igi-sa2_-e szad-lu-u-ti u2-szam-hi-ra kad3-ra-a 99'. {lu2}ra-am-ki {lu2}pa-szi-szu2 _{lu2}an-gub-ba-mesz_ ma-har-szu2 ul-ziz 100'. _ka-pirig-mesz gala-mesz nar-mesz_ sza2 ga-mir um-ma-nu-ti ha-am-mu ul-ziz ma-har-szu2 x x 101'. [...]-un-nu ip-par-di [...] 102'. [...] x ki-ma x [...] $ n lines broken 103'. ina u4-me-szu-ma u2-sze-pisz-ma _{na4}na-ru2-a_ szi-t,ir _mu_-ia 104'. s,a-lam _dingir-mesz gal-mesz en-mesz_-ia e-si-qa s,e-ru-usz-szu2 105'. s,a-lam _lugal_-ti-ia mu-sa-ap-pu-u _dingir_-ti-szu2-un ma-har-szu2-un ul-ziz 106'. ta-nit-ti {d}marduk _en_-ia ep-sze-ti-ia _saga-mesz_ 107'. s,e-ru-usz-szu2 u2-sza2-asz2-t,ir-ma a-na ar2-kat3 u4-me e-zib 108'. ia-a-ti {disz}an-szar2-du3-a szi-mat _saga_-tim? x i-szim szim-ti 109'. x x [...] 110'. _ta_ e2-hur-sag-gal-kur-kur-ra 111'. re-ha-a-ti x [...] 112'. _dingir-mesz kur eme-gi7_ u uri{ki} 113'. ki-sza2-di-szu2 114'. ia-a-ti {disz}asz-du3-a 115'. ik-ru-ub 116'. {disz}{d}gesz-nu11-mu-gi 117'. _szu-min dingir_-ti-szu2 118'. _{lu2}ka-pirig_ 119'. _{lu2}gala-mesz_ 120'. _{lu2}nar-mesz_ 121'. [...] {gesz}ma2-umusz-a 122'. ul-tu? _kar?_ bal-til{ki}
Total 1 record(s)