Witness
Witness to composite(s): Q003230
Primary Publication: Leichty, Erle V. (2011) RINAP 4 Esarhaddon 001, ex. 001
Collection: British Museum, London, UK
Museum no.: BM 121005
Provenience: Nineveh (mod. Kuyunjik)
Period: Neo-Assyrian (ca. 911-612 BC)
Object Type: prism
Material: clay
Date: Esarhaddon.08.12.00
Transliteration:
atf: lang akk
object prism
surface a
column 1
1. _e2-gal_ {disz}{d}asz-szur-szesz-szum2-na _lugal gal_-u2 _lugal_ dan-nu
2. _lugal_ kisz-sza2-ti _lugal kur_ asz-szur{ki} _szagina_ babila2{ki}
3. _lugal kur eme-gi7_ u uri{ki} _lugal_ kib-rat _limmu2_-ti
4. re-'u-um ke-e-nu mi-gir _dingir-mesz gal-mesz_
5. sza ul-tu s,e-he-ri-szu2 {d}asz-szur {d}utu {d}en u {d}ag
6. _{d}1(u)-5(disz)_ sza {iri}ni-nu-a _{d}1(u)-5(disz)_ sza2 {iri}limmu2-dingir
7. a-na _lugal_-ti _kur_ asz-szur{ki} ib-bu-u2 zi-kir-szu2
8. sza _szesz-mesz_-ia _gal-mesz szesz_-szu2-nu s,e-eh-ru a-na-ku
9. ina qi2-bit {d}asz-szur {d}3(u) {d}utu {d}en u3 {d}ag
10. _{d}1(u)-5(disz)_ sza2 {iri}ni-nu-a _{d}1(u)-5(disz)_ sza2 {iri}limmu2-dingir _ad_ ba-nu-u-a
11. ina _ukken szesz-mesz_-ia _sag-mesz_-ia ke-nisz ul-li-ma
12. um-ma an-nu-u2 ma-a-ru ri-du-ti-ia
13. {d}utu u {d}iszkur ina bi-ri i-szal-ma an-nu ke-e-nu
14. i-pu-lu-szu-ma um-ma szu-u2 te-nu-u-ka
15. zi-kir-szu2-nu kab-tu it-ta-'i-id-ma _ug3-mesz kur_ asz-szur{ki} _tur gal_
16. _szesz-mesz_-ia _numun e2 ad_-ia isz-te-nisz u2-pa-hir
17. ma-har {d}asz-szur {d}3(u) {d}utu {d}ag {d}marduk _dingir-mesz kur_ asz-szur{ki}
18. _dingir-mesz_ a-szi-bu-te _an_-e u _ki_-tim asz2-szu2 na-s,ar ri-du-ti-ia
19. zi-kir-szu2-un kab-tu u2-sza2-az-ki-ir-szu-nu-ti
20. ina _iti_ szal-me u4-me sze-me-e ki-i qi2-bi-ti-szu-nu s,ir-ti
21. ina _e2_ ri-du-u2-ti asz2-ri szug-lud-di sza szi-kin3 _lugal_-ti
22. ina lib3-bi-szu2 ba-szu-u2 ha-disz e-ru-um-ma
23. ri-id-du qi2-nu _ugu szesz-mesz_-ia it-ta-bik-ma
24. sza _dingir-mesz_ u2-masz-szir-u-ma a-na ep-sze-ti-szu2-nu szur-ru-ha-a-ti
25. it-tak-lu-ma i-kap-pu-du le-mut-tu
26. _eme hul_-tim kar-s,i tasz-gir-ti ki-i la lib3-bi _dingir-mesz_
27. _ugu_-ia u2-szab-szu-ma sur-ra-a-ti la szal-ma-a-ti
28. _egir_-ia id-da-nab-bu-bu ze-ra-a-ti
29. pa-asz2-ru lib3-bi _ad_-ia sza2 la _dingir-mesz_ u2-ze-en-nu-u _ki_-ia
30. szap-la-a-nu lib3-ba-szu re-e-mu ra-szi-szu-ma
31. a-na e-pesz _lugal_-ti-ia szit-ku-na _igi-min_-szu
32. it-ti lib3-bi-ia a-tam-mu-ma usz-ta-bi-la ka-bat-ti
33. um-ma ep-sze-ti-szu2-nu szur-ru-ha-a-ma a-na t,e3-e-me ra-ma-ni-szu-nu
34. tak-lu-ma sza2 la _dingir-mesz_ mi-na-a ip-pu-szu
35. {d}asz-szur _lugal dingir-mesz_ reme2-nu-u {d}marduk sza2 nu-ul-la-a-ti ik-kib-szu-un
36. i-na ik-ri-bi ut-nen-ni u3 la-ban ap-pi
37. u2-s,al-li-szu2-nu-ti-ma im-gu-ru qi2-be2-e-ti
38. ki-i t,e3-em _dingir-mesz gal-mesz en-mesz_-ia la-pa-an ep-szet _hul_-tim
39. a-szar ni-s,ir-ti u2-sze-szi-bu-ni-ma s,u-lul-szu2-nu _du10-ga_
40. _ugu_-ia it-ru-s,u-ma is,-s,u-ru-in-ni a-na _lugal_-u-ti
41. ar-ka-a-nu _szesz-mesz_-ia im-ma-hu-ma mim-ma sza _ugu dingir-mesz_
42. u3 a-me-lu-ti la _du10-ga_ e-pu-szu-ma ik-pu-du le-mut-tu2
43. is-se-hu-ma _{gesz}tukul-mesz_ ina qe2-reb nina{ki} ba-lu _dingir-mesz_
44. a-na e-pesz _lugal_-u-ti it-ti a-ha-mesz it-tak-ki-pu la-la-'i-isz
45. {d}asz-szur {d}3(u) {d}utu {d}en {d}ag _{d}1(u)-5(disz)_ sza2 nina{ki} _{d}1(u)-5(disz)_ sza2 {iri}limmu2-dingir
46. ep-szet {lu2}ha-am-ma-'e-e sza2 ki-i la lib3-bi _dingir-mesz_ in-ne2-ep-szu2
47. lem-nisz it-ta-at,-lu-ma i-da-szu-un ul i-zi-zu
48. e-mu-qa-szu-un lil-lu-ta u2-sza2-lik-u2-ma
49. szap-la-nu-u2-a u2-szak-me-su-szu-nu-ti
50. _ug3-mesz kur_ asz-szur{ki} sza2 a-de-e ma-mit _dingir-mesz gal-mesz_
51. a-na na-s,ar _lugal_-ti-ia ina _a-mesz_ u3 _i3-gesz_ it-mu-u2
52. ul il-li-ku re-s,u-us-su-un
53. a-na-ku {disz}{d}asz-szur-pap-asz sza ina tu-kul-ti _dingir-mesz gal-mesz en-mesz_-szu2
54. ina qe2-reb ta-ha-zi la i-ne2-e'-u2 i-rat-su
55. ep-sze-ti-szu2-nu lem-ne2-e-ti ur-ru-hi-isz asz2-me-e-ma
56. u8-a aq-bi-ma s,u-bat ru-bu-ti-ia u2-szar-rit,-ma
57. u2-sza2-as,-ri-ha si-pit-tu lab-bisz an-na-dir-ma is,-s,a-ri-ih ka-bat-ti
58. asz2-szu2 e-pesz _lugal_-u-ti _e2 ad_-ia ar-pi-sa rit-ti-ia
59. a-na {d}asz-szur {d}3(u) {d}utu {d}en {d}ag u {d}u-gur _{d}1(u)-5(disz)_ sza2 nina{ki} _{d}1(u)-5(disz)_ sza2 {iri}limmu2-dingir
60. qa-ti asz2-szi-ma im-gu-ru qi2-bi-ti ina an-ni-szu2-nu ke-nim
61. _uzu_ ta-kil-ti isz-tap-pa-ru-nim-ma a-lik la ka-la-a-ta
62. i-da-a-ka ni-it-tal-lak-ma ni-na-a-ra ga-re-e-ka
63. 1(disz)-en u4-me 2(disz) u4-me ul uq-qi2 pa-an _erin2 hi-a_-ia ul ad-gul
64. ar-ka-a ul a-mur pi-qit-ti _ansze-kur-ra-mesz_ s,i-mit-ti _{gesz}szudun_
65. u3 u2-nu-ut _me3_-ia ul a-szu-ur s,i-di-it ger-ri-ia ul asz2-pu-uk
66. szal-gu ku-us,-s,u {iti}ziz2 dan-na-at _en-te-na_ ul a-dur
67. ki-ma u5-ri2-in-ni mu-up-pa-ar-szi
68. a-na sa-kap za-'i-ri-ia ap-ta-a i-da-a-a
69. har-ra-an nina{ki} pa-asz2-qi2-isz u ur-ru-hisz ar-de-e-ma
70. el-la-mu-u-a ina _ki_-tim {kur}hal-ni-gal-bat gi-mir qu-ra-di-szu2-un _mah-mesz_
71. pa-an ger-ri-ia s,ab-tu-ma u2-sza2-'a-lu _{gesz}tukul-mesz_-szu2-un
72. pu-luh-ti _dingir-mesz gal-mesz en-mesz_-ia is-hup-szu2-nu-ti-ma
73. ti-ib _me3_-ia dan-ni e-mu-ru-ma e-mu-u2 mah-hu-tisz2
74. {d}isz-tar be-let _muru2_ u _me3_ ra-a'-i-mat sza2-an-gu-ti-ia
75. i-da-a-a ta-zi-iz-ma _{gesz}pan_-su-nu tasz-bir
76. ta-ha-za-szu2-nu ra-ak-su tap-t,u-ur-ma
77. ina _ukken_-szu-nu iq-bu-u2 um-ma an-nu-u _lugal_-a-ni
78. ina qi2-bi-ti-sza2 s,ir-ti i-da-a-a it-ta-na-as-ha-ru ti-bu-u _egir_-a-a
79. ka-lu-mesz i-dak-ka-ku u2-s,al-lu-u be-lu-ti
80. _ug3-mesz kur_ asz-szur{ki} sza2 a-de-e _mu dingir-mesz gal-mesz_ ina muh-hi-ia iz-ku-ru
81. a-di mah-ri-ia il-li-ku-nim-ma u2-na-asz2-szi-qu _giri3-min_-ia
82. u3 szu-nu {lu2}ha-am-ma-'e-e e-pisz si-hi u3 bar-ti
83. sza a-lak ger-ri-ia isz-mu-u-ma _{lu2}erin2-mesz_ tuk-la-te-szu2-nu e-zib-u-ma
84. a-na _kur nu zu_-u2 in-nab-tu2 ak-szu-dam-ma ina _kar_ {i7}idigna
85. ina qi2-bit {d}3(u) {d}utu _dingir-mesz en_ ka-a-ri
86. gi-mir _erin2 hi-a_-ia {i7}idigna _dagal_-tum a-tap-pisz u2-sza2-asz2-hi-it,
87. ina {iti}sze _iti_ mit-ga-ri _u4 8(disz)-kam2 u4 esz3-esz3_ sza2 {d}ag
column 2
1. ina qe2-reb nina{ki} _iri_ be-lu-ti-ia ha-disz e-ru-um-ma
2. ina _{gesz}gu-za ad_-ia t,a-bisz u2-szi-ib
3. i-zi-qam-ma _{im}u18-lu_ ma-nit {d}e2-a
4. sza2-a-ru sza a-na e-pesz _lugal_-ti za-aq-szu2 t,a-a-ba
5. uk-ki-pa-nim-ma i-da-at dum-qi2 ina sza2-ma-me u qaq-qa-ri
6. szi-pir mah-he-e na-asz2-par-ti _dingir-mesz_ u {d}isz-tar
7. ka-a-an u2-szad-di-ru-u-ni u2-szar-hi-s,u-u-ni lib3-bu
8. _{lu2}erin2-mesz en_ hi-t,i sza a-na e-pesz _lugal_-ti _kur_ asz-szur{ki}
9. a-na _szesz-mesz_-ia u2-szak-pi-du le-mut-tu
10. pu-hur-szu-nu ki-ma isz-ten2 a-hi-it,-ma an-nu kab-tu2 e-mid-su-nu-ti-ma
11. u2-hal-li-qa _numun_-szu-un
single ruling
12. a-na-ku {d}asz-szur-szesz-szum2-na _lugal_ kisz-sza2-ti _lugal kur_ asz-szur{ki}
13. zi-ka-ru qar-du a-sza2-red kal ma-al-ki
14. _dumu_ {disz}{d}3(u)-pap-me-su _lugal kisz lugal kur_ asz-szur{ki}
15. _dumu_ {disz}lugal-gi-na _lugal kisz lugal kur_ asz-szur{ki}-ma
16. bi-nu-ut {d}asz-szur {d}nin-lil2 na-ram {d}3(u) u {d}utu
17. ni-szit {d}ag {d}marduk mi-gir {d}isz-tar szar-ra-ti
18. hi-szih-ti _dingir-mesz gal-mesz_ le-'u-um it-pe-szu2
19. ha-as-su mu-du-u2 sza a-na ud-du-usz _dingir-mesz gal-mesz_
20. u3 szuk-lul esz-re-e-ti sza kul-lat ma-ha-zi
21. _dingir-mesz gal-mesz_ isz-szu-u-szu a-na _lugal_-ti ba-nu-u _e2_ {d}asz-szur
22. e-pisz e2-sag-gil2 u babila2{ki} mu-ud-di-isz _dingir-mesz_ u {d}isz-tar
23. sza2 qe2-reb-e-szu2 sza _dingir-mesz kur-kur_ szal-lu-u-ti ul-tu qe2-reb {iri}asz-szur
24. a-na asz2-ri-szu2-nu u2-ter-ru-u2-ma u2-sze-szi-bu szub-tu ni-ih-tum
25. a-di _e2-kur-ra-mesz_ u2-szak-lil-u-ma _dingir-mesz_ i-na _bara2_-szu-nu
26. u2-szar-mu-u2 szu-bat da-ra-a-ti ina tu-kul-ti-szu2-nu _gal_-ti
27. ul-tu s,i-it {d}utu-szi a-di e-reb {d}utu-szi szal-t,isz at-tal-lak-u-ma
28. ma-hi-ra ul i-szi ma-al-ki sza kib-rat _limmu2_-ti u2-szak-ni-szu2 sze-pu-u-a
29. _kur_ a-na {d}asz-szur ih-t,u-u2 u2-ma-'e-ru-in-ni ia-a-szi
30. {d}asz-szur _ad dingir-mesz_ szu-ud-du-u2 u3 szu-szu-bu
31. mi-s,ir _kur_ asz-szur{ki} ru-up-pu-szu2 u2-ma-al-la-a _szu-min_-u-a
32. {d}3(u) _en aga_ du-un-ni zik-ru-u-ti ma-le-e ir-ti i-szim szi-ma-ti
33. {d}utu _zalag2 dingir-mesz_ ni-bit _mu_-ia kab-ti a-na re-sze-e-ti u2-sze-s,i
34. {d}marduk _man dingir-mesz_ pu-luh-ti _lugal_-ti-ia ki-ma im-ba-ri kab-ti
35. u2-sza2-as-hi-pu _kur-mesz_-e kib-ra-a-ti
36. {d}u-gur dan-dan-ni _dingir-dingir_ uz-zu na-mur-ra-tum
37. u3 sza2-lum-ma-tum isz-ru-ka szi-rik-ti
38. {d}isz-tar be-let _muru2_ u _me3 {gesz}pan_ dan-na-tum
39. {gesz}szil-ta-hu szam-ru i-qi-sza2-an-ni a-na qisz-ti
single ruling
40. ina u4-me-szu-ma {disz}{d}ag-numun-zi-si-sa2 _dumu_ {disz}{d}marduk-a-asz _{lu2}gar kur_ tam-tim
41. la na-s,ir a-de-e la ha-si-is _mun_ sza _kur_ asz-szur{ki}
42. t,a-ab-tu2 _ad_-ia in-szi-ma ina da-li-ih-ti _kur_ asz-szur{ki}
43. _erin2 hi-a_-szu2 u3 _karasz_-su id-ke-e-ma a-na {disz}{d}nin-gal-szum2-na
44. _{lu2}gar-kur_ szesz-unu{ki} _ARAD2_ da-gil2 pa-ni-ia ni-i-tu il-me-szu-ma
45. is,-ba-tu mu-s,a-a-szu2 isz-tu {d}asz-szur {d}utu {d}en u {d}ag _{d}1(u)-5(disz)_ sza2 nina{ki}
46. _{d}1(u)-5(disz)_ sza2 {iri}limmu2-dingir ia-a-ti {disz}{d}asz-szur-pap-asz i-na _{gesz}gu-za ad_-ia
47. t,a-bisz u2-sze-szi-bu-ni-ma be-lut _kur-kur_ u2-szad-gi-lu pa-ni-ia
48. szu-u2 ul ip-lah3 na-de-e a-hi ul ir-szi-ma ar-di ul u2-masz-szir
49. u3 {lu2}rak-bu-szu2 a-di mah-ri-ia ul isz-pu-ram-ma
50. szul-mu _lugal_-ti-ia ul isz-al ep-sze-te9-e-szu2 lem-ne2-e-ti
51. ina qe2-reb nina{ki} asz2-me-e-ma lib3-bi i-gug-ma is,-s,a-ri-ih ka-bat-ti
52. {lu2}szu-ut _sag-mesz_-ia _{lu2}nam-mesz_ sza2 pa-a-t,i _kur_-szu
53. u2-ma-'e-er s,e-ru-usz-szu2 u3 szu-u2 {disz}{d}ag-numun-zi-si-sa2
54. ba-ra-nu-u2 na-bal-kat3-ta-nu a-lak _erin2 hi-a_-ia isz-me-e-ma
55. a-na {kur}elam-ma{ki} sze-la-bisz in-na-bit asz2-szu2 ma-mit _dingir-mesz gal-mesz_
56. sza e-ti-qu {d}asz-szur {d}3(u) {d}utu {d}en u3 {d}ag
57. an-nu kab-tu e-mi3-du-szu-ma qe2-reb {kur}elam-ma{ki} i-na-ru-usz ina _{gesz}tukul_
58. {disz}na-'i-id-mar-duk _szesz_-szu2 ep-szet {kur}elam-ma{ki} sza2 ana _szesz_-szu2 e-tep-pu-szu2
59. e-mur-ma ul-tu {kur}elam-ma{ki} in-nab-tam-ma
60. a-na e-pesz _ARAD2_-ti-ia a-na _kur_ asz-szur{ki} il-lik-am-ma
61. u2-s,al-la-a be-lu-u2-ti
62. _kur_ tam-tim a-na si-hi-ir-ti-sza2 ri-du-ut _szesz_-szu2 u2-szad-gil2 pa-nu-usz-szu2
63. szat-ti-szam-ma la na-par-ka-a it-ti ta-mar-ti-szu2 ka-bit-tu
64. a-na nina{ki} il-lak-am-ma u2-na-asz2-sza2-qa _giri3-min_-ia
single ruling
65. {disz}ab-di-mil-ku-ut-ti _lugal_ {iri}s,i-dun-ni
66. la pa-lih3 be-lu-ti-ia la sze-mu-u zi-kir szap-ti-ia
67. sza _ugu_ tam-tim gal-la-tim it-tak-lu-ma is-lu-u _{gesz}szudun_ {d}asz-szur
68. {iri}s,i-du-un-nu _iri_ tuk-la-a-ti-szu2 sza qe2-reb tam-tim na-du-u2
69. a-bu-bisz as-pu-un _bad3_-szu2 u szu-bat-su as-suh-ma
70. qe2-reb tam-tim ad-di-ma a-szar masz-kan2-szu2 u2-hal-liq
71. {disz}ab-di-mil-ku-ut-ti _lugal_-szu2 la-pa-an _{gesz}tukul-mesz_-ia
72. ina _muru2_ tam-tim in-na-bit ina qi2-bit {d}asz-szur _en_-ia
73. ki-ma nu-u-ni ul-tu qe2-reb tam-tim a-bar-szu-ma
74. ak-ki-sa _sag-du_-su _dam_-su _dumu-mesz_-szu2 _dumu-munus-mesz_-szu2
75. _ug3-mesz e2-gal_-szu2 _ku3-sig17 ku3-babbar nig2-szu nig2-gur11 na4-mesz_ a-qar-tu
76. lu-bul-ti _gun3_ u3 _gada kusz am-si zu2 am-si {gesz}esi {gesz}tug2_
77. mim-ma szum-szu2 ni-s,ir-ti _e2-gal_-szu2 a-na mu-'u-de-e asz2-lu-la
78. _ug3-mesz_-szu2 _dagal-mesz_-te sza ni-ba la i-sza2-a
79. _gu4-mesz_ s,e-e-ni u3 _ansze-nita2-mesz_ a-na mu-'u-de-e
80. a-bu-ka a-na qe2-reb _kur_ asz-szur{ki} u2-pa-hir-ma _lugal-mesz_ {kur}hat-ti
81. u3 a-hi tam-tim ka-li-szu2-nu ina asz2-ri sza2-nim-ma _iri_ u2-sze-pisz-ma
82. {iri}kar-{disz}{d}asz-szur-szesz-szum2-na at-ta-bi ni-bit-su
column 3
1. {iri}e2-{disz}s,u-pu-ri {iri}[sik-ku-u2 {iri}gi]-i'
2. {iri}in-im-me {iri}[hi-il-du]-u-a
3. {iri}qar-ti-im-me {iri}bi-[i'-ru-u {iri}ki]-il-me-e
4. {iri}bi-ti-ru-me {iri}sa-gu-u [{iri}am]-pa
5. {iri}e2-gi-si-me-ia {iri}bi-ir-gi-i'
6. {iri}ga-am-bu-lu {iri}da-la-im-me {iri}i-si-hi-im-me
7. _iri-mesz_-ni sza li-me-et {iri}s,i-du-un-ni
8. a-szar ri-i-ti u masz-qi2-ti _e2_ tuk-la-a-ti-szu2
9. sza ina tu-kul-ti {d}asz-szur _en_-ia ik-szu-da _szu-min_-a-a
10. _ug3-mesz_ hu-bu-ut _{gesz}pan_-ia sza _kur_-i u3 tam-tim
11. s,i-it {d}utu-szi ina lib3-bi u2-sze-szib-ma
12. a-na mi-s,ir _kur_ asz-szur u2-ter na-gu-u2 szu-a-tu2
13. a-na esz-szu-te as,-bat {lu2}szu-ut _sag_-ia a-na _{lu2}nam_-ti
14. _ugu_-szu2-nu asz2-kun-ma _gun_ u3 man-da-at-tu2
15. _ugu_ sza2 mah-ri ut-tir-ma e-mid-su _ta sza3 iri-mesz_-szu
16. sza2-tu-nu {iri}ma-a'-ru-ub-bu {iri}s,a-ri-ip-tu
17. ina _szu-min_ {disz}ba-'a-li _lugal_ {iri}s,ur-ri am-nu
18. _ugu gun_ mah-ri-ti na-dan _mu-an-na_-szu2
19. man-da-at-tu2 be-lu-ti-ia u2-rad-di-ma u2-kin s,e-ru-usz-szu2
single ruling
20. u3 {disz}sa-an-du-ar-ri _lugal_ {iri}kun-di
21. u3 {iri}si-is-su-u2 _{lu2}kur2_ ak-s,u
22. la pa-lih3 be-lu-ti-ia sza _dingir-mesz_ u2-masz-szir-u-ma
23. a-na _kur_-i mar-s,u-ti it-ta-kil
24. szu-u2 {disz}ab-di-mil-ku-ut-ti _lugal_ {iri}s,i-du-un-ni
25. a-na re-s,u-ti a-ha-mesz isz-szak-nu-u-ma
26. _mu dingir-mesz_-szu2-nu it-ti a-ha-mesz iz-kur-u-ma
27. a-na e-mu-qi ra-ma-ni-szu2-nu it-tak-lu
28. a-na-ku a-na {d}asz-szur {d}3(u) {d}utu {d}en u {d}ag
29. _dingir-mesz gal-mesz en-mesz_-ia at-ta-kil-ma
30. ni-i-tu al-me-szu-ma ki-ma is,-s,u-ri ul-tu qe2-reb _kur_-i
31. a-bar-szu-ma ak-ki-sa _sag-du_-su
32. ina {iti}du6 _sag-du_ {disz}ab-di-mil-ku-ut-ti
33. ina {iti}sze _sag-du_ {disz}sa-an-du-ar-ri
34. ina 1(disz)-et _mu-an-na_ u2-nak-ki-is-ma
35. mah-ru-u2 la u2-hi-ir-ma u2-szah-mi3-t,a _egir_-u2
36. asz2-szu2 da-na-an {d}asz-szur _en_-ia _ug3-mesz_ kul-lu-mi3-im-ma
37. ina ki-sza2-di _{lu2}gal-mesz_-szu-un a-lul-ma it-ti _{lu2}nar_
38. u3 _{gesz}za3-mi2_ ina re-bet nina{ki} e-te-et-ti-iq
single ruling
39. {iri}ar-za-a sza2 pa-a-t,i na-hal {kur}mu-s,ur-ri
40. asz2-lu-lam-ma {disz}a-su-hi-li _lugal_-szu bi-re-tu2 ad-di-ma
41. a-na _kur_ asz-szur{ki} u2-ra-a ina t,e-hi _ka2-gal muru2 iri_ sza2 {iri}ni-na-a
42. it-ti a-si _ur-gi7_ u _szah2_ u2-sze-szib-szu-nu-ti ka-mi3-isz
single ruling
43. u3 {disz}te-usz-pa-a {lu2}gi-mir-ra-a-a
44. _erin2 hi-a_-man-da sza2 a-szar-szu2 ru-u2-qu
45. ina er-s,e-et {kur}hu-bu-usz-na a-di gi-mir _erin2 hi-a_-szu2
46. u2-ra-as-si-ib ina _{gesz}tukul_
single ruling
47. ak-bu-us ki-sza2-di _ug3-mesz_ {kur}hi-lak-ki
48. szad-du-u-a a-szi-bu-te hur-sza2-a-ni pa-asz2-qu-u-ti
49. sza2 t,e-hi {kur}ta-ba-la {lu2}hat-te-e lem-nu-u2-ti
50. sza _ugu kur-mesz_-ni-szu2-nu dan-nu-u-ti tak-lu-u2-ma
51. ul-tu u4-me pa-ni la kit-nu-szu2 a-na ni-i-ri
52. 2(u) 1(disz) _iri-mesz_-szu2-nu dan-nu-ti u3 _iri-mesz tur-mesz_ sza2 li-me-ti-szu2-nu
53. al-me _kur_-ud asz2-lu-la szal-lat-sun2 ap-pul aq-qur ina {d}gesz-bar aq-mu
54. si-it-tu-te-szu2-nu sza2 hi-it,-t,u u3 gul-lul-tu2 la i-szu2-u2
55. kab-tu ni-ir be-lu-ti-ia e-mid-su-nu-u-ti
single ruling
56. ad-isz {kur}bar-na-ka-a-a lem-nu-u-ti
57. a-szi-bu-te {kur}du6-a-szur-ri sza ina pi-i _ug3-mesz_
58. {kur}mi-ih-ra-a-nu {kur}pi-ta-a-nu i-nam-bu-u zi-kir-szu2-un
59. u2-sap-pi-ih _ug3-mesz_ {kur}man-na-a-a qu-tu-u la sa-an-qu
60. u3 _erin2 hi-a_-szu2 {disz}isz-pa-ka-a-a {iri}as-gu-za-a-a
61. kit-ru la mu-sze-zi-bi-szu2 a-na-ar ina _{gesz}tukul_
single ruling
62. asz2-lul {kur}e2-{disz}dak-ku-ri sza2 qe2-reb {kur}kal-di a-a-ab babila2{ki}
63. ak-mu {disz}{d}sza2-masz-ib-ni _lugal_-szu is-hap-pu ha-bi-lum
64. la pa-li-hu zik-ri _en en-en_ sza2 _a-sza3-mesz dumu-mesz babila-me_
65. u3 bar2-sipa{ki} ina pa-rik-te it-ba-lu-u-ma
66. u2-ter-ru ra-ma-nu-usz asz2-szu2 ana-ku pu-luh-ti {d}en u {d}ag
67. i-du-u2 _a-sza3-mesz_ sza2-ti-na u2-ter-ma
68. pa-an _dumu-mesz_ babila2{ki} u bar2-sipa{ki} u2-szad-gil2
69. {disz}{d}muati-szal-lim _dumu_ {disz}ba-la-si
70. ina _{gesz}gu-za_-szu2 u2-sze-szib-ma i-sza2-t,a ab-sza2-a-ni
single ruling
71. {disz}en-ba-sza2 _dumu_ {disz}bu-na-ni {lu2}gam-bu-la-a-a
72. sza ina 1(u) 2(disz) _danna_ qaq-qa-ru ina _a-mesz_
73. u3 _gi-ambar-mesz_ szit-ku-nu szu-ub-tu
74. ina qi2-bit {d}asz-szur _en_-ia hat-tu ra-ma-ni-szu2 im-qut-su-ma
75. ki-i t,e3-me-szu2-ma bil-tu u man-da-at-tu
76. _gu4-mah_-hi szuk-lu-lu-ti s,a-ma-da-ni _{ansze}kunga-mesz babbar-mesz_
77. ul-tu {kur}e-lam-ti il-qa-am-ma a-na nina{ki}
78. a-di mah-ri-ia il-lik-am-ma u2-na-asz2-sziq _giri3-min_-ia
79. re-e-mu ar-szi-szu2-ma u2-szar-hi-is-su lib3-bu
80. {iri}sza2-pi-i-{d}en _iri_ dan-nu-ti-szu2
81. dan-na-as-su u2-dan-nin-ma
82. sza2-a-szu2 a-di _{lu2}erin2-mesz {gesz}pan_-szu2 ina lib3-bi u2-sze-li-szu2-ma
83. _gin7 {gesz}ig_ ina _igi_ {kur}e-lam-ti e-dil-szu
single ruling
column 4
1. {iri}a-du-ma-tu _iri_ dan-nu-tu {lu2}a-ri-bi
2. sza {disz}{d}3(u)-pap-mesz-su _lugal kur_ asz-szur{ki} _ad_ ba-nu-u-a
3. ik-szu-du-ma _nig2-szu_-szu2 _nig2-gur11_-szu2 _dingir-mesz_-szu2
4. a-di {munus#}ap#-kal-la-tu2 szar-rat {lu2}a-ri-bi
5. isz-lu-[lam]-ma a-na _kur_ asz-szur{ki} il-qa-a
6. {disz}ha-za-[dingir] _lugal#_ {lu2}a-ri-bi it-ti ta-mar-ti-szu2 ka-bit-tu2
7. a-na nina#{ki} _iri_ be-lu-ti-ia
8. il-lik-am-ma u2-na-asz2-szi-iq _giri3-min_-ia
9. asz2-szu2 na-dan _dingir-mesz_-szu2 u2-s,al-la-an-ni-ma re-e-mu ar-szi2-szu2-ma
10. {d}a-tar-sa-ma-a-a-in {d}da-a-a {d}nu-ha-a-a
11. {d}ru-ul-da-a-a-u2 {d}a-bi-ri-il-lu
12. {d}a-tar-qu-ru-ma-a _dingir-mesz_ sza2 {lu2}a-ri-bi
13. an-hu-su-nu ud-disz-ma da-na-an {d}asz-szur _en_-ia
14. u3 szi-t,ir _mu_-ia _ugu_-szu2-nu asz2-t,ur-ma ut-ter-ma ad-din-szu2
15. {munus}ta-bu-u-a tar-bit _e2-gal ad_-ia a-na _lugal_-u-ti
16. _ugu_-szu2-nu asz2-kun-ma it-ti _dingir-mesz_-sza2 a-na _kur_-sza2 u2-ter-szi
single ruling
17. 1(gesz2) 5(disz) _{ansze}gam-mal-mesz_ 1(u) _ansze-nita2-mesz ugu_ ma-da-ti
18. mah-ri-ti u2-rad-di-ma u2-kin s,e-ru-usz-szu2
19. {disz}ha-za-dingir szim-tu u2-bil-szu2-ma {disz}ia-ta-a' _dumu_-szu2
20. ina _{gesz}gu-za_-szu2 u2-sze-szib-ma 1(u) _ma-na ku3-sig17_ 1(disz) _lim na4-mesz_ be2-ru-ti
21. 5(u) _{ansze}gam-mal-mesz_ 1(disz) _me_ kun-zi _szim hi-a_
22. _ugu_ man-da-at-ti _ad_-szu2 u2-rad-di-ma e-mid-su
23. ar-ka {disz}u2-a-bu a-na e-pesz _lugal_-ti
24. {lu2}a-ru-bu ka-li-szu2 _ugu_ {disz}ia-ta-a' usz-bal-kit-ma
25. a-na-ku {disz}asz-szur-pap-asz _lugal kur_ asz-szur{ki} _lugal_ kib-rat _limmu2_-ti
26. sza2 kit-tu i-ram-mu-ma s,a-lip-tu2 ik-kib-szu2
27. _{lu2}erin2-mesz me3_-ia a-na na-ra-ru-tu {disz}ia-ta-a'
28. asz2-pur-ma {lu2}a-ru-bu ka-li-szu2 ik-bu-su-ma
29. {disz}u2-a-bu a-di _{lu2}erin2-mesz_ sza2 is-si-szu2 bi-re-tu id-du-u-ma
30. u2-bi-lu-nim-ma {gesz}szi-ga-ru asz2-kun-szu2-nu-ti-ma
31. ina le-et _ka2-gal_-ia ar-ku-us-szu2-nu-ti
single ruling
32. {disz}up-pi-is _{lu2}en-iri_ sza2 {iri}pa-ar-tak2-ka
33. {disz}za-na-sa-na _{lu2}en-iri_ sza2 {iri}pa-ar-tuk-ka
34. {disz}ra-ma-te-ia _{lu2}en-iri_ sza2 {iri}u2-ra-a-ka-za-bar-na
35. {kur}ma-da-a-a sza2 a-szar-szu2-nu ru-u-qu sza ina _lugal-mesz ad-mesz_-ia
36. mi-s,ir _kur_ asz-szur{ki} la ib-bal-ki-tu2-nim-ma la ik-bu-su qaq-qar-sza2
37. pu-ul-hi me-lam-me sza {d}asz-szur _en_-ia is-hup-szu-nu-ti
38. {ansze}mur-ni-is-qi2 _gal-mesz_ tak-kas _{na4}za-gin3_ hi-ip szad-di-szu2
39. a-na nina{ki} _iri_ be-lu-ti-ia isz-szu-nim-ma isz-szi-qu _giri3-min_-ia2
40. asz2-szu2 _{lu2}en-iri-mesz_-ni sza qa-tu2 id-ku-szu2-nu-ti
41. be-lu-ti u2-s,al-lu-ma e-ri-szu-in-ni kit-ru
42. {lu2}szu-ut _sag-mesz_-ia _{lu2}nam-mesz_ sza2 pa-a-t,i _kur_-szu-un
43. it-ti-szu2-nu u2-ma-'e-er-ma _ug3-mesz_ a-szi-bu-te _iri-mesz_
44. sza2-tu-nu ik-bu-su-ma u2-szak-ni-szu2 _giri3-min_-usz-szu2-un
45. _gun_ man-da-at-tu2 be-lu-ti-ia u2-kin s,e-ru-usz-szu2-un
single ruling
46. {kur}pa-tu-usz-ar-ri na-gu-u sza i-te-e _e2-mun_
47. sza2 qe2-reb {kur}ma-da-a-a ru-qu-u-te sza2 pa-a-t,i {kur}bi-ik-ni _kur {na4}za-gin3_
48. sza ina _lugal-mesz ad-mesz_-ia mam2-ma la ik-bu-su _ki_-tim _kur_-szu2-un
49. {disz}szi-dir-pa-ar-na {disz}e-pa-ar-na _{lu2}en-iri-mesz_ dan-nu-ti
50. sza2 la kit-nu-szu2 a-na ni-i-ri sza2-a-szu2-nu a-di _ug3-mesz_-szu2-nu
51. _ansze-kur-ra-mesz_ ru-ku-bi-szu2-nu _gu4-mesz_ s,e-e-ni {ansze}u2-du-ri
52. szal-lat-sun2 ka-bit-tu asz2-lu-la ana qe2-reb _kur_ asz-szur{ki}
single ruling
53. {kur}ba-a-zu na-gu-u2 sza2 a-szar-szu2 ru-u-qu
54. mi-szit na-ba-li qaq-qar _mun_ a-szar s,u-ma-a-me
55. 1(disz) _me_ 2(u) _danna_ qaq-qar ba-a-s,i pu-qut-ti u _{na4}zu2-masz-da3_
56. a-szar _musz_ u _gir2-tab_ ki-ma kul-ba-bi ma-lu-u _a-gar3_
57. 2(u) _danna_ {kur}ha-zu-u2 szad-di _{na4}sag-gil-mud_
58. a-na _egir_-ia u2-masz-szir-ma e-ti7-iq
59. na-gu-u2 szu-a-tu2 sza ul-tu u4-me ul-lu-ti
60. la il-li-ku _lugal_ pa-ni mah-ri-ia
61. ina qi2-bit {d}asz-szur _en_-ia ina qe2-reb-e-szu2 szal-t,a-nisz at-tal-lak
62. {disz}ki-i-su _lugal_ {iri}hal-di-su {disz}ak-ba-ru _lugal_ {iri}il-pi-a-tu2
63. {disz}ma-an-sa-ku _lugal_ {iri}ma-gal-a-ni
64. {munus}ia-pa-a' szar-rat {iri}di-ih-ra-a-ni
65. {disz}ha-bi-su _lugal_ {iri}qa-da-ba-a'
66. {disz}ni-ha-ru _lugal_ {iri}ga-a'-u-a-ni
67. {munus}ba-as-lu szar-rat {iri}i-hi-lum
68. {disz}ha-ba-zi-ru _lugal_ {iri}pu-da-a'
69. 8(disz) _lugal-mesz_-ni sza qe2-reb na-ge-e szu-a-tu2 a-duk
70. ki-ma _munu4_ asz2-ta-t,i pa-gar lu-qu-ra-di-szu2-un
71. _dingir-mesz_-szu2-nu _nig2-szu_-szu2-nu _nig2-gur11_-szu2-nu u3 _ug3-mesz_-szu2-nu
72. asz2-lu-la a-na qe2-reb _kur_ asz-szur{ki} {disz}la-a-a-le-e
73. _lugal_ {iri}ia-di-i' sza2 la-pa-an _{gesz}tukul-mesz_-ia in-nab-tu2
74. ha-at-tu ra-ma-ni-szu2 im-qut-su-ma a-na {iri}ni-na-a
75. a-di mah-ri-ia il-lik-am-ma u2-na-asz2-sziq _giri3-min_-ia
76. re-e-mu ar-szi-szu2-ma na-ge-e {iri}ba-zi szu-a-tum
77. u2-szad-gil2 pa-nu-usz-szu2
single ruling
78. ina e-muq {d}asz-szur {d}3(u) {d}utu {d}ag {d}marduk _{d}1(u)-5(disz)_ sza2 nina{ki}
79. _{d}1(u)-5(disz)_ sza2 {iri}limmu2-dingir ak-szu-ud kul-lat na-ki-ri mul-tar-hi
80. ina zik-ri _dingir_-u-ti-szu2-nu ma-al-ki na-ki-ri-ia
81. ki-ma qa-ne2-e me-he-e i-szu-ub-bu
82. _lugal-mesz_-ni a-szi-bu-te tam-tim sza _bad3-mesz_-szu2-nu tam-tim-ma
83. e-du-u szal-hu-szu2-un sza ki-ma _{gesz}gigir {gesz}ma2_ rak-bu
84. ku-um _ansze-kur-ra-mesz_-e s,a-an-du par-ri-sa-ni
85. pal-hisz ul-ta-nap-sza2-qu lib3-ba-szu2-nu i-tar-rak-ma
column 5
1. i-ma-'u mar-tu2 ul ib-szi sza2-ni-ni ul im-mah-ha-ru _{gesz}tukul_-u-a
2. u3 ina ma-al-ki a-lik mah-ri-ia la im-szu-la a-a-u2-ma
3. sza a-na _lugal-mesz ad-mesz_-ia i-szu-t,u-ma e-tap-pa-lu ze-ra-ti
4. ina qi2-bit {d}asz-szur _en_-ia ina _szu-min_-ia im-ma-nu-u2
5. pa-asz2-qu-ti _bad3 na4-mesz_-szu2-nu _gin7_ kar-pat pa-ha-ri u2-par-ri-ir
6. pa-gar qu-ra-di-szu2-un ina la qe-be2-ri u2-sza2-kil zi-i-bu
7. nak-mu _nig2-gur11_-szu2-nu asz2-lu-la a-na qe2-reb _kur_ asz-szur{ki}
8. _dingir-mesz_ ti-ik-li-szu2-nu szal-la-tisz am-nu
9. ki-ma s,e-e-ni a-bu-ka _ug3-mesz_-szu2-un szam-ha-a-ti
10. sza a-na szu-zu-ub na-pisz-ti-szu2 qe2-reb tam-tim in-nab-tu2
11. ina gesz-par-ri-ia ul ip-par-szid-ma ul u2-sze-s,i nap-szat-su
12. pe-tan bir-ki sza is,-ba-tu si-me-lat _kur_-i ru-qu-u-ti
13. ki-ma is,-s,u-ri ul-tu2 qe2-reb _kur_-i a-bar-szu2-ma ak-sa-a _a2-mesz_-szu2
14. _usz2-mesz_-szu2-nu ki-ma bu-tuq-ti na-at-bak _kur_-i u2-szar-di
15. su-te-e a-szi-bu-te kul-ta-ri sza2 a-szar-szu2-nu ru-u-qu
16. ki-ma ez-zi ti-ib me-he-e as-su-ha szu-ru-us-su-un
17. sza tam-tum a-na dan-nu-ti-szu2 _kur_-u2 a-na e-mu-qi-szu2 isz-ku-nu
18. ina sa-par-ri-ia a-a-um-ma ul u2-s,i
19. na-par-szu-du-um-ma ul ip-par-szid
20. sza2 tam-ti a-na _kur_-i sza _kur_-i a-na tam-tim a-szab-szu2-nu aq-bi
21. ina qi2-bit {d}asz-szur _en_-ia man-nu sza2 it-ti-ia isz-sza2-an-na-nu
22. a-na _lugal_-u-ti u3 ina _lugal-mesz_-ni _ad-mesz_-ia
23. sza ki-ma ia-a-ti-ma szur-ba-ta be-lu-su
24. ul-tu qe2-reb tam-tim _{lu2}kur2-mesz_-ia ki-a-am iq-bu-ni
25. um-ma _ka5-a_ la-pa-an {d}utu e-ki-a-am il-lak
single ruling
26. {kur}e-la-mu-u2 {kur}qu-tu-u ma-al-ki szip-s,u-u-ti
27. sza a-na _lugal-mesz ad-mesz_-ia e-tap-pa-lu ze-ra-a-ti
28. da-na-an {d}asz-szur _en_-ia sza2 ina kul-lat na-ki-ri e-tep-pu-szu2
29. isz-mu-u-ma hat-tum u pu-luh-tum _ugu_-szu2-nu it-ta-bik-ma
30. asz2-szu2 a-na mi-s,ir _kur-mesz_-szu2-nu la ha-t,e-e
31. _{lu2}kin-gi4-a-mesz_-szu2-nu sza2 t,u-bi u su-lum-me-e
32. a-na nina{ki} a-di mah-ri-ia isz-pu-ru-nim-ma
33. _mu dingir-mesz gal-mesz_ iz-ku-ru ul-tu {d}asz-szur {d}utu {d}en {d}ag
34. _{d}1(u)-5(disz)_ sza2 nina{ki} u3 _{d}1(u)-5(disz)_ sza2 {iri}limmu2-dingir _ugu_ na-ki-ri-ia
35. ina li-i-ti u2-sza2-zi-zu-ni-ma am-s,u-u ma-la lib3-bi-ia2
36. ina ki-szit-ti na-ki-ri szad-lu-u2-ti
37. sza ina tu-kul-ti _dingir-mesz gal-mesz en-mesz_-ia ik-szu-da _szu-min_-a-a
38. esz-ret ma-ha-zi sza _kur_ asz-szur{ki} u _kur_ uri{ki} u2-sze-pisz-ma
39. _ku3-babbar ku3-sig17_ uh-hi-zu-ma u2-nam-me-ra ki-ma u4-me
single ruling
40. ina u4-me-szu-ma _e2-gal_ ma-szar-ti sza nina{ki}
41. sza _lugal-mesz_-ni a-lik mah-ri _ad-mesz_-ia u2-sze-pi-szu2
42. a-na szu-te-szur _karasz_ pa-qa-a-di {ansze}mur-ni-is-qi2
43. _{ansze}kunga-mesz {gesz}gigir-mesz_ til-li u2-nu-ut _me3_
44. u3 szal-la-at na-ki-ri gi-mir mim-ma szum-szu2
45. sza {d}asz-szur _lugal dingir-mesz_ a-na esz-qi2 _lugal_-ti-ia isz-ru-ka
46. a-na szit-mur _ansze-kur-ra-mesz_ szi-tam-du-uh _{gesz}gigir-mesz_
47. asz2-ru szu-a-tu2 i-mi-s,a-an-ni-ma _ug3-mesz kur-kur_
48. hu-bu-ut _{gesz}pan_-ia al-lu tup-szik-ku u2-sza2-asz2-szi-szu2-nu-ti-ma
49. il-bi-nu _sig4 e2-gal-tur-ra_ szu-a-tu2
50. a-na si-hir-ti-sza2 aq-qur-ma qaq-qa-ru ma-a'-du
51. ki-ma a-tar-tim-ma ul-tu lib3-bi _a-sza3-mesz_ ab-tuq-ma
52. _ugu_-szu2 usz-rad-di ina {na4}pi-i-li _na4 kur_-i dan-ni
53. usz-szi-szu2 ad-di-ma tam-la-a u2-mal-li
54. ad-ke-e-ma _lugal-mesz_ {kur}hat-ti u e-ber _i7_
55. {disz}ba-'a-lu _lugal_ {iri}s,ur-ri {disz}me-na-si-i _lugal_ {iri}ia-u2-di
56. {disz}qa-usz-gab-ri _lugal_ {iri}u2-du-me {disz}mu-s,ur-i _lugal_ {iri}ma-'a-ab
57. {disz}s,il-_en lugal_ {iri}ha-zi-ti {disz}me-ti-in-ti _man_ {iri}is-qa-lu-na
58. {disz}i-ka-u2-su _lugal_ {iri}am-qar-ru-na
59. {disz}mil-ki-a-sza2-pa _lugal_ {iri}gu-ub-li
60. {disz}ma-ta-an-ba-'a-al _lugal_ {iri}a-ru-ad-da
61. {disz}a-bi-ba-'a-li _lugal_ {iri}sam-si-mur-ru-na
62. {disz}bu-du-dingir _lugal_ {iri}e2-am-ma-na {disz}pap-mil-ki _man_ {iri}as-du-di
63. 1(u) 2(disz) _lugal-mesz_ sza2 ki-sza2-di tam-tim {disz}e-ki-isz-tu-ra
64. _lugal_ {iri}e-di-'i-il {disz}pi-la-a-gu-ra-a _man_ {iri}ki-it-ru-si
65. {disz}ki-i-su _lugal_ {iri}si-il-lu-u8-u-a
66. {disz}i-tu-u-an-da-ar _lugal_ {iri}pa-ap-pa
67. {disz}e-re-su _lugal_ {iri}si-il-li {disz}da-ma-su _man_ {iri}ku-ri-i
68. {disz}ad2-me-e-su _lugal_ {iri}ta-me-si
69. {disz}da-mu-u2-si _lugal_ {iri}qar-ti-ha-da-as-ti
70. {disz}u2-na-sa-gu-su _lugal_ {iri}li-di-ir
71. {disz}bu-s,u-su _lugal_ {iri}zalag2-ia 1(u) _lugal-mesz_ sza {kur}ia-ad-na-na
72. _muru2_ tam-tim _szu-nigin_ 2(u) 2(disz) _lugal-mesz_ {kur}hat-ti a-hi tam-tim
73. u3 _muru2_ tam-tim ka-li-szu2-nu u2-ma-'e-er-szu2-nu-ti-ma
74. _gesz-ur3-mesz gal-mesz_ tim-me _mah-mesz_ {gesz}a-dap2-pi szu-hu-u-ti
75. sza _{gesz}eren {gesz}szur-min3_ tar-bit {kur}si-ra-ra u {kur}lab-na-na
76. sza ul-tu u4-me pa-ni ma-gal ik-bi-ru-ma i-szi-hu la-a-nu
77. _{d}alad-{d}lamma-mesz_ sza _{na4}{d}asznan_
78. _{munus}{d}lamma-mesz {munus}ab2-za-za_-a-ti _{na4}kun4-mesz_ a-gur2-ri
79. sza _{na4}gesz-nu11-gal {na4}{d}asznan {na4}dur2-mi-na_
80. _{na4}dur2-mi-na-banda3{da}_ {na4}a-lal-lum _{na4}gi-rim-hi-li-ba_
81. ul-tu qe2-reb hur-sza2-a-ni a-szar nab-ni-te-szu2-nu
82. a-na hi-szih-ti _e2-gal_-ia _gig_-isz pa-asz2-qi2-isz
column 6
1. a-na nina{ki} _iri_ be-lu-ti-ia u2-szal-di-du-u-ni
single ruling
2. ina {iti}sze-ga u4-me mit-ga-ri _ugu_ tam-le-e szu-a-tum
3. _e2-gal-mesz_ rab-ba-a-ti a-na mu-szab be-lu-ti-ia
4. ab-ta-ni s,e-ru-usz-szu
5. _e2 lugal_ sza 1(gesz2) 3(u) 5(disz) ina 1(disz) _kusz3 gal_-tim _gid2_ sza 3(u) 1(disz) ina 1(disz) _kusz3 gal_-tim _dagal_
6. sza ina _lugal-mesz_-ni _ad-mesz_-ia mam2-ma la e-pu-szu2 ana-ku e-pu-usz
7. _{na4}kun4-mesz {na4}gesz-nu11-gal_ a-sur-ru-szu2 u2-sza2-as-hir-ma
8. _gesz-ur3-mesz {gesz}eren mah-mesz_ u2-szat-ri-s,a _ugu_-szu2
9. _e2-gal_ {na4}pi-i-li pe-s,i-i u3 _e2-gal-mesz zu2 am-si_
10. _{gesz}esi {gesz}tug2_ {gesz}mu-suk-kan-ni _{gesz}eren {gesz}szur-min3_
11. a-na mu-szab _lugal_-ti-ia u mul-ta-u-ti be-lu-ti-ia
12. nak-lisz u2-sze-pisz-ma _gesz-ur3-mesz {gesz}eren mah-mesz_ u2-szat-ri-s,a _ugu_-szu2
13. _{gesz}ig-mesz {gesz}szur-min3_ sza2 e-re-si-na _du10-ga_ me-ser _ku3-babbar_
14. u3 _uruda_ u2-rak-kis-ma u2-rat-ta-a _ka2-mesz_-szin
15. _{d}alad-{d}lamma-mesz {munus}ab2-za-za_-a-ti sza _{na4}{d}asznan_
16. sza ki-i szik-ni-szu2-nu ir-ti lem-ni u2-tar-ru
17. _{na4}{d}alad-{d}lamma-mesz gal-mesz_ ur-mah-hi szu-ta-tu-u-ti
18. _{munus}ab2-za-za_-a-ti szu-ta-ha-a-ti _{munus}{d}lamma-mesz_ masz-sza2-a-ti
19. sza _uruda_ nam-ri ap-ti-iq-ma
20. u3 _{d}alad-{d}lamma-mesz_ sza pi-i-li pe-s,e-e
21. _za3_ u _gub3_ u2-sza2-as,-bi-ta _si-gar_-szi-in
22. tim-me _uruda gal-mesz_ tim-me _{gesz}eren mah-mesz_
23. a-dap2-pi ku-lul _ka2-mesz_-szin e-mid si-hi-ir-ti _e2-gal_ sza2-a-tu
24. ne2-be2-hu pa-asz2-qu sza _{na4}zu2 {na4}za-gin3_ u2-sze-pisz-ma
25. u2-szal-ma-a ki-li-lisz si-il-lu u3 mat-gi-qu
26. ki-ma {d}tir-an-na u2-sza2-as-hi-ra gi-mir _ka2-mesz_-ni
27. sik-kat3 _ku3-babbar ku3-sig17_ u3 _uruda_ nam-ri u2-rat-ta-a qe2-reb-szin
28. da-na-an asz-szur _en_-ia ep-szet ina _kur-kur_ nak-ra-a-ti e-tep-pu-szu2
29. ina szi-pir {lu2}ur5-ra-ku-ti e-si-qa qe2-reb-sza2
30. _{gesz}kiri6-mah_ tam-szil {kur}ha-ma-nim sza2 ka-la _szim hi-a_
31. u3 _gurun_ hur-ru-szu2 i-ta-a-ti-sza2 az-qu-up
32. ki-sal-la-sza2 ma-gal u2-rab-bi-ma tal-lak-ta-sza2 ma-a'-disz
33. u2-rap-pisz a-na masz-qit _ansze-kur-ra-mesz_ ina qe2-reb-e-sza2
34. pat-tu u2-sze-sze-ram-ma u2-szah-bi-ba a-tap-pisz
35. ul-tu _e2-gal_ szu-a-tu2 ul-tu _usz8_-sza2 a-di gaba-dib-e-sza2
36. ar-s,i-pu u2-szak-li-lu lu-le-e u2-mal-lu-u
37. szal-la-ru-sza2 ina _kasz sag_ mah-s,u ba-al-lu4 ka-lak-ku-sza2 ina _gesztin_
38. na-szi _{gesz}mar_ al-li tup-szik-ki e-pisz dul-li
39. za-bil ku-du-ur-ri ina e-le-li ul-s,i hu-ud lib3-bi
40. nu-um-mur pa-ni ub-ba-lu4 u4-um-szu2-un
41. szi-pir-sza2 ina hi-da-a-ti ri-sza2-a-ti za-ma-ri tak-ni-i
42. ag-mur-ma esz3-gal-szid-du3-du3-a
43. _e2-gal_ pa-qi-da-at ka-la-mu az-ku-ra ni-bit-sa
single ruling
44. {d}asz-szur {d}en {d}ag _{d}1(u)-5(disz)_ sza2 nina{ki} _{d}1(u)-5(disz)_ sza2 {iri}limmu2-dingir
45. _dingir-mesz kur_ asz-szur{ki} ka-li-szu2-nu ina qer-bi-sza2 aq-re-ma
46. _{udu}siskur-mesz_ tasz-ri-ih-ti eb-bu-u-ti ma-har-szu2-un aq-qi2-ma
47. u2-szam-hi-ra kad3-ra-a-a _dingir-mesz_ sza2-tu-nu
48. ina ku-un-ni lib3-bi-szu2-nu ik-tar-ra-bu _lugal_-u-ti
49. _{lu2}gal-mesz_ u3 _ug3-mesz kur_-ia ka-li-szu2-nu
50. ina _{gesz}banszur_ ta-szi-la-a-ti ta-kul-ti u qe2-re-e-ti
51. ina qer-bi-sza2 u2-sze-szib-szu2-nu-ti-ma u2-sza2-li-s,a nu-pa-ar-szu2-un
52. _gesztin-mesz_ u ku-ru-un-nu am-ki-ra s,ur-ra-szu2-un
53. _i3-sag_ i3-gu-la-a muh-ha-szu2-nu u2-sza2-asz2-qi2
54. ina qi2-bit {d}asz-szur _lugal dingir-mesz_ u3 _dingir-mesz kur_ asz-szur{ki} _du3_-szu2-nu
55. ina t,u-ub _uzu-mesz_ hu-ud lib3-bi nu-um-mur ka-bat-ti
56. sze-be2-e lit-tu-ti qe2-reb-sza2 da-risz
57. lu-ur-mi3-ma lu-usz-ba-a la-la-a-sza2
58. ina za3-muk-ki _iti_ resz-ti-i kul-lat {ansze}mur-ni-is-qi2
59. _{ansze}kunga-mesz {ansze}gam-mal-mesz_ til-li u2-nu-ut _me3_
60. gi-mir _erin2 hi-a_ szal-la-at na-ki-ri szat-ti-szam-ma
61. la na-par-ka-a lu-up-qi2-da qe2-reb-sza2
62. qe2-reb _e2-gal_ sza2-a-tu {d}alad _saga_ {d}lamma _saga_
63. na-s,ir kib-si _lugal_-ti-ia mu-ha-du-u ka-bat-ti-ia
64. da-risz lisz-tab-ru-u a-a ip-par-ku-u i-da-a-sza2
65. a-na _egir_ u4-me ina _lugal-mesz_-ni _dumu-mesz_-ia
66. sza {d}asz-szur u {d}isz-tar a-na be-lut _kur_ u _ug3-mesz_
67. i-nam-bu-u zi-kir-szu2 e-nu-ma _e2-gal_ sza2-a-tu
68. i-lab-bi-ru-ma in-na-hu an-hu-us-sa lu-disz
69. ki-i sza2 a-na-ku _mu-sar_-u2 szi-t,ir szu-me _lugal ad_ ba-ni-ia2
70. it-ti _mu-sar_-e szi-t,ir _mu_-ia asz2-ku-nu-u-ma
71. at-ta ki-i ia-a-ti-ma _mu-sar_-u2 szi-t,ir _mu_-ia
72. a-mur-ma _i3-gesz_ pu-szu-usz _{udu}siskur bal_-qi2
73. it-ti _mu-sar_-e szi-t,ir _mu_-ka szu-kun
74. {d}asz-szur u {d}isz-tar ik-ri-bi-ka i-szem-mu-u2
single ruling
75. {iti}sze-sag11-ku5 lim-mu {disz}a-tar-dingir _{lu2}en-nam_ {kur}la-hi-ra
Total 1 record(s)
