Witness
Witness to composite(s): Q003306
Primary Publication: Leichty, Erle V. (2011) RINAP 4 Esarhaddon 077, ex. 001
Collection: British Museum, London, UK
Museum no.: BM 131129
Provenience: Kalhu (mod. Nimrud/ Tawfiqiyah)
Period: Neo-Assyrian (ca. 911-612 BC)
Object Type: cylinder
Material: clay
Date: Esarhaddon.09.05.05
Transliteration:
atf: lang akk
object cylinder
surface a
1. {disz}asz-szur-szesz-szum2-na _lugal gal_-u2 _lugal_ dan-nu _lugal_ kisz-sza2-ti _lugal kur_ asz-szur{ki}
2. _szagina_ babila2{ki} _lugal kur_ szu-me-ri u3 uri{ki}
3. re-e2-um ki-i-nu sza _ug3-mesz_ dal-ha-a-ti u2-taq-qi-nu u2-sze-s,i-szi-na-ti nu-u2-ru
4. sza _dingir-mesz gal-mesz_ ba-nu-u2 e-pe-szu2 ud-du-szu isz-ru-ku szi-rik-tusz
5. ba-nu-u2 _e2_ an-szar2 e-pisz e2-sag-il2 u3 babila2{ki}
6. mu-szak-lil ma-ha-zi ka-li-szu2-nu mu-ud-disz s,a-lam _dingir-mesz gal-mesz_
7. sza2 _dingir-mesz kur-kur_ szal-lu-tu ul-tu qe2-reb _kur_ asz-szur{ki} a-na asz2-ri-szu2-nu u2-ter-ru
8. e2-gaszan-kalam-ma _e2_ {d}isz-tar {iri}limmu2-dingir be-el-ti-szu2
9. za-ha-la-a u2-szal-bisz-ma u2-nam-me#-ru ki-ma u4-me
10. _ur-mah-mesz_ an-ze-e na-'i-i-ri {d}lah3-me {d}ku-ri-bi
11. sza _ku3-babbar_ u _uruda_ u2-sze-pisz-ma ne2-reb _ka2-mesz_-sza2 ul-ziz
12. _lugal_ sza2 ina tu-kul-ti _an-szar2_ {d}3(u) {d}utu {d}ag {d}marduk _{d}1(u)-5(disz)_ sza nina{ki} _{d}1(u)-5(disz)_ sza {iri}limmu2-dingir
13. ul-tu tam-tim e-li-ti a-di tam-tim szap-li-ti i-sza2-risz it-tal-lak-u2-ma
14. kul-lat na-ki-re-e-szu2 [x x]-al-ki la kan-szu-ti-szu2 u2-szak-ni-sza2 sze-pu-usz-szu
15. ka-szid {iri}s,i-du-nu sza2 ina [x] tam-tim na-du-u2 sa-pi-in gi-mir da-ad2-me-szu
16. sza2-lil {iri}ar-za-a sza i-te-e na-hal {kur}mu-us,-ri sza {disz}a-su-hi-li _lugal_-szu
17. a-di ma-li-ke-e-szu2 bi-re-e-ti id-du-u a-na _kur_ asz-szur{ki} u2-ra-a
18. u3 {disz}te-usz-pa-a {kur}gi-mir-a-a ina _ki_-tim {kur}hu-bu-usz-nu
19. a-di gi-mir um-ma-ni-szu2 u2-ra-as-si-bu i-na _{gesz}tukul_
20. ka-bi-is _ug3-mesz_ {kur}hi-lak-ki la kan-szu-ti
21. t,a-rid {disz}{d}ag-numun-zi-si-sa2 _dumu_ {disz}{d}marduk-a-szum2-na
22. [x x]-i' {kur}e2-da-ku-ri sza qe2-reb {kur}kal-di a-a-bi babila2{ki}
23. [x x]-u2 {disz}{d}sza2-masz-ib-ni _lugal_-szu is-hap-pu hab-bi-lu
24. [x x]-an-da-su {iri}ma-ga-la-nu {iri}al-pi-ia-na {iri}di-ih-ra-nu
25. {iri}qa-ta-bu-u' {iri}pa-de-e {iri}u2-de-ri _iri-mesz_ dan-nu-ti
26. sza na-ge-e {kur}ba-az-zi a-di _iri-mesz_ s,e-he-ru-ti sza li-me-ti-szu2
27. al-me ak-szu-ud asz2-lu-la szal-lat-su-un ap-pul aq-qur ina gesz-bar aq-mu
28. da-a'-isz {kur}bar-na-ki _{lu2}kur2_ ak-s,u a-szi-bu-ti {kur}du6-a-szur-ri
29. sza ina pi-i _ug3-mesz_ {kur}mi-hi-ir-a-nu {kur}pi-it-ta-nu i-nam-bu-u zi-kir-szu2
30. mu-sap-pi-ih _ug3-mesz_ {kur}man-na-a-a gu-tu-u2 la sa-an-qu
31. {kur}pa-tu-usz-ar-ra na-gu-u2 sza i-te-e _e2-mun_
32. sza qe2-reb {kur}ma-da-a-a ru-qu-ti sza pa-a-t,i {kur}bi-ik-ni
33. sza i-na _lugal-mesz ad-mesz_-ia mam2-ma la ik-bu-su _ki_-tim ma-a-ti-szu2-un
34. {disz}szi-dir-pa-ar-ni {disz}e-pa-ar-ni _{lu2}en-iri-mesz_ dan-nu-ti
35. sza la kit-nu-usz a-na ni-ri sza2-a-szu2-nu a-di _ug3-mesz_-szu2-nu
36. szal-lat-su-nu ka-bit-tu asz2-lu-la a-na qe2-reb _kur_ asz-szur{ki}
37. _dumu_ {disz}{d}en-zu-szesz-mesz-eri-ba _lugal szu2 lugal kur_ asz-szur{ki}
38. _dumu_ {disz}lugal-gi-na _lugal szu2 lugal kur_ asz-szur{ki}
39. _szagina_ babila2{ki} _lugal kur_ szu-me-ri u uri{ki}
40. ina u4-me-szu-ma ina _ug3-mesz_ ki-szit-ti _kur-kur_
41. sza ina tu-kul-ti _an-szar2 en_-ia ik-szu-da qa-ta-a-a
42. _e2-gal_ ma-szar-ti sza2 qe2-reb {iri}kal-ha sza {disz}{d}szul3-ma-nu-_masz man kur_ asz-szur
43. _dumu_ {disz}asz-szur-pap-ir-a _nun_ a-lik pa-ni-ia e-pu-szu2
44. tam-lu-sza2 ul ib-szi-ma s,u-uh-hu-rat szu-bat-sa
45. ia-a-ti {disz}asz-szur-szesz-szum2-na _man kur_ asz-szur{ki} _nun_ na-a'-du
46. szin-na-at _abgal_ a-da-pa3 sza2 isz-ru-ku ru-bu-u {d}nin-szi-ku3
47. sza tam-le-e szu-a-tu ina uz-ni-ia ib-szi-ma usz-ta-bi-la ka-bat-su
48. qaq-qa-ru ki-szub-ba-a ki-ma a-tar-tim-ma lu as,-ba-ta
49. i-na esz-qi2 _na4 kur_-e tam-la-a usz-mal-li
50. i-na 1(disz) _me_ 2(u) ti-ib-ki ul-la-a re-esz-e-szu
51. _e2-gal-mesz_ a-na mu-szab _lugal_-u-ti-ia ab-ta-ni qe2-reb-szu
52. ul-tu usz-szi-szu a-di gaba-dib-e-szu ar-s,ip u2-szak-lil
53. _gesz-ur3-mesz {gesz}eren mah-mesz_ tar-bit {kur}ha-ma-ni u2-szat-ri-s,a e-li-szin
54. _{gesz}ig-mesz {gesz}szur-min3_ sza i-ri-si-in _du10-ga_ u2-rat-ta-a _ka2-mesz_-szin
55. a-na tab-rat kisz-szat _ug3-mesz_ lu-le-e usz-mal-li
56. _mu-sar-mesz_ e-pu-usz-ma da-na-an _an-szar2 en_-ia
57. ep-sze-et e-tep-pu-szu s,e-ru-usz-szu u2-sza2-asz2-t,ir-ma ina qe2-reb-szu2-un asz2-kun
58. i-na ar2-kat3 u4-me i-na u4-me s,a-a-ti
59. _nun egir_-u2 ina _lugal-mesz dumu-mesz_-ia an-hu-su lu-ud-disz
60. _mu-sar_ szi-t,ir szu-mi3-ia li-mur-ma _{udu}siskur bal_-qi2 _i3-mesz szesz2_
61. szu-mi3 it-ti szu-me-szu lisz-t,ur a-na asz2-ri-szu lu-ter
62. {d}nin-urta _ibila_ {d}en-lil2 ik-ri-bi-szu2 i-szem-me
single ruling
63. {iti}ne-ne-gar _u4 5(disz)-kam_ li-mu {disz}{d}ag-be-li2-u2-s,ur _{lu2}gar-kur {iri}bad3-lugal_-uk-ka
Total 1 record(s)
