Witness
Witness to composite(s): Q003971
Primary Publication: Grayson, A. Kirk; Novotny, Jamie (2014) RINAP 3/2 Sennacherib 230, ex. 001 Sennacherib 166, ex. 001
Collection: Vorderasiatisches Museum, Berlin, Germany
Museum no.: VA 08254
Provenience: Assur (mod. Qalat Sherqat)
Period: Neo-Assyrian (ca. 911-612 BC)
Object Type: prism
Material: stone
Date: Sennacherib.00.00.00
Transliteration:
atf: lang akk
prism
surface a
1. {disz}{d}sin-pap-mesz-su _man gal man_ dan-nu _man szu2 man kur_ asz-szur{ki} _man_ kib-rat _limmu2_-tim mut-tar#-[x x]
2. _ug3-mesz dagal-mesz_ e-pisz s,a-lam an-szar2 {d}a-nim {d}sin {d}utu {d}[x]
3. {d}u-gur {d}1(u)?-5(disz) sza2 e2-kid-mu-ri _dingir-mah_ u3 _dingir-mesz gal-mesz#_
4. mu-szak-lil pa-ra-as e2-szar2-ra u e2-mes-mes sza2 pa-lah3 _dingir-mesz_ sza2 _an_-e u _dingir-mesz_
5. _kur_ asz-szur{ki} ra-bisz mu-du-u e-pisz _kur_ asz-szur{ki} mu-szak-lil ma-ha-zi-szu2 na-si-ih#
6. na-ki-ri mu-ab-bit da-ad2-me-szu2-un mal-ku pit-qu-du sza2 _ugu lugal-mesz_ a-szib _bara2_
7. nu-'u-u2-da-at be-lut-su tukul-ti _kur_-szu2 na-a'-id _murub4_ u3 _me3_ s,u-lu-lu
8. _erin2-hi-a_-szu2 a-na-ku i-nu-szu2 e2-hur-sag-gal-kur-kur-ra sza2 qe2-reb ($ erasure $) e2-szar2-ra pa-rak an-szar2
9. _en gal_-i _en_-ia sza2 ul-tu _u4-mesz su3-mesz_ si-ma-tu-szu2 im-qu-ta-a-ma _ka2_-szu2
10. pe#-tu-u a-na _im-u18-lu_ ina _igi-min_ ra-pa-asz2-ti sza2 {d}e2-a isz-ru-ka#
11. ina# igi#-gal2-lu-u2-ti sza2 an-szar2 u2-szat-li-man-ni ia-a-szi ina t,e3-em ram-ni-ia
12. am-tal-lik-ma _ka2_ e2-hur-sag-gal-kur-kur-ra a-na na-pa-ah _{d}utu_-szi me2-eh-ret _{im}kur-ra_
13. pe-ta-a-szu2 lib3-bi ub-la-an-ni t,e3-em {d}utu {d}iszkur al-mad-ma an-na ki-i-nu
14. i-pu-lu-in-ni-ma sza2 _ka2_ szu-a-[x] a-na na-pa-ah _{d}utu_-szi me2-eh-ret _{im}kur-ra_
15. {d}utu u {d}iszkur iq-bu-u pe-ta#-a#-szu2 ina u4-me-szu2-ma _e2-gar8_ an-da-ak-kis-ma
16. a-na _gaba an-szar2 en_-ia me2-eh-ret _{im}kur-ra ka2_ esz-szisz# ap-te-e-ma _ka2 lugal_-ti#
17. _mu_-szu2 am-bi _e2_ sza2-hu-ru esz-szisz e-pu-usz-ma _ka2_-szu2 u2#-rap-pisz ina _ka2 e2_ sza2-hu-ru#
18. szu-a-tu 4(disz) _gu4 dumu {d}utu zabar husz-a_ e-lisz _szu-min_-szu2-nu _{d}utu_-szi na-szu-u2
19. u2-kal-lu s,u-lu-lu szap-lisz _giri3_-szu2-nu i-na _ugu_ 2(disz) _bara2 zabar_
20. sza2 _ku6-lu2-u18-lu zabar_ sza2 _suhur-masz2{ku6} zabar_ szur-szu-du gis-gal-la
21. _za3_ u _gub3_ sza2 _ka2 ur-idim_ u3 _gir2-tab-lu2-u18-lu_ kul-lu szi-ga-ri _ka2_ szu-nu-tu#
22. _ka2 kaskal_ szu-ut az-za-kar _mu_-szu2 _kisal_-szu2 esz-szisz ab-ni-ma _kisal_ si-dir man-za-az
23. {d}i2-gi3-gi3 _mu_-szu2 am-bi _ka2_-szu2 sza2 a-na s,i-it _{d}utu_-szi a-na _ugu i7 ka2_ bu-ru-mu
24. az-za-kar ni-bit-su _ka2_ ne2-re-bi-szu2 a-na _kisal_ ne2-reb {d}i2-gi3-gi3 _mu_-szu2 az-kur
25. _ka2_ sza2 a-na _{im}u18-lu ka2_ kan-su {d}i2-gi3-gi3 _mu_-szu2 am-bi _ka2_ ne2-re-bi-szu2 a-na _kisal#_
26. _ka2_ hi-[x] _kur mu_-szu2 az-kur _ka2_-szu2 sza2 a-na _{im}si-sa2 ka2 {mul}mar-gid2-da mu_-szu2 am-bi
27. _ka2_ ne2-re-bi-szu2 a-na _kisal ka2 bara2 nam-mesz mu_-szu2 az-kur _ka2_ pa-pa-hi _e2_ sza2-hu-ru
28. _e2-gar8-mesz_-szu2 a-di _kisal#_-szu2 _e2-mesz ka2-mesz_ ul-tu _usz8_-szu2 a-di gaba-dib-bi-szu2 ina szi-pir {d}kulla
29. u2-szak#-lil-szu-ma ki#-ma# _kur_-i re-szi-szu2 ul-li ina nik-lat lib3-bi-ia sza2 _ka2-mesz_
30. u3 _kisal#_-[x]-na _mu_-szu2-nu am-bi-ma ni-bit-si-na az-kur te-em-me-en-na at-ta sza2 {disz}{d}sin-pap-mesz-[x]
31. _man# kur_ asz-szur ra-'i-im ki-na-a-ti e-pisz s,a-lam _dingir_-szu2 ba-an _e2_ da-me-eq-ta-szu2 a-na an-szar2 qi2-bi#
32. it#-ti bal-til{ki} u e2-szar2-ra lisz-te-li-pu _nunuz-mesz_-szu2 _dumu-mesz_-szu2 _dumu-mesz dumu-mesz_-szu2 it-ti s,al-mat _sag-du_
33. li-ku-nu a-na du-ur da-a-ri a-a-um-ma _nun egir_-u2 sza2 an-szar2 a-na _sipa_-ut _kur_ u _ug3-mesz_ i-nam-bu-u
34. _mu_-szu2 sza2 ina _bala_-szu2 _e2_ szu2-a-tu2 in-na-hu an-hu-su lid-disz _mu-sar_-a-a li-mur-ma _i3-gesz_ lip-szu-usz
35. _siskur2_ liq-qi2 ina asz2-ri-szu2 lisz-kun an-szar2 ik-ri-bi-szu2 i-szem-me mu-nak-kir3 _mu-sar_-a-a
36. da-a-a-i-s,i a-ma-ti-ia an-szar2 _man dingir-mesz_ u3 _dingir-mesz gal-mesz_
37. sza2 _an_-e u3 _ki_-tim ar-rat ma-ru-usz-tu li-ru-ru-szu-ma
38. _lugal_-us-su lis-ki-pu _ti-la_-szu2 li-ki-mu-szu2 _mu_-szu2 _numun_-szu2
39. _nunuz_-szu2 u3 na-an-nab-szu2 i-na _ka ug3-mesz_ li-hal-li-qu#
Total 1 record(s)
