Witness
Witness to composite(s): Q003973
Primary Publication: Grayson, A. Kirk; Novotny, Jamie (2014) RINAP 3/2 Sennacherib 230, ex. 001 Sennacherib 168, ex. 001
Collection: Vorderasiatisches Museum, Berlin, Germany
Museum no.: VA 08248
Provenience: Assur (mod. Qalat Sherqat)
Period: Neo-Assyrian (ca. 911-612 BC)
Object Type: tablet or envelope > tablet
Material: stone
Date: Sennacherib.00.00.00
Transliteration:
atf: lang akk
tablet
obverse
1. {disz}{d}sin-pap-mesz-su _man gal man_ dan-nu _man szu2 man kur_ asz-szur{ki}
2. _man_ kib-rat _limmu2_-ti mu-tar-ru-u _ug3-mesz dagal-mesz_
3. e-pisz s,a-lam an-szar2 u _dingir-mesz gal-mesz_ mu-szak-lil
4. pa-ra-as, e2-szar2-ra ma-szu-u-ti ina bi-ri ina qi2-bit
5. {d}utu u {d}iszkur mu-szar-bu-u szu-luh-hi-szu2-un
6. mu-ter _{d}lamma_ e2-szar2-ra ba-t,il-ti a-na asz2-ri-szu2
7. sza2 pa-lah3 _dingir-mesz_ sza2 _an_-e u _dingir-mesz kur_ asz-szur{ki} ra-bisz
8. mu-du-u mu-ul-li _dingir-mesz gal-mesz_ ina szub-ti-szu2-nu
9. mu-szar-bu-u si-ma-ti-szu2-nu e-pisz _kur_ asz-szur{ki}
10. mu-szak-lil ma-ha-zi-szu2 mu-ma-gir _kur_ na-ki-ri
11. mu-ab-bit da-ad2-me-szu2-un mu-szah-ru-u _i7-mesz_
12. pe-tu-u mit,-ra-a-ti mu-szah-bi-ib pat-ta-a-ti
13. sza2-kin nu-uh-szu2 u t,uh-du ina u2-ga-ri _kur_ asz-szur{ki} rap-szu2-ti
14. mu-kin _a-mesz_ szi-qa-a-ti ina qar-ba-a-ti _kur_ asz-szur{ki}
15. sza2 ul-tu2 u4-me pa-ni hi-ri-i-ti u szi-qi ina _kur_ asz-szur{ki}
16. mam-ma-an la i-mu-ru a-a-um-ma la i-du-u
17. szu-ut mah-ri la i-pu-szu2 mu-szar-szid szi-pir {d}kulla
18. ul-tu2 szi-pir bal-t,u-ti a-di _ki-mah_ si-mat mi3-tu-tu
19. ina {na4}pi-i-li _na4 kur_-i sza2 ma-na-a-ma ina _kur_ asz-szur{ki} la i-pu-szu2
20. _lugal_ pa-ni mah-ri-ia ma-al-ku pit-qu-du sza2 _ugu lugal-mesz_ a-szib pa-rak-ki
21. nu-'u-da-at be-lut-su tukul-ti _kur_-szu2 na-a'-id qab-li u _me3_
22. s,u-lul _erin2-hi-a_-szu2 a-na-ku e-nu-szu2 isz-tu s,a-lam an-szar2 _en gal_-i _en_-ia
23. u s,a-lam _dingir-mesz gal-mesz du3_-ma u-szar-me-szu-nu-ti szu-bat-su-nu ne2-eh-ti
24. _{iti}bar-sag-sag iti_ resz-tu-u sza2 a-bi {d}en-lil2 _iti_ na-an-mur-ti
25. _{mul}apin_ i-sin-ni qe2-re-ti sza2 _lugal dingir-mesz an-szar2_
26. sza2 ul-tu u4-me _su3-mesz_ ina e-sza2-a-ti u sah-ma-sza2-a-ti _e2_ a-ki-it
27. _edin_ im-ma-szu2-u ina qe2-reb _iri_ in-ne2-ep-pu-szu2 pa-ra-as, _lugal dingir-mesz an-szar2_
28. it-ti szip-ri-im-ma szu-a-ti a-na e-pesz _e2_ a-kit lib3-bi ub-la-ni-ma
29. t,e3-em {d}utu {d}iszkur al-mad-ma an-na ke-<e-nu> i-pu-lu-in-ni-ma
30. iq-bu-u-ni e-pe-e-szu2 ina _iti dug3-ga_ u4-me szal-mu ina szi-pir i-szip-pu-ti
31. ne2-me-eq ka-ku3-gal-u-ti ina {na4}pi-i-li _na4 kur_-i _usz8_-szu2 ad-di-ma
32. ul-la-a re-szi-szu2 ul-tu _usz8_-szu2 a-di gaba-dib-bi-szu2 ina _na4 kur_-i
33. u2-szak-lil-szu2-ma u2-saq-qir-szu2 hur-sza2-nisz _2(disz)-ta_ pat-ta-a-ti
34. a-na i-ta-ti-szu2 u2-szah-ri-i-ma _{gesz}kiri6_ nu-uh-szi
35. s,ip-pat _nig2-sa-sa-hi-a_ u2-sza2-as-hir-szu2-ma mu-sa-re-e ku-uz-bi
36. i-ta-ti-szu2 u2-szal-me isz-tu babilax(|DIN.TIR|){ki} ah-pu-u
37. _dingir-mesz_-sza2 u2-szab-bi-ru _ug3-mesz_-szu2 ina _{gesz}tukul_ as-pu-nu
38. asz2-szu qaq-qar _iri_ szu-a-ti la# mus#-si#-i qaq-qar-szu2 as-suh-ma
39. a-na {i7}pu-rat-ti a-na tam-tim u2-sza2-bil e-pe-ri-szu2 a-na ni-tuk{ki}
40. ik-szu-du-ma _ni-tuk{ki}_-a-a i-mu-ru-ma hat-ti pu-luh-ti sza2 an-szar2
41. im-qut-su-nu-ti-ma na-mur-ta-szu2-nu ub-lu-u-ni
42. it-ti na-mur-ti-szu2-nu _erin2-hi-a_ di-ku-ut _kur_-szu2-nu za-bil tup-szik-ki
43. _{gesz}mar zabar gag-mesz zabar_ u2-nu-ut szi-pir _kur_-szu2-nu
44. a-na na-qar babilax(|DIN.TIR|){ki} isz-pu-ru-u-ni a-na nu-uh-hi lib3-bi
45. an-szar2 _en_-ia ta-nit-ti dan-nu-ti-szu2 _ug3-mesz_ a-na da-la-li
46. a-na ta-mar-ti _ug3-mesz_ ah-ra-a-ti _sahar-hi-a babilax(|DIN.TIR|){ki}_
47. as-su-ha-am-ma ina _e2_ a-ki-ti szu2-a-ti ka-re-e _du6_ u2-gar-ri-in
48. ina na-de-e _usz8_ sza2 _e2_ a-ki-ti na-mur-tu2 sza2 {disz}ka-ri-bi-dingir
49. _lugal_ {kur}sa-ba-a' _{na4}babbar#-dili#_ ni-siq-ti _na4-mesz szim-mesz dug3-mesz_
50. [i]-qa-ri-ba-am-ma isz-tu lib3-bi na-mur-ti szu-a-tu2
51. _na4-mesz szim-mesz_ a-na _sza3 usz8_-szu2 ad-di a-na _sza3 usz8 e2_ a-ki-ti
52. sza2-a-tu2 _ku3-babbar ku3-sig17 {na4}gug {na4}za-gin3 {na4}nir2 {na4}musz-gir2_
53. _{na4}babbar-dili {na4}babbar-min5 im-sig7-sig7_ nap-har _szim-mesz_ t,a-bu-tu2
54. ki-ma#? x x hi _usz8_ szu-a-ti i3-gu-la-a _i3_ ru-usz-ti
55. ki-ma _a-mesz i7_ lu as-lu-uh te-me2-en-na at-ta
56. sza2 {disz}{d}sin-pap-mesz-su _man kur_ asz-szur{ki} ra-im ki-na-a-ti
57. e-pisz s,a-lam an-szar2 ba-an _e2_ da-me-eq-ta-szu2 a-na an-szar2 qi2-bi
58. it-ti bal-til{ki} u e2-szar2-ra lisz-te-li-pu _nunuz-mesz_-szu2
59. _dumu-mesz_-szu2 _dumu dumu-mesz_-szu2 it-ti s,al-mat _sag-du_ li-ku-nu
60. a-na du-ur da-a-ri a-a-um-ma _nun egir_-u2 sza2 an-szar2
61. a-na _sipa_-ut _kur_ u _ug3-mesz_ i-nam-bu-u _mu_-szu2
62. sza2 ina _bala_-szu2 _e2_ szu-a-ti in-na-hu an-hu-us-su
63. lid-disz _mu-sar_-a-a li-mur-ma _i3-gesz_ lip-szu-usz
64. _siskur2_ liq-qi2 ina asz2-ri-szu2 lisz-kun
65. an-szar2 ik-ri-bi-szu2 i-szem-me
66. mu-ne2-kir _mu-sar#_-a-a da-a-a-i-s,i a-ma-ti-ia
67. e-pisz [la] _mun_ a-[na] _x-mesz_ x u _nunuz-mesz_-szu2-nu
68. an-szar2 _lugal dingir-mesz_ u _dingir-mesz# gal#-mesz_ sza2 _an_-e u _ki_-tim
69. ar-rat [la] nap-szu-ri ma-ru-usz-ti li-ru-ru-szu2-ma
70. _lugal_-us-su lis-ki-pu _ti-la_-su li-ki-mu-szu2
71. _mu_-szu2 _numun_-szu2 _nunuz_-szu2 u3 na-an-nab-szu2
72. ina nap-har _kur-kur_ li-hal-li-qu
Total 1 record(s)
