Search results

   Page: 1   
1 text(s) found
Return to Search Page
Search aids
Terms of Use
Internal login

Download all text      Download transliterations      Reduce to catalogue data      Unclear abbreviations?      Support the CDLI

CDLI Literary 000623 (Inanna B) composite
Click for archival page

Primary publicationCDLI Literary 000623 (Inanna B) composite
Publication date2014ff.
Secondary publication(s)Black, Jeremy A., et al., ETCSL (1998-2006) 4.07.02 Inanna B; Attinger, Pascal (s. PDF version at ‟View commentary”)
Museum no.
Accession no.
ProvenienceNippur (mod. Nuffar)
Excavation no.
PeriodOld Babylonian (ca. 1900-1600 BC)
Dates referenced
Object typeother (see object remarks)
Remarkscomposite text
Sub-genreETCSL 4.07.02 Inanna B ('Decad no. 04' (composite)
CDLI comments
Catalogue source20150207 cdliadmin
ATF sourcecdlistaff (check)
Translationno translation
UCLA Library ARK
Composite no.Q000623
Seal no.
CDLI no.P478852

Can you improve upon the content of this entry?
Please contact us!
View commentary
No Image Available
Composite text

surface a
1. nin me szar2-ra u4 dalla e3-a
Cited in OB catalogue from Nippur, at Philadelphia, 0.2.01, line 4; OB catalogue from Ur (U2), 0.2.04, line 8; OB catalogue at Andrews University, 0.2.11, line 3; OB catalogue at Yale, 0.2.12, Seg. A, line 4)
2. munus zi3 me-lam2 gur3-ru ki ag2 an urasz-a
3. nu-gig an-na suh-gir11 gal-gal-la
4. aga zi3-de3 ki-ag2 nam-en-na tum2-ma
5. me 7(disz)-bi szu sa2 du11-ga
6. nin-gu10 me gal-gal-la sag kesz2-bi za-e-me-en
7. me mu-e-il2 me szu-zu-sze3 mu-e-la2
8. me mu-e-ur4 me gaba-za bi2-tab
9. uszumgal-gin7 kur-re usz11 ba-e-szum2
10. {d}iszkur-gin7 ki szegx(|KAxLI|) gi4-a-za {d}ezina2 la-ba-e-szi-gal2
11. a-ma-ru kur-bi-ta e11-de3
12. sag-kal an ki-a {d}inanna-bi-me-en
13. izi bar7-bar7-ra kalam-e szeg3-ga2
14. an-ne2 me szum2-ma nin ur-ra u5-a
15. inim ku3 an-na-ta inim du11-du11
16. biluda{+da} gal-gal-la nig2-zu a-ba mu-un-zu
17. kur gul-gul u4-de3 a2 ba-e-szum2
18. ki-ag2 {d}en-lil2-la2 kalam-ma ni2 mi-ni-ri
19. a2 ag2-ga2 an-na-ke4 ba-gub-be2-en
20. nin-gu10 za-pa-ag2-zu-sze3 kur i3-gam-gam-e
21. ni2 me-lam2 u18-lu-da nam-lu2-ulu3
22. nig2-me-gar giri3-bi u3-mu-ri-gub
23. me-ta me husz-bi szu ba-e-re-ti
24. i-dub er2-ra-ke4 gal2 ma-ra-ab-tak4
25. e2 a-nir gal-gal-la sila-ba mu-ri-du
26. igi me3-ta nig2 ma-ra-ta-si-ig
27. nin-gu10 a2 ni2-za {na4}zu2 zu2 i3-gu7-e
28. u4 du7-du7-gin7 i3-du7-du7-de3-en
29. u4 gu3 ra-ra-da gu3 im-da-ab-ra-ra-an
30. {d}iszkur-da szegx(|KAxLI|) mu-da-an-gi4-gi4-in
31. im-hul-im-hul-da im-da-kusz2-u3-de3-en
32. giri3-za nu-kusz2-u3 i3-im-si
33. balag a-nir-ra-ta i-lu im-da-ab-be2
34. nin-gu10 {d}a-nun-na dingir gal-gal-e-ne
35. su-din{muszen} dal-la-gin7 du6-de3 mu-e-szi-ib-ra-asz
36. igi husz-a-za la-ba-su8-ge-de3-esz
37. sag-ki husz-a-za sag nu-mu-un-de3-ga2-ga2
38. sza3 ib2-ba-za a-ba ib2-te-en-te-en
39. sza3 hul-gal2-la-za te-en-te-bi mah-am3
40. nin ur5 i3-sa6 nin sza3 i3-hul2
41. ib2-ba nu-te-en-te-en dumu gal {d}suen-na
42. nin kur-ra diri-ga a-ba ki-za ba-an-tum3
43. hur-sag ki-za ba-e-de3-gid2-de3-en {d}ezina2 nig2-gig-bi
44. abul-la-ba izi mu-ni-in-ri-ri
45. i7-ba usz2 ma-ra-an-de2 ug3-bi ma-ra-na8-na8
46. ugnim-bi ni2-bi-a ma-ra-ab-lah5-e
47. zu2 kesz2-bi ni2-bi-a ma-ra-ab-si-il-le
48. gurusz a2-tuku-bi ni2-bi-a ma-ra-ab-su8-ge-esz
49. iri-ba ki-e-ne-di-ba mer i-ib2-si
50. gurusz sza3-gan-bi lu2-esz2 ma-ra-ab-sar-re-esz
51. iri kur za-ra li-bi2-in-du11-ga-am3
52. a-a ugu-zu li-bi2-in-esz-am3
53. inim ku3-zu bi2-in-du11 ki giri3-za he2-eb-gi4
54. sza3 tur3-bi-ta giri3 he2-eb2-ta-an-ze2-er
55. munus-bi dam-a-ni-ta sa6-ga na-an-da-ab-be2
56. ge6 u3-na ad na-an-di-ni-ib-gi4-gi4
57. nig2 ku3 sza3-ga-na nam-mu-da-an-bur2-re
58. u3-sun2 zi3-zi3 dumu gal {d}suen-na
59. nin an-ra diri-ga a-ba ki-za ba-an-tum3
60. me zi3-de3 nin gal nin-e-ne
61. sza3 ku3-ta e3-a ama ugu-ni-ir diri-ga
62. gal-zu igi-gal2 nin kur-kur-ra
63. zi-gal2 ug3 lu-a szir3 ku3-zu ga-am3-du11
64. dingir zi3 me-a tum2-ma gal-bi du11-ga-zu mah-am3
65. sza3 su3-ra2 munus zi3 sza3 zalag-zalag-ga me-zu
66. ge6-par3 ku3-ga2 hu-mu-szi-in-ku4-re-en
67. en-me-en en-he2-du7-an-na-me-en
68. {gi}ma-sa2-ab i3-gur3-ru asil-la2 i3-du11
69. ki-se3-ga bi2-ib-gar ge26-e nu-mu-un-ti-le-en
70. u4-de3 ba-te u4 mu-da-bil2
71. gissu ne ba-te u18-lu-da im-mi-dul
72. ka lal3-gu10 szu uh3-a ba-ab-du11
73. nig2 ur5 sa6-sa6-gu10 sahar-ta ba-da-gi4
74. nam-gu10 {d}suen lugal-an-ne2
75. an-ra du11-mu-na-ab an-ne2 ha-ma-du8-e
76. a-da-lam an-ra ba-an-na-ab-be2-en an-ne2 mu-e-du8-e
77. nam lugal-an-ne2 munus-e ba-ab-kar-re
78. kur a-ma-ru giri3-ni-sze3 i3-nu2
79. munus-bi in-ga-mah iri mu-un-da-ab-tuku4-e
80. gub-ba sza3-ga-na ha-ma-sed-de3
81. en-he2-du7-an-na-me-en a-ra-zu ga-mu-ra-ab-du11
82. er2-ga2 kasz du10-ga-gin7
83. ku3 {d}inanna-ra szu ga-mu-ni-ri-bar di-zu ga-mu-ra-ab-du11
84. {d}asz-im2-babbar na-an-kusz2-u3-de3-en
85. szu-luh an ku3-ga-ke4 nig2-nam-ma-ni in-kur2
86. an-da e2-an-na ha-ba-da-an-kar
87. dingir lu2 gu-la-ta ni2 ba-ra-ba-da-te
88. e2-bi la-la-bi ba-ra-mu-un-gi4 hi-li-bi ba-ra-mu-un-til
89. e2-bi e2 hul-a hu-mu-un-di-ni-in-ku4
90. tab mu-szi-in-ku4-ra-ni ninim-ma-ni hu-mu-un-te
91. {d}sun2-zi3-gu10 lu2 hu-mu-sar-re-en lu2 he2-em-mi-dab5-be2-en
92. ki zi-sza3-gal2-la-ka ge26-e a-na-me-en
93. ki-bala hul gig {d}nanna-za-ke4-esz an-ne2 ha-ba-ab-szum2-mu
94. iri-bi an-ne2 ha-ba-ra-an-si-il-le
95. {d}en-lil2-le nam ha-ba-da-an-ku4-de3
96. dumu er2 pa3-da-bi ama-ni na-an-se25-e
97. nin a-nir ki gar-ra
98. {gesz}ma2 a-nir-ra-zu ki kur2-ra he2-bi2-ib-tak4
99. szir3 ku3-ga2-ke4-esz i3-ug5-ge-de3-en
100. ge26-e {d}nanna-gu10 en3-gu10 ba-ra-an-tar
101. ki-lul-la he2-eb-gul-gul-en
102. {d}asz-im2-babbar-e di-gu10 ba-ra-bi2-in-du11
103. bi-in-du11 nam-gu10 li-bi2-in-du11 nam-gu10
104. u3-ma gub-gub-ba e2-ta ba-ra-an-e3-en
105. sim{muszen}-gin7 ab-ta ba-ra-an-dal-en zi-gu10 im-mi-gu7
106. {gesz}kiszi16 kur-ra-ke4 bi2-in-du-e-en
107. aga zi3 nam-en-na mu-da-an-kar
108. gir2 ba-da-ra ma-an-szum2 a-ra-ab-du7 ma-an-du11
109. nin kal-kal-la an-ne2 ki ag2
110. sza3 ku3-zu mah-a ki-bi ha-ma-gi4-gi4
111. nitalam ki-ag2 {d}uszumgal-an-na-ka
112. an-ur2 an-pa nin gal-bi-me-en
113. {d}a-nun-na-ke4-ne gu2 gesz ma-ra-an-gar-re-esz
114. u3-tu-da-ta nin banda3{+da}-me-en
115. {d}a-nun-na dingir gal-gal-e-ne a-gin7 ba-e-ne-diri-ga
116. {d}a-nun-na-ke4-ne nundum-nundum-bi-ta ki su-ub ma-ra-ak-ke4-ne
117. di ni2-ga2 nu-mu-un-til di kur2 di-gu10-gin7 igi-ga2 mu-un-nigin2
118. {gesz}na2 gi-rin-na szu nu-um-mi-la2
119. inim du11-ga {d}nin-gal lu2-ra nu-mu-na-bur2
120. en dadag-ga {d}nanna-me-en
121. nin ki-ag2 an-na-gu10 sza3-zu ha-ma-sed-de3
122. he2-zu he2-zu-am3 {d}nanna li-bi2-in-du11-ga za-a-kam bi2-in-du11-ga
123. an-gin7 mah-a-za he2-zu-am3
124. ki-gin7 dagal-la-za he2-zu-am3
125. ki-bala gul-gul-lu-za he2-zu-am3
126. kur-ra gu3 de2-e-za he2-zu-am3
127. sag gesz ra-ra-za he2-zu-am3
128. ur-gin7 ad6 gu7-u3-za he2-zu-am3
129. igi husz-a-za he2-zu-am3
130. igi husz-bi il2-il2-i-za he2-zu-am3
131. igi gun3-gun3-na-za he2-zu-am3
132. uru16-na nu-sze-ga-za he2-zu-am3
133. u3-ma gub-gub-bu-za he2-zu-am3
134. {d}nanna li-bi2-in-du11-ga za-a-kam bi2-in-du11-ga
135. nin-gu10 ib2-gu-ul-en i3-mah-en
136. nin ki-ag2 an-na-gu10 mer-mer-za ga-am3-du11
137. ne-mur mu-dub szu-luh si bi2-sa2
138. e2-esz2-dam-ku3 ma-ra-gal2 sza3-zu na-ma-sed-de3
139. im-ma-si im-ma-diri-ga-ta nin UN-gal ma-ra-du11
140. nig2 ge6 u3-na ma-ra-an-du11-ga-am3
141. gala-e an-bar7-ka szu hu-mu-ra-ab-gi4-gi4
142. dam dab5-ba-za-ke4-esz dumu dab5-ba-za-ke4-esz
143. ib2-ba-zu ib2-gu-ul sza3-zu nu-te-en-te-en
144. nin gu2-tuku nir-gal2 gu2-en-na-ke4
145. sizkur2-ra-na szu ba-an-szi-in-ti
146. sza3 ku3 {d}inanna ki-bi ba-an-na-ab-gi4
147. u4 ba-an-na-du10 la-la ba-an-su4-su4 hi-li ma-az ba-an-du8-du8
148. itudx(|UD.AN.ŠEŠ.KI|) e3-a-gin7 la-la ba-an-guru3
149. {d}nanna u6 zi3-de3-esz mu-un-e3
150. ama-ni {d}nin-gal-am3 szudu3 mu-na-an-sza4
151. gesz-ka2-na-ke4 silim-ma mu-na-ab-be2
152. nu-gig-ra du11-ga-ni mah-am3
153. kur gul-gul an-da me ba-a
154. nin-gu10 hi-li gu2 e3 {d}inanna za3-mi2

Version History

  Page: 1