Search results
Page: 1
1 text(s) found
Search aids
Terms of Use
Internal login
|
|
Search resultsPage: 1 1 text(s) found |
Return to Search Page Search aids Terms of Use Internal login |
| Download all text | Download transliterations | Reduce to catalogue data | Unclear abbreviations? | Support the CDLI |
| CDLI Literary 000782 (Instructions of Shuruppak) composite Click for archival page
Can you improve upon the content of this entry? Please contact us! | No Image Available | Composite text surface a 1. u4 re-a u4 su3-ra2 re-a 2. ge6 re-a ge6 ba9-ra2 re-a 3. mu re-a mu su3-ra2 re-a 4. u4-ba gesztu2 tuku inim galam inim zu-a kalam-ma ti-la-a 5. szuruppak{ki} gesztu2 tuku inim galam inim zu-a kalam-ma ti-la-a 6. szuruppak{ki}-e dumu-ni-ra na na-mu-un-de5-de5 7. szuruppak{ki} dumu ubara-tu-tu-ke4 8. zi-u4-su3-ra2 dumu-ni-ra na na-mu-un-de5-de5 9. dumu-mu na ga-de5 na-de5-mu he2-dab5 10. zi-u4-su3-ra2 inim ga-ra-ab-du11 gizzal he2-em-szi-ak 11. na-de5-ga-mu szu nam-bi2-bar-re 12. inim du11-ga-mu na-ab-ta-bala-e-de3 13. na-de5 ab-ba nig2 kal-la-am3 gu2-zu he2-em-szi-gal2 14. dur3{ur3} gu3 di na-ab-sa10-sa10 murub4-zu sza-ra-ab-si-il 15. GAN2 kaskal-la nam-bi2-ib2-ga2-ga2 nam-silig gu2-ga2-am3 16. a-sza3 ka-giri3-ka nam-ba-e-ur11-ru zi bulug-ga-am3 17. GAN2-zu-am3 pu2 na-an-ni-du3-e-en ug3-e sza-ri-ib-hul-hul 18. e2 sila dagal nam-bi2-ib-la2-e kesz2-da gal2-la-am3 19. szu du8-a nu-e-tum3 lu2-bi sza-ba-e-dab5-be2 20. za-e szu du8-a nam-mu-e-ak-e 21. lu2-ra igi du8 na-an-ak-e uru2-bi sza-ri-ib-su-su 22. ki du14-da-ka nam-bi2-du-x-de3 23. du14-de3 lu2-ki-inim-ma nam-ba-e-ku4-ku4 24. du14-de3 ni2-zu nam-ba-[...] 25. du14 nam-ak-de3-en x [...] 26. x x ka2 e2-gal-la x-am3 ba-ra-si-ga 27. du14-de3 bar-bar-ta gub-gub-ba in-nu-usz sila kur2-ra nam-ma-ni-ib-du 28. nig2 nam-mu-zuh-zuh ni2-zu nam-mu-usz2-e 29. e2 na-a-an-ni-buru3-e-en mi-si-ISZ-ra al nam-me 30. ni2-zu pirig na-nam ul-dab5 sag na-nam 31. dumu-mu sa gaz nam-mu-u3-ak-e ni2-zu tun3-am3 nam-bi2-ib-bar-re-e 32. nita nimgir-si na-an-ak ni2-zu na-an-x-x 33. ki-sikil dam tuku-da e-ne nam-mu-un-ne?-e inim sig-ga mah-am3 34. dumu-mu dagan-na lu2 dam tuku-da dur2 nam-bi2-e-ga2-ga2 35. du14 nam-mu2-mu2-de3 ni2-zu na-an-pe-el-la2 36. lul nam-guru5-guru5 sag gu2 sal-sal-la 37. ka nam-tar-tar-re-e-en inim-zu gar-ra-am3 38. ad? nam-gi4-gi4 igi dugud nu-mu-un-da-il2 39. lu2-da ninda zuh-a nam-mu-da-gu7-e 40. szu-zu usz2-am3 na-di-ni-ib-su-su 41. giri3 hur-re gu4 sza-ba-ri-ib-su-su udu sza-ba-ri-ib-su-su 42. u3-nu-gar-ra na-ab-be2-e 43. egir-bi-sze3 gesz-par3-gin7 szi-me-szi-ib2-la2-e 44. u2 nu-kin-ga2-sze3 udu-zu sag2 nam-me 45. usz nu-se3-ga-sze3 gu4 lu2 na-hun-e 46. usz se3-ga kaskal se3-ga-am3 47. kaskal ge6 na-an-du sza3-bi sa6 hul-a 48. ansze-edin-na na-ab-sa10-sa10 u4-da-be2-esz [...]-e-zal 49. geme2-zu-ur2 gesz3 na-an-du3 zu ur2 szu-mu-ri-in-sa4 50. asz2 a2 zi na-ab-bala-e szu-usz im-szi-ni10-ni10 51. a szu nu-gid2-i na-an-e11-de3 a2 sig szu-mu-e-ra-gal2 52. mah-bi nig2 gid2-i x ba-an-szub-be2 nig2-e ba?-an-szub-be2 53. ur5 tuku na-an-bad-e lu2-bi sza-ba-e-x-x-kur2 54. sun7-na-da e2 na-an-da-ga2-ga2-an 55. gi4-in-sze3 du-de3 szi-me-szi-ib-szub-szub 56. ki-tusz lu2-ka na-ab-ta-bala-e-de3 57. szi-du-un szi-du-un szi-me-szi-ib2-be2-e-ne 58. gi-sig-ga {gesz}kiri6-ka da-ga nam-bi2-du8-e-en 59. sug6-ga-ab sug6-ga-ab szi-me-szi-ib2-be2-ne 60. ur nam-mu-un-gu7-en du14 nam-ur3-ur3-re-en 61. dumu-mu nam-silig nam-mu-ak-en lu2 ki nam-us2-e-en 62. dumu lu2-ra gesz3 a2 zi na-an-ne-en kisal-e bi2-zu-zu 63. a2-tuku na-an-bad-e-en bad3-szul-hi na-an-gul-e-en 64. gurusz na-an-bad-e-en iri-sze3 na-an-gur-re-en 65. lu2 inim sig-ga-ke4 igi {gesz}bala-gin7 szi-NU-NU 66. igi-a nam-ba-e-gub-gub-bu-de3-en sza3-ge na-mu-un-kur2-kur2 67. lu2-lul-la-gin7 e2 kasz-ka ka nam-tar-tar-re 68. ki nam-nita-ka um-me-te szu na-an-gu4-gu4-de3 69. ur-sag dili na-nam dili-ni lu2 szar2-ra-am3 70. {d}utu dili na-nam dili-ni lu2 szar2-ra-am3 71. ur-sag-da gub-bu-de3 zi-zu he2-en-da-gal2 72. {d}utu-da gub-bu-de3 zi-zu he2-en-da-gal2 73. szuruppak{ki}-e dumu-ni-ra na sze3-mu-un-ni-in-de5 74. szuruppak{ki} dumu ubara-tu-tu-ke4 75. zi-u4-su3-ra2 dumu-ni-ra na sze3-mu-un-ni-in-de5 76. 2(disz)-kam-ma-sze3 szuruppak{ki}-e dumu-ni-ra na na-mu-un-de5-de5 77. szuruppak{ki} dumu ubara-tu-tu-ke4 78. zi-u4-su3-ra2 dumu-ni-ra na na-mu-un-de5-de5 79. dumu-mu na ga-de5 na-de5-mu he2-dab5 80. zi-u4-su3-ra2 inim ga-ra-ab-du11 gizzal he2-em-szi-ak 81. na-de5-ga-mu szu nam-bi2-bar-re-en 82. inim du11-ga-ga2 na-ab-ta-bala-e-de3-en 82a. na-de5 ab-ba nig2 kal-la-am3 gu2-zu he2-em-szi-gal2 83. ka kasz nag-a [...] x-kam 84. lu2-tur-mu [...] lu2 x [...] 85. ka kasz nag-a [...] x 86. {d}nin-ka-si [...] 87. [...] KA x ur3 he2-x IM 88. [...]-ur3-ur3-re 89. [...] x a mu-un-ni-ib2-il2-il2 90. [...] x im-sar-re 91. KA x sag im-ta-ab-gur4-gur4-re 92. lu2 ni2-za-ke4 nu-e-szi-su-su 93. gesz-gi masz2 u2 na-nam sza3-bi inim sig-ga-am3 94. e2-gal i7 mah-am3 sza3-bi gu4 du7-du7-dam 95. nig2 ku4-ku4 nig2 sa2 nu-di-dam 96. nig2 e3 nig2 nu-silig-ge-dam 97. ninda lu2-ka ga-ra-ab-szum2-bi ku-nu-a 98. szum2-mu-da-bi an ba9-ra2-am3 99. ga-ra-ab-szum2-bi lu2-ra ga-ni-in-us2 100. nu-ra-ab-szum2-mu ninda igi-bi-sze3 til-la-am3 101. nig2-u2-rum nig2 a2 se3-ga-a-da 102. lu2-tur-mu nig2 nu-mu-un-da-sa2 103. ka sa6-sa6-ge inim i3-szid-e 104. ka du3-du3-e kiszib3 i3-il2-il2 105. ka lal3-e u2-lal3 e-bur12-re 106. ka tuku {kusz}lu-ub2-a-ni sa2 im-du11 107. gal-gal di {kusz}lu-ub2 sug4-ga sza-mu-un-de6 108. silim du11 ka sug4-ga sza-ba-ni-ib-gar 109. kusz du3-du3-e kusz-ni sze3-ba-e-du3-e 110. usu-tuku szu lu2-ta sza-ba-ra-an-tum3 111. {lu2}lil-e nig2 u2-gu i3-ib-de2-e 112. u3?-sa2 {lu2}lil-e nig2 u2-gu i3-de2-e 113. na-an-kesz2-kesz2-re-de3 giri17 szu am3-mi-in-gal2 114. ga-ti-la giri17 szu am3-mi-in-gal2 115. sag-du nu-tuku nam szi-ib-tar-re 116. tesz2 nu-tuku lu2 ur2-sze3 mu-un-de2-e 117. ge26-e na-nam u6-e ba-gub 118. dam dim3-e nam? tar-re ba-dab5-dab5 119. lu2 hun-ga2-zu {kusz}lu-ub2 szi-me-da-ba-e 120. {kusz}lu-ub2 szi-ma-da-gu7-e 121. {kusz}lu-ub2 szi-me-da-til-e 122. ga2-la szi-me-da-dag-ge 123. ga-ba-ra-gu7 e2-gal-la ba-gub 124. dumu-nita-zu e2-zu-sze3 im-me 125. dumu-munus-zu ama5-ni-sze3 im-me 126. kasz nag-a-zu-ne di na-an-ne-e 127. e2-ta e3 sza3-zu na-an-gu7-e 128. an su3-u4-dam ki kal-kal-la-am3 129. an-da nig2 im-da-lu-lu-un 130. kur-kur-re zi szi-im-da-pa-an-pa 131. u4 buru14-sze3 u4 kal-kal-la-sze3 132. geme2-gin7 de5-ga-ab egir2-gin7 gu7-a 133. dumu-mu geme2-gin7 ri egir2-gin7 gu7-a ur5 he2-en-na-nam-ma-am3 134. asz2 du11-du11-ge bar szi-in-dar 135. igi-tum3 la2 sag gesz im-ra-ra 136. gu3 mur-re lu2-lul-e tug2 szi-bir7-bir7-e 137. asz2 di nig2-erim2-e na-de5 sze3-il2-il2 138. inim dirig u3-bu-bu-ul-la-am3 u2 lipisz gig-ga-am3 139. MU dar-dar-da ga-mu-e-da-zalag-ge 140. inim szudu3-de3-mu he2-gal2-la-am3 141. a-ra-zu a sedx(KAD3)-da sza3-ge im-sedx(KAD3)-e 142. asz2 di? na-ga2-ah di-da gizzal kalam-ma-ke4 143. szuruppak{ki}-e dumu-ni-ra na sze3-mu-ni-in-de5 144. szuruppak{ki} dumu ubara-tu-tu-ke4 145. zi-u4-su3-ra2 dumu-ni-ra na sze-mu-ni-in-de5 146. 3(disz)-kam-ma-sze3 szuruppak{ki} dumu-ni-ra na na-mu-un-de5-de5 147. szuruppak{ki} dumu ubara-tu-tu-ke4 148. zi-u4-su3-ra na sze3-mu-ni-in-de5 149. dumu-mu na ga-de5 na-de5-mu he2-dab5 150. zi-u4-su3-ra2 inim ga-ra-ab-du11 gizzal he2-em-szi-ak 151. na-de5-ga-mu nam-bi2-bar-re 152. inim du11-ga-mu na-ab-ta-bala-e-de3 152a. na-de5 ab-ba nig2 kal-la-am3 gu2-zu he2-em-szi-ak 153. dumu engar-ra-ra nig2 nam-mu-ra-ra-an e pa5-zu sze3-em-ra 154. kar-ke4 na-an-sa10-sa10-an ka u4-sar-ra-kam 155. ama-a-tu na-an-sa10-sa10-an u2 lipisz gig-ga-am3 156. dumu-gi7 na-an-sa10-sa10-an za3 e2-gar8-e us2-sa-am3 157. geme2 e2-gal-la na-an-sa10-sa10-an giri3 dur2-bi-sze3 gal2-gal2-la-am3 158. sag kur-ra kur-bi-ta um-ta-a-e11 159. lu2 ki nu-zu-a-ni-ta u3-mu-e-de6 160. dumu-mu ki {d}utu e3-a-asz 161. a hu-mu-ra-an-de2-e igi-zu-sze3 he2-du 162. e2 nu-tuku e2-a-ni-sze3 la-ba-du 163. iri nu-tuku iri-ni-sze3 la-ba-du 163a. {gesz}ig x [...] szu la?-ba-an-da-us2-sa 163b. x x x-sze3 la-ba-an-da-ku4-ku4 164. la-ba-e-da-hi-li-e la-ba-e-da-sun7-e 165. dumu-mu ki {d}utu e3-a-asz 166. dili-zu-ne kaskal na-an-ni-du-un 167. lu2 zu-a-zu sag szu UD ba-ra-ak-ke4 168. mu mu-a se3-ga sag-du lu2-u3-ra im-ma?-x-e 169. kur-ra kur na-an-na-dub-be2 170. nam-tar pesz10 dur5-ra-am3 171. lu2-da giri3-ni im-ma-da-an-ze2-er 172. szesz-gal a-a na-nam nin9 gal ama na-nam 173. szesz-gal-zu-ur2 gizzal he2-em-szi-ak 174. nin9 gal ama-zu-gin7 gu2 he2-em-szi-gal2 175. za-e igi-zu-ta kin na-an-ak-e 176. ka-zu-ta nig2-nam nu-lu-lu-un 177. ga2-la dag-ge e2 dur2-bi-sze3 mu-un-gen 178. ninda-e lu2 kur-ra bi2-in-e11-de3 179. lu2-lul lu2 bar-ra bi2-in-tum2-mu 180. ninda-e lu2 kur-ta im-ma-da-ra-an-e11-de3 181. uru2 tur-re lugal-bi-ir amar szi-in-ga-an-u3-tu 182. uru2 mah-e e2 du3-a szi-hur-re 183. [...] x-ke4 a2 szu im-du7-du7 184. lu2 nig2-tuku lu2 nig2 nu-tuku gig sze3-em-gar 185. lu2 dam tuku a2 szu im-du7-du7 186. dam nu-un-tuku sze-er-tab-ba mu-un-nu2 187. e2 gul-gul-lu-de3 e2 sza-ba-da-an-gul-e 188. lu2 zi-zi-i-de3 lu2 sza-ba-da-an-zi-zi-i 189. gu4 mah-a gu2-bi lu2 a-ba-an-dab5 190. lu2 i7-da ba-ra-an-bala-e 191. lu2 gu-la iri-za-ka za3-ba u3-ba-e-zal-ta 192. dumu-mu za-a ur5-re he2-em-me-re-a-e11-de3 193. geme2-zu hur?-sag-ta szi-im-ta-an-tum3 sa6 szi-im-ta-an-de6 194. hul szi-in-ga-am3-ta-an-tum3 195. sa6-ga szu-am3 hul sza3 an-ga-am3 196. sa6-ga sza3-ge szu nu-bar-re 197. hul sza3-ge szu nu-di-ni-bar-re 198. sa6-ga ki dur5-ru-am3 sza3-ge nu-da13-da13 199. hul e2 nig2-gur11-ra ur5-e la-ba-an-gu7-e 199a. mu-un-sa6 mu-un-sa6 199b. ka-ni mu-un-tag-tag 200. hul-da i7-da ma2? he2-en-da-su 201. an-edin-na {kusz}ummu he2-en-da-dar 202. sza3 ki ag2 nig2 e2 du3-du3-u3-dam 203. sza3 hul gig nig2 e2 gul-gul-lu-dam 204. nir-gal2-e nig2-tuku gaba-gal2 me nam-nun-na 205. nir-gal2-ra gu2 he2-en-ne-ni-gal2 206. a2-tuku ni2-zu he2-en-ne-szi-la2 207. dumu-mu lu2 hul-gal2-ra he2-en-ne-szi-gal2-le 208. ezem-ma-ka dam na-an-tuku-tuku-e 209. sza3-ga hun-ga2-am3 bar-ra hun-ga2-am3 210. ku3 hun-ga2-am3 za-gin3 hun-ga2-am3 211. tug2? hun-ga2-am3 gada? hun-ga2-am3 212. [...] nu-mu-un-da-sa2 213. gu4 [...] na-an-ni-sa10-sa10 214. gu4 lul-la na-sa10-sa10 e2 tur3 buru3 x x [...] 215. munus zi e2 zi-sze3 lu2 szi-in-gar 216. u4 buru14-ka ansze na-an-sa10-sa10 217. ansze la gu7 ansze-da im-[...] 218. ansze lul-la gu2-tar im-la2 219. dumu-mu lu2-lul-e za3-si mu-un-sa6-sa6 220. munus bar-szu-gal2-e e2 dur2-bi-sze3 mu-un-gen 221. kurun nag-nag-e buru14 im-su-su-su 222. {sal}szu-ku6 {gesz}kun5 lu2 2(disz)-e da nu-DI 223. e2-a nim-gin7 mi-ni-ib-dal-dal-en 224. eme3 sila-a inim i3-szid-e 225. |SAL.SZUL| sila-a dumu-ni-ra ga mu-ni-ib-gu7-e 226. munus giri17 hur ak szeg11 gi4-gi4-dam 227. {gesz}bala hur-ra szu-na na-mu-un-gal2 228. e2-e2-a i-in-ku4-ku4-ku4 229. e-sir2-e-sir2-ra gu2 mu-un-gi-gi-de3 230. da ur3-ra im-me im-me e3-ab 231. bad3-si-bad3-si-a igi mu-szi-x-il2-il2?-e 232. ki du14-de3 gal2-la-sze3 zi im-x-pa?-pa-an-e? 233. ki mu-szub-ba a2-za x x x IM x 234. zi x gi4 ESZ mu-un-ne?-pa3 im-mi-ni-du11 235. x x-ke4 sza3 hul gig tuku-tuku 236. dumu-mu [...] gum2-gamx(LUM) mi-ni-ib-za 237. [...] A x x IN TAR 238. [...] x x [...] tum3 239. [...] nu2 240. [...] DU 241. sza3 hul2-la i-im-dirig-ge [...] 242. nig2-nam nu-kal zi ku7-ku7-da 243. nig2 nam-kal-kal-en nig2-e me-kal-kal 244. dumu-mu gun3-gun3-gin7 igi gun3-gun3 245. {d}ezina2-ra na-an-kesz2-kesz2-re-de3-en {gesz}a2-bi i3-szar2 246. kir11-e asz2 nam-en dumu-munus in-u3-tu-un 247. {gesz}mi-si-ISZ-a lag nam-bi2-szub-be2-en dumu-nita in-u3-tu-un 248. dam nam-mu-un-kar-re-en gu3 KA na-an-ga2-ga2 249. ki dam kar-re nam-silig gum-ga2-am3 250. a giri3 a gu2 nigin2-na ga-am3-me-re7-de3-en 251. lu2 gu-la a2 1(disz)-e ga-na-gam-me-en-de3 252. galam-ma na-an-ug5-ge-en dumu in-sug4-ge tu-da 253. en-ra BAD-a-gin7 {d}nanna-ug5-ge-en szu na-an-du3-du3-en 254. emeda-ga-la2 ama5-a-ke4 lugal-bi-ir nam szi-im-mi-ib-tar-re 255. ama-zu-ur2 inim dirig nam-ba-na-ab-be2-en hul sza-ba-ra-gig-ga-am3 256. inim ama-za inim dingir-za ka-sze3 nam-bi2-ib-dib2-be2-en 257. ama {d}utu-am3 lu2 mu-un-u3-tu 258. ab-ba dingir-ra-am3 x mu-un-dadag-ge 259. ab-ba dingir-am3 inim-ma-ni zi-da 260. na-de5 ab-ba-sze3 gizzal he2-em-szi-ia-ak 261. e2 iri bar-ra-ke4 iri sza3-ga szi-du3-du3-e 262. dumu-mu GAN2 e dur2-bi-sze3 gal2-la 263. al-duru5 szukur2-ra-am3 al-had2 szukur2-ra-am3 264. nig2 u2-gu de2-a nig2-me-gar-ra 265. {uruda?}gin2 dilmun{ki}-na sa10-sze3 TE-ga 266a. ur nu-zu hul-am3 lu2 nu-zu husz-am3 266b. ki nu-zu husz-am3 ur nu-zu tesz2-am3 267. kaskal nu-zu gaba kur-ra-ka 268. dingir kur-ra lu2 gu7-gu7-u3-me-esz 269. e2 lu2-gin7 nu-du3 iri lu2-gin7 nu-du3 270. ki-zu-a lu2-ka lu2 sza-ba-ra-an-e3-de3 271. sipa-ra kin-kin mu-na-til udu gi4-gi4 mu-na-til 272. engar-ra a-sza3 ur11-ru mu-na-til 273a. [...] x gi4 mu-na-KU-en? 273b. [...] la [...] u2 de5-ge [...] 274. kadra inim-ma-bi nig2 sza3 ten-na mu?-[...] 275. e2-gal-la ku4-ra-bi nig2 sza3 ten-na [...] 276. kadra inim-inim-ma mul [...] 277. na-de5 szuruppak{ki} dumu ubara-tu-tu-ke4 na-de5-ga 278. szuruppak{ki} dumu ubara-tu-tu-ke4 na-de5-ga 279. nin dub gal-gal-la szu du7-a 280. ki-sikil {d}nisaba za3-mi2 Version History |