Witness
Witness to composite(s): Q005399
Primary Publication: Weiershäuser, Frauke; Novotny, Jamie (2020) RINBE 2 Nabonidus 02, ex. 04
Collection: National Museum of Iraq, Baghdad, Iraq
Museum no.: IM 095926
Provenience: Babylon (mod. Bābil)
Period: Neo-Babylonian (ca. 626-539 BC)
Object Type: cylinder
Material: clay
Date: Nabonidus.00.00.00
Transliteration:
atf: lang akk
object cylinder
surface a
column 1
1. a-na {d}isz-tar szu-ur2-bu-tum ru-um-ti i3-li2 qa2-ri-it-ti
2. {d}in-nin i-la-at ta-am-ha-ri
3. e-pi2-sza-at tu-qu-un-tim
4. na-mi-ir-ti be-le-et da-ad-mi sza-qu-tu2 i-gi4-gi4
5. ru-ba-a-ti3 {d}a-nun-na-ki na-sza2-at pu-lu-uh2-tim
6. be-el-tim sza me2-lam-mu-sza2 sza-mu-u2 ka-at-mu
7. nam-ri-ru-sza2 er-s,e-tim ra-pa-asz-tim sa-ah-pu
8. ka-szi-da-at a-a-bi mu-hal-li-qa-at za-ma-nu
9. {d}inanna a-ka3-de3{ki} be-let ta-ha-zi
10. sza-ki-na-at s,u-la-a-ti a-szi-ba-at e2-masz2-da-ri
11. sza qe2-re-eb babila2{ki} _gaszan_-ia
12. {d}na-bi-um-na-'i-id _lugal_ babilax(|TIN.TIR|){ki}
13. ti#-ri-is, qa-at {d}tu-tu a3-asz2-ri ka-an-szu pa-li-ih _dingir gal-gal_
14. re-e2-a-am za-ni-nu sza a-na t,e3-e-mi i3-li2 pu-tuq-qu
15. _szagina_ sza-ah-t,u2 mu-ur-te-ed-du-u2 u2-si {d}isz-tar
16. mu-t,ah-hi-id sa-at-tu-uk-ku mu-szar-ri-ih ni-id-be2-e
17. sza ud-da-kam isz-te-ne2-e'-u3 du-mu-uq ma-ha-zi i3-li2
18. i-na e2-sag-il2 _e2-gal_ i3-li2 szu-tu-ru zi-in-na-a-ti
19. i-gi-sa-a szu-ur-ru-hu u2-sze-re-bu qe2-re-eb-szu
20. a-na esz-re-e-ti i3-li2 ka-la-szi-na sa-ad-ru szu-ul-ma-nu
column 2
1. _dumu_ {d}na-bi-um-ba-la-at-su-iq-bi ru-ba-a e-em-qu-ma <a-na-ku>
2. i-nu-szu e2-masz2-da-ri _e2_ {d}inanna a-ka3-de3{ki} sza qe2-re-eb babila2{ki}
3. sza usz-szu-szu in-<na>-mu-u2 i-mu-u2 kar-mi-isz
4. a-szar-szu szu!(LA) ud-du-u2 la ba-asz2-mu sa-gu-szu
5. na-du-u2 si-ma-ak-ki-szu na-par-ku-u2 qu2-ut-re-nu
6. e-pe2-esz _e2_ sza-a-ti li-ib-bi i-ta-mi-ma
7. ka-ba-at-ti ha-asz2-ha-tusz
8. a-szar _e2_ szu-a-tim asz-te-'e-e-ma a-hi-it, te-me-en-szu
9. i-szi-id-su ab-re-e-ma u2-ki-in li-ib-na-at-szu
10. e2-masz2-da-ri in qe2-re-eb <babila2{ki>} e-esz-szi-isz e-pu2-usz
11. usz-szu-szu usz-te-szi-ir u2-ki-in te-em-me-en-szu
12. a-na szu-a-tim {d}inanna a-ka3-de3{ki}
13. i-la-at ta-am-ha-ri
14. _e2_ szu-a-ti szu-ba-at na-ar-mi-ki
15. ha-di!(MI)-isz na-ap-li-si-ma qi2-bi-i ba-la-t,a4
16. sza ur-ri-ku u4-mi-ia szu-um-u2-du sza-na-ti-ia
17. ma-ha-ar {d}marduk _lugal_ i3-li2 tam-mi-i ud-da-kam
18. a-szar qab-lu u3 ta-ha-zi i-da-a-a al-ki
19. lu-na-ar a-a-bi-ia
20. lu-sza-am-qi2-it na-ki-ri-ia
Total 1 record(s)
