Composite
Composite No.: Q005426
Primary Publication: Weiershäuser, Frauke; Novotny, Jamie (2020) RINBE 2 Nabonidus 29 composite
Collection: —
Museum no.: —
Provenience: Sippar-Yahrurum (mod. Tell Abu Habbah)
Period: Neo-Babylonian (ca. 626-539 BC)
Object Type: —
Material: —
Date: Nabonidus.00.00.00
Transliteration:
atf: lang akk
object composite text
surface a
beginning broken
1'. szu-ba-at t,u-ub lib3-bi-szu ra-mu-u2 qe2-reb-szu?
2'. e-li _iri_ u3 _e2_ sza2-a-szu lib3-bu-usz i-zu-uz-ma
3'. _{lu2}erin2_-man-da u2-szat-ba-am-ma _e2_ szu-a-tim ub-bi-it-ma
4'. u2-sza-lik-szu kar-mu-tu i-na pa-le-e-a ki-i-nim
5'. {d}suen _en gal_-u2 i-na na-ra-am _lugal_-ti-ia
6'. a-na _iri_ u3 _e2_ sza2-a-szu is-li-mu ir-szu-u2 ta-a-a-ri
7'. i-na re-esz _lugal_-u2-ti-ia da-ri2-ti u2-szab-ru-'i-in-ni szu-ut-ti
n lines broken
8'. [...] x x x
9'. _{lu2}erin2_-man-da sa-hi-ir-szum-ma pu-ug-gu-lu e-mu-qa-a-szu
10'. {d}marduk-ma i-ta-ma-a it-ti-ia um-man-ma-an-du
11'. sza2 taq-bu-u2 sza-a-szu _kur_-szu u3 _lugal-mesz_ a-lik i-di-szu ul i-ba-asz2-szi
12'. i-na sza-lu-ul-ti _mu-an-na_ i-na ka-sza2-du u2-szat-bu-nisz-szum-ma
13'. {disz}ku-ra-asz2 _lugal_ {kur}an-za-an _ARAD_-su s,a-ah-ri
14'. i-na um-ma-ni-szu i-s,u-tu um-man-ma-an-du rap-sza2-a-ti u2-sap-pi-ih
15'. {disz}isz-tu-me-gu _lugal_ um-man-ma-an-du is,-bat-ma ka-mu-ut-su a-na _kur_-szu il-qe2
16'. a-mat {d}en _gal_-u2 {d}marduk u3 {d}suen na-an-na-ri _an_-e u3 _ki_-tim
17'. sza2 qi2-bi-it-su-nu la in-nen-nu-u2 a-na qi2-bi-ti-szu2-nu s,ir-ti
18'. ap-la-ah ak-ku-ud na-qut-ti ar-sze-e-ma
19'. dul-lu-hu pa-nu-u2-a la e-gi la a-sze-et a-ha la ad-du u2-szat-ba-am-ma
20'. um-ma-ni-ia rap-sza2-a-ti ul-tu {kur}ha-az-za-ti
21'. pa-at, {kur}mi-s,ir tam-tim e-li-ti a-bar-tu4 {i7}buranun{ki}
22'. a-di tam-tim szap-li-ti _lugal-mesz ug3-mesz szagina-mesz_
23'. u3 um-ma-ni-ia rap-sza2-a-ti sza {d}suen {d}utu u3 {d}isz-tar
24'. _en-mesz_-e-a ia-ti i-qi2-pu-nu a-na e-pe-szu e2-hul2-hul2
25'. _e2_ {d}suen _en_-ia a-lik i-di-ia sza2 qe2-re-eb {iri}har-ra-nu
26'. sza2 {disz}an-szar2-ba-an-ibila _lugal kur_ asz-szur{ki} _dumu_ {disz}an-szar2-szesz-mu _lugal kur_ asz-szur{ki}
27'. _nun_ a-lik mah-ri-ia i-pu2-szu i-na _iti_ sza2-al-mu i-na u4-mu sze-mi-i
28'. sza2 i-na bi-ri u2-ad-du-ni {d}utu u3 {d}iszkur
29'. i-na ne2-me-qu {d}e2-a u3 {d}asal-lu2-hi i-na ka-ku3-gal2-u2-tu
30'. i-na szi-ip-ri {d}kulla _en_ usz-szu u3 _sig4-hi-a_
31'. i-na _ku3-babbar ku3-sig17 na4_ ni-siq-ti szu-qu-ru-tu hi-bisz-ti _{gesz}tir_
32'. _szim-hi-a {gesz}erin_ i-na hi-da-a-ti u3 ri-sza2-a-ti
33'. e-li te-me-en-na sza2 {disz}an-szar2-ba-an-ibila _lugal kur_ asz-szur{ki}
34'. sza te-me-en-na {disz}szul-ma-an-a-sza2-red _dumu_ {disz}an-szar2-na-s,ir-ibila
35'. i-mu-ru usz-szu-szu ad-di-ma u2-kin lib-na-at-su
36'. i-na _kasz gesztin i3-gesz lal3_ szal-la-ar-szu am-ha-as,-ma
37'. ab-lu-ul ta-ra-ah-hu-usz e-li sza2 _lugal_ ab-be2-e-a
38'. ep2-sze-ti-szu u2-dan-nin-ma u2-na-ak-ki-lu szi-pi2-ir-szu
39'. _e2-kur_ szu-a-tim ul-tu te-me-en-ni-szu a-di gaba-dab-bi-szu
40'. e-esz-szi-isz ab-ni-ma u2-szak-lil szi-pi2-ir-szu
41'. _gesz-ur3 {gesz}erin_ s,i-ru-tu ta-ar-bi-it {iri}ha-ma-nu
42'. u2-sza-at-ri-is, s,e-ru-usz-szu _{gesz}ig-mesz {gesz}erin_
43'. sza i-ri-is-si-na t,a-a-bi u2-ra-at-ta-a i-na _ka2-mesz_-szu
44'. _ku3-babbar_ u3 _ku3-sig17 e2-gar8-mesz_-szu u2-sza-al-bi-isz-ma
45'. u2-sza-an-bi-it, sza-asz-sza-ni-isz
46'. ri-i-mu za-ha-le-e eb-bi mu-nak-kip ga-ri-ia
47'. ka-ad-ri-isz usz-zi-iz i-na at-ma-ni-szu
48'. 2(disz) {d}lah3-mu esz-ma-ru-u2 sa-pi-in a-a-bi-ia
49'. i-na _ka2_ s,i-it {d}utu-szi _za3_ u3 _gub3_ u2-szar-szi-id
50'. qa2-at {d}suen {d}nin-gal {d}nusku u3 {d}sa-dar3-nun-na
51'. _en-mesz_-e-a ul-tu szu-an-na{ki} _iri lugal_-u2-ti-ia
52'. as,-ba-at-ma i-na hi-da-a-ti u3 ri-sza2-a-ti
53'. szu-ba-at t,u-ub lib3-bi qe2-er-ba-szu u2-sze-szi-ib
54'. _{udu}siskur2_ tasz-ri-ih-ti eb-bi ma-har-szu-nu aq-qi2-ma
55'. u2-sza2-am-hi-ir kad-ra-a-a e2-hul2-hul2 re-esz-ti u2-mal2-li-ma
56'. {iri}har-ra-nu a-na pa-at, gi-im-ri-szu
57'. ki-ma s,e-et _iti_ u2-nam-mi-ir sza-ru-ru-szu
58'. {d}suen _lugal dingir-mesz_ sza2 _an_-e u3 _ki_-tim sza2 ul-la-nu-usz-szu
59'. _iri_ u3 _kur_ la in-nam-du-u2 la i-tur-ru asz2-ru-usz-szu
60'. x x x
61'. _saga-mesz iri_ u3 _e2_ sza2-a-szu x x x [...]
62'. _dingir-mesz_ a-szi-bu-tu sza2 _an_-e u3 _ki_-tim
63'. li-ik-ta-ra-bu _e2 {d}suen_ a-bi ba-ni-szu-un
64'. ia-a-ti {d}na3-ni2-tuku _lugal_ babilax(|TIN.TIR|){ki} mu-szak-lil _e2_ szu-a-tim
65'. {d}suen _lugal dingir-mesz_ sza2 _an_-e u3 _ki_-tim i-na ni-isz i-ni-szu _saga-mesz_
66'. ha-di-isz lip-pal-sa-an-ni-ma ar2-hi-sza2-am-ma i-na ni-ip-hi u3 ri-ba
67'. li-dam-mi-iq it-ta-tu-u2-a _u4-mesz_-ia li-sza2-ri-ik
68'. _mu-an-na-mesz_-ia li-sza2-an-di-il li-ki-in pa-lu-u2-a
69'. na-ak-ru-ti-ia lik-szu-ud za-ma-ni-ia li-sza2-am-qi2-it
70'. li-is-pu-un ga-ri-ia {d}nin-gal _ama dingir gal-gal_
71'. i-na ma-har {d}suen na-ar-mi-szu li-iq-ba-a ba-ni-ti
72'. {d}utu u3 {d}isz-tar s,i-it lib3-bi-szu2 na-am-ra
73'. a-na {d}suen a-bi ba-ni-szu-un li-iq-bu-u2 _saga_-ti3
74'. {d}nusku su-uk-kal-lum s,i-i-ri su-pe-e-a li-isz-me-e-ma
75'. li-is,-ba-at a-bu-tu mu-sa-ru-u2 szi-t,i-ir szu-um
76'. sza {disz}an-szar2-ba-an-ibila _lugal kur_ asz-szur{ki} a-mu-ur-ma
77'. la u2-nak-ki-ir _i3-gesz_ ap-szu-usz _{udu}siskur2_ aq-qi2
78'. it-ti mu-sa-re-e-a asz2-ku-un-ma u2-te-er asz2-ru-usz-szu
79'. a-na {d}utu da-a-a-nu sza2 _an_-e u3 _ki_-tim e2-babbar-ra _e2_-su
80'. sza2 qe2-re-eb zimbir{ki} sza2 {disz}{d}na3-nig2-gub-uru3 _lugal_ mah-ri i-pu-szu-ma
81'. te-me-en-szu la-bi-ri u2-ba-'u-u2-ma la i-mu-ru
82'. _e2_ szu-a-tim i-pu-usz-ma i-na 4(u) 5(disz) _mu-an-na-mesz_
83'. sza _e2_ szu-a-tim i-qu-pu i-ga-ru-szu ak-ku-ud asz2-hu-ut
84'. na-qu2-ut-ti ar-sze-e-ma dul-lu-hu pa-nu-u2-a
85'. a-di {d}utu ul-tu qe2-re-bi-szu u2-sze-s,u-u2
86'. u2-sze-szi-bu i-na _e2_ sza-nim-ma
87'. _e2_ szu-a-tim ad-ke-e-ma te-me-en-szu la-bi-ri
88'. u2-ba-'i-ma _1(u) 8(disz) kusz3_ qaq-qa-ri u2-szap-pil-ma
89'. te-me-en-na {disz}na-ra-am-{d}suen _dumu_ {disz}lugal-gi-na
90'. sza _3(disz) lim 2(disz) me mu-an-na-mesz_ ma-na-ma _lugal_ a-lik mah-ri-ia
91'. la i-mu-ru {d}utu _en gal_-u2 e2-babbar-ra _e2_ szu-bat t,u-ub lib3-bi-szu
92'. u2-kal-lim-an-ni ia-a-szi i-na {iti}du6_ i-na _iti_ szal-mu i-na _u4 sze-ga_
93'. sza i-na bi-ri u2-ad-du-ni {d}utu u3 {d}iszkur
94'. i-na _ku3-babbar ku3-sig17 na4_ ni-siq-ti szu-qu-ru-tu hi-bisz-ti _{gesz}tir_
95'. _szim-hi-a {gesz}erin_ i-na hi-da-a-ti u3 ri-sza2-a-ti
96'. e-li te-me-en-na {disz}na-ra-am-{d}suen _dumu_ {disz}lugal-gi-na
97'. _szu-si_ la a-s,e-e _szu-si_ la e-re-bi u2-ki-in lib-na-at-su
98'. 5(disz) _lim {gesz}erin_ dan-nu-tu a-na s,u-lu-li-szu2 u2-szat-ri-is,
99'. x x x x _{gesz}erin_ s,i-ra-a-ti as-kup-pu u3 nu-ku-sze-e
100'. i-na _ka2-ka2_-szu u2-ra-at-ti
101'. e2-babbar-ra a-di e2-kun4-an-ku3-ga ziq-qur-ra-ti-szu2
102'. esz-szi-isz e-pu-usz-ma u2-szak-lil szi-pi2-ir-szu
103'. qa-at {d}utu _en_-ia as,-bat-ma i-na hi-da-a-ti u3 ri-sza2-a-ti
104'. szu-ba-at t,u-ub lib3-bi qe2-er-ba-szu u2-sze-szi-ib
105'. szi-t,i-ir szu-um sza2 {disz}na-ra-am-{d}sin _dumu_ {disz}lugal-gi-na a-mu-ur-ma
106'. la u2-nak-ki-ir _i3-gesz_ ap-szu-usz _{udu}siskur2_ aq-qi2
107'. it-ti mu-sa-re-e-a asz2-ku-un-ma u2-te-er asz2-ru-usz-szu
108'. {d}utu _en gal_ sza2 _an_-e u3 _ki_-tim nu-u2-ur2 _dingir-mesz_ ab-be2-e-szu
109'. s,i-it lib3-bi sza {d}suen u3 {d}nin-gal
110'. a-na e2-babbar-ra _e2_ na-ra-mi-ka i-na e-re-bi-ka
111'. _bara2_-ka da-ru-u2 i-na ra-me2-e-ka ia-ti {d}na3-ni2-tuku _lugal_ babilax(|TIN.TIR|){ki}
112'. _nun_ za-nin-ka mu-t,i-ib lib3-bi-ka e-pi2-isz ku-um-mi-ka s,i-i-ri
113'. e-ep-sze-tu-u2-a dam-qa-a-ti ha-di-isz na-ap-li-is-ma
114'. u4-mi-sza-am i-na ni-ip-hu u3 ri-bi i-na sza2-ma-mi u3 qaq-qa-ri
115'. du-um-mi-iq it-ta-tu-u2-a
116'. un-nin-ni-ia le-qe2-e-ma mu-gu-ur ta-as,-li-ti
117'. _{gesz}nig2-gidri_ u3 szi-bir-ri ki-i-nim sza2 tu-szat-mi-hu qa-tu-u2-a
118'. lu-be2-el a-na du-ur da-a-ri
119'. a-na {d}inanna a-ka3-de3{ki} be-let _dingir-dingir_ x x x x x
120'. be-let ta-ha-za mu-szal-li?-ma?-at? qi2-bi-it {d}en-lil2 a-bi-szu
121'. sa-pi-na-at na-ak-ru mu-hal-li-qa-at ra-ag-gu
122'. a-li-ka-at mah-ri sza _dingir-mesz_ sza2 i-na x x x x x
123'. x x x x x x x x x
124'. x x x x x x i li x x x x
125'. x x x x x x x x x x
126'. x x x x x x x x x x
127'. te-me-en-szu la-bi2-ri x x x x x x x x
128'. x x x x te-me-en-na {disz}na-ra-am-{d}suen x
129'. te-me-en-szu la-bi-ri da-ri2-a a-mu-ur-ma
130'. _szu-si_ la a-s,e-e _szu-si_ la e-re-bi
131'. e-li te-me-en-na sza-a-szu usz?-x x x x x
132'. _e2_ szu-a-tim e-esz-szi-isz e-x x x x x x x
133'. {d}inanna? a-ka3-de3{ki} _gaszan_ ra-bi-ti _gaszan_ ta-ha-zi
134'. mu-szal-li-ma-at qi2-bi-ti {d}en-lil2 a-bi-szu
135'. sa-pi-na-at na-ak-ru mu-hal-li-qa-at rag-gu?
136'. a-li-ka-at mah-ri sza _dingir-dingir_
137'. u2-szar-ma?-a szu-bat?-su?
138'. sat-tuk-ku u3 nin-da-be2-e e-li sza2 mah-ri
139'. u2-sza2-te-er-ma u2-ki-in ma-har-sza?
140'. at-ta {d}inanna a-ka3-de3{ki} _gaszan_ ra-bi-ti
141'. a-na _e2_ szu-a-tim ha-di-isz i-na e-re-bi-ka
142'. ep2-sze-tu-u2-a _saga-mesz_ ha-di-isz na-ap-li-si-ma
143'. ar2-hi-szam-ma i-na _{d}utu-e3_ u3 _{d}utu-szu2-a_
144'. a-na {d}sin a-bi a-li-di-ka szu-uq-ri-bi _saga_-ti3
145'. {d}a-nu-ni-tum be-el-ti s,ir-tum
146'. u4-mi-szam?-ma i-na mah-ri {d}en-lil2
147'. x x x x x da-mi-iq-ti
148'. man-nu at-ta sza {d}sin u3 {d}utu
149'. a-na _lugal_-u2-tu i-nam-bu-szu-ma
150'. i-na pa-le-e-szu _e2_ szu-a-tim
151'. in-na-hu e-esz-szi-isz ip-pu-szu
152'. mu-sa-ru-u2 szi-t,i-ir szu-mi-ia li-mur-ma
153'. la u2-nak-ka-ar _i3-gesz_ lip-szu-usz _{udu}siskur2_ li-iq-qi2
154'. it-ti mu-sa-re-e szi-t,i-ir szu-mi-szu
155'. li-isz-ku-un-ma lu-te-er asz2-ru-usz-szu
156'. {d}inanna a-ka3-de3{ki} u3 {d}a-nu-ni-tum
157'. su-pu-u2-szu li-isz-mu-u2
158'. li-im-gu-ra qi2-bi-it-su
159'. i-da-a-szu li-il-li-ka
160'. u4-mi-szam-ma a-na {d}sin a-bi ba-ni-szu-un
161'. da-mi-iq-ta-szu li-iq-ba-a'
Total 1 record(s)
